Ix pitzvixi Jesús
16
Axo ix ecꞌbꞌat scꞌual icꞌoj ip,
a ix María aj Magdala,
ix Salomé yedꞌ ix María snun vin̈aj Jacobo,
ix sman juntzan̈ te sucꞌuqꞌui sjabꞌ ebꞌ ix yic sbꞌat sucanecꞌ ebꞌ ix dꞌa snivanil Jesús.
Marcos 16.1-20
2 Axo ix sacbꞌi dꞌa domingo,
val sqꞌueul cꞌu,
ix bꞌat ebꞌ ix bꞌaj ix mucchajcanoch chiꞌ.
3 Axo yic van sbꞌey ebꞌ ix chiꞌ,
ix yalan ebꞌ ix:
—¿Mach ol icꞌanel smacul qꞌueen?
xchi ebꞌ ix.
4 Palta axo ix yilanbꞌat ebꞌ ix,
elnacxo smacul qꞌuen chiꞌ.
Te nivaquil qꞌueen.
5 Axo ix ochcꞌoch ebꞌ ix dꞌa yol qꞌueen,
ix yilan ebꞌ ix,
cꞌojanem jun ángel dꞌa svachꞌ ebꞌ ix icha yilji ebꞌ vin̈ quelemtac.
Ayoch jun pichul jucan yuuj,
te sac.
Ix te xiv ebꞌ ix yuuj.
6 Palta ix yalan jun ángel chiꞌ dꞌa ebꞌ ix:
—Man̈ ex xivoc.
Van e sayanecꞌ Jesús aj Nazaret,
aton jun ix culusajqꞌuei.
Palta toxo ix pitzvixi.
Man̈xo ayococh dꞌa yol qꞌuen tic.
Ilecnabꞌ bꞌaj ix ul yacꞌcanochta ebꞌ tic.
7 Ixiquec,
bꞌat alec dꞌa ebꞌ scꞌaybꞌum Jesús chiꞌ yedꞌ dꞌa vin̈aj Pedro to ol bꞌabꞌlaj cꞌoch eyuuj dꞌa Galilea.
Ataꞌ ol eyilaꞌ,
icha yaj yalancan dꞌayex,
xchi dꞌa ebꞌ ix.
8 Ix lajvi chiꞌ,
elan̈chamel ix elixta ebꞌ ix dꞌa yol qꞌueen.
Ix bꞌat lemnaj ebꞌ ix.
Ix te ibꞌxiqꞌue ebꞌ ix yuj xivelal.
Malaj junoc mach bꞌaj ix yal ebꞌ ix,
yujto ix te xiv ebꞌ ix.
Ix schꞌox sbꞌa Jesús dꞌa ix María aj Magdala
9 [A dꞌa domingo,
ayto sacbꞌi,
ataꞌ ix pitzvixi Jesús.
Ix lajvi chiꞌ,
a dꞌa ix María aj Magdala bꞌaj ix sbꞌabꞌlaj chꞌoxej sbꞌa.
A dꞌa jun ix chiꞌ,
ataꞌ elnac ucvan̈ ebꞌ enemigo yuj Jesús.
10 Axo ix,
ix bꞌat alan dꞌa ebꞌ ecꞌnac yedꞌ Jesús dꞌa yalan̈taxo.
Ste cus ebꞌ,
van yocꞌ pax ebꞌ.
11 Axo ix yalan ix dꞌa ebꞌ to ix pitzvixi Jesús,
to yel ix yil ix.
Palta maj schalaj yabꞌ ebꞌ dꞌa ix.
Ix schꞌox sbꞌa Jesús dꞌa chavan̈ ebꞌ scꞌaybꞌum
12 Ix lajvi chiꞌ,
ix schꞌoxan sbꞌa Jesús dꞌa chavan̈ ebꞌ scꞌaybꞌum,
ayic van sbꞌey ebꞌ.
Chꞌoc yilji ix yil ebꞌ.
13 Yuj chiꞌ ix meltzaj ebꞌ.
Ix bꞌat yalan ebꞌ dꞌa juntzan̈xo ebꞌ yetbꞌeyum.
Palta an̈ejtonaꞌ maj schalaj yabꞌ ebꞌ.
A Jesús ix checanbꞌat ebꞌ scꞌaybꞌum
14 Axo junelxo,
ayic van sva ebꞌ scꞌaybꞌum yuxluchvan̈il,
ix schꞌoxan sbꞌa Jesús dꞌa ebꞌ.
Ix tumaj ebꞌ yuuj,
yujto chabꞌcꞌolal yaj ebꞌ,
pit ebꞌ.
Yujto maj scha yabꞌ ebꞌ dꞌa ebꞌ ix ilani ayic toxo ix pitzvixi.
15 Ix lajvi chiꞌ,
ix yalanxi dꞌa ebꞌ:
—Ixiquec dꞌa masanil yolyibꞌan̈qꞌuinal tic.
Alequel vachꞌ abꞌix yic colnabꞌil dꞌa scal ebꞌ anima smasanil.
16 A mach ol acꞌanoch dꞌa scꞌool,
syacꞌan acꞌjoc bautizar sbꞌa,
ol colchajoc.
Palta a ebꞌ max yacꞌoch dꞌa scꞌool,
ol ochcan yaelal dꞌa yibꞌan̈ ebꞌ.
17 A ebꞌ ol acꞌanoch dꞌa scꞌool,
ol schꞌox juntzan̈ milagro tic ebꞌ:
Yuj in poder ol yicꞌanel juntzan̈ enemigo ebꞌ dꞌa ebꞌ anima.
Ol lolon ebꞌ dꞌa juntzan̈ chꞌocchꞌoc tiꞌal.
18 Tato ol syam junoc nocꞌ chan ebꞌ,
tato ol yucꞌ junoc tas ebꞌ to scham anima yuuj,
malaj ol icꞌan ebꞌ.
Tato ol yaqꞌuecꞌ scꞌabꞌ ebꞌ dꞌa yibꞌan̈ ebꞌ penaay,
ol bꞌoxoc scꞌool ebꞌ,
xchican Jesús.
Ix icꞌji pax Jesús dꞌa satchaan̈
19 Ayic ix lajvi yalan juntzan̈ tic Cajal Jesús dꞌa ebꞌ schecabꞌ chiꞌ,
ix icꞌjiqꞌue dꞌa satchaan̈.
Ataꞌ ix em cꞌojan dꞌa svachꞌ cꞌabꞌ Dios.
20 Ix lajvi chiꞌ,
ix bꞌatcan ebꞌ schecabꞌ chiꞌ yalcanel slolonel Dios dꞌa junjun lugar.
Axo Cajal Jesús ix och yedꞌ ebꞌ.
Ix schꞌox juntzan̈ milagro yedꞌ ebꞌ,
yic chequel to yel jun lolonel tzecꞌ yalel ebꞌ chiꞌ.]
Marcos -créditos