Ayecꞌ vin̈aj Pablo dꞌa jun luum scuchan Malta
28
Axo yic ix on̈ colchajcaneli ix cabꞌani to a jun lum luum dꞌa snan̈al aꞌ chiꞌ,
Malta sbꞌi luum.
2 Axo ebꞌ aj chon̈abꞌ chiꞌ te vachꞌ ix yutej spensar ebꞌ dꞌayon̈.
Ix yacꞌanoch jun nivan cꞌacꞌ ebꞌ yujto te siic,
ay pax n̈abꞌ.
Ix on̈ yavtanbꞌat ebꞌ cꞌaxnel.
3 Axo vin̈aj Pablo chiꞌ ix bꞌat mecꞌancot juntzan̈xo teꞌ bꞌolobꞌ.
Ayic van yacꞌanbꞌat teꞌ vin̈ dꞌa yibꞌan̈ cꞌacꞌ,
ay jun nocꞌ chan ix elta dꞌa scal teꞌ yuj teꞌ cꞌacꞌ chiꞌ.
Ix chiji scꞌabꞌ vin̈ yuj nocꞌ,
ix can chinan nocꞌ dꞌay.
4 Ayic ix yilan ebꞌ aj chon̈abꞌ chiꞌ to ix can chinan nocꞌ dꞌa scꞌabꞌ vin̈,
ix yalan ebꞌ:
—A jun vin̈ tic,
tecan macꞌumcham anima vin̈.
Vachꞌchom ix yacꞌ ganar vin̈ scolchaj dꞌa yibꞌan̈ aꞌ mar tic,
palta yovalil ol scha spac smul vin̈ chiꞌ,
ol cham vin̈,
xchi ebꞌ.
5 Axo vin̈aj Pablo chiꞌ,
ton̈ej ix stzicubꞌtan̈ej scꞌabꞌ vin̈,
ix em lan̈naj nocꞌ dꞌa scal teꞌ cꞌacꞌ chiꞌ.
Malaj jabꞌoc ix icꞌan vin̈ yuj nocꞌ.
6 Axo ebꞌ smasanil,
ix stan̈vej ebꞌ smal scꞌabꞌ vin̈ chiꞌ.
A snaan ebꞌ to dꞌa jun rato chiꞌ ol cham vin̈.
Axo ix yilan ebꞌ ix ecꞌ tiempo,
malaj jabꞌoc tas ix icꞌan vin̈.
Yuj chiꞌ ix sqꞌuex spensar ebꞌ.
Ix yalan ebꞌ icha tic:
—A vin̈aj Pablo tic,
tecan dios vin̈,
xchi ebꞌ.
7 A dꞌa slacꞌanil bꞌaj ay on̈ ecꞌ chiꞌ,
ataꞌ ay sluum jun vin̈ yajal yaj dꞌa Malta chiꞌ,
aton jun vin̈ scuch Publio.
Ix on̈ schaoch vin̈ dꞌa yol spat.
Oxeꞌ cꞌual ix on̈ ecꞌ yedꞌ vin̈,
te vachꞌ ix yutej spensar vin̈ dꞌayon̈.
8 Palta a vin̈ smam vin̈aj Publio chiꞌ,
te penaay vin̈.
Van scham vin̈ yuj cꞌacꞌal yabꞌil yedꞌ chicꞌ.
Axo vin̈aj Pablo chiꞌ ix och yedꞌ vin̈ dꞌa yol scuarto.
Ix lesalvi vin̈.
Ix lajvi chiꞌ ix yacꞌanecꞌ scꞌabꞌ vin̈ dꞌa yibꞌan̈ vin̈.
Ichato chiꞌ ix bꞌoxican scꞌool vin̈.
9 Ixn̈ej bꞌoxi scꞌool vin̈ chiꞌ,
a juntzan̈xo ebꞌ penaay dꞌa jun chon̈abꞌ chiꞌ,
ix laj cꞌoch ebꞌ dꞌa vin̈.
Ix bꞌoxipaxcan scꞌool ebꞌ.
10 Te xajan ix on̈ yil ebꞌ anima dꞌa jun lugar chiꞌ.
Axo yic ix cꞌoch stiempoal co bꞌatxi dꞌa yol junxo barco,
ix laj yacꞌ ebꞌ tastac tzꞌoch cuuj.
Cꞌochnac vin̈aj Pablo dꞌa Roma
11 Oxeꞌ ujal ix on̈ ecꞌ dꞌa Malta chiꞌ.
Ataꞌ vaan och jun teꞌ barco,
van stan̈van yecꞌ n̈abꞌil qꞌuinal teꞌ taꞌ.
