Acꞌbꞌilbꞌat vin̈aj Pablo dꞌa Roma
27
Ix slajtian sbꞌa ebꞌ vin̈ yajal to sbꞌat vin̈aj Pablo dꞌa Roma dꞌa yol yic Italia.
Yuj chiꞌ ix acꞌji entregar vin̈ yedꞌ jayvan̈xo ebꞌ yetpresovumal dꞌa yol scꞌabꞌ jun vin̈ capitán scuchan Julio.
A jun vin̈ chiꞌ,
yetbꞌeyum sbꞌa vin̈ yedꞌ jun macan̈ ebꞌ soldado vin̈aj Augusto.
2 Ix on̈ och dꞌa yol jun barco yic chon̈abꞌ Adramitio.
A teꞌ barco chiꞌ,
dꞌin̈an yecꞌ teꞌ dꞌa junjun lugar dꞌa stitac Asia.
Ayic ix on̈ bꞌat dꞌa yol teꞌ,
ix bꞌat pax vin̈aj Aristarco quedꞌoc,
aton vin̈ aj Tesalónica dꞌa yol yic Macedonia.
El naufragio (Hechos 27.1–28.10)
3 Axo dꞌa junxo cꞌu ix on̈ cꞌoch dꞌa chon̈abꞌ Sidón.
A vin̈aj Julio chiꞌ,
te vachꞌ ix yutej spensar vin̈ dꞌa vin̈aj Pablo chiꞌ,
yuj chiꞌ ix acꞌji spermiso vin̈ yuj vin̈ bꞌat scꞌuman ebꞌ svachꞌcꞌool,
yic syacꞌ ebꞌ tas yovalil tzꞌoch yuj vin̈.
4 Ix on̈ elxi dꞌa Sidón chiꞌ,
ix on̈ ecꞌ dꞌa slacꞌanil Chipre ay dꞌa snan̈al aꞌ mar.
A dꞌa co qꞌuexan̈ ix can Chipre chiꞌ yujto man̈ tojoloc sbꞌey icꞌ.
5 Ix on̈ ecꞌ dꞌa stitac Cilicia yedꞌ dꞌa stitac Panfilia.
Ix on̈ cꞌoch dꞌa chon̈abꞌ Mira,
aton jun ay dꞌa yol yic Licia.
6 Axo vin̈ capitán chiꞌ ix sayanecꞌ junxo teꞌ barco taꞌ.
Ix ilchaj jun teꞌ barco yic Alejandría yuj vin̈ van sbꞌat dꞌa Italia.
Yuj chiꞌ dꞌa yol teꞌ ix on̈ yacꞌxioch vin̈.
7 Ayic ix on̈ bꞌatxi te tzijtum cꞌual ix on̈ bꞌeyi,
yujto cꞌojancꞌolal sbꞌey teꞌ barco chiꞌ.
Pural ix on̈ cꞌoch dꞌa yichan̈cot chon̈abꞌ Gnido.
Ix lajvi chiꞌ,
ix on̈ ecꞌ dꞌa slacꞌanil chon̈abꞌ Salmón,
ix on̈ ecꞌ pax dꞌa Creta,
aton jun ay dꞌa snan̈al aꞌ mar,
yujto a jun icꞌ chiꞌ an̈ejaꞌ man̈ tojoloc sbꞌeyi.
8 Pural ix on̈ ecꞌ dꞌa stiꞌ Creta chiꞌ masanto ix on̈ cꞌoch dꞌa jun chon̈abꞌ scuch “Bꞌaj Vachꞌ Tzꞌoch vaan Teꞌ Barco” ay dꞌa slacꞌanil chon̈abꞌ Lasea.
9 Te ayxo smay sbꞌeyecꞌ teꞌ barco chiꞌ dꞌa yibꞌan̈ aꞌ mar chiꞌ,
yujto toxo ix te ecꞌ tiempo,
vanxo sja n̈abꞌil qꞌuinal.
10 Yuj chiꞌ ix yal vin̈aj Pablo dꞌa ebꞌ icha tic:
—Ex vetanimail,
svilaꞌ to te ay smay co bꞌat ticnaic.
Ol lajvoquel teꞌ barco tic yedꞌ yicatz smasanil.
An̈ejtonaꞌ ay pax smay ol on̈ chamoc,
xchi vin̈ dꞌa ebꞌ.
11 Palta a vin̈ capitán chiꞌ,
maj schalaj yabꞌ vin̈ tas ix yal vin̈aj Pablo chiꞌ.
