Ix pitzvixi Jesús
20
A dꞌa domingoal,
ayto sacbꞌi,
ix bꞌat ix María Magdalena bꞌaj ix mucchajcanoch snivanil Jesús chiꞌ.
Ix yilan ix to toxo ix icꞌjiel smacul bꞌaj mucan chiꞌ.
2 Yuj chiꞌ elan̈chamel ix bꞌat lemnaj ix,
axo ix cꞌoch ix dꞌa vin̈aj Simón Pedro yedꞌ dꞌa junxo vin̈ scꞌaybꞌum Jesús,
aton vin̈ te xajan yuj Jesús chiꞌ.
Ix yalan ix dꞌa ebꞌ vin̈:
—Toxo ix icꞌjibꞌat snivanil Cajal Jesús bꞌaj mucan,
¿bꞌaj am ix yacꞌ ebꞌ?
xchi ix dꞌa ebꞌ vin̈.
3 Ix lajvi yabꞌan jun chiꞌ vin̈aj Pedro yedꞌ junxo vin̈ scꞌaybꞌum Jesús chiꞌ,
ix bꞌat ebꞌ vin̈,
ix bꞌat yilan ebꞌ vin̈ bꞌaj ay qꞌuen qꞌueen chiꞌ.
4 Elan̈chamel ix bꞌat ebꞌ vin̈ schavan̈il.
Palta ix tzacꞌlajcan vin̈aj Pedro chiꞌ.
Yuj chiꞌ a junxo vin̈ cꞌaybꞌum chiꞌ ix bꞌabꞌlajcꞌochi.
5 Ix och dꞌan̈an vin̈ dꞌa stiꞌ qꞌueen.
Ix yilanoch jun cꞌapac vin̈ lan̈aneqꞌui.
Palta maj ochlaj vin̈ dꞌa yol qꞌueen.
6 Axo vin̈aj Simón Pedro chiꞌ tzacꞌanto ix cꞌoch vin̈.
Bꞌen̈ej ix ochbꞌat vin̈ dꞌa yol qꞌueen.
Ix yilan vin̈,
lan̈anecꞌ juntzan̈ cꞌapac chiꞌ.
7 A junxo cꞌapac sbꞌacꞌul sjolom Jesús chiꞌ,
pacbꞌilcan cꞌapac,
chꞌoc aycancot cꞌapac.
8 Ichato chiꞌ ix ochcꞌoch junxo vin̈ cꞌaybꞌum ix bꞌabꞌlaj cꞌoch chiꞌ.
Ayic ix yilan jun chiꞌ vin̈,
ix yacꞌoch vin̈ dꞌa scꞌool to ix pitzvixi Jesús.
9 Maxto nachajel yuj ebꞌ vin̈ tas tzꞌibꞌabꞌilcan dꞌa Slolonel Dios to yovalil ol pitzvocxi Jesús dꞌa scal ebꞌ chamnac.
10 Ix lajvi chiꞌ,
ix paxcan ebꞌ vin̈ dꞌa spat junjun.
Schꞌoxnac sbꞌa Jesús dꞌa ix María aj Magdala
11 Axo ix María aj Magdala,
ix can ix dꞌa stzꞌey jun qꞌueen chiꞌ.
Maj ochlaj ix dꞌa yol qꞌueen.
Van yocꞌ ix,
ix och dꞌan̈an ix dꞌa stiꞌ qꞌueen.
12 Axo ix yilan ix,
ayelta chavan̈ ángel dꞌa yol qꞌueen.
Te sac spichul ebꞌ.
Cꞌojjabꞌem ebꞌ bꞌaj ix em snivanil Jesús chiꞌ,
jun dꞌa sjolomtac,
jun dꞌa yoctac.
13 Ix scꞌanbꞌanelta ebꞌ dꞌa ix:
—Ach ix,
¿tas yuj tzach oqꞌui?
xchielta ebꞌ.
