Hechos sbꞌi jun libro tic, yujto a dꞌay tzꞌibꞌabꞌilcan tastac scꞌulejnac ebꞌ schecabꞌ Jesús. A vin̈aj Lucas tzꞌibꞌannaccan jun libro tic. Syalcoti to a Yespíritu Dios ix cuchbꞌan ebꞌ schecabꞌ ayic ix yalanel yabꞌixal Jesús ebꞌ dꞌa Jerusalén, dꞌa Judea, dꞌa Samaria masanto bꞌaj slajvicꞌoch yolyibꞌan̈qꞌuinal. Syalcoti to a jun cꞌaybꞌubꞌal tic, ix el yich dꞌa scal ebꞌ israel, ix pucaxbꞌat dꞌa scal masanil anima. Ix snibꞌej vin̈aj Lucas tic schꞌoxeli to man̈ chucoc jun cꞌaybꞌubꞌal tic dꞌa sat ebꞌ yajal dꞌa Roma ayic ix el yich. Icha ton tic ix aj yelcꞌoch tas tan̈vabꞌil yuj ebꞌ israel chiꞌ.

A jun libro tic, ox macan̈ yaji: Bꞌabꞌel macan̈, tzꞌel yich dꞌa capítulo 1 masanto dꞌa 7, syalcot tas ix aj sqꞌuibꞌ sbꞌisul ebꞌ bꞌabꞌel creyente dꞌa Jerusalén. Schabꞌil macan̈, tzꞌel yich dꞌa capítulo 8 masanto dꞌa 12, syalcot tas ix aj scꞌoch jun cꞌaybꞌubꞌal tic dꞌa juntzan̈xo lugar dꞌa yol yic Palestina. Yoxil macan̈, tzꞌel yich dꞌa capítulo 13 masanto dꞌa slajvubꞌ jun libro tic, syalcot tas ix aj scꞌoch vachꞌ abꞌix yic colnabꞌil dꞌa scal ebꞌ man̈ israeloc, masanto dꞌa Roma.

Te nivan tas syalcot yuj tas schꞌoxnac Yespíritu Dios ayic ix em dꞌa yibꞌan̈ ebꞌ bꞌabꞌel creyente dꞌa scꞌual Pentecostés. Yacꞌnac val spoder dꞌa ebꞌ, ix cuchbꞌaj ebꞌ yuuj. A val scꞌaybꞌubꞌal ebꞌ bꞌabꞌel creyente chiꞌ, a tzꞌacꞌan checlajeli to te nivan spoder evangelio dꞌa junjun creyente.