An̈ej tas ix yal vin̈ tzꞌicꞌan bꞌey teꞌ barco yedꞌ vin̈ aj barco chiꞌ ix scha yabꞌ vin̈.
12 A dꞌa jun lugar chiꞌ,
malaj bꞌaj syal scan vaan teꞌ barco chiꞌ yic tzꞌecꞌ n̈abꞌil qꞌuinal chiꞌ.
Yuj chiꞌ quenxon̈ej man̈ masaniloc ebꞌ ix naani to vachꞌ tzon̈ bꞌatn̈ej,
ta icha chiꞌ colan tzon̈ cꞌoch dꞌa chon̈abꞌ Fenice dꞌa yol yic Creta chiꞌ.
Ataꞌ sgana ebꞌ ix co tan̈vej ecꞌ n̈abꞌil qꞌuinal chiꞌ,
yujto man̈ ovoc scꞌoch icꞌ taꞌ.
Pitzvinac chaan̈ jun nivan icꞌ dꞌa yibꞌan̈ aꞌ mar
13 Ix sna ebꞌ to vachꞌ tzon̈ bꞌati,
yujto ay jun icꞌ cꞌojancꞌolal van scot dꞌa sur.
Yuj chiꞌ ix on̈ bꞌati.
Ix on̈ ecꞌ dꞌa slacꞌanil stitac Creta chiꞌ.
14 Palta junanto rato chiꞌ ix pitzvichaan̈ junxo nivan icꞌ tzꞌecꞌ dꞌa jun luum chiꞌ.
15 Ix och chulan icꞌ dꞌa teꞌ barco chiꞌ,
majxo yal-laj sbꞌat teꞌ bꞌaj sja icꞌ chiꞌ.
Yuj chiꞌ ix cactej quicꞌanbꞌat teꞌ bꞌaj sja icꞌ chiꞌ,
munilxon̈ej ix bꞌat teꞌ bꞌaj sbꞌat icꞌ chiꞌ.
16 Ix on̈ ecꞌ dꞌa stzꞌey jun yuneꞌ lugar scuch Clauda ay dꞌa snan̈al aꞌ mar.
Ataꞌ man̈xo ovoclaj icꞌ icha ix aj sja dꞌa sbꞌabꞌelal chiꞌ.
Aytaxon jun teꞌ co yuneꞌ barco tocꞌbꞌil yuj teꞌ nivan chiꞌ.
Pural ix qꞌueta teꞌ co tocꞌan dꞌa yibꞌan̈ teꞌ nivan chiꞌ.
17 Ix lajvi sqꞌuecꞌoch teꞌ dꞌa yibꞌan̈ teꞌ nivan chiꞌ,
axo ebꞌ aj barco chiꞌ,
ix scꞌan juntzan̈ nivac lasu ebꞌ,
yic stzecꞌan tzatzbꞌoc teꞌ nivan chiꞌ ebꞌ.
Yujto ix xiv ebꞌ spocꞌanem sbꞌa teꞌ dꞌa yibꞌan̈ jun yarenail jun scuchan Sirte,
ay dꞌa sjayil stiꞌ aꞌ,
yuj chiꞌ ix stijemta juntzan̈ icha mantiado ebꞌ ayqꞌue dꞌa yibꞌan̈ teꞌ barco chiꞌ,
aton juntzan̈ smacꞌji yuj icꞌ.
Ix lajvi chiꞌ,
ix on̈ can ichn̈ej taꞌ.
Munilxon̈ej ix on̈ yicꞌbꞌat teꞌ yedꞌ icꞌ chiꞌ.
18 An̈ejtonaꞌ dꞌa junxo cꞌu,
te ov jun icꞌ chiꞌ.
Yuj chiꞌ,
ix och ijan ebꞌ syumancanel yicatz teꞌ dꞌa yol aꞌ.
19 Axo dꞌa yoxil cꞌual,
ix on̈ colvaj yedꞌ ebꞌ aj barco chiꞌ.
Ay pax juntzan̈ syamcꞌabꞌil teꞌ barco chiꞌ ix co yumcanel yedꞌ ebꞌ.
20 Nivan tiempo majxo quil-laj cꞌu yedꞌ qꞌuen cꞌanal.
Axo yuj jun icꞌ te ov ix cꞌoch chiꞌ dꞌayon̈,
majxo co nalaj tato tzato on̈ colchaji.
21 Nivan tiempo majxo on̈ valaj.
Ix lajvi chiꞌ ix qꞌue lin̈an vin̈aj Pablo chiꞌ dꞌa co cal.
