A Vachꞌ Abꞌix Ix Stzꞌibꞌejcan
SAN LUCAS
Tzꞌibꞌabꞌilbꞌat juntzan̈ abꞌix tic dꞌa vin̈aj Teófilo
1
1-2 Ach Teófilo tzin tzꞌibꞌejbꞌat juntzan̈ tic dꞌayach.
Ay juntzan̈ tas ujinac dꞌa co cal tic.
A ebꞌ tzꞌalanel slolonel Dios ticnaic,
yilnac ebꞌ smasanil chajtil ajnac yel yich juntzan̈ tic.
Ichato chiꞌ ix on̈ scꞌaybꞌan ebꞌ.
Tzijtumxo ebꞌ ix naaneli,
ix stzꞌibꞌancan yabꞌixal juntzan̈ chiꞌ ebꞌ,
icha ajnac yel yich.
Lucas 1.1-25
3 A inxo tic,
ix in cꞌaybꞌej juntzan̈ chiꞌ smasanil sicꞌlabꞌil.
Yuj chiꞌ ach mamin Teófilo,
tzin nibꞌej tzin tzolbꞌitej smasanil abꞌi tastac ajnac sbꞌo junjun.
4 Icha chiꞌ ol vutoc,
yic ol a vachꞌ ojtaquejeli to yel juntzan̈ ix a cꞌaybꞌej chiꞌ.
Albꞌilcan yaljubꞌal vin̈aj Juan
5 Ayic ayoch vin̈aj Herodes reyal dꞌa Judea,
ay jun vin̈ sacerdote scuchan Zacarías,
yetbꞌeyum sbꞌa vin̈ yedꞌ jun macan̈ ebꞌ sacerdote* scuch Abías.
A ix yetbꞌeyum vin̈,
Elisabet sbꞌi ix,
a vin̈aj Aarón ay yin̈tilcan ix.
6 Te vachꞌ spensar ebꞌ dꞌa yichan̈ Dios.
Scꞌanabꞌajej schecnabꞌil yedꞌ juntzan̈xo sley Dios Cajal ebꞌ.
Yuj chiꞌ malaj junoc mach syal yalani to ay smul ebꞌ.
7 Malaj junoc yuneꞌ ebꞌ,
yujto max unevilaj ix.
Ichamtac animaxo ebꞌ schavan̈il.
8 A junel ix ja scꞌual yoch vin̈aj Zacarías chiꞌ dꞌa stzolal yedꞌ ebꞌ yetsacerdoteal,
yic syacꞌanoch stiꞌ ebꞌ yetisraelal ebꞌ dꞌa Dios.
9 Ix laj yacꞌan suerte ebꞌ,
ichataxon smodo.
Axo dꞌa yibꞌan̈ vin̈aj Zacarías chiꞌ ix emi,
yuj chiꞌ ix och vin̈ dꞌa yol stemplo Dios Cajal.
Ataꞌ ix sn̈us incienso vin̈.
10 Ayic van sn̈usan vin̈ chiꞌ,
masanil ebꞌ anima van slesalvi dꞌa stiꞌ templo chiꞌ.
11 Axo yic ayoch vin̈ dꞌa yol templo chiꞌ,
ix ul schꞌoxan sbꞌa jun yángel Dios Cajal dꞌa vin̈.
Lin̈anoch dꞌa stzꞌey jun yedꞌtal bꞌaj van stzꞌa incienso chiꞌ dꞌa svachꞌ.
12 Axo ix yilan jun ángel chiꞌ vin̈,
ix te sat scꞌol vin̈.
Ix te xivpaxbꞌat vin̈ yuuj.
13 Palta ix yalan jun ángel chiꞌ dꞌa vin̈:
—Zacarías,
man̈ ach xivoc,
yujto ix yabꞌ a lesal Dios.
A ix etbꞌeyum ix Elisabet,
ol yuneej jun vinac unin ix.
Juan ol acꞌ sbꞌiej.
14 Te nivan a tzalajcꞌolal ol ja yuuj.
Tzijtum ebꞌ anima ol te qꞌuechaan̈,
yujto ol aljoc jun unin chiꞌ,
15 yujto nivan ol aj yelcꞌoch dꞌa yichan̈ Dios Cajal.
