2 Ataꞌ ix syamoch ebꞌ yacꞌanoch juntzan̈ es dꞌa yibꞌan̈.

Ix laj yalan ebꞌ:

—Ix quilaꞌ to a vin̈ van yacꞌan somchajel ebꞌ quetchon̈abꞌ.

Syalanpax vin̈ to max yal cacꞌan qꞌuen tumin scꞌanjiel dꞌayon̈ yuj vin̈ yajal dꞌa Roma.

A val vin̈ tzꞌalanpaxi to Cristo vin̈,

syalelcꞌochi to rey vin̈,

xchi ebꞌ dꞌa vin̈aj Pilato chiꞌ.

3 Yuj chiꞌ ix scꞌanbꞌej vin̈aj Pilato chiꞌ dꞌay:

—Tzin cꞌanbꞌej dꞌayach,

¿tom sreyal ach ebꞌ israel?

xchi vin̈ dꞌay.

—A in toni,

ichaton tzutej alan chiꞌ,

xchi Jesús dꞌa vin̈.

4 Yuj chiꞌ,

ix yal vin̈aj Pilato chiꞌ dꞌa ebꞌ vin̈ sat sacerdote yedꞌ dꞌa ebꞌ anima chiꞌ:

—Malaj jabꞌoc smul jun vin̈ tic tzꞌilchaj vuuj,

xchi vin̈.

5 Palta axo ebꞌ,

yelcꞌolal yalan ebꞌ:

—A vin̈ tic,

masanil ebꞌ anima aj Judea tic van somchajel yuj juntzan̈ cꞌaybꞌubꞌal syacꞌ vin̈.

Ato dꞌa Galilea ix schael yich vin̈ yalani,

masanto ix javi vin̈ dꞌa Judea tic,

xchi ebꞌ dꞌa vin̈aj Pilato chiꞌ.

6 Ayic ix yabꞌan juntzan̈ chiꞌ vin̈aj Pilato chiꞌ,

ix scꞌanbꞌan vin̈ yabꞌ dꞌa ebꞌ,

tato a Jesús aj Galilea.

7 Axo yic ix yabꞌan vin̈ to aj Galilea,

yuj chiꞌ ix yacꞌanbꞌat dꞌa vin̈aj Herodes yajal dꞌa Galilea chiꞌ yujto ayecꞌ vin̈ dꞌa Jerusalén dꞌa juntzan̈ cꞌual chiꞌ.

8 Ayic ix yilan vin̈aj Herodes chiꞌ scꞌoch Jesús,

te vachꞌ ix yabꞌ vin̈,

yujto ayxo stiempoal yabꞌan specal vin̈.

Yuj chiꞌ sganaxo vin̈ slolon yedꞌoc.

Snibꞌej val vin̈ syil sbꞌoan junoc milagro.

9 Tzijtum tas ix scꞌanbꞌej vin̈ dꞌay,

axo Jesús man̈ jabꞌoc ix tacꞌvi dꞌa vin̈.

10 Axo ebꞌ vin̈ sat sacerdote yedꞌ ebꞌ vin̈ cꞌaybꞌum dꞌa ley Moisés ayecꞌ taꞌ,

yelcꞌolal ix yacꞌoch ebꞌ vin̈ dꞌa yibꞌan̈.

11 Yuj chiꞌ a vin̈aj Herodes chiꞌ yedꞌ ebꞌ soldado,

ix sbꞌaj Jesús chiꞌ ebꞌ.

Ix sbꞌuchan pax ebꞌ.

Ix stzꞌacan yacꞌoch juntzan̈ pichul ebꞌ te vachꞌ dꞌay,

icha spichul ebꞌ vin̈ rey.

Ix lajvi chiꞌ,

ix yacꞌanxi meltzaj Jesús vin̈ dꞌa vin̈aj Pilato.

12 A dꞌa jun cꞌual chiꞌ ix yamigoejqꞌue sbꞌa vin̈aj Pilato chiꞌ yedꞌ vin̈aj Herodes,

yujto a dꞌa yalan̈taxo yajcꞌool sbꞌa ebꞌ vin̈.

13 Axo vin̈aj Pilato chiꞌ ix molbꞌan ebꞌ vin̈ sat sacerdote,

ebꞌ vin̈ ay yopisio yedꞌ pax ebꞌ anima smasanil.