Ix yalan vin̈:
—Ex vetanimail,
octom val ix e cha eyabꞌ tas ix valaꞌ.
Octom maj on̈ cotlaj dꞌa Creta chiꞌ.
Tato icha chiꞌ,
maj am ja jun tic dꞌa quibꞌan̈,
malaj am pax jabꞌoc tas ix sateli.
22 Axo ticnaic sval dꞌayex,
tecꞌan tzeyutej e bꞌa,
yujto malaj junoc on̈ ol on̈ chamoc.
Vachꞌchom ol lajvoquel teꞌ barco tic.
23 Yujto a qꞌuiqꞌui dꞌacꞌval ix ul schꞌox sbꞌa jun yángel Dios dꞌayin.
Aton jun Dios bꞌaj svacꞌ em in bꞌa,
yujto aꞌ ay in yicoꞌ.
24 Ix yalan jun ángel chiꞌ dꞌayin icha tic:
Pablo,
man̈ ach xivoc,
yujto yovalil ol ach cꞌoch dꞌa yichan̈ vin̈ yajal dꞌa Roma.
Uujn̈ej ol colchajcanel ebꞌ ayecꞌ edꞌ dꞌa yol teꞌ barco tic yuj Dios,
xchi dꞌayin.
25 Yuj chiꞌ,
tecꞌan tzeyutej e bꞌa ex vetanimail,
yujto svacꞌoch Dios yipoc in cꞌool to yovalil ol elcꞌoch icha ix yal jun ángel chiꞌ dꞌayin.
26 Palta yovalil ol on̈ yumjoccanel dꞌa jun lum luum ay dꞌa snan̈al aꞌ,
xchi vin̈aj Pablo chiꞌ.
27 Ayic ix lajvi schan̈lajun̈il cꞌual,
an̈ejaꞌ ay on̈ ecꞌ dꞌa aꞌ mar yic Adria.
Toxo ix on̈ cꞌaxpajecꞌ dꞌa jun aꞌ mar chiꞌ yuj icꞌ.
Axo dꞌa chimilacꞌval,
a snaan ebꞌ smunlaj dꞌa teꞌ to van co cꞌoch dꞌa junoc luum.
28 Ix yechtan sjulal aꞌ ebꞌ.
Ay am junoc 40 vara sjulal aꞌ.
Ix bꞌat janicꞌxo teꞌ,
ix yechtanxi ebꞌ,
ayxon̈ej am junoc 30 vara sjulal aꞌ.
29 Ix xiv ebꞌ smacꞌan poj sbꞌa teꞌ dꞌa qꞌuen qꞌueen ay dꞌa yich aꞌ.
Yuj chiꞌ ix yacꞌoch dꞌun̈an chan̈eꞌ qꞌuen nivac qꞌuen ebꞌ dꞌa spatic elcꞌoch teꞌ.
Axo qꞌuen ix yamanoch vaan teꞌ.
Ix lajvi chiꞌ,
ix stan̈van ebꞌ sacbꞌi.
Ix snibꞌej ebꞌ elan̈chamel ix sacbꞌi.
30 Axo ebꞌ smunlaj dꞌa teꞌ barco chiꞌ,
ix snibꞌej el sbꞌa ebꞌ dꞌa elan̈chamel.
Yuj chiꞌ,
cꞌubꞌeltac ix yaqꞌuem dꞌun̈un̈oc te yuneꞌ barco chiꞌ ebꞌ dꞌa yibꞌan̈ aꞌ mar chiꞌ.
Axo ix yutej ebꞌ yalani to a juntzan̈xo qꞌuen qꞌueen ix yaqꞌuem ebꞌ dꞌa sn̈iꞌ teꞌ,
yic malaj mach snaaneli tas van scꞌulan ebꞌ.
31 Palta axo vin̈aj Pablo ix bꞌat alan dꞌa vin̈ capitán yedꞌ dꞌa ebꞌ soldado.
—Tato tzꞌel ebꞌ dꞌa yol teꞌ barco tic,
val yel man̈ ol on̈ colchajlaj,
xchi vin̈.
32 Axo ebꞌ soldado chiꞌ ix tzepan schꞌan̈al teꞌ yuneꞌ barco chiꞌ.
Ix elcan dꞌin̈naj teꞌ schꞌocoj.
33 Axo yic van sacbꞌi,
ix yalan vin̈aj Pablo chiꞌ dꞌa ebꞌ smasanil to yovalil sva jabꞌoc ebꞌ.
Ix yalan vin̈ icha tic:
—Schan̈lajun̈ilxo cꞌual maxtzac ex vayi,
maxtzac ex va yuj xivelal.
