Romanos sbꞌi jun libro tic, aton jun scarta vin̈aj apóstol Pablo stzꞌibꞌejnacbꞌat dꞌa ebꞌ creyente dꞌa Roma. A dꞌa tic syalbꞌat vin̈ to ol cꞌoch vin̈ yil ebꞌ creyente chiꞌ. Snibꞌej vin̈ smunlaj yedꞌ ebꞌ junoc tiempoal, slajvi chiꞌ sbꞌat vin̈ dꞌa España. Stzꞌibꞌejbꞌat jun carta tic vin̈ yuj yalan tas val syalelcꞌoch jun vachꞌ abꞌix yic colnabꞌil yedꞌ bꞌeybꞌal smoj sbꞌeybꞌalan ebꞌ creyente. A jun libro tic, tzꞌacan syalaꞌ tas val tzꞌaj snachajel yuj vin̈aj apóstol Pablo chiꞌ.

Ayic slajvi yacꞌjibꞌat stzatzil scꞌol ebꞌ creyente ay dꞌa Roma chiꞌ, syalanbꞌat vin̈ dꞌa ebꞌ to slesalvi vin̈ yuj ebꞌ. Slajvi chiꞌ, syalanbꞌat vin̈ tas snibꞌej syalbꞌat dꞌa ebꞌ. Aton yuj vachꞌ abꞌix chꞌoxbꞌil yuj Dios, to tzꞌochxi juncꞌolal dꞌa scal ebꞌ anima yedꞌ Dios tato syacꞌoch ebꞌ dꞌa scꞌool. Masanil anima ayoch yacꞌan servil chucal vachꞌchom israel mato man̈ israeloc, yuj chiꞌ smoj schaan jun colnabꞌil tic ebꞌ. Tzꞌochxi vachꞌil dꞌa co cal yedꞌ Dios an̈ej tato scacꞌoch Jesús dꞌa co cꞌool. Tato vachꞌon̈xo yuj Cristo, ayxo co juncꞌolal yedꞌ Dios, axo co colchajel dꞌa yol scꞌabꞌ chucal yuj Yespíritu Dios, yuj chiꞌ smoj to sqꞌuexmaj co bꞌeybꞌal.

Syalanpax vin̈aj Pablo tas nabꞌil yuj Dios dꞌa yibꞌan̈ ebꞌ israel yedꞌ dꞌa yibꞌan̈ ebꞌ man̈ israeloc. Syalanpax vin̈ to yuj spitalil ebꞌ israel tzꞌaltaj jun colnabꞌil tic dꞌa masanil anima, yujto a ebꞌ israel chiꞌ maj scha ebꞌ tato a Jesús scolomal ebꞌ tan̈vabꞌil sjavi ayecꞌ dꞌa scal ebꞌ. Palta cꞌojancꞌolalto ol yojtaquejel ebꞌ. Syalanpaxcoti tas tzꞌaj co xajanan co bꞌa yedꞌ ebꞌ quetanimail, yovalil sco cꞌanabꞌajej ebꞌ yajal. Syalanpaxi to max yal co comon telan co bꞌa dꞌa yibꞌan̈ junoc cꞌaybꞌubꞌal max nachajel cuuj. Slajvi chiꞌ syacꞌan stzatzil scꞌol ebꞌ creyente vin̈ dꞌa Roma chiꞌ.