Pitzvinacxi Jesús
24
Ayic ayto scꞌan sacbꞌi dꞌa domingoal,
aton jun bꞌabꞌel cꞌu yic semana,
ix bꞌat ebꞌ ix ix chiꞌ bꞌaj mucbꞌil snivanil Jesús chiꞌ.
Yedꞌnac juntzan̈ yal sucꞌuqꞌui sjabꞌ chiꞌ ebꞌ ix bꞌobꞌil yuuj.
Lucas 24.1-35
2 Axo ix cꞌoch ebꞌ ix,
ix yilan ebꞌ ix to toxo ix el qꞌuen smacul chiꞌ.
3 Ix och ebꞌ ix dꞌa yol qꞌueen,
ix yilan ebꞌ ix to man̈xalaj snivanil Jesús Cajal ayeqꞌui.
4 Ix te satbꞌat scꞌool ebꞌ ix yilani.
Axo ix yilan ebꞌ ix ayecꞌ chavan̈ ángel icha yilji vinac,
lin̈jabꞌecꞌ dꞌa stzꞌey ebꞌ ix.
Toxon̈ej stziquiqui spichul ebꞌ.
5 Yuj chiꞌ ix te xiv ebꞌ ix,
ix em cumjabꞌ ebꞌ ix dꞌa sat luum.
Axo ix yalan ebꞌ ángel chiꞌ dꞌa ebꞌ ix:
—¿Tas yuj tze say jun pitzan dꞌa yol bꞌaj smucchaj ebꞌ chamnac tic?
6 Man̈xo ayoquecꞌlaj dꞌa tic.
Toxo ix pitzvixi.
Naeccot tas yalnac dꞌayex,
ayic aytoecꞌ eyedꞌoc dꞌa Galilea.
7 Ayic yalani to a jun Acꞌbꞌilcot yuj Dios yoch animail,
yovalil ol acꞌjococh dꞌa yol scꞌabꞌ ebꞌ anima chuc spensar,
ol culusajqꞌue yuj ebꞌ.
Axo dꞌa schabꞌjial ol pitzvocxi.
Icha chiꞌ yutejnac yalancan dꞌayex,
xchi ebꞌ ángel chiꞌ dꞌa ebꞌ ix.
8 Ix snacot ebꞌ ix tas yalnaccan Jesús chiꞌ,
9 yuj chiꞌ ix paxta ebꞌ ix taꞌ,
ix bꞌat yalan ebꞌ ix dꞌa ebꞌ uxluchvan̈ scꞌaybꞌum Jesús chiꞌ yedꞌ dꞌa ebꞌ scꞌaybꞌum smasanil.
10 A ebꞌ ix ix bꞌat alan abꞌix tic,
aton ix María aj Magdala,
ix Juana yedꞌ ix María snun vin̈aj Jacobo.
Ay pax juntzan̈xo ebꞌ ix yetbꞌeyum sbꞌa yedꞌ ebꞌ ix.
11 Palta a ebꞌ schecabꞌ Jesús chiꞌ,
ton̈ej ste comon lolon ebꞌ ix snaan ebꞌ.
Maj schalaj yabꞌ ebꞌ dꞌa ebꞌ ix.
12 Axo vin̈aj Pedro yelcꞌolal ix bꞌat vin̈ bꞌaj mucan chiꞌ.
Ayic ix cꞌoch vin̈,
ix em n̈ojan vin̈ yilanoch dꞌa yol qꞌueen,
ix yilan vin̈ to axon̈ej cꞌapac sábana ix bꞌacꞌchajoch dꞌa snivanil Jesús chiꞌ aycan schꞌocoj.
Ix paxta vin̈,
ix te sat scꞌool vin̈ yuj tas ix uji chiꞌ.
Schꞌoxnac sbꞌa Jesús dꞌa chavan̈ ebꞌ dꞌa yol bꞌe
13 A dꞌa jun cꞌual chiꞌ,
ay chavan̈ ebꞌ scꞌaybꞌum van sbꞌat dꞌa jun bꞌe scꞌoch dꞌa chon̈abꞌ Emaús.
