Ol ja scꞌual yoval scꞌol Jehová
4
A Jehová Yajal dꞌa Smasanil tzꞌalan icha tic: Abꞌec, van sja scꞌual yic ol in chꞌoxan yoval in cꞌool. Ol in satel masanil ebꞌ bꞌuchumtac yedꞌ ebꞌ scꞌulan chucal icha val tzꞌaj stzꞌabꞌat an̈ ac dꞌa yol junoc horno. Man̈xa junoc ebꞌ ol canoc. 2 Palta a ex to ay velcꞌoch dꞌa e sat, icha val sqꞌueul cꞌu dꞌa qꞌuin̈ibꞌalil, icha chiꞌ ol vutej in chꞌoxan in colval dꞌayex. Yuj chiꞌ, ol ex tzalajxoc. Ol ex qꞌue cheneljoc yuj tzalajcꞌolal, icha tzꞌaj sqꞌue cheneljoc nocꞌ quelemtac vacax tzꞌelta bꞌaj macan. 3 A dꞌa jun cꞌual chiꞌ, a ex tic toxon̈ej ol e tecꞌcanem ebꞌ scꞌulan chucal, icha val tzꞌaj stecꞌjiem qꞌuen ticꞌaqꞌuil taan̈, icha chiꞌ ol eyutej ebꞌ.4 Naeccot in checnabꞌil vacꞌnaccan dꞌa vin̈ in checabꞌ aj Moisés, ayic ayecꞌ vin̈ dꞌa sjolom lum vitz scuch Horeb. A juntzan̈ cꞌaybꞌubꞌal yedꞌ checnabꞌil chiꞌ, smoj val to tze cꞌanabꞌajej e masanil a ex israel ex tic.
5 Abꞌec, ol in bꞌabꞌlaj chequejbꞌat vin̈ in checabꞌ aj Elías, ayic manto javi jun cꞌual yic ol checlaj yoval in cꞌool. A jun cꞌual chiꞌ, te nivan yelcꞌochi, ayxo smay ol ujoc. 6 A vin̈aj Elías chiꞌ ol acꞌanoch ebꞌ mamabꞌil yedꞌ ebꞌ uninabꞌil dꞌa juncꞌolal. Tato man̈ ol sna sbꞌa ebꞌ, axo yic ol in cꞌochoc, axo in satanel e chon̈abꞌ chiꞌ dꞌa juneln̈ej, xchi Jehová.