A teꞌ barco chiꞌ,
yic chon̈abꞌ Alejandría teꞌ.
A dꞌa sat teꞌ ayoch yechel chavan̈ sdiosal ebꞌ,
aton Cástor yedꞌ Pólux.*
A dꞌa yol teꞌ ix on̈ ochi,
ix on̈ bꞌati.
12 Ix on̈ cꞌoch dꞌa chon̈abꞌ Siracusa.
Axo taꞌ ix on̈ vanaj oxeꞌ cꞌual.
13 Ix lajvi chiꞌ,
ix on̈ bꞌatxi,
ix on̈ ecꞌ dꞌa slacꞌanil stitac lum luum,
masanto ix on̈ cꞌoch dꞌa chon̈abꞌ Regio.
Axo dꞌa junxo cꞌu,
ix cot jun icꞌ dꞌa sur.
Yuj chiꞌ ix on̈ bꞌatxi,
chabꞌ cꞌual ix on̈ bꞌeyxi dꞌa sat aꞌ.
Ichato chiꞌ ix on̈ cꞌoch dꞌa chon̈abꞌ Puteoli.
14 Ataꞌ ix ilchajel jayvan̈ ebꞌ creyente cuuj.
Ix yalan ebꞌ to tzon̈ can uqueoc cꞌual taꞌ yedꞌ ebꞌ.
Ix lajvi chiꞌ,
axo dꞌa coc ix on̈ bꞌat dꞌa chon̈abꞌ Roma.
15 Axo ebꞌ creyente aj Roma chiꞌ,
ayic ix yabꞌan ebꞌ to van co cꞌochi,
ix ul on̈ scha ebꞌ dꞌa bꞌe.
Ay ebꞌ ix ul on̈ chaan dꞌa Apio bꞌaj ay jun mercado,
ay pax ebꞌ dꞌa Oxeꞌ Posado.
Axo ix yilanbꞌat vin̈aj Pablo chiꞌ to van scꞌoch ebꞌ dꞌa vin̈,
ix yacꞌan yuj diosal vin̈ dꞌa Dios.
Ix te tzalajqꞌue vin̈.
16 Axo yic ix on̈ cꞌoch dꞌa Roma chiꞌ ix yacꞌanoch ebꞌ presovum chiꞌ vin̈ capitán dꞌa yol scꞌabꞌ junxo vin̈ yajal ebꞌ soldado ayecꞌ taꞌ.
Axo vin̈aj Pablo chiꞌ maj ochlaj vin̈ dꞌa preso yedꞌ ebꞌ.
Ton̈ej ix can vin̈ dꞌa jun majan pat bꞌaj ix tan̈vaj vin̈ yuj jun vin̈ soldado.
Ix yalel slolonel Dios vin̈aj Pablo dꞌa Roma
17 Schabꞌilxo cꞌual co cꞌoch taꞌ,
ix yavtancot ebꞌ yichamtac vinaquil ebꞌ israel aj Roma chiꞌ vin̈aj Pablo chiꞌ.
Axo yic ix cꞌoch ebꞌ dꞌa vin̈ ix yalan vin̈ dꞌa ebꞌ:
—Ex vetchon̈abꞌ,
malaj jabꞌoc in mul dꞌa ebꞌ quetisraelal.
Maj in ju pax sbꞌeybꞌal ebꞌ co mam quicham.
Palta a dꞌa Jerusalén in och dꞌa preso yuj ebꞌ,
in yacꞌoch ebꞌ dꞌa yol scꞌabꞌ ebꞌ aj Roma.
18 Scꞌanbꞌej ebꞌ aj Roma chiꞌ dꞌayin tas in mul.
Palta ix yil ebꞌ to malaj jabꞌoc in mul smoj in cham yuuj.
Yuj chiꞌ ix snibꞌej ebꞌ in yaqꞌuel dꞌa libre.
19 Palta a ebꞌ quetisraelal chiꞌ,
maj yal-laj scꞌol ebꞌ icha chiꞌ.
Yuj chiꞌ ix in cꞌancot in bꞌa dꞌa vin̈ cajal dꞌa Roma tic,
ato vin̈ ol chꞌolbꞌitanoc tas in mul.
Palta malaj jabꞌoc tas ol vacꞌbꞌat dꞌa yibꞌan̈ ebꞌ quetchon̈abꞌ chiꞌ.
20 Yuj chiꞌ tzex vavtejcoti,
yujto in gana tzex vilaꞌ,
tzex in cꞌumej jabꞌoc.
Yujto ay jun co Columal tan̈vabꞌiltaxon sjavi cuuj a on̈ israel on̈ tic.
