San Lucas sbꞌi jun libro tic, yujto a vin̈aj Lucas an̈tum tzꞌibꞌannac. A jun libro tic syalcoti to a Jesús Scolumal chon̈abꞌ Israel yaji, Scolumal pax masanil anima. Syalanpaxi to a Jesús checbꞌilcot ul yal vachꞌ abꞌix dꞌa ebꞌ mebꞌaꞌ. Syalanpax yuj vin̈aj Juan Bautista yedꞌ tastac sbꞌonac vin̈. Syalanpax yuj yaljubꞌal Jesús yedꞌ pax yic ix acꞌji proval, yic ix el yich smunlajel dꞌa Galilea, yic pax ix och dꞌa yol chon̈abꞌ Jerusalén, yic ix acꞌjioch dꞌa yol scꞌabꞌ syaelal, yic ix chami yedꞌ tas ix aj spitzvixi, tas pax ix aj spax dꞌa satchaan̈. A juntzan̈ tic syalpax dꞌa San Mateo yedꞌ dꞌa San Marcos.

Palta ay juntzan̈xo tas max bꞌinajlaj dꞌa San Mateo yedꞌ dꞌa San Marcos chiꞌ, axo dꞌa San Lucas tic sbꞌinaji, aton juntzan̈ tic: Sbꞌit ebꞌ ángel, yabꞌixal ebꞌ vaymitum calnel xidꞌnac yil Jesús ayic yaljinac, yabꞌixal ayic ix cꞌoch Jesús dꞌa yol stemplo Dios ayic uninto, yabꞌixal jun vin̈ aj Samaria, yabꞌixal jun vin̈ uninabꞌil satnacbꞌati. A dꞌa jun libro tic te nivan syal yuj lesal, yuj Yespíritu Dios, yabꞌixal ebꞌ ix ix ochnac tzacꞌan yuj Jesús yedꞌ pax yuj spoder Jesús yacꞌan lajvoc mul.