Slolonel vin̈aj Pablo dꞌa vin̈aj rey Agripa
26
Axo vin̈aj rey Agripa chiꞌ ix alan dꞌa vin̈aj Pablo chiꞌ:
—Syal alan ticnaic tas aji,
xchi vin̈.
Ix yicꞌanchaan̈ scꞌabꞌ vin̈aj Pablo chiꞌ,
ix och ijan vin̈ yalan icha tic:
2 —Ach rey Agripa,
tzin te tzalaji yujto tzin a cha lolon dꞌa ichan̈,
yujto in gana sviqꞌuel jantacn̈ej tas ix yacꞌoch ebꞌ vetisraelal dꞌa vibꞌan̈.
3 Te vachꞌ sval dꞌayach,
yujto ojtactaxon co ley a on̈ israel on̈ tic.
Ojtac pax tas tzꞌicꞌan co telan co bꞌa.
Yuj chiꞌ tzin cꞌan dꞌayach to nivan tzutej a cꞌol dꞌayin yic tzabꞌan tas ol val dꞌayach.
A sbꞌeybꞌal vin̈aj Pablo dꞌa yalan̈taxo
4 A ebꞌ vetisraelal smasanil,
yojtactaxon ebꞌ tas vutejnac in bꞌeybꞌal dꞌa in chon̈abꞌ yedꞌ dꞌa Jerusalén yictax ix in cotoch uninal.
5 Tato ay sgana ebꞌ syalaꞌ,
syal yalan ebꞌ to ayxo tiempo fariseo in.
A ebꞌ fariseo chiꞌ yelxo val scꞌanabꞌajej juntzan̈ bꞌeybꞌal yic co cꞌaybꞌubꞌal ebꞌ.
6 Axo ticnaic,
syacꞌoch ebꞌ dꞌa vibꞌan̈ yujn̈ej to svacꞌoch yipoc in cꞌol tas yalnaccan Dios ayic yacꞌannaccan stiꞌ dꞌa ebꞌ co mam quicham.
7 A ebꞌ quetisraelal slajchavil macan̈,
van stan̈van ebꞌ yelcꞌoch tas yalnaccan Dios chiꞌ.
Yuj chiꞌ cꞌual dꞌacꞌval yacꞌanem sbꞌa ebꞌ dꞌa Dios.
Ach rey Agripa,
yujn̈ej to tzin tan̈vej yelcꞌoch jun chiꞌ,
yuj chiꞌ syacꞌoch ebꞌ vetisraelal chiꞌ dꞌa vibꞌan̈ ticnaic.
8 A exxo tic,
¿tas yuj max eyacꞌoch dꞌa e cꞌool to a Dios tzꞌacꞌan pitzvocxi ebꞌ chamnac?
9 A in pensar dꞌa yalan̈taxo,
to svacꞌ chucal dꞌa ebꞌ yic Jesús aj Nazaret.
A in naani to te vachꞌ svutej in bꞌa.
10 Icha chiꞌ vutejnac in bꞌa dꞌa Jerusalén.
Ochnac vopisio yuj ebꞌ vin̈ sat sacerdote,
yuj chiꞌ tzijtum ebꞌ creyente vacꞌnacoch dꞌa preso.
Ayic smacꞌjicham ebꞌ,
tzin tacꞌvibꞌat dꞌa spatic ebꞌ.
11 Tzijtum el vacꞌnacoch syaelal ebꞌ yic maxtzac yacꞌoch Jesús ebꞌ dꞌa scꞌool in naani.
Icha chiꞌ ecꞌ vutejnac in bꞌa dꞌa yoltac spatil culto.
Te nivan chichonnac in cꞌol dꞌa ebꞌ.
Xidꞌnac in pax ecꞌ dꞌa juntzan̈ chon̈abꞌ te najat,
xidꞌ vacꞌannacoch syaelal ebꞌ.
Chajtil aj schaannac Cristo vin̈aj Pablo
12 Yuj val in chichoncꞌolal chiꞌ,
a junel bꞌat in dꞌa chon̈abꞌ Damasco.
Yujto ay vopisio yuj ebꞌ vin̈ sat sacerdote,
yuj chiꞌ schec in bꞌat ebꞌ vin̈.