A jun chon̈abꞌ chiꞌ,
ay am oxeoc legua scal yedꞌ Jerusalén.
14 Van sbꞌey ebꞌ,
van yalubꞌtan̈an ebꞌ tas juntzan̈ ix uji.
15 Ayic van yalubꞌtan̈an ebꞌ chiꞌ,
ix cꞌoch Jesús,
ix yetbꞌatan sbꞌa yedꞌ ebꞌ.
16 Ix moyjican sat ebꞌ yuuj.
Vachꞌchom tzꞌilji yuj ebꞌ,
palta maj nachajel-laj yuj ebꞌ tato aꞌ.
17 Ix scꞌanbꞌan Jesús dꞌa ebꞌ:
—¿Tas val eyalubꞌtan̈ej tzex bꞌeyi?
xchi dꞌa ebꞌ.
Ix och vaan ebꞌ,
te cuseltac yilji ebꞌ.
18 Ay jun vin̈ scuch Cleofas ix tacꞌvi dꞌay:
—Inatax yojtac ebꞌ anima smasanil tas ix uji dꞌa Jerusalén dꞌa evi chabꞌji tic.
A achxo tic,
¿tom maj abꞌ jabꞌoc?
Ina ach ecꞌ taꞌ,
xchi vin̈ dꞌay.
19 —¿Tas juntzan̈ ix uji chiꞌ jun?
xchi Jesús chiꞌ dꞌa ebꞌ vin̈.
—Ay jun aj Nazaret scuch Jesús.
Schecabꞌ ton val Dios yaji.
A dꞌa yichan̈ Dios yedꞌ dꞌa yichan̈ ebꞌ chon̈abꞌ,
te nivan yelcꞌoch tas ix scꞌulej yedꞌ tas ix yalaꞌ.
20 Palta a ebꞌ vin̈ sat sacerdote yedꞌ ebꞌ vin̈ yajal ix acꞌanoch dꞌa yol scꞌabꞌ chamel.
Yuj chiꞌ ix culusajqꞌuei.
21 Ix cacꞌoch yipoc co cꞌool to ol on̈ scolel a on̈ aj Israel on̈ tic.
Chabꞌjitax ix uji jun chiꞌ ticnaic.
22 Palta ay juntzan̈ ebꞌ ix quetbꞌeyum co bꞌa yedꞌoc,
sat co cꞌool yuj tas syal ebꞌ ix,
a ix sacbꞌi ix bꞌat ebꞌ ix yil jun qꞌueen bꞌaj ochcan snivanil Jesús chiꞌ.
23 Ix abꞌ yilan ebꞌ ix,
man̈xalaj snivanil ayeqꞌui.
Ix lajvi chiꞌ,
xidꞌ yalan ebꞌ ix dꞌayon̈ to icha vayich ix aj yilan chavan̈ ángel ebꞌ ix.
Ix abꞌ yalan ebꞌ ángel chiꞌ dꞌa ebꞌ ix to a Jesús toxo ix pitzvixi.
24 Ix lajvi chiꞌ,
ix bꞌat juntzan̈ ebꞌ quetbꞌeyum yilaꞌ.
Icha val ix aj yalan ebꞌ ix chiꞌ,
icha val chiꞌ ix aj yilan ebꞌ.
Axo pax Jesús,
maj yil-laj ebꞌ,
xchi ebꞌ dꞌay.
25 Axo Jesús ix alan dꞌa ebꞌ:
—A ex tic malaj jabꞌoc e pensar,
max e bꞌalaj aqꞌuejochlaj dꞌa e cꞌool tastac yalnaccan ebꞌ schecabꞌ Dios dꞌa pecaꞌ.
26 A Cristo chiꞌ,
yovalil ix yabꞌ syail,
ayic mantzac och Yajalil,
xchi dꞌa ebꞌ.