—Tzin oqꞌui yujto ix icꞌjibꞌat snivanil vin̈ Vajal dꞌa tic.
¿Bꞌaj am ix yacꞌ ebꞌ?
xchi ix dꞌa ebꞌ.
14 Vanto yalan jun chiꞌ ix,
ix bꞌat qꞌuelan ix dꞌa spatic.
Axo ix yilan ix ayecꞌ Jesús chiꞌ,
palta maj yilochlaj ix tato aꞌ.
15 Yuj chiꞌ ix scꞌanbꞌan dꞌa ix:
—Ach ix,
¿tas yuj tzach oqꞌui?
¿Mach tza sayeqꞌui?
xchi dꞌa ix.
Palta a snaan ix to a vin̈ yilumal teꞌ avbꞌen teꞌ chiꞌ lin̈anecꞌ taꞌ.
Yuj chiꞌ ix yalan ix:
—Ach vetanimail,
tato a ach ix ul iqꞌuel snivanil Jesús chiꞌ,
al val dꞌayin bꞌajtil ix bꞌat acꞌcani yic ol vicꞌbꞌati,
xchi ix dꞌay.
16 —María,
xchi Jesús chiꞌ dꞌa ix.
Yuj chiꞌ ix meltzajbꞌat qꞌuelan ix dꞌay.
Ix yalan ix dꞌa stiꞌ hebreo:
—Raboni,
xchi ix.
Syalelcꞌochi,
Ach in Cꞌaybꞌumal.
17 Ix yalan dꞌa ix:
—Man̈ in a yamaꞌ,
yujto manto in paxqꞌue bꞌaj ay in Mam.
Ixic al dꞌa ebꞌ vucꞌtac yedꞌ dꞌa ebꞌ vanabꞌ smasanil to ol in paxqꞌue bꞌaj ay in Mam.
A in Mam chiꞌ,
e Mam pax vedꞌoc.
A in Diosal,
e Diosal pax vedꞌoc,
xchi Jesús chiꞌ dꞌa ix.
18 Yuj chiꞌ ix bꞌat ix yal dꞌa ebꞌ scꞌaybꞌum Jesús chiꞌ:
—Ix vil Cajal Jesús,
xchi ix dꞌa ebꞌ.
Ix laj yalan ix dꞌa ebꞌ tastac ix yal dꞌa ix.
Schꞌoxnac sbꞌa Jesús dꞌa ebꞌ scꞌaybꞌum
19 An̈ejaꞌ dꞌa jun domingo chiꞌ dꞌa qꞌuicꞌbꞌalil,
ix smolbꞌej sbꞌa ebꞌ scꞌaybꞌum Jesús chiꞌ.
N̈abꞌabꞌi ix aj spuertail jun pat chiꞌ,
yujto xiv ebꞌ dꞌa ebꞌ vin̈ aj Judea.
Axo ix yilan ebꞌ ayxoecꞌ Jesús dꞌa scal ebꞌ,
ix yalan dꞌa ebꞌ:
—Juncꞌolalocabꞌ eyaji,
xchi dꞌa ebꞌ.
Jesús se aparece a los discípulos (Juan 20.19-31)
20 Ix lajvi chiꞌ,
ix schꞌoxan yol scꞌabꞌ yedꞌ scostil dꞌa ebꞌ.
Axo ebꞌ scꞌaybꞌum chiꞌ,
ix te tzalaj ebꞌ yilan Cajal Jesús chiꞌ.
21 Ix yalanpax junelxo:
—Juncꞌolalocabꞌ eyaji.
Icha ix yutej co Mam Dios in schecancoti,
icha chiꞌ svutej ex in checanbꞌati,
xchi dꞌa ebꞌ.
22 Ix lajvi yalan juntzan̈ chiꞌ,
ix spuꞌanecꞌ yicꞌ dꞌa yibꞌan̈ ebꞌ,
ix yalani:
—Chaec Yespíritu Dios.
