San Juan sbꞌi jun libro tic, yujto a dꞌay tzꞌibꞌalbꞌican yabꞌixal Jesucristo yuj vin̈aj apóstol Juan. Tzacꞌanto tzꞌibꞌabꞌil jun libro tic, syalcoti to a Jesús aton Slolonel Dios sbꞌi, Yuninal ton Dios, yacꞌnacoch sbꞌa animail. Ulnaquecꞌ cajan jun tiempoal dꞌa yolyibꞌan̈qꞌuinal tic.

A jun libro tic syalaꞌ to yovalil scacꞌoch Jesús dꞌa co cꞌool, yujto Yuninal Dios, a tzꞌacꞌan co qꞌuinal dꞌa juneln̈ej. A Jesús chiꞌ, icha yopisio nocꞌ calnel yic silabꞌ, icha chiꞌ yopisio yuj Dios. Man̈ jantacoc juntzan̈ tas satubꞌtac schꞌoxnac, stelaj sbꞌa yedꞌ ebꞌ anima, yalannacxi tas syalelcꞌoch junjun macan̈ milagro chiꞌ. Syalanpaxcot jun libro tic yuj ebꞌ anima acꞌannacoch Jesús dꞌa scꞌool yedꞌ pax ebꞌ ochnac ajcꞌolal dꞌay.

A capítulo 13 masanto dꞌa 17, ataꞌ syalcot tastac scꞌulejnac Jesús yedꞌ ebꞌ scꞌaybꞌum dꞌa slajvubꞌxo. A dꞌa jun tiempoal chiꞌ, yacꞌcan snivanil scꞌol ebꞌ scꞌaybꞌum, yujto yojtac to van sjavi chamel dꞌa yibꞌan̈. Axo dꞌa slajvubꞌxo jun libro tic, ataꞌ syalcani tas ajnac syamchaj Jesús, tas ajnac scꞌoch dꞌa yichan̈ ebꞌ ay yopisio, tas ajnac sculusajqꞌuei, schamel yedꞌ tas ajnac smucchaji. Palta pitzvinacxi dꞌa scal ebꞌ chamnac, schꞌoxannacxi sbꞌa dꞌa ebꞌ scꞌaybꞌum.

An̈ej jun libro tic tzijtum el tzꞌalancot yuj silabꞌ Dios scha junoc mach tzꞌacꞌanoch Jesús dꞌa scꞌool, aton qꞌuinal ay dꞌa juneln̈ej.