3 Ix laj cꞌoch ebꞌ vin̈ dꞌa stzꞌey,

ix stzꞌacan yal ebꞌ vin̈ dꞌay:

—Tzalajan̈ ach sreyal ebꞌ israel,

xchi ebꞌ vin̈ dꞌay.

Ix tzꞌitjibꞌat sat yuj ebꞌ vin̈.

4 Ix lajvi chiꞌ,

ix elta vin̈aj Pilato dꞌa stiꞌ bꞌaj aycan ebꞌ aj Judea chiꞌ.

Ix yalanelta vin̈ dꞌa scal ebꞌ:

—Ilecnabꞌi,

tic tzin chꞌoxelta vin̈ dꞌayex,

yic vachꞌ tzeyojtaquejeli to malaj jabꞌoc smul vin̈ ix ilchaj vuuj,

xchi vin̈ dꞌa ebꞌ.

5 Ichato chiꞌ ix elta Jesús dꞌa stiꞌ.

An̈ejaꞌ ayqꞌue jun qꞌuiix chiꞌ dꞌa sjolom,

an̈ejaꞌ aypaxoch jun qꞌuicꞌ mutzꞌinac cꞌapac chiꞌ yuuj.

Ix yalanxielta vin̈aj Pilato chiꞌ dꞌa ebꞌ:

—Ina vin̈ tic,

xchi vin̈.

6 Ayic ix yilan ebꞌ vin̈ sat sacerdote yedꞌ ebꞌ vin̈ stan̈vumal templo yelcꞌoch Jesús dꞌa stiꞌ chiꞌ,

ix qꞌue umnaj ebꞌ vin̈ yalani:

—Culusejqꞌue vin̈.

Culusejqꞌue vin̈,

xchi ebꞌ vin̈.

Ix yalanpax vin̈aj Pilato chiꞌ dꞌa ebꞌ:

—Iqꞌuecbꞌat vin̈ a ex tic,

tze culusanqꞌue vin̈ e chꞌocoj.

Xal in tic,

malaj jabꞌoc smul vin̈ tzꞌilchaj vuuj,

xchi vin̈.

7 Ix yalanpax ebꞌ aj Judea chiꞌ dꞌa vin̈:

—Palta ay jun ley aycan dꞌayon̈.

Yuj jun ley chiꞌ yovalil ol miljoccham jun vin̈ tic,

yujto ix yaloch sbꞌa vin̈ Yuninaloc Dios,

xchi ebꞌ.

8 Axo ix yabꞌan jun chiꞌ vin̈aj Pilato chiꞌ,

ix te xivbꞌat vin̈.

9 Yuj chiꞌ ix ochxicꞌoch vin̈ dꞌa yol sdespacho,

ix scꞌanbꞌan vin̈ dꞌa Jesús:

—¿Bꞌajtil cotnac ach jun?

xchi vin̈ dꞌay.

Palta maj tacꞌvoclaj Jesús chiꞌ dꞌa vin̈.

10 Yuj chiꞌ ix yalanxi vin̈ dꞌay:

—¿Tas yuj max ach tacꞌvi dꞌayin?

¿Tom man̈ ojtacoc to ay vopisio ach vacꞌanel dꞌa libre,

ay pax vopisio ach in culusanqꞌuei?

xchi vin̈ dꞌay.

11 Ix yalan Jesús dꞌa vin̈:

—Palta aton Dios acꞌjinac opisio chiꞌ.

Tato maay,

malaj alan jabꞌoc ic dꞌayin.

Yuj chiꞌ a vin̈ ix in acꞌanoch dꞌa yol a cꞌabꞌ,

te ecꞌalto smul vin̈ dꞌa ichan̈,

xchi dꞌa vin̈.

12 Ix lajvi yabꞌan juntzan̈ chiꞌ vin̈,

ix snaan vin̈ tas syutej yacꞌanel Jesús chiꞌ dꞌa libre.

Axo ebꞌ aj Judea chiꞌ,

ix qꞌue umnaj ebꞌ yalani:

—Tato tzaqꞌuel vin̈ dꞌa libre,

ajcꞌool ach dꞌa vin̈ yajal dꞌa Roma syal chiꞌ.

A vin̈ tic ix yaloch sbꞌa vin̈ reyal.

