3 A vin̈aj Judas,

vin̈ ix acꞌanoch Jesús dꞌa yol scꞌabꞌ ebꞌ vin̈,

ayic ix yabꞌan vin̈ to ix och chamel dꞌa yibꞌan̈ Jesús chiꞌ,

ix snaan sbꞌa scꞌool vin̈.

Ix bꞌatxi vin̈ bꞌaj ay ebꞌ vin̈ sat sacerdote yedꞌ ebꞌ vin̈ ichamtac vinac,

yujto ix snibꞌej vin̈ ix yacꞌxi meltzaj 30 plata tumin ix scha dꞌa ebꞌ vin̈.

4 Yuj chiꞌ,

ix yalan vin̈ dꞌa ebꞌ vin̈:

—Ix och val in mul,

yujto ix vacꞌoch Jesús chiꞌ dꞌa yol scꞌabꞌ chamel,

palta malaj jabꞌoc smul,

xchi vin̈.

Palta ix yalan ebꞌ vin̈:

—A on̈ tic,

malaj coch dꞌa a mul chiꞌ.

A chumxo dꞌa chiꞌ,

xchi ebꞌ vin̈.

5 A ix yabꞌan jun chiꞌ vin̈,

ix syumancan och juntzan̈ tumin chiꞌ vin̈ dꞌa yol yamaqꞌuil stemplo Dios.

Ix lajvi chiꞌ,

ix bꞌat vin̈ sdꞌun̈bꞌejcham sbꞌa.

6 Axo ebꞌ vin̈ sat sacerdote ix sicꞌanqꞌue qꞌuen tumin chiꞌ,

ix yalan ebꞌ vin̈:

—Max yal-laj cacꞌanoch juntzan̈ tumin tic dꞌa scal qꞌuen ofrenda,

yujto ix manjicham jun vin̈ yuj qꞌueen,

xchi ebꞌ vin̈.

7 Yuj chiꞌ,

ix laj yal-lan yabꞌ ebꞌ vin̈.

Ix yalan ebꞌ vin̈ tas ol och qꞌueen.

Ix lajvi chiꞌ,

ix smanan jun sluum jun vin̈ tzꞌacum ebꞌ vin̈,

yic ataꞌ smucji ebꞌ chꞌoc chon̈abꞌil slaj chami.

8 Yuj chiꞌ,

Slumal Chicꞌ ix sbꞌiejcan jun lugar chiꞌ.

Icha chiꞌ ix sbꞌiejn̈ejcani.

9 Icha chiꞌ ix aj yelcꞌoch tas yalnaccan vin̈aj Jeremías schecabꞌ Dios dꞌa pecaꞌ,

ayic yalannaccani:

Ix yicꞌ 30 plata tumin ebꞌ,

aton stojol jantac snanac ebꞌ aj Israel.

10 A dꞌa jun tumin chiꞌ ix manjiel sluum jun vin̈ tzꞌacum.

Icha chiꞌ yalnaccan Dios Cajal dꞌayin,

xchi.

11 Ayic ix cꞌoch Jesús dꞌa yichan̈ vin̈aj Pilato,

vin̈ gobernador,

ix scꞌanbꞌan vin̈ dꞌay:

—¿Tom a ach tic,

Sreyal ach ebꞌ israel?

xchi vin̈ dꞌay.

—Yel ton tzalaꞌ,

xchi.

12 Axo ebꞌ vin̈ sat sacerdote yedꞌ ebꞌ vin̈ ichamtac vinac,

ix yacꞌbꞌat ebꞌ vin̈ dꞌa yibꞌan̈,

palta maj tacꞌvoclaj.

13 Yuj chiꞌ ix yalanxi vin̈aj Pilato chiꞌ dꞌay:

—¿Tom max abꞌ juntzan̈ tas syacꞌoch ebꞌ vin̈ dꞌa ibꞌan̈ tic?

xchi vin̈ dꞌay.

14 Palta man̈ val jabꞌoc ix tacꞌvi.

Yuj chiꞌ ix te sat scꞌool vin̈ yuuj.

15 A dꞌa junjun abꞌil dꞌa scꞌual qꞌuin̈,

tzꞌacꞌjielta junjun ebꞌ preso yuj vin̈ gobernador,

ato syalaꞌ,

mach scꞌanelta ebꞌ anima.