13 Palta ach rey sval dꞌayach,
tas aj in.
Ayic van in bꞌey dꞌa chimcꞌualil,
vilan scot copnaj jun saquilqꞌuinal dꞌa satchaan̈.
Ecꞌalto yoc dꞌa yoc cꞌu.
Emul copnaj dꞌa vibꞌan̈ yedꞌ dꞌa yibꞌan̈ ebꞌ ajun vedꞌoc.
14 Telvi on̈ dꞌa sat luum yuj jun saquilqꞌuinal chiꞌ co masanil.
Vabꞌan yavaj jun,
yalan dꞌa tiꞌ hebreo icha tic:
Saulo,
Saulo,
¿tas yuj tzin ixtej?
Palta munil tzixtej a bꞌa icha junoc nocꞌ vacax stecꞌvaj och dꞌa junoc te teꞌ stecjioch dꞌay,
xchi dꞌayin.
15 Valan dꞌay:
Mamin,
¿mach ach?
xin chi.
Yuj chiꞌ,
yalan Cajal Jesús dꞌayin:
A in ton tic,
Jesús in.
A in ton tzin ixtej.
16 Palta qꞌuean̈ vaan.
Tzul in chꞌox in bꞌa dꞌayach yic ol ach och in checabꞌoc,
ol alanel yabꞌixal tas ix il tic yedꞌ jantacn̈ej tas toto ol in chꞌox ilaꞌ.
17 A ticnaic,
tzach in checbꞌat dꞌa ebꞌ man̈ israeloc.
Ol ach in colelta dꞌa yol scꞌabꞌ ebꞌ yedꞌ dꞌa yol scꞌabꞌ ebꞌ etisraelal.
18 Tzach in checbꞌat dꞌa ebꞌ yic vachꞌ ol javoc spensar ebꞌ,
yic syactejcan jun sbꞌeybꞌal ebꞌ yic qꞌuicꞌalqꞌuinal,
axo yoch ebꞌ dꞌa jun saquilqꞌuinal yic Dios.
Ol elcan ebꞌ dꞌa yol scꞌabꞌ vin̈ diablo,
axo dꞌa yol scꞌabꞌ Dios ol ochcan ebꞌ.
Ol in yacꞌoch ebꞌ dꞌa scꞌool yic vachꞌ ol acꞌjoccan lajvoc smul ebꞌ.
Ichato chiꞌ ol och ebꞌ yetbꞌeyumoc ebꞌ ayxo och yicoc Dios,
yujn̈ej in yacꞌanoch ebꞌ dꞌa scꞌool,
xchi Jesús dꞌayin.
19 Yuj val chiꞌ,
ach rey Agripa,
in cꞌanabꞌajej tas ul yalcan Jesús chiꞌ dꞌayin,
ayic scot dꞌa satchaan̈ ul schꞌoxan sbꞌa.
20 Yuj chiꞌ a dꞌa Damasco chiꞌ in bꞌabꞌlaj alejel slolonel Dios.
Slajvi chiꞌ ecꞌ valanel dꞌa Jerusalén yedꞌ dꞌa masanil yol yic Judea,
svalanpax dꞌa ebꞌ man̈ israeloc to sna sbꞌa ebꞌ,
syacꞌanpaxoch spensar ebꞌ dꞌa Dios.
Svalan pax dꞌa ebꞌ to yovalil vachꞌ syutej sbꞌeybꞌal ebꞌ,
yic vachꞌ scheclaji to yel sna sbꞌa ebꞌ.
21 Yujto ix valel juntzan̈ chiꞌ,
yuj chiꞌ ix in syam ebꞌ israel dꞌa yol yamaqꞌuil stemplo Dios.
Ix yacꞌlan ebꞌ in smilanchamoc.
22 Palta a Dios ix colvaj vedꞌoc.
Yuj chiꞌ te tecꞌan ix vutej in bꞌa.
An̈ejtonaꞌ pax ticnaic,
tecꞌan svutej in bꞌa valanel slolonel Dios dꞌa masanil anima.
Sval dꞌa ebꞌ nivan yelcꞌochi,
sval pax dꞌa ebꞌ malaj yelcꞌochi.
