2 Palta, ¿mach ol techaj yuj dꞌa jun cꞌu ayic ol in cꞌoch chiꞌ? ¿Mach val ol stecꞌbꞌej sbꞌa dꞌa vichan̈? Yujto a vopisio, lajan val icha schaquil teꞌ cꞌacꞌ scꞌan ebꞌ bꞌoum qꞌueen, ma icha nocꞌ xapon scꞌan ebꞌ sjucꞌvi. 3 A in Jehová in tic ol in em cꞌojan, yic tzin sacbꞌitan ebꞌ yin̈tilal Leví, icha val tzꞌaj yicꞌjiel smical qꞌuen plata, ma qꞌuen oro dꞌa scal cꞌacꞌ. Ichato chiꞌ, ol yacꞌan yofrenda ebꞌ dꞌa vichan̈, icha dꞌa smojal yedꞌ dꞌa stojolal. 4 A in Jehová in tic, ol in tzalaj yedꞌ yofrenda ebꞌ aj Jerusalén yedꞌ ebꞌ ay dꞌa juntzan̈xo lugar dꞌa yol smacbꞌen Judá, icha ajnac in tzalaj yedꞌoc dꞌa pecataxo.

5 A in Jehová Yajal in dꞌa Smasanil sval icha tic: Ol in cꞌoch dꞌa e cal yic tzex in chꞌolbꞌitej. Elan̈chamel ol vacꞌoch dꞌa yibꞌan̈ juntzan̈ ebꞌ tic: Aton ebꞌ ajbꞌaal, ebꞌ scꞌulan ajmulal, ebꞌ esalvum, ebꞌ man̈ tzꞌacanoc stupan smunlajvum, ebꞌ tzꞌixtan ebꞌ ix chamnac yetbꞌeyum yedꞌ ebꞌ unin chamnac smam yedꞌ ebꞌ chꞌoc chon̈abꞌil. Ol vacꞌpaxoch dꞌa yibꞌan̈ ebꞌ malaj velcꞌoch dꞌay.

6 A in Jehová Yajal in dꞌa Smasanil, malaj bꞌaqꞌuin̈ tzin qꞌuexmaji. Yuj chiꞌ, a ex yin̈tilal ex Jacob tic, maj ex satel-laj 7 vachꞌchom ix e patiquejel in checnabꞌil, maj e cꞌanabꞌajejlaj, lajan ix eyutej e bꞌa icha yutejnac sbꞌa ebꞌ e mam eyicham. A ticnaic, meltzajan̈ecxi dꞌayin, yic ol in meltzajxibꞌat qꞌuelan dꞌayex. Palta e ex tic tze cꞌanbꞌej: ¿Tas tzꞌaj co meltzajxi dꞌayach? xe chi. 8 A in xo tic tzin cꞌanbꞌej dꞌayex: ¿Tom smoj tzꞌelcꞌan ebꞌ anima dꞌa sDiosal? Palta a ex tic tzin eyelqꞌuej. Tzato e cꞌanbꞌan icha tic: ¿Tas bꞌaj tzach quelqꞌuej chiꞌ? xe chi. A bꞌaj tzin eyelqꞌuej, aton dꞌa masanil e diezmo yedꞌ eyofrenda. 9 Yuj chiꞌ dꞌa val yel catabꞌil exxo e masanil, yujto e masanil tzin eyelqꞌuej. 10 A ticnaic jun, iqꞌueccot masanil e diezmo bꞌaj smolchaj dꞌa in templo, yic vachꞌ ay tas sva ebꞌ tzin acꞌan servil taꞌ. A in Jehová Yajal in dꞌa Smasanil sval icha tic: To tzin eyacꞌ proval. Icha val chiꞌ ol aj eyilani to ol in jac satchaan̈, ol in secanemta in vachꞌcꞌolal dꞌa eyibꞌan̈, man̈xalaj bꞌaj ol aj yedꞌtal eyuuj. 11 A in svalaꞌ to man̈ ol in cha lajvoquel tas avabꞌil eyuuj yuj nocꞌ nocꞌ, man̈ ol in chapax ixtaxel sat eyuva ayic manto qꞌuin̈bꞌi. 12 Ol yal juntzan̈xo chon̈abꞌ eyuuj to te vachꞌ eyicoꞌ yujto te vachꞌ ol elcꞌoch e chon̈abꞌ tic, xchi Jehová.

13 Syalanpax Jehová icha tic: A ex tic, te chuc tzeyal dꞌayin. Tzato val e cꞌanbꞌan icha tic: ¿Tas chuc scal dꞌayach? xe chi. 14 Icha tic tzeyutej eyalani: Nabꞌan̈ej scacꞌ servil Dios. Malaj scacꞌ yalaꞌ tato sco cꞌanabꞌajej tas syalaꞌ, scacꞌanoch pichul yic cuscꞌolal dꞌa yichan̈ Jehová Yajal dꞌa Smasanil, yic sco chꞌoxan co cuscꞌolal yuj co mul. 15 Squil val ebꞌ syicꞌchaan̈ sbꞌa, tzalajcꞌolal yaj ebꞌ. Yedꞌ ebꞌ chuc, vachꞌn̈ej tzꞌelcꞌoch ebꞌ. A ebꞌ stecꞌbꞌej sbꞌa dꞌa yichan̈ Dios, malaj pax yaelal sja dꞌa yibꞌan̈ ebꞌ, xe chi, xchi Jehová.

16 A ebꞌ ay yelcꞌoch Jehová dꞌa yol sat, slolon ebꞌ dꞌay junjun, axo Jehová chiꞌ tzꞌabꞌan tas syal ebꞌ chiꞌ. Yuj chiꞌ schecji tzꞌibꞌchajcan sbꞌi ebꞌ dꞌa jun libro, aton taꞌ sbꞌinajcan ebꞌ ay yelcꞌoch Jehová dꞌa yol sat, yujto ay val och spensar ebꞌ dꞌay.

17 A Jehová Yajal dꞌa Smasanil tzꞌalan icha tic: Ay jun cꞌual ol in chꞌolbꞌitej masanil ebꞌ anima. A ebꞌ ay velcꞌoch dꞌay, ol in sicꞌcanel ebꞌ yic tzꞌochcan ebꞌ vicoc. Icha junoc mamabꞌil tzꞌocꞌ scꞌool dꞌa junoc yuninal tzꞌacꞌan servil, icha chiꞌ ol aj yocꞌ in cꞌool dꞌa ebꞌ. 18 Ataꞌ ol nachajel eyuuj to chꞌoc spac yic ebꞌ vachꞌ sbꞌeybꞌal tzin acꞌan servil, chꞌoc pax spac yic ebꞌ chuc sbꞌeybꞌal max in acꞌanlaj servil, xchi Jehová.