16 A dꞌa preso chiꞌ ayoch jun vin̈ scuchan Barrabás.

Ojtacabꞌil vin̈ yuj ebꞌ anima smasanil.

17 Ayic molanecꞌ ebꞌ chiꞌ,

ix scꞌanbꞌan vin̈aj Pilato chiꞌ dꞌa ebꞌ:

—¿Mach junoc e gana svaqꞌuel dꞌa libre,

am vin̈aj Barrabás,

mato a Jesús,

syal ebꞌ Cristoal?

xchi vin̈ dꞌa ebꞌ.

18 Icha chiꞌ ix yal vin̈,

yujto yojtactaxon vin̈ to yuj schichoncꞌolal ebꞌ vin̈ sacerdote ix acꞌjioch Jesús chiꞌ dꞌa yol scꞌabꞌ vin̈.

19 Cꞌojanem vin̈aj Pilato chiꞌ dꞌa sdespacho,

ix cꞌoch schecabꞌ ix yetbꞌeyum vin̈ dꞌay.

Ix yalanbꞌat ix:

Man̈ a locbꞌej a bꞌa dꞌa vin̈ tojol spensar chiꞌ,

yujto ix in vayichej vin̈ qꞌuiqꞌui.

Tzin xivbꞌat yuj jun in vayich chiꞌ,

xchi ix.

20 Palta axo ebꞌ vin̈ sat sacerdote yedꞌ ebꞌ vin̈ ichamtac vinac ix acꞌan scꞌool ebꞌ anima,

yic a vin̈aj Barrabás scꞌanelta ebꞌ.

Axo Jesús scꞌan cham ebꞌ.

21 Ix scꞌanbꞌanxi vin̈ gobernador chiꞌ dꞌa ebꞌ:

—¿Mach junoc ebꞌ chavan̈ tic e gana svaqꞌuelta dꞌa libre?

xchi vin̈.

—A vin̈aj Barrabás co gana tzaqꞌuelta,

xchi ebꞌ.

22 —Palta ¿tas ol vutoc Jesús,

tzꞌaljipax Cristoal tic?

xchi vin̈.

—Culusejqꞌuei,

xchi ebꞌ smasanil.

23 —Palta ¿tas val junoc chucal ix scꞌulej vin̈ tzeyilaꞌ?

xchi vin̈.

Palta ix qꞌue umnaj ebꞌ yalani:

—Culusejqꞌuei,

xchi ebꞌ.

24 Axo ix yilan vin̈aj Pilato chiꞌ to max yacꞌ ganar vin̈ scolan Jesús,

ton̈ej ix vachꞌ qꞌue somnaj ebꞌ anima yalan yuuj.

Yuj chiꞌ,

ix schec vin̈ icꞌjicot jabꞌ yaal.

Ix sbꞌicanel scꞌabꞌ vin̈ dꞌa yichan̈ ebꞌ anima chiꞌ smasanil.

Icha chiꞌ ix yutej vin̈ schꞌoxan dꞌa ebꞌ to man̈ locanoc vin̈ yedꞌ ebꞌ.

Ix yalanxi vin̈ dꞌa ebꞌ:

—A in tic malaj voch dꞌa schamel vin̈ tojol spensar tic.

E chumxo dꞌa chiꞌ,

xchi vin̈ dꞌa ebꞌ.

25 Yuj chiꞌ,

ix laj yalan ebꞌ smasanil dꞌa vin̈:

—Ochocabꞌcan schamel vin̈ chiꞌ co muloc yedꞌ dꞌa yibꞌan̈ ebꞌ cuninal,

xchi ebꞌ.

26 Ayic ix yabꞌan jun chiꞌ vin̈,

ix acꞌjielta vin̈aj Barrabás chiꞌ dꞌa libre.

Axo Jesús ix schec macꞌjoc vin̈.

Ix acꞌjioch dꞌa yol scꞌabꞌ ebꞌ sculusanqꞌuei.

27 Axo ebꞌ vin̈ soldado yic vin̈ yajal chiꞌ,

ix yicꞌanbꞌat Jesús ebꞌ dꞌa spat vin̈.

Ataꞌ ix yavtejcot ebꞌ soldado ebꞌ masanil.

28 Ix squichan el spichul Jesús ebꞌ vin̈.

Ix yacꞌanoch junxo pichul chacchac ebꞌ vin̈ dꞌay.