Malaj bꞌaj ol yucꞌ vino,
malaj pax bꞌaj ol yucꞌ an̈.
Ayic manto aljoc,
ayxo och Yespíritu Dios dꞌay.
16 Yujn̈ej jun uninal chiꞌ,
tzijtum ebꞌ etisraelal ol meltzajoch spensar dꞌa Dios Cajal.
17 A vin̈aj Juan chiꞌ ol bꞌabꞌlaj dꞌa yichan̈ Cajalil.
Icha scꞌulejnac vin̈aj Elías dꞌa pecaꞌ,
icha chiꞌ ol yutej sbꞌa vin̈.
Lajan ol aj pax spoder vin̈ yedꞌ vin̈aj Elías chiꞌ.
A vin̈ ol cachan ebꞌ mamabꞌil yedꞌ ebꞌ uninabꞌil yic slajvi oval dꞌa scal ebꞌ.
A ebꞌ spitej sbꞌa dꞌa Dios,
yuj vin̈ ol qꞌuexmaj spensar ebꞌ yic ol scꞌanabꞌajej ebꞌ.
Icha chiꞌ ol yutoc sbꞌoan sbꞌa ebꞌ anima,
yic listaxo yaj ebꞌ ayic ol javoc Cajalil,
xchi jun ángel chiꞌ.
18 Ix scꞌanbꞌan vin̈aj Zacarías chiꞌ dꞌa jun ángel chiꞌ:
—¿Tas ol vutoc vojtacaneli tato yel juntzan̈ tzal tic?
A in tic icham vinac inxo,
chichimxo pax ix vetbꞌeyum,
xchi vin̈.
19 Ix yalanxi jun ángel chiꞌ dꞌa vin̈:
—A in ton tic tzin cuch Gabriel,
schecabꞌ in Dios.
Aꞌ ix in checancot val jun vachꞌ abꞌix tic dꞌayach.
20 A ticnaic,
ol ach queecaxcanoc yujto max a cha tas svalaꞌ,
masanto ol aljoc jun unin chiꞌ,
ichato chiꞌ ol ach lolonxoc.
A jun tic ol ujoc ayic ol ja stiempoal,
xchi jun ángel chiꞌ.
21 Axo ebꞌ anima van stan̈vancan vin̈ dꞌa stiꞌ chiꞌ,
ix te sat scꞌol ebꞌ,
yujto te junip ix ochcan vin̈ dꞌa yol templo chiꞌ.
22 Axo ix elul vin̈,
majxo yal-laj slolon vin̈.
Ix snaanel ebꞌ to ay tas ix schꞌox Dios dꞌa vin̈,
yujto ayic snibꞌej vin̈ sloloni,
axon̈ej yedꞌ scꞌabꞌ vin̈ schꞌoxoꞌ,
yujto ix queecaxcan vin̈.
23 Axo ix lajvi sturno vin̈ chiꞌ,
ix pax vin̈ dꞌa spat.
24 Ix lajvi chiꞌ,
axo ix yetbꞌeyum vin̈,
aton ix Elisabet,
ix scuchoch jun unin chiꞌ ix.
Oyeꞌ ujal axon̈ej dꞌa spat ix ayeqꞌui,
ix yalan ix icha tic:
25 Yuj svachꞌcꞌolal Dios Cajal dꞌayin,
yuj chiꞌ icha tic in aji,
yuj chiꞌ man̈xalaj mach ol alan in pecal to malaj vuneꞌ,
xchi ix.
Albꞌilcan yaljubꞌal Jesús
26-27 Ay jun ix cobꞌes scuchan María cajan dꞌa chon̈abꞌ Nazaret dꞌa yol yic Galilea.
Ayxo strato ix yedꞌ vin̈aj José.
A vin̈aj José chiꞌ,
yin̈tilal vin̈ vin̈aj rey David.
Svaquilxo ujal schꞌoxan sbꞌa ángel Gabriel dꞌa vin̈aj Zacarías,
ix checjixicot yuj Dios dꞌa ix María chiꞌ.
Lucas 1.26-56
—Tzalajan̈,
yujto te xajan ach yuj Dios Cajal.
Aꞌ ayn̈ej ecꞌ edꞌoc,
xchi.
