3 Eyuj a ex tic ex sacerdote, yuj chiꞌ ol vacꞌ qꞌuixvelal ebꞌ eyin̈tilal, a nocꞌ tzeyicꞌcot silabꞌil chiꞌ dꞌayin, a stzaꞌ nocꞌ ol in juloch dꞌa e sat. Junn̈ej ol aj ex in julanel yedꞌ stzaꞌ nocꞌ chiꞌ. 4 Icha chiꞌ ol aj snachajel eyuuj to a in Jehová Yajal in dꞌa Smasanil a in svacꞌ jun checnabꞌil tic, yic vachꞌ a in trato vacꞌnaccan yedꞌ ebꞌ yin̈tilal Leví, aton ebꞌ e mam eyicham, ol bꞌeyn̈ejbꞌatoc.

5 A in trato yedꞌ ebꞌ chiꞌ to svacꞌ sqꞌuinal ebꞌ yedꞌ sjuncꞌolal, yic ay velcꞌoch dꞌa yol sat ebꞌ. Ix schꞌoxel ebꞌ to ay velcꞌoch dꞌa yol sat ebꞌ, ix in scꞌanabꞌajan ebꞌ. 6 Yeln̈ej tas ix yal ebꞌ, malaj bꞌaj ix yesej ebꞌ. Vachꞌn̈ej ix ecꞌ ebꞌ vedꞌoc. Jantac ebꞌ ix yiqꞌuelta ebꞌ dꞌa scal chucal. 7 A ex sacerdote ex tic, a eyopisio to tze cꞌaybꞌej ebꞌ anima yic tzin yojtaquejel ebꞌ. Smoj scꞌoch masanil anima dꞌayex, yic syabꞌan scꞌaybꞌubꞌal ebꞌ, yujto a in Jehová Yajal in dꞌa Smasanil, in checabꞌ eyaji.

8 A exxo pax tic, toxo ix in e patiquejeli. Yuj cꞌaybꞌubꞌal ix eyacꞌaꞌ, yuj chiꞌ tzijtum ebꞌ ix juvicaneli. A ex ix eyixtejbꞌat in trato vacꞌnac yedꞌ vin̈ e mam eyicham. 9 Max e cꞌanabꞌajej tas tzin nibꞌej, yujto man̈ lajanoc tzeyutej e chꞌolbꞌitan smasanil anima, yuj chiꞌ sviqꞌuecꞌ snivanil eyelcꞌochi, emnaquil tzex ajcan dꞌa sat masanil anima, xchi Jehová Yajal dꞌa Smasanil.

10 A on̈ tic junn̈ej co Mam, aton Dios bꞌojinac on̈ co masanil. ¿Tas yuj scacꞌlaj musansatil co bꞌa, scacꞌlan chucal dꞌayon̈ junjun on̈, squixtanbꞌat strato Dios yacꞌnac yedꞌ ebꞌ co mam quicham? 11 A ebꞌ vetchon̈abꞌ aj Judá, maj scꞌanabꞌajej ebꞌ bꞌaj ix yacꞌ stiꞌ dꞌa yichan̈ Dios. Te chuclaj tas ix scꞌulej ebꞌ dꞌa Jerusalén yedꞌ dꞌa masanil yol smacbꞌen Israel. Ix yixtejbꞌat scajnubꞌ Jehová ebꞌ, aton jun yicn̈ej yaji, xajan yuuj. A ebꞌ vin̈ vinac, ix yicꞌlaj sbꞌa ebꞌ vin̈ yedꞌ ebꞌ ix ix chꞌoc chon̈abꞌil tzꞌoch ejmelal dꞌa comon dios. 12 A Jehová Yajal dꞌa Smasanil, comonoc tzꞌel dꞌa scꞌol satanel masanil ebꞌ scꞌulan juntzan̈ chiꞌ dꞌa co cal a on̈ yin̈tilal on̈ vin̈aj Jacob tic, yalxon̈ej mach, vachꞌchom syicꞌpaxcot silabꞌ ebꞌ dꞌay.

13 Ay val junxo tas tze cꞌulej: Toxon̈ej schꞌayxiel yaltar Jehová yuj yal e sat eyoqꞌui. Tzex ocꞌ val sicꞌlabꞌil, yujto maxtzac chaji eyofrenda yuj Jehová. 14 Tzato e cꞌanbꞌan dꞌa Jehová chiꞌ icha tic: ¿Tas yuj maxtzac a cha cofrenda chiꞌ? xe chi. Aton yuj tic: Yujto a val Jehová ix ilani to max e cꞌanabꞌajej e tiꞌ eyacꞌnac dꞌa ebꞌ ix ix eyicꞌnac e bꞌa yedꞌoc dꞌa e quelemal, vachꞌchom a ebꞌ ix chiꞌ eyetbꞌeyum ebꞌ ix bꞌaj eyacꞌnac e tiꞌ chiꞌ eyicꞌlan e bꞌa yedꞌoc. 15 ¿Tom man̈ junn̈ejoc bꞌobꞌil on̈ yuj Dios yic junn̈ej nivanil tzon̈ aj yedꞌ ebꞌ ix? ¿Tas nabꞌil yuj Dios, yuj chiꞌ icha chiꞌ ix on̈ yutej tze naꞌa? Icha chiꞌ ix on̈ yutej, yic vachꞌ a ebꞌ cuninal ay yelcꞌoch Dios dꞌa yol sat ebꞌ. Yuj chiꞌ tzeyil val e bꞌa yedꞌ e pensar yic man̈ chucoc tzeyutej e bꞌa dꞌa ebꞌ ix eyetbꞌeyum bꞌaj ix eyacꞌ e tiꞌ eyicꞌlan e bꞌa yedꞌoc dꞌa e quelemal. 16 A val Jehová co Diosal a on̈ israel on̈ tic, aton Yajal dꞌa Smasanil tzꞌalan icha tic: Tzeyil val e bꞌa, aqꞌuec elcꞌoch e tiꞌ eyacꞌnac dꞌa ix eyetbꞌeyum. Yujto a jun pojlajbꞌail chiꞌ, te chuc dꞌa yol in sat, yuj chiꞌ man̈ e jubꞌat e bꞌa yuj jun chiꞌ, xchi Jehová.

17 Toxo ix tzactzajqꞌue Jehová yuj tas tzeyalaꞌ, tzato val e cꞌanbꞌan icha tic: ¿Tas ix calaꞌ yuj chiꞌ stzactzajqꞌue Jehová chiꞌ quedꞌoc? xe chi. Stzactzaj eyedꞌoc, yujto tzeyalaꞌ to a Jehová scha scꞌol ebꞌ scꞌulan chucal, stzalaj yedꞌ ebꞌ eyalani. Tzeyalanpaxi to malaj junoc Dios schꞌolbꞌitan dꞌa stojolal.