29 Ix sjalan setan jun teꞌ qꞌuiix ebꞌ vin̈.

Ix yacꞌanqꞌue ebꞌ vin̈ dꞌa sjolom scoronaoc,

yic lajan tzꞌaj yilji icha junoc rey snaan ebꞌ vin̈.

Ix yacꞌoch jun teꞌ aj ebꞌ vin̈ scꞌocochoc dꞌa svachꞌ cꞌabꞌ.

Ix lajvi chiꞌ,

ix laj stzꞌacan em cuman sbꞌa ebꞌ vin̈ dꞌa yichan̈.

Ix laj bꞌuchvaj ebꞌ vin̈ dꞌay.

Ix laj stzꞌacan yal ebꞌ vin̈ dꞌay:

—Tzalajan̈ ach sreyal ebꞌ israel,

xchi ebꞌ vin̈.

30 Ix tzubꞌaj yuj ebꞌ vin̈.

Ix tocꞌjiecꞌ teꞌ aj chiꞌ dꞌay.

Ix ste pajanoch teꞌ ebꞌ vin̈ dꞌa sjolom.

31 Ayic ix lajvi sbꞌuchvaj ebꞌ vin̈ dꞌay,

ix squichanxiel jun pichul chacchac chiꞌ ebꞌ vin̈ dꞌay.

Ix yacꞌanxioch spichultaxon chiꞌ ebꞌ vin̈.

Ichato chiꞌ ix yicꞌanbꞌat ebꞌ vin̈ bꞌaj ol culusajqꞌueoc.

32 Ayic van sbꞌat ebꞌ vin̈ yedꞌ Jesús,

ix ilchajel jun vin̈ aj Cirene scuchan Simón yuj ebꞌ vin̈.

Ix acꞌji pural vin̈ yuj ebꞌ vin̈ yic scuchanbꞌat teꞌ sculusal Jesús chiꞌ.

33 Icha chiꞌ ix aj scꞌoch ebꞌ dꞌa jun lugar scuch Gólgota.

A Gólgota chiꞌ,

syalelcꞌochi,

Bꞌaj Ay Sbꞌaquil Jolom.

34 Ataꞌ ix yacꞌ yal uva ebꞌ vin̈ yuqꞌuej,

calan yaj yedꞌ an̈ ixaj.^*

Palta ayic ix yabꞌlani,

maj schalaj yuqꞌuej dꞌa ebꞌ vin̈.

35 Ichato chiꞌ ix culusajqꞌue Jesús chiꞌ.

Axo ebꞌ vin̈ soldado chiꞌ,

ix yacꞌ suerte ebꞌ vin̈,

yic spojecꞌ spichul Jesús ebꞌ vin̈ dꞌa spatic.

36 Ix lajvi chiꞌ,

ix em cꞌojan ebꞌ stan̈van yilaꞌ.

37 Axo dꞌa sjolom sculusal chiꞌ ix och jun letra.

A tzꞌalani tas yuj ix acꞌjioch chamel dꞌa yibꞌan̈.

Aton Jesús tic,

Sreyal ebꞌ israel,

xchi jun letra chiꞌ.

38 An̈ejtonaꞌ ay chavan̈ ebꞌ elcꞌum ix culusajqꞌue yedꞌoc,

jun dꞌa svachꞌ,

jun dꞌa sqꞌuexan̈.

Junjun sculusal junjun ebꞌ.

39 Axo ebꞌ ix laj ecꞌ taꞌ,

sbꞌuchvajqꞌue ebꞌ dꞌay.

40 Ix yalan ebꞌ:

—A ach ton tic,

ix alaꞌ to tza satel stemplo Dios,

axo dꞌa schabꞌjial tza bꞌoanxiqꞌue sqꞌuexul.

Col a bꞌa ticnaic.

Tato yel Yuninal ach Dios,

eman̈cot dꞌa teꞌ culus chiꞌ,

xchi ebꞌ dꞌay.

41 Icha pax chiꞌ ebꞌ vin̈ sat sacerdote,

ebꞌ vin̈ cꞌaybꞌum dꞌa ley Moisés,

ebꞌ vin̈ fariseo yedꞌ ebꞌ vin̈ ichamtac vinac,

ix laj bꞌuchvaj ebꞌ vin̈ dꞌay.

