Ix pitzvixi Jesús
28
Axo ix ecꞌbꞌat scꞌual icꞌoj ip,
ix qꞌuin̈ibꞌi dꞌa domingo,
bꞌabꞌel cꞌu yic semana.
Ix bꞌat ix María aj Magdala yedꞌ junxo ix María bꞌaj ix acꞌjicanoch snivanil Jesús.
2 Axo yic van scꞌoch ebꞌ ix taꞌ,
ix ecꞌ jun nivan quixcabꞌ,
yujto a jun yángel Dios Cajal ix emta dꞌa satchaan̈.
Ix cꞌoch dꞌa jun qꞌuen chiꞌ.
Ix yicꞌanelta qꞌuen smacul chiꞌ.
Ix em cꞌojan dꞌa yibꞌan̈ qꞌueen.
3 Icha yecꞌ copnaj cꞌacꞌ yilji,
te sac spichul icha qꞌuen sacbꞌat.
4 Axo ebꞌ soldado,
van stan̈van qꞌuen qꞌueen chiꞌ,
ayic ix yilan ebꞌ,
ix te ibꞌxiqꞌue ebꞌ yuj xivelal.
Ix laj telvi ebꞌ,
icha chamnac ix aj ebꞌ.
5 Axo jun ángel chiꞌ ix alan dꞌa ebꞌ ix:
—Man̈ ex xivoc.
Vojtac to a Jesús tzecꞌ e sayaꞌ,
aton jun ix culusajqꞌuei.
6 Man̈xo ayococh dꞌa tic.
Toxo ix pitzvixi icha yaj yalancan dꞌayex.
Cotan̈ec,
ilecnabꞌi,
ilec yedꞌtal bꞌaj ix ul yacꞌoch ebꞌ vin̈.
7 Ixiquec,
bꞌat alec elan̈chamel dꞌa ebꞌ scꞌaybꞌum to ix pitzvixi dꞌa scal ebꞌ chamnac.
Ol bꞌabꞌlajcꞌoch eyuuj dꞌa Galilea.
Ataꞌ ol eyilaꞌ.
Aton juntzan̈ tic tzul val dꞌayex,
xchi jun ángel chiꞌ dꞌa ebꞌ ix.
8 Dꞌa jun rato chiꞌ,
ix yactancan qꞌuen bꞌaj mucan chiꞌ ebꞌ ix.
Ix xiv ebꞌ ix,
palta ix te tzalajpax ebꞌ ix.
Yuj chiꞌ,
ix bꞌat lemnaj ebꞌ ix yal dꞌa ebꞌ scꞌaybꞌum Jesús chiꞌ.
9 Axo yic vanto sbꞌey ebꞌ ix,
ix schꞌoxan sbꞌa Jesús dꞌa ebꞌ ix.
Ix cꞌanbꞌaj scꞌool ebꞌ ix yuuj.
Yuj chiꞌ,
ix cꞌoch ebꞌ ix dꞌa stzꞌey.
Ix yacꞌanem sbꞌa ebꞌ ix dꞌay.
Ix syaman yoc Jesús chiꞌ ebꞌ ix.
10 Ix yalan dꞌa ebꞌ ix:
—Man̈ ex xivoc.
Ixiquec,
bꞌat alec dꞌa ebꞌ in cꞌaybꞌum to sbꞌat ebꞌ dꞌa Galilea,
yujto ataꞌ ol in yil ebꞌ,
xchi dꞌa ebꞌ ix.
A tas yalnac ebꞌ soldado
11 Ayic van sbꞌat ebꞌ chiꞌ,
a jayvan̈ ebꞌ soldado ix tan̈van qꞌuen chiꞌ,
ix bꞌat ebꞌ dꞌa chon̈abꞌ.
Ix cꞌoch ebꞌ dꞌa ebꞌ vin̈ sat sacerdote.
Ix laj yal ebꞌ tas ix uji.
12 Ix lajvi yabꞌan juntzan̈ chiꞌ ebꞌ vin̈,
ix bꞌat yal-lan yabꞌ ebꞌ vin̈ yedꞌ ebꞌ vin̈ ichamtac vinac ay yopisio.
Ix laj yalan ebꞌ vin̈ to nivan tumin ol yacꞌ ebꞌ vin̈ dꞌa ebꞌ soldado chiꞌ.
13 Yuj chiꞌ,
ix yalan ebꞌ vin̈ dꞌa ebꞌ soldado chiꞌ:
—Yovalil tzeyalaꞌ:
Ayic vaynac on̈ dꞌacꞌvalil,
a ebꞌ scꞌaybꞌum xidꞌ icꞌanelta snivanil Jesús chiꞌ,
xe chi.
14 Tato syabꞌ specal jun tic vin̈ gobernador,
malaj pena.
Ol on̈ bꞌat co bꞌo yaj yedꞌ vin̈,
xchi ebꞌ vin̈.
15 Yuj chiꞌ,
ix scha juntzan̈ tumin chiꞌ ebꞌ vin̈ soldado chiꞌ.
Ix ecꞌ yalan ebꞌ vin̈ icha ix yal ebꞌ vin̈ chiꞌ.
Yuj chiꞌ an̈ejaꞌ tzꞌabꞌchaj jun es chiꞌ dꞌa scal ebꞌ israel.
Schecnacbꞌat ebꞌ scꞌaybꞌum Jesús
16 Axo ebꞌ uxluchvan̈ scꞌaybꞌum Jesús chiꞌ,
ix bꞌat ebꞌ dꞌa Galilea.
Ataꞌ ix cꞌoch ebꞌ dꞌa jun tzalan yalnaccan Jesús.
17 Ataꞌ ix yil Jesús ebꞌ.
Ix laj em cumjabꞌ ebꞌ dꞌay.
Palta ay jayvan̈ ebꞌ ay schabꞌcꞌolal.
18 Axo Jesús,
ix cꞌoch dꞌa stzꞌey ebꞌ.
Ix yalan dꞌa ebꞌ:
—In acꞌjioch Yajalil dꞌa yibꞌan̈ masanil tas ay dꞌa satchaan̈ yedꞌ dꞌa yolyibꞌan̈qꞌuinal tic.
19 Yuj chiꞌ,
ixiquec,
cꞌaybꞌejec ebꞌ anima dꞌa junjun chon̈abꞌ,
yic ol laj och ebꞌ in cꞌaybꞌumoc.
Slaj eyacꞌ bautizar ebꞌ dꞌa sbꞌi Dios Mamabꞌil yedꞌ Dios Uninabꞌil,
a in ton tic yedꞌ Dios Espíritu Santo.
20 Tze cꞌaybꞌej ebꞌ,
yic vachꞌ a jantacn̈ej tas valnaccan dꞌayex ol laj scꞌanabꞌajej ebꞌ.
Abꞌec,
ay in ecꞌ eyedꞌ dꞌa masanil tiempo,
masanto ol lajvoquecꞌ yolyibꞌan̈qꞌuinal tic,
xchi Jesús dꞌa ebꞌ.