A ebꞌ schecabꞌ Dios dꞌa pecaꞌ yedꞌ vin̈aj Moisés,
ayocto stzꞌibꞌannaccan ebꞌ tastac ol javoc.
An̈ej juntzan̈ chiꞌ tzecꞌ valeli.
23 Svalaneli to a Cristo yovalil ix yabꞌ syail,
ix chami.
Ix lajvi chiꞌ,
axo ix bꞌabꞌlaj pitzvixi dꞌa scal ebꞌ chamnac yic syalanel yabꞌixal colnabꞌil dꞌa ebꞌ quetchon̈abꞌ yedꞌ dꞌa ebꞌ anima smasanil,
xchi vin̈aj Pablo chiꞌ.
24 Ayic van yalan juntzan̈ chiꞌ vin̈aj Pablo chiꞌ,
axo vin̈aj Festo chiꞌ ix qꞌue jucnaj vin̈,
ix yalan vin̈ dꞌa vin̈:
—Pablo,
tecan to ay tas tzꞌixtan yol a jolom.
Man̈ jantacoc tas a cꞌaybꞌejnac,
yuj chiꞌ aꞌ ix qꞌue dꞌa a jolom,
xchi vin̈ dꞌa vin̈.
25 Palta ix tacꞌvi vin̈aj Pablo chiꞌ:
—Ach vajalil Festo,
malaj tas tzꞌixtan yol in jolom.
A juntzan̈ lolonel sval tic dꞌayex,
te yel,
te nivan yelcꞌochi.
26 Axo vin̈aj rey Agripa tic,
yojtactaxon juntzan̈ tic vin̈ sicꞌlabꞌil.
Yuj chiꞌ,
tecꞌan val svutej in bꞌa valan juntzan̈ tic dꞌa yichan̈ vin̈.
A juntzan̈ sval tic,
man̈ cꞌubꞌeltacoc yaji,
yojtacn̈ej ebꞌ anima smasanil.
Yuj chiꞌ vojtac to yojtac pax vin̈ rey tic.
27 A achxo tic ach rey Agripa,
¿tzam acꞌoch dꞌa a cꞌool tas yalnaccan ebꞌ schecabꞌ Dios dꞌa pecaꞌ?
Vojtac to tzacꞌoch dꞌa a cꞌool,
xchi vin̈aj Pablo chiꞌ.
28 Yuj chiꞌ ix tacꞌvi vin̈ rey chiꞌ dꞌa vin̈:
—¿Tom yujn̈ej jabꞌ tzal tic tzin och cristianoal tza naꞌa?
xchi vin̈.
29 Yuj chiꞌ,
ix yalan vin̈aj Pablo chiꞌ:
—Vachꞌchom yujn̈ej jabꞌ ix val tic dꞌayach,
mato yujto tzijtumto tas ol eyabꞌi,
comonoc tzꞌel dꞌa scꞌool Dios to icha ix in aj tic icha pax chiꞌ tzach aj yedꞌ jantac ebꞌ ix abꞌan tas ix val tic,
palta max ex tzecꞌchajlaj dꞌa qꞌuen cadena icha vaj tic,
xchi vin̈aj Pablo chiꞌ dꞌa ebꞌ.
30 Ix lajvi yalan juntzan̈ chiꞌ vin̈,
ix qꞌue lin̈an vin̈ rey chiꞌ yedꞌ ix Berenice.
An̈ejtonaꞌ ix qꞌuepax lin̈an vin̈aj Festo yedꞌ jantacn̈ej ebꞌ ayecꞌ chiꞌ taꞌ.
31 Ix sbꞌesanel sbꞌa ebꞌ,
yic smol alej ebꞌ tas ol aj jun chiꞌ.
Ix yalan ebꞌ:
—Man̈ smojoc scham jun vin̈ tic,
yujto malaj jabꞌoc smul vin̈,
an̈ejtonaꞌ man̈ smojoc ayoch vin̈ dꞌa preso tic,
xchi ebꞌ vin̈.
32 Ix yalan vin̈aj Agripa dꞌa vin̈aj Festo chiꞌ:
—Syal cacꞌanel vin̈ dꞌa libre ticnaic,
ichoctaꞌ maj scꞌanbꞌat sbꞌa vin̈ dꞌa vin̈ cajal dꞌa Roma chiꞌ,
xchi vin̈.