23 Tato ay ebꞌ tzeyacꞌ nivancꞌolal smul,
an̈ejtonaꞌ ol acꞌjocpax lajvoc smul ebꞌ yuj Dios.
Tato ay ebꞌ max eyacꞌ nivancꞌolal smul chiꞌ,
ol cann̈ej smul ebꞌ chiꞌ dꞌa yibꞌan̈,
xchi dꞌa ebꞌ.
Yilnac Jesús vin̈aj Tomás
24 Palta ay jun vin̈ yetbꞌeyum ebꞌ scꞌaybꞌum Jesús chiꞌ scuchan Tomás,
tzꞌalji Tioxal.
Man̈ ayoquecꞌlaj vin̈ yedꞌ ebꞌ ayic ix ecꞌ Jesús chiꞌ taꞌ.
25 Yuj chiꞌ ix yal ebꞌ yetcꞌaybꞌumal vin̈ chiꞌ dꞌay:
—Ix quil Cajal Jesús,
xchi ebꞌ vin̈.
—Oc in val svil bꞌaj ix ecꞌ qꞌuen lavux dꞌa yol scꞌabꞌ,
svecanoch yiximal in cꞌabꞌ dꞌa yolanil bꞌaj ix ecꞌ qꞌuen chiꞌ,
svacꞌanpaxoch in cꞌabꞌ dꞌa scostil,
ichato chiꞌ,
ol vacꞌanoch dꞌa in cꞌool tato a val Jesús chiꞌ,
xchi vin̈aj Tomás chiꞌ.
26 Ucubꞌixitax chiꞌ,
ix smolbꞌanxi sbꞌa ebꞌ dꞌa yol jun pat chiꞌ.
Ayxo pax ecꞌ vin̈aj Tomás chiꞌ yedꞌ ebꞌ.
N̈abꞌabꞌi yaj jun pat chiꞌ schꞌapan ebꞌ,
palta ix yilan ebꞌ,
ayxoecꞌ Jesús chiꞌ dꞌa scal ebꞌ.
Ix yalan dꞌa ebꞌ:
—Juncꞌolalocabꞌ eyaji,
xchi.
27 Ix lajvin̈ej chiꞌ,
ix yalan dꞌa vin̈aj Tomás chiꞌ:
—Ilnabꞌ in cꞌabꞌ tic.
Ecoch yiximal a cꞌabꞌ dꞌa yolanil tic.
Tzacꞌanpaxoch a cꞌabꞌ dꞌa yolanil in costil tic.
Man̈ acꞌ chabꞌcꞌolal.
Acꞌ in val och dꞌa a cꞌool,
xchi dꞌa vin̈.
28 Ix lajvi chiꞌ,
ix yalan vin̈aj Tomás chiꞌ dꞌay:
—Ach Vajalil,
ach in Diosal,
xchi vin̈.
29 Ix yalanxi Jesús chiꞌ dꞌa vin̈:
—In acꞌoch dꞌa a cꞌool yujto in ilaꞌ.
A ebꞌ max in ilani,
tato tzin yacꞌoch ebꞌ dꞌa scꞌool,
teꞌ vachꞌ yic ebꞌ,
xchi dꞌa vin̈.
Tas yuj tzꞌibꞌabꞌilcan jun libro tic
30 Tzijtumto juntzan̈xo tas satubꞌtac ix schꞌox Jesús dꞌa yichan̈ ebꞌ scꞌaybꞌum,
palta man̈ tzꞌibꞌabꞌiloclajcan dꞌa jun uum tic.
31 Palta a juntzan̈ tic tzꞌibꞌabꞌilcani yic tzeyacꞌoch dꞌa e cꞌool to a Jesús aton Cristo,
Yuninal Dios.
Tato icha chiꞌ ol eyutoc eyacꞌanoch dꞌa e cꞌool,
ol e cha e qꞌuinal dꞌa juneln̈ej yuuj.