34 Yuj chiꞌ tzin tevi dꞌayex to tzex vaꞌi yic vachꞌ ol ochxoc eyip,
yujto malaj junoc on̈ ol on̈ chamoc.
An̈ejtonaꞌ malaj junoc on̈ ol on̈ lajvoc,
xchi vin̈ dꞌa ebꞌ.
35 Ix lajvi yalan jun chiꞌ vin̈,
ix yicꞌancot jun pan vin̈.
Ix yacꞌan yuj diosal vin̈ dꞌa Dios dꞌa yichan̈ ebꞌ smasanil.
Ix xepan snan̈al ixim pan chiꞌ vin̈.
Ix syamanoch vin̈ svaan ixim.
36 Ichato chiꞌ,
ix snivanan sbꞌa co cꞌool co masanil.
Ix on̈ vaxi.
37 276 co bꞌisul dꞌa yol teꞌ barco chiꞌ.
38 Ix lajvi co vaan tas icha co gana,
ix vachꞌ yumchajcanbꞌat nan̈alxo ixim trigo dꞌa yol aꞌ mar chiꞌ yic sebꞌbꞌi teꞌ barco chiꞌ.
Smacꞌ poj sbꞌa teꞌ barco dꞌa sat luum
39 Axo yic ix sacbꞌi,
ix yilanbꞌat lum luum ebꞌ munlajvum dꞌa teꞌ barco chiꞌ,
palta man̈ yojtacoc ebꞌ bꞌajtil ay jun lugar chiꞌ.
Ix yilanbꞌat jun scꞌabꞌ aꞌ mar chiꞌ ebꞌ,
nabꞌa arena stitac.
Ix snaan ebꞌ to syacꞌlej ebꞌ yicꞌanbꞌat teꞌ barco chiꞌ taꞌ,
talaj syal scꞌoch teꞌ taꞌ.
40 Ix stzepan dꞌin̈chaj schꞌan̈al qꞌuen syamanoch vaan teꞌ barco chiꞌ ebꞌ.
Ix can juntzan̈ qꞌuen qꞌueen chiꞌ dꞌa yol aꞌ mar chiꞌ.
Ix stijanel schꞌan̈al bꞌaj schꞌumji teꞌ ebꞌ,
yic vachꞌ syal schꞌuman teꞌ ebꞌ junelxo.
Ix yacꞌanxiqꞌue jun icha mantiado ebꞌ dꞌa chaan̈,
yic a smacꞌji yuj icꞌ sbꞌeyxi teꞌ.
Yuj chiꞌ ix och ijan teꞌ sbꞌat bꞌaj ay yarenail stiꞌ aꞌ chiꞌ.
41 Palta ix spoqꞌuem sbꞌa teꞌ dꞌa yibꞌan̈ qꞌuen arena ay dꞌa yich aꞌ.
Yuj chiꞌ ix can chꞌapan teꞌ dꞌa qꞌuen arena chiꞌ.
Majxo ibꞌxoclaj jabꞌoc teꞌ.
Axo teꞌ spatic elcꞌochi van smacꞌjiel vecnaj teꞌ yuj yipal aꞌ.
42 Axo ebꞌ soldado,
ix snibꞌej ebꞌ smilcham ebꞌ preso yaji yic vachꞌ malaj ebꞌ tzꞌeli,
sbꞌatcan ebꞌ elelal.
43 Palta a vin̈ capitán chiꞌ maj stacꞌlaj vin̈ smiljicham ebꞌ presovum chiꞌ,
yujto sgana vin̈ scolcanel vin̈aj Pablo chiꞌ.
Yuj chiꞌ ix yal vin̈ to a ebꞌ syal smacꞌan aꞌ,
syal sbꞌabꞌlaj bꞌat ebꞌ dꞌa yibꞌan̈ aꞌ,
yic tzꞌelcꞌoch ebꞌ dꞌa stiꞌ aꞌ bꞌaj ay lum luum.
44 Axo ebꞌ tzacꞌan sbꞌati,
ay ebꞌ sbꞌat dꞌa yibꞌan̈ teꞌ chemteꞌ.
Ay ebꞌ sbꞌat dꞌa yibꞌan̈ juntzan̈xo steꞌal teꞌ barco chiꞌ.
Icha chiꞌ ix cutej co bꞌa.
Yuj chiꞌ ix on̈ colchajcanel co masanil.
Ix on̈ elcancꞌoch dꞌa stiꞌ aꞌ bꞌaj ay jun lum luum chiꞌ.