14 Ix yalanelta vin̈ dꞌa scal ebꞌ:

—A vin̈ ix ul eyacꞌ tic dꞌayin,

yujto tzeyalaꞌ to somchajel ebꞌ anima yuj vin̈,

palta ina dꞌa eyichan̈ ix in cꞌanbꞌej vabꞌ dꞌa vin̈,

palta malaj jabꞌoc smul vin̈ scheclajelta vuj icha ix aj eyalani.

15 An̈ejaꞌ pax vin̈aj Herodes,

malaj tas ix ilchaj yuj vin̈ dꞌa vin̈.

Yuj chiꞌ ix schecxicot vin̈ dꞌayon̈.

Inai,

malaj jabꞌoc smul vin̈ yic smoj schami.

16-17 Yuj chiꞌ,

ton̈ej ol in chec macꞌjoc vin̈,

ol vacꞌanxiel vin̈ dꞌa libre,

xchi vin̈ dꞌa ebꞌ.

18 Axo yic ix yabꞌan ebꞌ anima to icha chiꞌ,

ix laj avajqꞌue ebꞌ:

—A vin̈ tic,

chamocabꞌ vin̈.

Aocabꞌ vin̈aj Barrabás chiꞌ tzꞌel dꞌa libre,

xchi ebꞌ.

19 A vin̈aj Barrabás chiꞌ,

preso yaj vin̈,

yujto locan vin̈ yedꞌ ebꞌ vin̈ ix acꞌan oval yedꞌ ebꞌ vin̈ yajal dꞌa yol chon̈abꞌ chiꞌ.

Macꞌumcham anima pax vin̈.

20 Axo vin̈aj Pilato chiꞌ snibꞌej vin̈ syaqꞌuel Jesús dꞌa libre.

Yuj chiꞌ icha chiꞌ ix yutej vin̈ yalanxi dꞌa ebꞌ anima.

21 Palta ayic ix yabꞌan ebꞌ to icha chiꞌ,

ix qꞌue umnaj ebꞌ yavaji:

—Culusejqꞌue vin̈.

Culusejqꞌue vin̈,

xchi ebꞌ.

22 Ix yalanxi vin̈aj Pilato chiꞌ yoxelal dꞌa ebꞌ:

—¿Tas val smul vin̈ dꞌayex jun?

Malaj val jabꞌoc smul vin̈ tzꞌilchaj vuuj yic smoj schami.

Yuj chiꞌ ton̈ej ol in chec macꞌjoc vin̈,

ol vacꞌanxiel vin̈ dꞌa libre,

xchi vin̈ dꞌa ebꞌ.

23 Axo ebꞌ,

ix te qꞌue umnaj yavaji to yovalil sculusajqꞌuei.

Te chaan̈ ix avajqꞌue ebꞌ yedꞌ ebꞌ vin̈ sat sacerdote.

Yuj chiꞌ ix yacꞌ ganar ebꞌ.

24 Ix yalan vin̈aj Pilato chiꞌ:

Ujocabꞌ icha sgana ebꞌ,

xchi vin̈.

25 Axo vin̈ locan dꞌa scal oval chiꞌ,

vin̈ macꞌumcham anima chiꞌ,

vin̈ preso yaji,

a vin̈ ix acꞌjielta dꞌa libre icha sgana ebꞌ.

Axo Jesús ix acꞌjicanoch dꞌa yol scꞌabꞌ ebꞌ icha sgana.

26 Ayic van yicꞌanbꞌat Jesús ebꞌ bꞌaj ol chamoc,

ay jun vin̈ aj Cirene scuchan Simón,

spetoj vin̈ dꞌa smunlajel,

ix yamchaj vin̈ yuj ebꞌ soldado.

Axo vin̈ ix checji scuchbꞌat sculusal Jesús chiꞌ.

Ix och tzacꞌan vin̈ yuuj.

27 Tzijtum ebꞌ anima ix och tzacꞌan yuuj.

Yedꞌ pax ebꞌ ix ix,

veqꞌueqꞌui yel yav ebꞌ ix yocꞌ yuuj.

28 Axo Jesús ix meltzajbꞌat qꞌuelan dꞌa ebꞌ ix,

ix yalani:

—Ex ix aj Jerusalén,

man̈ ex ocꞌ vuuj.