Ix laj yalanqꞌue ebꞌ vin̈:

42 —Nivanoc ix colchaj juntzan̈xo ebꞌ yuj vin̈,

palta ina max ujilaj scolan sbꞌa vin̈ ticnaic.

A jun vin̈ tic nivanoc co Reyal a on̈ israel on̈ tic.

A ticnaic,

yicꞌocabꞌemta sbꞌa vin̈ dꞌa teꞌ culus tic quilaꞌ.

Ichato chiꞌ,

ol cacꞌanoch dꞌa co cꞌool.

43 Nivanoc ix yacꞌoch Dios vin̈ yipoc scꞌool.

Yuj chiꞌ colvajocabꞌ Dios chiꞌ yedꞌ vin̈ quil ticnaic tato yel xajan vin̈ yuj Dios.

Inato ix yal vin̈ to Yuninal Dios,

xchi ebꞌ vin̈.

44 Axo ebꞌ elcꞌum culusabꞌilqꞌue yedꞌ chiꞌ,

ix bꞌuchvaj pax ebꞌ dꞌay.

45 Axo dꞌa chimcꞌualil,

ix qꞌuicꞌbꞌi dꞌa masanil yolyibꞌan̈qꞌuinal tic,

masanto dꞌa a las tres.

46 Ix lajvi chiꞌ,

ix avajqꞌue Jesús chiꞌ:

—Elí,

Elí,

¿lama sabactani?

xchi.

Syalelcꞌochi:

Ach in Diosal,

ach in Diosal,

¿tas yuj tzin actejcan in chꞌocoj?

xchi.

47 Ay jayvan̈ ebꞌ ayecꞌ taꞌ,

ayic ix yabꞌan ebꞌ jun ix yal chiꞌ,

ix yalan ebꞌ:

—A dꞌa vin̈aj Elías,

vin̈ schecabꞌ Dios,

ataꞌ tzꞌavaji,

xchi ebꞌ.

48 Dꞌa jun rato chiꞌ,

ix bꞌat lemnaj jun vin̈.

Ix yicꞌancot jun tzꞌubꞌlabꞌ vin̈,

ix slabꞌanem vin̈ dꞌa scal vinagre.

Ix yacꞌanoch vin̈ dꞌa sjolom jun teꞌ aj,

ix yacꞌan vin̈ stzꞌubꞌuꞌ.

49 Palta ay juntzan̈xo ebꞌ ix alan dꞌa vin̈:

—Yilxo vin̈,

quil bꞌela tato ol ja vin̈aj Elías chiꞌ ul scol vin̈,

xchi ebꞌ.

50 Axo Jesús,

te chaan̈ ix avajqꞌue junelxo.

Ichato chiꞌ ix chami.

51 Val dꞌa jun rato chiꞌ,

axo jun cꞌapac cortina ayoch smaculoc snan̈al stemplo Dios,

chabꞌn̈ej ix aj snan̈al cꞌapac sn̈icꞌchaji.

Ix n̈icꞌchajcot dꞌa sjolom masanto dꞌa yoctac.

Ix ecꞌ pax jun nivan quixcabꞌ.

Ix laj jat juntzan̈ nivac qꞌueen.

52 Axo juntzan̈xo qꞌuen joybꞌilel yool bꞌaj ayoch ebꞌ chamnac,

ay qꞌuen ix laj jacvi.

Axo juntzan̈ ebꞌ yicxo Dios chamnacxo,

tzijtum ebꞌ ix pitzvixi yedꞌ snivanil.

53 Ato yic ix pitzvixi Jesús,

ato taꞌ ix elta ebꞌ dꞌa juntzan̈ qꞌuen bꞌaj aycanoch chiꞌ.

Ix cꞌoch ebꞌ dꞌa yol chon̈abꞌ Jerusalén chiꞌ,

aton jun chon̈abꞌ yicn̈ej Dios yaji.

Tzijtum ebꞌ anima ix laj ilan ebꞌ.

54 Axo ebꞌ vin̈ soldado stan̈vumal Jesús yedꞌ vin̈ scapitanil ebꞌ,

ix yabꞌan ebꞌ vin̈ yecꞌ jun quixcabꞌ chiꞌ.

Ix yilanpax ebꞌ vin̈ juntzan̈xo tas ix uji.

Yuj chiꞌ,

ix te xiv ebꞌ vin̈.

Ix laj yalan ebꞌ vin̈:

—A jun vin̈ ix cham tic,

val yel Yuninal ton Dios,

xchi ebꞌ vin̈.