Palta a mach tzꞌalan icha chiꞌ,

ajcꞌool dꞌa vin̈ yajal dꞌa Roma chiꞌ,

xchi ebꞌ dꞌa vin̈.

13 Ix lajvi yabꞌan jun chiꞌ vin̈,

ix yalan vin̈ to tzꞌicꞌjicot Jesús chiꞌ bꞌaj ayecꞌ vin̈ chiꞌ.

Ix lajvi chiꞌ,

ix em cꞌojan vin̈ dꞌa scꞌojnubꞌ bꞌaj sbꞌo yaj oval.

A jun lugar chiꞌ,

Gabata sbꞌi dꞌa hebreo.

Syalelcꞌochi,

bꞌaj latzꞌbꞌilem qꞌuen qꞌueen.

14 Ayic ix em cꞌojan vin̈ chiꞌ,

vanxo yoch chimcꞌualil.

Qꞌuicꞌanocxo sqꞌuin̈ ebꞌ israel yic snaancot ebꞌ tas aj yelnaccot ebꞌ smam yicham ebꞌ dꞌa Egipto.

Axo ix yalanpaxelta vin̈ dꞌa scal ebꞌ aj Judea chiꞌ:

—Ina vin̈ e reyal tic,

xchielta vin̈ dꞌa ebꞌ.

15 Palta ix laj avaj chaan̈ ebꞌ junelxo:

—Chamocabꞌ vin̈.

Chamocabꞌ vin̈.

Culusejqꞌue vin̈,

xchi ebꞌ.

—¿Tom svacꞌ culusejqꞌue vin̈ e reyal tic?

xchi vin̈ dꞌa ebꞌ.

Axo ebꞌ vin̈ sat sacerdote ix tacꞌvi:

—A on̈ tic,

an̈ej vin̈ yajal dꞌa Roma co reyal.

Malaj junocxo,

xchi ebꞌ vin̈.

16 Ichato chiꞌ ix acꞌjioch Jesús dꞌa yol scꞌabꞌ ebꞌ yic sculusajqꞌuei.

Yuj chiꞌ ix yicꞌbꞌat Jesús chiꞌ ebꞌ.

17 Axo Jesús ix cuchan sculusal,

ix icꞌjibꞌat dꞌa jun lugar scuchan Gólgota dꞌa hebreo.

Syalelcꞌochi:

Bꞌaj Ay Sbꞌaquil Jolom.

18 Ataꞌ ix culusajqꞌue Jesús yuj ebꞌ.

Ay chavan̈xo ebꞌ vin̈ ix culusajqꞌue yedꞌoc,

jun vin̈ dꞌa svachꞌ,

junxo vin̈ dꞌa sqꞌuexan̈,

axo dꞌa snan̈al sculusal ebꞌ vin̈ chiꞌ ix culusajqꞌue Jesús chiꞌ.

19 Axo vin̈aj Pilato chiꞌ ix acꞌan tzꞌibꞌchajoch juntzan̈ lolonel dꞌa jun yuneꞌ chem teꞌ.

Ix yacꞌan acꞌjococh vin̈ dꞌa sjolom sculusal Jesús chiꞌ.

Icha tic syal jun chiꞌ:

A Jesús aj Nazaret,

Sreyal ebꞌ israel,

xchi.

20 A jun lugar bꞌaj ix culusajqꞌue Jesús chiꞌ,

a dꞌa tiꞌ chon̈abꞌ ay.

Yuj chiꞌ tzijtum ebꞌ israel ix ilan juntzan̈ lolonel chiꞌ.

A dꞌa hebreo,

dꞌa griego yedꞌ pax dꞌa latín,

aton stiꞌ ebꞌ aj Roma,

ataꞌ ix tzꞌibꞌchajochi.

21 Yuj chiꞌ ix yal ebꞌ vin̈ sat sacerdote dꞌa vin̈aj Pilato chiꞌ:

—Octom man̈oc Sreyal ebꞌ israel ix acꞌ tzꞌibꞌchajochoc.

Octom tzacꞌ tzꞌibꞌchaj icha tic:

A vin̈ tic,

ix yaloch sbꞌa vin̈ Sreyaloc ebꞌ israel,

xchi ebꞌ vin̈ dꞌa vin̈.

22 —A tas ix vacꞌ tzꞌibꞌchajoc,

scann̈ej icha chiꞌ,

xchi vin̈aj Pilato chiꞌ dꞌa ebꞌ vin̈.