Ocꞌan̈ec eyuuj yedꞌ yuj ebꞌ eyuneꞌ,

29 yujto ay val jun cꞌual ol javoc,

ol eyalani:

A val ebꞌ ix malaj yuneꞌ,

ebꞌ ix toxon max unevi yedꞌ ebꞌ ix man̈ yojtacoc yacꞌan chunoc yuneꞌ,

te vachꞌ yic ebꞌ ix,

xe chama.

30 A dꞌa jun tiempoal chiꞌ,

ol laj yal ebꞌ anima icha tic:

Tzoc val cot juntzan̈ vitz yedꞌ juntzan̈ tzalquixtac tic dꞌa quibꞌan̈ yic tzon̈ scꞌubꞌejeli,

xcham ebꞌ.

31 A in tic,

lajan in icha junoc te teꞌ yaax,

palta ina val tas syacꞌoch ebꞌ dꞌa vibꞌan̈.

Ocxom val a ex tic.

Yelxo val nivan tas ol acꞌjococh dꞌa eyibꞌan̈,

yujto lajan ex icha junoc te teꞌ taquin̈xo,

xchi Jesús dꞌa ebꞌ ix.

32 Ay pax chavan̈ ebꞌ vin̈ ay smul ix icꞌjibꞌat yedꞌ Jesús chiꞌ,

yic sculusajqꞌue ebꞌ vin̈ yedꞌoc.

33 Ix cꞌoch ebꞌ dꞌa jun lugar scuchan Bꞌaj Ay Sbꞌaquil Jolom.

Ataꞌ ix culusajqꞌue Jesús yuj ebꞌ vin̈ soldado.

Ix culusajpaxqꞌue chavan̈ ebꞌ vin̈ ay smul chiꞌ yedꞌoc,

jun vin̈ dꞌa svachꞌ,

jun vin̈ dꞌa sqꞌuexan̈.

Junjun sculusal junjun ebꞌ.

34 Ayic van sqꞌue dꞌun̈un̈oc Jesús yuj ebꞌ,

ix yalani:

—Mamin,

acꞌ nivancꞌolal ebꞌ,

yujto man̈ yojtacoc ebꞌ tas van scꞌulani,

xchi dꞌa Dios.

Axo ebꞌ vin̈ soldado,

ix yacꞌ suerte ebꞌ vin̈ yic spojanecꞌ spichul Jesús chiꞌ ebꞌ vin̈ dꞌa spatic.

35 Axo ebꞌ anima,

van yilan ebꞌ tas van yuji chiꞌ.

An̈ejaꞌ pax ebꞌ vin̈ yajal,

ix sbꞌuch Jesús ebꞌ vin̈.

Ix laj yalan ebꞌ vin̈:

—Abꞌi chiꞌ colvajvum vin̈ dꞌa juntzan̈xo.

Scolocabꞌ pax sbꞌa vin̈ ticnaic,

tato dꞌa val yel Cristo vin̈,

vin̈ sicꞌbꞌilel yuj Dios,

xchi ebꞌ vin̈.

36 An̈ejaꞌ ix bꞌuchji pax yuj ebꞌ vin̈ soldado.

Ix cꞌoch ebꞌ vin̈ dꞌa stzꞌey.

Ix yacꞌan vinagre ebꞌ vin̈ yuqꞌuej.

37 Ix yalan ebꞌ vin̈ dꞌay:

—Tato yel Sreyal ach ebꞌ israel,

colto naic a bꞌa quilaꞌ,

xchi ebꞌ vin̈ dꞌay.

38 Ay jun letra ix tzꞌibꞌajoch dꞌa sjolom teꞌ sculusal,

xchi icha tic:

A vin̈ tic Sreyal ebꞌ israel,

xchi.

39 Ay pax jun vin̈ culusabꞌilqꞌue yedꞌoc ix bꞌuchani,

ix yalan vin̈ icha tic:

—Tato yel Cristo ach,

col a bꞌa quilaꞌ,

tzon̈ a colan paxi,

xchi vin̈ dꞌay.

40 Axo junxo vin̈ yetbꞌeyum vin̈ ix cachani,

ix yalan vin̈:

—¿Tom max ach xiv dꞌa Dios?

Ina lajan cajoch dꞌa yol scꞌabꞌ jun yaelal tic yedꞌoc.

41 A on̈ tic,

smoj val scabꞌ syail co chaan spac co mul,

palta a jun vin̈ tic,

malaj tas ix smulej,

xchi vin̈.

