2 A Jehová tzꞌalan icha tic: A in tic tzex in xajanej, palta a exxo tic, tzex tacꞌvi dꞌayin icha tic: ¿Tas val scutej cojtacaneli tato tzon̈ a xajanej? xe chi. Palta a in Jehová in sval dꞌayex icha tic: Vachꞌchom yucꞌtac sbꞌa vin̈aj Esaú yedꞌ vin̈aj Jacob, palta te xajan vilnac vin̈aj Jacob chiꞌ, aton vin̈ e mam eyicham, 3 axo vin̈aj Esaú chiꞌ, maay. A lum tzalquixtac bꞌaj cajan ebꞌ yin̈tilal vin̈aj Esaú chiꞌ, cuseltacxon̈ej ix ajcan lum vuuj, axon̈ej nocꞌ caltacteꞌal nocꞌ ay taꞌ.

4 Qꞌuinaloc a ebꞌ edomita yin̈tilalcan vin̈aj Esaú tzꞌalan icha tic: Vachꞌchom on̈ sateli, palta ol co bꞌoxiqꞌue co chon̈abꞌ tic, ta xchi ebꞌ. Vachꞌchom sbꞌoxiqꞌue ebꞌ, palta a in ol in satxieli. Ol yal ebꞌ anima dꞌa schon̈abꞌ ebꞌ chiꞌ icha tic: A jun nación tic, schon̈abꞌil ebꞌ chuc, ayn̈ejcot yoval scꞌol Jehová dꞌa yibꞌan̈ dꞌa masanil tiempo, xcham ebꞌ. 5 A ex israel ex tic, ol eyil val sicꞌlabꞌil, ol eyalan icha tic: A Jehová, yelxo val te nivan yelcꞌoch dꞌa yolyibꞌan̈qꞌuinal tic, man̈ocn̈ej dꞌa yol co macbꞌen tic, xe chama, xchi Jehová.

6 A Jehová Yajal dꞌa Smasanil tzꞌalan dꞌa ebꞌ sacerdote icha tic: A ebꞌ uninabꞌil, ay yelcꞌoch smam snun ebꞌ dꞌa sat. A ebꞌ checabꞌ, ay pax yelcꞌoch spatrón ebꞌ dꞌa sat. Yuj chiꞌ ex sacerdote, tato mamabꞌil vaj dꞌayex eyalani, ¿tas pax yuj malaj velcꞌoch dꞌayex? Tato yajal vaj dꞌayex eyalani, ¿tas yuj max in e cꞌanabꞌajej? A ex tic tzin e patiquejeli, palta tzato val eyal icha tic: ¿Tas scutej ach co paticaneli? xe chi. 7 Tzeyicꞌcot e silabꞌ man̈ smojoc sjavi dꞌa valtar, tzato val e cꞌanbꞌani: ¿Bꞌajtil tzꞌoch co mul chiꞌ dꞌayach? xe chi. Tzꞌoch e mul chiꞌ, yujto ichato malaj yelcꞌoch valtar dꞌa e sat. 8 ¿Tom vachꞌ tze naꞌa to a nocꞌ nocꞌ ay spaltail tzeyacꞌ dꞌayin silabꞌil, aton nocꞌ malaj yol sat, nocꞌ qꞌuiich yedꞌ nocꞌ penaay? Qꞌuinaloc tzeyicꞌbꞌat juntzan̈ nocꞌ chiꞌ e silabꞌoc dꞌa ebꞌ eyajalil, ¿tom ol ex scha ebꞌ yuj juntzan̈ e silabꞌ chiꞌ tze naꞌa? 9 A ebꞌ anima tzꞌalan dꞌayex icha tic: Ex sacerdote, cꞌanec dꞌa Dios cuuj, yic tzꞌocꞌ scꞌol dꞌayon̈, xchi ebꞌ. Palta a in Jehová Yajal in dꞌa Smasanil sval icha tic: Tato a juntzan̈ nocꞌ ix val tic ol eyacꞌ e silabꞌoc dꞌayin, ¿tocval ol in cha dꞌayex dꞌa tzalajcꞌolal? 10 Comonoc a junoc ex tic tze mac spuertail in templo, yic vachꞌ man̈ nabꞌan̈ejoc scomon och cꞌacꞌ dꞌa valtar. Yujto a in Jehová Yajal in dꞌa Smasanil, max in tzalaj jabꞌoc eyedꞌoc, man̈xo ol in cha eyofrenda chiꞌ. 11 Palta te nivan velcꞌoch dꞌa sat masanil anima dꞌa yolyibꞌan̈qꞌuinal tic. A val tas vachꞌ sn̈ustzꞌa ebꞌ silabꞌil dꞌayin. Syacꞌan yofrenda ebꞌ dꞌayin icha val dꞌa smojalil, yujto nivan velcꞌoch dꞌa yol sat ebꞌ. 12 Palta a exxo tic, malaj jabꞌoc velcꞌoch dꞌa yol e sat. Tzeyalani to malaj yelcꞌoch valtar yedꞌ juntzan̈ silabꞌ tzꞌacꞌji dꞌayin. 13 Tzeyalan icha tic: Tzon̈ tzactzajcꞌoch yedꞌ juntzan̈ tic, xe chi. Tzin e paticaneli. Slajvi chiꞌ tzeyacꞌan juntzan̈ nocꞌ e silabꞌ dꞌayin, aton nocꞌ tzeyelqꞌuej, nocꞌ qꞌuiich yedꞌ nocꞌ penaay. ¿Tom ol in cha juntzan̈ chiꞌ dꞌayex tze naꞌa? 14 A in Rey in, nivan velcꞌochi, xiv masanil chon̈abꞌ dꞌayin, yuj chiꞌ tzin catabꞌej ebꞌ stacꞌvej stiꞌ yacꞌan junoc scalnel malaj spaltail silabꞌil dꞌayin, slajvi chiꞌ sqꞌuexan pax nocꞌ ebꞌ, axo junoc nocꞌ penaay syacꞌ ebꞌ, xchi Jehová Yajal dꞌa Smasanil.