23 Axo ebꞌ vin̈ soldado,

ayic manto sculusejqꞌue Jesús ebꞌ vin̈,

ix quichjiel spichul yuj ebꞌ vin̈.

Ix spucanecꞌ ebꞌ vin̈ dꞌa spatic.

Chan̈ poj ix aji.

Junjun yic junjun ebꞌ vin̈.

Palta axo jun colxo spichul,

jalbꞌilcot dꞌa sjolom masanto dꞌa yoctac,

malaj stzꞌisul.

24 Yuj chiꞌ ix yal ebꞌ vin̈ icha tic:

—Tecan a jun tic man̈ ol co n̈icꞌchitejbꞌati.

Vachꞌ ama to scaqꞌuec co suerte dꞌa yibꞌan̈,

yaln̈ej mach on̈ ol quicꞌaꞌ,

xchi ebꞌ vin̈.

Icha chiꞌ ix aj yelcꞌoch tas tzꞌibꞌabꞌilcan dꞌa Slolonel Dios,

ayic yalannaccani:

Ol spuquecꞌ in pichul ebꞌ dꞌa spatic,

ol yacꞌan suerte ebꞌ dꞌa yibꞌan̈ junxo,

xchi.

Yuj chiꞌ icha chiꞌ ix yutej ebꞌ vin̈ soldado chiꞌ.

25 Lin̈anoch ix snun Jesús dꞌa stzꞌey teꞌ culus chiꞌ,

ajun ix snulej ix yedꞌoc yedꞌ ix María ix yetbꞌeyum vin̈aj Cleofas yedꞌ ix María aj Magdala.

26 Ay pax ecꞌ jun vin̈ scꞌaybꞌum Jesús dꞌa stzꞌey ix snun chiꞌ,

aton jun vin̈ te xajan yuuj.

Ayic ix iljicot ebꞌ yuj Jesús,

ix yalan dꞌa ix snun chiꞌ:

—Nunin,

a jun ayecꞌ edꞌ tic,

icha uneꞌ tzutej,

xchi dꞌa ix.

27 Ix lajvin̈ej chiꞌ,

ix yalan dꞌa jun vin̈ scꞌaybꞌum chiꞌ:

—A ix in nun tic,

icha a nun tzutej ix,

xchi.

Yuj chiꞌ,

a jun vin̈ scꞌaybꞌum chiꞌ ix icꞌancanoch ix snun Jesús chiꞌ dꞌa yol spat.

Atax taꞌ cannac ix yedꞌoc.

28 Ix lajvi chiꞌ,

yojtacxo Jesús to ix elcꞌoch masanil tas tzꞌibꞌabꞌilcan dꞌa yibꞌan̈.

Yuj chiꞌ ix yal icha tic:

—Stacji val in tiꞌ,

xchi.

Icha chiꞌ ix yutej yalani yic tzꞌelcꞌoch tas tzꞌibꞌabꞌilcan dꞌa Slolonel Dios.

29 Ayecꞌ jun chen vinagre taꞌ.

Ix yacꞌanoch jun tzꞌubꞌlabꞌ ebꞌ dꞌa sjolom jun teꞌ hisopo,

ix slabꞌanem ebꞌ dꞌa scal jun vinagre chiꞌ,

ix yacꞌanoch ebꞌ dꞌa stiꞌ Jesús chiꞌ.

30 Ix stzꞌubꞌan jun vinagre chiꞌ,

ix lajvi chiꞌ ix yalani:

—Toxo ix yicꞌ sbꞌa smasanil,

xchi.

Ix lajvi chiꞌ,

ix em n̈ojnaj schami.

31 A dꞌa jun cꞌu chiꞌ,

qꞌuicꞌanocxo tzꞌoch sqꞌuin̈ ebꞌ israel yic snaancot ebꞌ tas aj yelnaccot ebꞌ smam yicham ebꞌ dꞌa Egipto,

scꞌual icꞌoj ip yaj dꞌa ebꞌ.

A ebꞌ vin̈ aj Judea malaj sgana ebꞌ vin̈ scan snivanil ebꞌ culusabꞌil dꞌa teꞌ culus chiꞌ,

yujto a jun qꞌuin̈ sja chiꞌ,

te nivan qꞌuin̈ syutej ebꞌ.