29 Ayic ix yabꞌan juntzan̈ chiꞌ ix,
ix te sat scꞌol ix.
Ix snaubꞌtan̈an ix tas yuj icha chiꞌ ix yutej jun ángel chiꞌ yalani.
30 Ix yalan jun ángel chiꞌ dꞌa ix:
—María,
man̈ ach xivoc,
yujto te nivan svachꞌcꞌolal Dios ol yacꞌ dꞌayach.
31 A ticnaic,
ol a cuchcanoch jun vinac unin,
JESÚS ol acꞌ sbꞌiej.
32 A jun chiꞌ,
nivan ol aj yelcꞌochi.
Ol aljoc to Yuninal Dios,
Jun Yelxo Nivan Yelcꞌochi.
Aton Dios Cajal ol acꞌan och reyal sqꞌuexuloc vin̈aj rey David,
aton smam yicham.
33 Aton ol och yajaloc ebꞌ etisraelal dꞌa masanil tiempo.
Malaj bꞌaqꞌuin̈ ol lajvoc jun yopisio chiꞌ,
xchi dꞌa ix.
34 —¿Tas ol aj yelcꞌoch jun tzal chiꞌ,
yujto a in tic mantalaj vin̈ vetbꞌeyum?
xchi ix dꞌay.
35 —A Yespíritu Dios ol ja dꞌa ibꞌan̈.
A spoder jun Nivan Yelcꞌochi,
aꞌ ol emul dꞌa ibꞌan̈ icha asun.
Yuj chiꞌ a jun unin ol aljoc chiꞌ,
yicn̈ej ton Dios ol ajoc.
Ol yal ebꞌ anima to Yuninal Dios.
36 A ix a cꞌabꞌ oc ix Elisabet,
vachꞌchom chichimxo ix,
ol aljoc jun yuneꞌ ix.
Vachꞌchom tzꞌalji dꞌa ix to malaj bꞌaqꞌuin̈ ol aljoc yuneꞌ ix,
palta a ticnaic svaquilxo ujal scuchanoch yuneꞌ ix chiꞌ,
37 yujto malaj junoc tas ajaltac dꞌa Dios,
xchi jun ángel chiꞌ dꞌa ix.
38 —A in tic schecabꞌ in Dios Cajal,
yuj chiꞌ ujocabꞌ icha ix al chiꞌ dꞌayin,
xchi ix dꞌa jun ángel chiꞌ.
Ix lajvi chiꞌ,
ix pax jun ángel chiꞌ.
Ix xidꞌecꞌ ix María yil ix Elisabet
39 A dꞌa jun tiempoal chiꞌ,
elan̈chamel ix bꞌat ix María chiꞌ dꞌa jun chon̈abꞌ ay dꞌa tzalquiltac dꞌa yol yic Judea.
40 Ix cꞌoch ix dꞌa spat vin̈aj Zacarías chiꞌ,
ix yacꞌan stzatzil scꞌool ix Elisabet chiꞌ ix.
41 Ix te ibꞌxiqꞌue jun unin dꞌa yol scꞌool ix Elisabet chiꞌ,
ayic ix yabꞌan slolon ix María chiꞌ.
Ix te vachꞌ och Yespíritu Dios dꞌa ix Elisabet chiꞌ.
42 Yuj chiꞌ te chaan̈ ix yal ix:
—A ach tic ecꞌal svachꞌcꞌolal Dios ix yacꞌ dꞌayach dꞌa yichan̈ ebꞌ ix quetixal.
Te nivan pax svachꞌcꞌolal ol yacꞌ dꞌa jun uneꞌ ol aljoc chiꞌ.
43 A in tic,
¿tom ay jabꞌoc vopisio?
A ach tic snun ach Cajalil,
palta tzach javi in a cꞌumej.
44 A ix vabꞌan a loloni,
axo jun vuneꞌ tic,
ix te ibꞌxiqꞌue dꞌa yol in cꞌool,
ichato ste tzalaj svabꞌi.
45 A ach tic ix acꞌoch dꞌa a cꞌool tas ix yal Cajal chiꞌ dꞌayach,
yuj chiꞌ te vachꞌ icoꞌ,
yujto yovalil ol ujoc elcꞌoch tas ix yal chiꞌ,
xchi ix Elisabet chiꞌ dꞌa ix María chiꞌ.