55 Ay pax juntzan̈ ebꞌ ix ix najattac aycoti,

van yilan ebꞌ ix.

A ebꞌ ix chiꞌ,

ecꞌnac ebꞌ ix yedꞌ Jesús chiꞌ ayic ayecꞌ dꞌa Galilea.

Axo scoti,

scot ebꞌ ix yedꞌoc yic tzꞌacꞌji servil yuj ebꞌ ix.

56 A dꞌa scal ebꞌ ix,

ayecꞌ ix María aj Magdala,

ix María snun vin̈aj Jacobo yedꞌ vin̈aj José yedꞌ pax ix snun ebꞌ yuninal vin̈aj Zebedeo.

57 Ay jun vin̈ bꞌeyum scuchan José aj chon̈abꞌ Arimatea.

Scꞌaybꞌumpax Jesús yaj vin̈.

58 Axo dꞌa yemcꞌualil ix cꞌoch vin̈ dꞌa vin̈aj Pilato.

Ix scꞌananemta snivanil Jesús chiꞌ vin̈.

Yuj chiꞌ ix yalan vin̈aj Pilato chiꞌ to tzꞌacꞌji snivanil Jesús chiꞌ dꞌa vin̈.

59 Ix bꞌat yicꞌanemta vin̈.

Ix spichanoch vin̈ dꞌa jun cꞌapac sábana te sac.

60 Ay jun qꞌueen joybꞌilxoel yool,^*

yictaxon vin̈aj José chiꞌ,

mantalaj junoc chamnac tzꞌacꞌjioch dꞌa yool.

Ataꞌ ix yacꞌcanoch snivanil Jesús chiꞌ vin̈.

Ix sbꞌalanoch jun nivan qꞌueen vin̈ smaculoc stiꞌ,

ix pax vin̈.

61 Axo ix María aj Magdala yedꞌ junxo ix María,

ix cꞌoch ebꞌ ix taꞌ,

ix em cꞌojan ebꞌ ix dꞌa slacꞌanil qꞌueen.

62 A dꞌa jun cꞌual chiꞌ,

scꞌual yacꞌan lista sbꞌa ebꞌ israel,

yujto qꞌuicꞌanocxo scꞌual icꞌoj ip.

Axo dꞌa junxo cꞌu ix cꞌoch ebꞌ vin̈ sat sacerdote yedꞌ ebꞌ vin̈ fariseo dꞌa vin̈aj Pilato.

63 Ix yalan ebꞌ vin̈:

—Ach cajal,

sco nacot jun vin̈ esalvum chiꞌ,

a ix yalani:

Schabꞌjial in chami,

ol in pitzvocxi,

nivanoc xchi vin̈.

64 Yuj chiꞌ,

ma max acꞌ pavor dꞌayon̈.

Tza checbꞌat stan̈vumal jun bꞌaj xidꞌ acꞌjicanoch snivanil vin̈ chiꞌ,

masanto tzꞌel schabꞌjial chiꞌ.

Tato maay,

tecan ol bꞌat ebꞌ scꞌaybꞌum vin̈ yelqꞌuejelta snivanil chiꞌ.

Ol lajvoc chiꞌ,

axo ol yalanel ebꞌ dꞌa scal ebꞌ anima:

Ix pitzvixi Jesús dꞌa scal ebꞌ chamnac,

xcham ebꞌ.

Tato icha chiꞌ,

axo jun slajvubꞌalxo es más nivan ol aj dꞌa yichan̈ jun bꞌabꞌel es ix yal chiꞌ,

xchi ebꞌ vin̈ dꞌa vin̈aj Pilato chiꞌ.

65 Yuj chiꞌ ix yalan vin̈aj Pilato chiꞌ:

—A ex tic ay e soldado.

Olxo eyilaꞌ tas ol eyutoc e tan̈vani,

xchi vin̈.

66 Yuj chiꞌ,

ix yicꞌanbꞌat ebꞌ soldado ebꞌ vin̈ chiꞌ.

Ix stan̈van qꞌuen ebꞌ vin̈.

Ix yacꞌoch jun sello ebꞌ vin̈ dꞌa smacul qꞌueen.

Axo ebꞌ soldado chiꞌ,

ix can ebꞌ dꞌa stiꞌ qꞌueen stan̈vej.