Yuj chiꞌ ix bꞌat ebꞌ scꞌan dꞌa vin̈aj Pilato to syacꞌ macꞌjoc poj sbꞌaquil sat spenec^* ebꞌ vin̈,

yic tzꞌicꞌjiemta ebꞌ dꞌa teꞌ culus chiꞌ.

32 Yuj chiꞌ ix cꞌoch ebꞌ vin̈ soldado bꞌaj ix culusajqꞌue ebꞌ chiꞌ.

A ebꞌ vin̈ culusalbꞌilqꞌue yedꞌ Jesús chiꞌ,

ix macꞌjipoj sbꞌaquil sat spenec ebꞌ vin̈.

33 Palta axo yic ix cꞌoch ebꞌ vin̈ dꞌa stzꞌey Jesús chiꞌ,

ix yilan ebꞌ vin̈ to chamnacxo,

majxo smacꞌpojlaj sbꞌaquil sat spenec chiꞌ ebꞌ vin̈.

34 Palta ay jun vin̈ soldado ix tipanoch qꞌuen slanza dꞌa scostil Jesús chiꞌ.

Yuj chiꞌ ix elta usnaj chicꞌ yedꞌ a aꞌ.

35 A in tic,

ix vil val juntzan̈ tic.

Yuj chiꞌ svacꞌ testigoal in bꞌa yuuj,

yic ol eyacꞌoch dꞌa e cꞌool.

A juntzan̈ tzin tzꞌibꞌejcan tic,

te yel.

A in tic vojtac to te yel svalaꞌ.

36 Ix uji juntzan̈ tic,

yic tzꞌelcꞌoch tas tzꞌibꞌabꞌilcan dꞌa Slolonel Dios ayic syalan icha tic:

Malaj junoc sbꞌaquil ol smacꞌ poj ebꞌ,

xchi.

37 Syalanpax junxo tic dꞌa Slolonel chiꞌ:

Ol yil jun mach bꞌaj stipnacoch qꞌuen lanza ebꞌ,

xchi.

38 Ay jun vin̈ scuchan José aj chon̈abꞌ Arimatea.

Scꞌaybꞌum vin̈ Jesús dꞌa cꞌubꞌeltac,

yujto xiv vin̈ dꞌa ebꞌ vin̈ aj Judea.

Xidꞌ scꞌanan spermiso vin̈ dꞌa vin̈aj Pilato yic syiqꞌuemta snivanil Jesús chiꞌ vin̈ dꞌa teꞌ culus,

bꞌat smucan vin̈.

Axo vin̈aj Pilato chiꞌ ix acꞌan spermiso vin̈ yicꞌanemta.

Yuj chiꞌ ix yicꞌanbꞌat vin̈.

39 Ajun pax vin̈aj Nicodemo vin̈ xidꞌnaquecꞌ scꞌumej Jesús dꞌacꞌvalil yedꞌnac vin̈.

Ay am oxeoc arroba juntzan̈ sucꞌuqꞌui sjabꞌ scuchan mirra calan yaj yedꞌ junxo scuchan áloes yedꞌnac vin̈aj Nicodemo chiꞌ.

40 Ix yicꞌanbꞌat snivanil Jesús chiꞌ ebꞌ vin̈.

Ix spichan ebꞌ vin̈ dꞌa jun cꞌapac.

Ix yacꞌanoch jun sucꞌuqꞌui sjabꞌ chiꞌ ebꞌ vin̈ dꞌay,

yujto icha chiꞌ sley ebꞌ israel chiꞌ ayic smucan ebꞌ chamnac ebꞌ.

41 Axo dꞌa slacꞌanil bꞌaj ix culusajqꞌue Jesús chiꞌ ay jun avbꞌen teꞌ.

Ataꞌ ay jun qꞌuen qꞌueen joybꞌilel yool.

A jun qꞌueen chiꞌ,

manta junoc chamnac tzꞌacꞌjioch dꞌa yol qꞌueen.

42 Axo jun scꞌual icꞌoj ip,

toxo syamchajochi.

Yuj chiꞌ a dꞌa yol jun qꞌueen chiꞌ ix acꞌjioch snivanil Jesús chiꞌ,

yujto lacꞌan ay qꞌueen bꞌaj ix cham chiꞌ.