46 Yuj chiꞌ ix yal ix María chiꞌ icha tic:
Yedꞌ smasanil in cꞌool sval vachꞌ lolonel dꞌa Cajalil.
47 Ste tzalaj in cꞌool dꞌa Dios co Columal.
48 A in tic schecabꞌ in Dios.
Ix ocꞌ scꞌol dꞌayin,
vachꞌchom malaj velcꞌochi.
Yuj chiꞌ masanil tiempo ol yal ebꞌ anima to vachꞌ vicoꞌ,
49 yujto a Dios te nivan spoder,
man̈ jantacoc svachꞌil ix schꞌox dꞌayin.
Malaj junocxo mach lajan yedꞌoc.
50 Masanil tiempo tzꞌocꞌ scꞌol dꞌa jantacn̈ej ebꞌ tzꞌoch ejmelal dꞌay.
51 Ix schꞌoxeli to te nivan spoder.
A ebꞌ syicꞌchaan̈ sbꞌa,
ix can ebꞌ dꞌa yalan̈ yuuj.
52 Ix icꞌjicanel ebꞌ yajal dꞌa yopisio.
Axo ebꞌ nanam,
ix icꞌji chaan̈ ebꞌ.
53 Jantac tas ix acꞌji dꞌa ebꞌ ay svejel.
Axo ebꞌ bꞌeyum,
malaj tas ix acꞌji dꞌa ebꞌ,
ix checji pax ebꞌ.
54 Ix och Dios quedꞌoc a on̈ aj Israel on̈ tic,
yujto schecabꞌ caji.
Tzꞌocꞌn̈ej scꞌool dꞌayon̈,
55 icha yutejnac yalancan dꞌa ebꞌ co mam quicham,
yujto yacꞌnaccan stiꞌ dꞌa vin̈aj Abraham yedꞌ dꞌa ebꞌ yin̈tilal dꞌa juneln̈ej,
xchi ix María chiꞌ.
56 Oxeꞌ ujal ix ecꞌ ix dꞌa spat ix Elisabet chiꞌ,
ichato chiꞌ ix paxta ix dꞌa spat.
A yaljubꞌal vin̈aj Juan
57 Axo ix cꞌoch stiempoal yalji yuneꞌ ix Elisabet chiꞌ,
vinac unin jun ix alji chiꞌ.
Lucas 1.57-80
58 A ebꞌ cajan dꞌa slacꞌanil ix yedꞌ ebꞌ scꞌabꞌ yoc ix,
ix te tzalaj ebꞌ yedꞌ ix ayic ix yabꞌan ebꞌ to a Dios Cajal ix acꞌan svachꞌcꞌolal dꞌa ix.
59 Yucubꞌixial yalji jun unin chiꞌ,
ix smolbꞌan sbꞌa ebꞌ dꞌa spat vin̈aj Zacarías chiꞌ yic tzꞌacꞌji circuncidar jun unin chiꞌ.
Ix snibꞌej ebꞌ ijan a sbꞌi vin̈ smam ix yacꞌoch ebꞌ dꞌay.
60 Axo ix snun chiꞌ ix alan icha tic:
—Maay,
Juan ol sbꞌiej,
xchi ix.
61 Ix scꞌanbꞌan ebꞌ:
—¿Tas yuuj?
¿Tom ay ebꞌ a cꞌabꞌ oc icha chiꞌ sbꞌi?
xchi ebꞌ.
62 Ichato chiꞌ ix scꞌanbꞌan ebꞌ dꞌa vin̈aj Zacarías chiꞌ,
ix yacꞌan yechel ebꞌ scꞌanbꞌani tas ol sbꞌiej jun unin tic.
63 Ix schꞌoxan yechel vin̈ to tzꞌacꞌjibꞌat junoc bꞌaj syal stzꞌibꞌanem vin̈.
Yuj chiꞌ ix stzꞌibꞌanem vin̈:
“Juan ol sbꞌiej” xchi vin̈.
Masanil ebꞌ ix sat scꞌol yuj jun chiꞌ.
