San Marcos sbꞌi jun libro tic. Schael yich yalan yuj vachꞌ abꞌix yic Jesucristo yuninal Dios. A Jesucristo yel Yuninal Dios, Ochnac Animail. Syalcoti to ay val tas sbꞌonac Jesús, syalanpaxcoti to ay val yopisio. A yopisio chiꞌ scheclajel yuj scꞌaybꞌubꞌal syacꞌaꞌ. Ay yopisio dꞌa yibꞌan̈ ebꞌ demonio, syalpax yacꞌan lajvoc mul. A Jesús chiꞌ a val aljinac to a Dios ix checancot dꞌa scal ebꞌ anima. Ulnac eqꞌui yuj ul yacꞌancham sbꞌa yic scolan ebꞌ anima dꞌa yalan̈ smul.

A vin̈ tzꞌibꞌannac jun libro tic yelxo val sna vin̈ yuj tas sbꞌonac Jesús yedꞌ slolonel yedꞌ scꞌaybꞌubꞌal. Ayic slajvi yalan jayeoc versículo vin̈ yuj vin̈aj Juan Bautista, syalanpaxcot vin̈ yuj sbautismo Jesús yedꞌ bꞌaj acꞌji proval. Slajvi chiꞌ syalanpax vin̈ yuj smunlajel Jesús yedꞌ tas syutej sbꞌoanxi scꞌol ebꞌ penaay. Syalanpax vin̈ yuj scꞌaybꞌubꞌal Jesús chiꞌ. Yacbꞌan tzꞌecꞌ tiempo, a ebꞌ scꞌaybꞌum Jesús chiꞌ ix nachajel yuj ebꞌ mach Jesús chiꞌ. Axo pax ebꞌ ajcꞌool, junjun cꞌu syacꞌlan ebꞌ scachanoch vaan Jesús chiꞌ. A juntzan̈ slajvubꞌ capítulo syalcot yuj jun semana dꞌa yalan̈to schamel Jesús, syalanpax yuj schamel dꞌa teꞌ culus, yuj tas ajnac spitzvixi yedꞌ tas ajnac spax dꞌa satchaan̈.