Yujn̈ej to svacꞌoch in pensar dꞌa jun chiꞌ,
ayoch qꞌuen cadena tic dꞌayin,
xchi vin̈aj Pablo chiꞌ dꞌa ebꞌ.
21 Yuj chiꞌ,
ix yal ebꞌ dꞌa vin̈:
—Malaj junoc carta ix cot dꞌa ebꞌ aj Judea chiꞌ bꞌaj syal uuj.
Malaj pax junoc ebꞌ quetchon̈abꞌ israel ix ul alan junoc tas dꞌa a patic.
22 Palta co gana scabꞌ a on̈ tic tas van a naani.
Yujto ix cabꞌ specal to a dꞌa junjun lugar,
slaj yal chucal ebꞌ dꞌa spatic jun e cꞌaybꞌubꞌal toto pitzvinac chiꞌ,
xchi ebꞌ dꞌa vin̈.
23 Ix lajvi chiꞌ,
ix yacꞌan slajtial ebꞌ tas cꞌual smolbꞌej sbꞌa ebꞌ junelxo.
Axo dꞌa junxo cꞌu chiꞌ tzijtum ebꞌ ix smolbꞌej sbꞌa bꞌaj ayecꞌ vin̈aj Pablo chiꞌ.
Ix och ijan vin̈ yalan dꞌa ebꞌ dꞌa qꞌuin̈ibꞌalil,
masanto ix bꞌat cꞌu.
Ix yalan val vin̈ dꞌa ebꞌ sicꞌlabꞌil tas tzꞌaj yoch ebꞌ dꞌa yol scꞌabꞌ Dios.
Ix yavtan pax juntzan̈ tzꞌibꞌabꞌilcan dꞌa chꞌan̈ ley Moisés vin̈ yedꞌ tas tzꞌibꞌabꞌilcan yuj ebꞌ schecabꞌ Dios dꞌa pecaꞌ yic syacꞌ vin̈ yojtaquejel ebꞌ to yel tas syal vin̈ yuj Jesús chiꞌ.
24 Ay ebꞌ ix acꞌanoch dꞌa scꞌool.
Ay pax ebꞌ maj chaan yabꞌi tas ix yal vin̈.
25 Yujto maj scha sbꞌa spensar ebꞌ,
ix laj pax ebꞌ dꞌa spat.
Yuj chiꞌ ix yal vin̈aj Pablo chiꞌ dꞌa ebꞌ:
—A Yespíritu Dios acꞌannac yal vin̈aj Isaías dꞌa ebꞌ co mam quicham dꞌa pecaꞌ.
Te yel jun yalnac vin̈ chiꞌ,
aton jun syal icha tic:
26 Ixic bꞌat al dꞌa ebꞌ anima tic,
tzalan icha tic:
Val yel ol eyabꞌi,
palta man̈ ol nachajel-laj eyuuj.
Vachꞌchom ol eyilaꞌ,
palta an̈ejtonaꞌ man̈ ol nachajel-laj eyuuj,
xa chi dꞌa ebꞌ.
27 Yujto a ebꞌ anima tic,
toxo ix pitbꞌiel ebꞌ.
Icha to smac schiquin ebꞌ,
yic max yabꞌ in lolonel ebꞌ.
An̈ejtonaꞌ,
icha to smutzꞌ sat ebꞌ,
yic max yil jun yel chiꞌ ebꞌ.
Toxon max nachajel-laj jabꞌoc yuj ebꞌ.
Max sqꞌuex sbꞌeybꞌal ebꞌ.
Max yacꞌoch spensar ebꞌ dꞌayin,
yic tzin colan ebꞌ,
xchi Yespíritu Dios dꞌa Slolonel Tzꞌibꞌabꞌilcani.
28-29 Yuj chiꞌ,
nachajocabꞌ el eyuuj to a Dios van yacꞌan jun colnabꞌil tic dꞌa ebꞌ man̈ israeloc.
Yujto a ebꞌ chiꞌ syacꞌoch schiquin ebꞌ dꞌay,
xchi vin̈aj Pablo chiꞌ dꞌa ebꞌ.
30 Axo vin̈aj Pablo chiꞌ,
chabꞌ abꞌil ix aj vin̈ dꞌa yol jun smajan pat chiꞌ.
Axo ebꞌ ix laj cꞌoch scꞌumej vin̈ ix chaji ebꞌ yuj vin̈.
31 Ix stecꞌbꞌej sbꞌa vin̈ yalaneli,
chajtil tzꞌaj yoch ebꞌ anima dꞌa yol scꞌabꞌ Dios.
Ix yalanel juntzan̈ scꞌaybꞌubꞌal Cajal Jesucristo vin̈.
Malaj mach ix cachanoch vaan jabꞌoc vin̈.