64 Dꞌa jun rato chiꞌ ix lolonxiqꞌue vin̈aj Zacarías chiꞌ,
ix och ijan vin̈ yalan vachꞌ lolonel dꞌa Dios.
65 Yuj chiꞌ,
masanil ebꞌ cajan dꞌa slacꞌanil chiꞌ,
ix te sat scꞌol ebꞌ.
Ix laj alji dꞌa juntzan̈ aldea smasanil dꞌa tzalquiltac dꞌa yol yic Judea chiꞌ tas ix uji.
66 Masanil ebꞌ ix abꞌan jun tic,
ix och ijan ebꞌ snaubꞌtan̈ani,
ix laj scꞌanbꞌan yabꞌ ebꞌ dꞌay junjun:
—¿Tas yaj jun unin tic?
xchi ebꞌ.
Icha chiꞌ ix yal ebꞌ yujto ix schꞌox val spoder Dios dꞌay.
A sbꞌit vin̈aj Zacarías
67 Axo vin̈aj Zacarías,
vin̈ smam jun unin chiꞌ,
ix och Yespíritu Dios dꞌa vin̈,
yuj chiꞌ ix acꞌji lolon vin̈ yuuj icha tic:
68 Calec vachꞌ lolonel dꞌa Cajalil,
aton co Diosal a on̈ aj Israel on̈ tic,
yujto ix javi on̈ scolel a on̈ schon̈abꞌ on̈ tic.
69 Ol yacꞌcot jun co Columal te ay spoder.
A dꞌa ebꞌ yin̈tilalcan David,
vin̈ schecabꞌ,
ataꞌ ol aljoc.
70 Icha chiꞌ yutejnac yalancan dꞌa pecaꞌ yuj ebꞌ schecabꞌ sicꞌbꞌileli.
71 Yalannac Dios to ol on̈ scolcanel dꞌa yol scꞌabꞌ ebꞌ cajcꞌool yedꞌ dꞌa masanil ebꞌ tzon̈ chacaneli.
72 Ol schꞌox svachꞌcꞌolal dꞌa ebꞌ co mam quicham.
Man̈ ol satlaj scꞌol dꞌa jun strato yalnac to yicn̈ej yaji.
73 Aton jun strato chiꞌ yalnac dꞌa vin̈ co mam quicham aj Abraham a yacꞌannaccan stiꞌ dꞌa vin̈
74 to ol on̈ scol dꞌa yol scꞌabꞌ ebꞌ cajcꞌool,
yic man̈ xivcꞌolaloc scal co bꞌa dꞌay.
75 Dꞌa stojolal scutej co bꞌa dꞌay,
an̈ej dꞌay scacꞌoch co pensar dꞌa masanil tiempo.
76 A ach tic,
vuninal ach,
ol aljoc dꞌayach to yalumal ach el slolonel Dios Te Nivan,
yujto ol ach bꞌabꞌlaj bꞌat dꞌa yichan̈ vin̈ Cajal,
ol sbꞌoan spensar ebꞌ anima uuj icha tzꞌaj sbꞌo junoc bꞌe.
77 A ach ol acꞌ nachajel yuj schon̈abꞌ tas ol aj scolchaj ebꞌ,
syalelcꞌochi to ol acꞌjoc lajvoc smul ebꞌ.
78 Yujto te xajan on̈ yuj co Diosal,
tzꞌocꞌ scꞌool dꞌayon̈,
yuj chiꞌ ix uji jun tic.
Ichato van sacbꞌi qꞌuinal,
icha chiꞌ ol aj sja jun checbꞌilcot yuuj,
79 yic ol och saquilqꞌuinal dꞌa ebꞌ ay dꞌa qꞌuicꞌalqꞌuinal,
ebꞌ ay smay scot chamel dꞌa yibꞌan̈.
A ol chꞌoxan dꞌayon̈ tas scutej co bꞌeybꞌal yic vachꞌ juncꞌolal ol on̈ ajoc,
xchi vin̈aj Zacarías chiꞌ.
80 Axo ix qꞌuibꞌ jun unin chiꞌ,
ix te och yip dꞌa yic Dios,
ix cajnaj dꞌa tzꞌinan luum,
masanto ix cꞌoch stiempoal ayic ix schꞌoxanelta sbꞌa dꞌa ebꞌ yetisraelal.