27 Ix lajvi chiꞌ,
ix och ijan yalan dꞌa ebꞌ bꞌajtactil tzꞌibꞌabꞌilcan yabꞌixal dꞌa Slolonel Dios.
Ix schaancot yalan tastac tzꞌibꞌabꞌilcan yuj vin̈aj Moisés,
masanto dꞌa tas tzꞌibꞌabꞌilcan yuj ebꞌ schecabꞌ Dios dꞌa pecaꞌ.
28 Ayic ix cꞌoch ebꞌ dꞌa jun chon̈abꞌ bꞌaj van sbꞌat ebꞌ chiꞌ,
axo Jesús ijan bꞌen̈ej ix ecꞌbꞌati.
29 Axo ebꞌ ix acꞌan pural scani.
Ix yalan ebꞌ dꞌay:
—Canan̈ quedꞌoc,
ina vanxo yem cꞌu,
toxo val ol qꞌuicꞌbꞌoc,
xchi ebꞌ dꞌay.
Yuj chiꞌ ix och dꞌa yol spat ebꞌ,
ix can yedꞌ ebꞌ.
30 Ayic ix em cꞌojan dꞌa teꞌ mexa yedꞌ ebꞌ,
ix yicꞌanqꞌue vaan jun ixim pan.
Ix yacꞌan yuj diosal dꞌa Dios yuj ixim.
Ix lajvi chiꞌ,
ix och ijan spucanbꞌat ixim dꞌa ebꞌ.
31 A dꞌa jun rato chiꞌ,
ichato ix jacvi sat ebꞌ.
Ix yilanoch ebꞌ to a Jesús.
Palta ix satem dꞌa stzꞌey ebꞌ,
axo ix yilan ebꞌ,
man̈xalaj mach.
32 Ix yalan ebꞌ:
—Yel toni,
ix och pitzꞌan dꞌa co cꞌool yuuj a ix yalan dꞌayon̈ dꞌa yol bꞌe,
ayic ix yacꞌanpax nachajel cuuj tastac tzꞌibꞌabꞌilcan dꞌa Slolonel Dios,
xchi ebꞌ.
33 Dꞌa jun rato chiꞌ ix qꞌue vaan ebꞌ,
ix pax ebꞌ dꞌa Jerusalén.
Ataꞌ ix ilchaj ebꞌ uxluchvan̈ schecabꞌ Jesús yuj ebꞌ yedꞌ juntzan̈xo yetbꞌeyum ebꞌ.
Molanecꞌ ebꞌ.
34 Axo ebꞌ chiꞌ,
ix alan dꞌa ebꞌ chavan̈ chiꞌ:
—Dꞌa val yel ix pitzvixi Jesús Cajal.
Ix schꞌox sbꞌa dꞌa vin̈aj Simón tic,
xchi ebꞌ.
35 Ix lajvi chiꞌ,
axo ebꞌ chavan̈ chiꞌ ix alani tas ix scꞌulej ebꞌ dꞌa yol bꞌe yedꞌ pax tas ix aj snachajel yuj ebꞌ to a Jesús ayic ix spucanecꞌ jun ixim pan chiꞌ.
Schꞌoxnac sbꞌa Jesús dꞌa ebꞌ scꞌaybꞌum
36 Vanto yalan jun chiꞌ ebꞌ,
axo ix yilan ebꞌ ayxo ecꞌ Jesús dꞌa scal ebꞌ.
Ix yalani:
—Juncꞌolalocabꞌ eyaji,
xchi dꞌa ebꞌ.
Lucas 24.36-53
37 A ebꞌ chiꞌ,
ton̈ej ix satbꞌat scꞌool ebꞌ.
Ix laj xivqꞌue ebꞌ.
A snaan ebꞌ to a junoc pixan schꞌox sbꞌa dꞌa ebꞌ.
38 Ix yalan Jesús dꞌa ebꞌ:
—¿Tas yuj tzex te xivi?
¿Tas yuj ay e chabꞌcꞌolal dꞌayin?