42 Ix lajvi chiꞌ ix yalan vin̈ dꞌa Jesús:

—Ach Jesús,

tzin a nacoti ayic ol ach ja acꞌ Yajalil,

xchi vin̈ dꞌay.

43 Ix yalan Jesús dꞌa vin̈:

—Val yel sval dꞌayach,

a dꞌa jun cꞌu tic ol ach cꞌoch vedꞌ dꞌa svachꞌilal,

xchi dꞌa vin̈.

44 Ayic toxo tzꞌoch chimcꞌualil,

ix qꞌuicꞌbꞌi qꞌuinal dꞌa masanil yolyibꞌan̈qꞌuinal tic masanto dꞌa a las tres yic yemcꞌualil.

45 A yoc cꞌu,

majxo yacꞌlaj yoc.

Axo cꞌapac cortina ayoch smaculoc snan̈al yol stemplo Dios,

ix n̈icꞌchaj snan̈al cꞌapac.

46 Axo Jesús te chaan̈ ix avaji,

ix yalan icha tic:

—Mamin,

svabꞌenejcanoch in pixan dꞌa yol a cꞌabꞌ,

xchi dꞌa Dios.

Ix lajvin̈ej yalan jun chiꞌ,

ix chami.

47 Axo jun vin̈ capitán aj Roma,

ayic ix yilan juntzan̈ chiꞌ vin̈,

ix yal vachꞌ lolonel vin̈ dꞌa Dios,

ix yalan vin̈ icha tic:

—Val yel a jun vin̈ tic,

te malaj smul vin̈,

xchi vin̈.

48 Axo masanil ebꞌ anima ayecꞌ chiꞌ taꞌ,

ix yil ebꞌ tas ix uji chiꞌ.

Ix laj paxta ebꞌ,

ix och val pitzꞌan cuscꞌolal dꞌa spixan ebꞌ.

49 Axo jantacn̈ej ebꞌ ojtannac Jesús yedꞌ juntzan̈ ebꞌ ix ix cotnac yedꞌ dꞌa Galilea,

najatto ix laj cotcan dꞌan̈jabꞌ ebꞌ ix.

50 Ay jun vin̈ scuchan José,

aj chon̈abꞌ Arimatea dꞌa yol yic Judea.

Vachꞌ vin̈,

tojol spensar vin̈.

Ay pax yopisio vin̈ yedꞌ ebꞌ vin̈ yajal.

51 Palta maj yacꞌoch sbꞌa vin̈ yedꞌ ebꞌ vin̈ ix acꞌanoch chamel dꞌa yibꞌan̈ Jesús chiꞌ.

Van stan̈van vin̈ svachꞌ och Dios Yajalil.

52 Ix cꞌoch vin̈ dꞌa vin̈aj Pilato,

yic scꞌananemta snivanil Jesús vin̈.

53 Ix lajvi yicꞌan spermiso vin̈ chiꞌ,

ix bꞌat yacꞌan icꞌjoquemta snivanil chiꞌ vin̈.

Ix sbꞌacꞌanoch jun sábana vin̈ dꞌa spatic.

Ix lajvi chiꞌ ix bꞌat yacꞌan acꞌjoc och snivanil vin̈ dꞌa yol jun qꞌuen qꞌueen joybꞌilel yool.

A dꞌa jun qꞌueen chiꞌ,

manta junoc mach smucchaji.

54 Aton dꞌa jun cꞌual chiꞌ vanxo yacꞌan lista sbꞌa ebꞌ yuj scꞌual icꞌoj ip toxo ol yamchaj ochoc.

55 Axo ebꞌ ix ix cotnac yedꞌ Jesús dꞌa Galilea,

ix bꞌat ebꞌ ix yil qꞌuen qꞌueen bꞌaj ix mucchaj chiꞌ.

Ix yilan ebꞌ ix chajtil ix yutej ebꞌ yacꞌanoch snivanil chiꞌ dꞌa yol qꞌueen.

56 Ix lajvi chiꞌ,

ix paxta ebꞌ ix dꞌa sposado.

Ix laj sbꞌoan juntzan̈ yal sucꞌuqꞌui sjabꞌ ebꞌ ix yedꞌ juntzan̈ vachꞌ sucjioch dꞌa snivanil Jesús chiꞌ.

Axo yic ix cꞌoch yorail scꞌual icꞌoj ip,

ix yicꞌan yip ebꞌ ix icha yalan jun checnabꞌil dꞌa ley.