San Mateo sbꞌi jun libro tic. Bꞌabꞌel libro dꞌa yol Nuevo Testamento, syalcoti to a Jesús “Rey toni”. A dꞌay tzꞌibꞌabꞌilcan vachꞌ abꞌix yic Jesucristo ix stzꞌibꞌejcan vin̈aj apóstol Mateo. Ayocto ix aljican yabꞌixal to a dꞌa Jesús, ataꞌ ol yaqꞌuelcꞌoch stiꞌ Dios yacꞌnaccan dꞌa ebꞌ anima icha yaj stzꞌibꞌchajcan dꞌa Antiguo Testamento. A jun vachꞌ abꞌix tic, man̈ocn̈ej ebꞌ israel ay yicoꞌ, aton ebꞌ bꞌaj ulnaquecꞌ Jesús chiꞌ, palta yic masanil anima dꞌa yolyibꞌan̈qꞌuinal tic. A jun vachꞌ abꞌix tic tzꞌalani to an̈ej Jesucristo syal yacꞌan scolnabꞌil masanil anima.

Syalcot jun libro tic to a Jesús Rey toni, Yajal yaji, yuj schꞌoxanel yopisio yic syalanel slolonel Dios yedꞌ juntzan̈ cꞌaybꞌubꞌal vachꞌ yic Dios. Ay oyeꞌ macan̈ bꞌaj tzꞌilchaj juntzan̈ cꞌaybꞌubꞌal chiꞌ: A dꞌa capítulo 5 masanto dꞌa 7, ataꞌ tzꞌilchaj juntzan̈ cꞌaybꞌubꞌal ix yal Jesús dꞌa sjolom lum vitz, syalcot yuj bꞌeybꞌal yedꞌ juntzan̈ tas ay yalan yic dꞌa ebꞌ ayoch dꞌa yol scꞌabꞌ Dios. Axo dꞌa capítulo 10, syal yuj tas ix aj scꞌaybꞌaj ebꞌ schecabꞌ Jesús yic syalanel vachꞌ abꞌix chiꞌ ebꞌ, tas tzꞌaj yoch ebꞌ anima dꞌa yol scꞌabꞌ Dios. Axo dꞌa capítulo 13, syalcot juntzan̈ abꞌix schꞌoxanel tastac ay dꞌa yol scꞌabꞌ Dios. Axo capítulo 18, syalcot tas snibꞌej Dios dꞌa ebꞌ tzꞌoch tzꞌacꞌan yedꞌoc. Axo dꞌa capítulo 24 yedꞌ 25, syalcot yuj tastac ol ujoc dꞌa slajvubꞌ tiempoal, yic ol checlajel yopisio Dios.