39 Ilecnabꞌ in cꞌabꞌ yedꞌ voc tic.
An̈ejtonaꞌ a in.
Yamlejecnabꞌi,
tzeyilani tato a junoc pixan,
¿tom ay sbꞌacꞌchil junoc pixan yedꞌ sbꞌaquil syal tze yam icha vic tic?
xchi dꞌa ebꞌ.
40 Ix lajvi yalan jun chiꞌ dꞌa ebꞌ,
ix schꞌoxan scꞌabꞌ yedꞌ yoc dꞌa ebꞌ.
41 Vachꞌchom stzalaj ebꞌ,
palta an̈ejaꞌ maj yacꞌochlaj ebꞌ dꞌa scꞌool,
yujto ton̈ej ste sat scꞌool ebꞌ.
Yuj chiꞌ ix yal dꞌa ebꞌ:
—¿Mama jabꞌoc tas tzin va dꞌa tic?
xchi.
42 Axo ebꞌ ix acꞌan jabꞌ bꞌolbꞌil chay dꞌay.
—A ticnaic,
ix elcꞌoch tas ix valcan dꞌayex ayic ayinto ecꞌ eyedꞌoc.
Valnaccan dꞌayex to yovalil ol elcꞌoch jantacn̈ej vabꞌixal tzꞌibꞌyajcan dꞌa ley Moisés,
tas tzꞌibꞌabꞌil pax can yuj ebꞌ schecabꞌ Dios yedꞌ juntzan̈ vabꞌixal dꞌa libro Salmos,
xchi dꞌa ebꞌ.
45 Ichato chiꞌ,
ix acꞌji jacvoc spensar ebꞌ yuuj,
yic snachajel yuj ebꞌ tas tzꞌibꞌabꞌilcan dꞌa Slolonel Dios.
46 Ix yalan dꞌa ebꞌ:
—A dꞌa Slolonel Dios tzꞌibꞌabꞌilcan vabꞌixal a in Cristo in tic,
to yovalil in chami,
axo dꞌa schabꞌjial in pitzvixi dꞌa scal ebꞌ chamnac.
47 An̈ejtonaꞌ,
yovalil ol aljoquel vabꞌixal dꞌa scal ebꞌ anima dꞌa junjun nación.
Ol aljoquel dꞌa scal ebꞌ to yovalil sna sbꞌa ebꞌ,
yic ol acꞌjoc lajvoc smul ebꞌ.
Schael yich dꞌa Jerusalén tic masanto bꞌaj slajvicꞌoch yolyibꞌan̈qꞌuinal tic.
48 A ex tic,
ol eyacꞌ testigoal e bꞌa dꞌa juntzan̈ tic.
49 A in xo,
ol bꞌat in checcot jun yalnac Dios to ol yacꞌcot dꞌayex.
Palta tan̈vejeccan dꞌa Jerusalén tic,
masanto ol e cha jun poder ol acꞌjoquemta dꞌayex dꞌa satchaan̈,
xchi Jesús dꞌa ebꞌ.
Paxnacqꞌue Jesús dꞌa satchaan̈
50 Ix lajvi chiꞌ ix yicꞌanbꞌat ebꞌ scꞌaybꞌum dꞌa slacꞌanil chon̈abꞌ Betania.
Ataꞌ ix yicꞌchaan̈ scꞌabꞌ,
ix scꞌanan svachꞌcꞌolal Dios dꞌa yibꞌan̈ ebꞌ.
51 Vanto scꞌanan jun chiꞌ,
ix paxqꞌue dꞌa satchaan̈,
ix can ebꞌ yuuj.
52 Ix lajvi yacꞌanem sbꞌa ebꞌ dꞌay,
te tzalajcꞌolal ix pax ebꞌ dꞌa Jerusalén.
53 Junjun cꞌu ix och ebꞌ dꞌa yol yamaqꞌuil stemplo Dios.
Ix yalan vachꞌ lolonel ebꞌ dꞌay.
Lucas -créditos