22
—Ex vetchon̈abꞌ yedꞌ ex ichamtac vinac,
abꞌec in lolonel sval tic dꞌayex,
xchi vin̈.
2 Axo ix yabꞌan ebꞌ to ix lolon vin̈ dꞌa tiꞌ hebreo,
te numan ix aj ebꞌ.
Yuj chiꞌ ix yalan vin̈ dꞌa ebꞌ:
3 —A in tic,
israel in eyedꞌoc.
A dꞌa chon̈abꞌ Tarso dꞌa yol yic Cilicia,
ataꞌ aljinac in,
palta a dꞌa Jerusalén tic qꞌuibꞌnac in.
Axo vin̈aj Gamaliel* cꞌaybꞌannac in.
Ix in scꞌaybꞌej val vin̈ sicꞌlabꞌil dꞌa sley ebꞌ co mam quicham.
Svacꞌanpax val servil Dios dꞌa smasanil in cꞌool,
icha tzeyutej e bꞌa e masanil ticnaic.
4 A dꞌa yalan̈taxo vixtejnac val ebꞌ ayoch dꞌa jun cꞌaybꞌubꞌal bꞌaj ay in och ticnaic.
Ay bꞌaj in yamnaccot ebꞌ.
Vachꞌchom vinac,
ma ix,
laj vacꞌnacoch ebꞌ dꞌa preso.
Ay bꞌaj vacꞌnacoch chamel dꞌa yibꞌan̈ ebꞌ.
5 A vin̈ sacerdote yedꞌ ebꞌ vin̈ yajal smasanil syal yalan ebꞌ vin̈ to yel svalaꞌ,
yujto yacꞌnac juntzan̈ carta ebꞌ vin̈ dꞌayin yic svicꞌanbꞌat dꞌa ebꞌ quetisraelal dꞌa chon̈abꞌ Damasco.
Bꞌat in dꞌa chon̈abꞌ chiꞌ yujto in gana tzin sayecꞌ ebꞌ creyente taꞌ.
In gana sbꞌat in tzecꞌcot ebꞌ,
tzul vacꞌan ebꞌ dꞌa Jerusalén tic yic tzꞌacꞌjioch syaelal ebꞌ.
Ix yal vin̈aj Pablo tas ix aj schaan Jesús
6 Palta axo yic van in bꞌeyi,
ayic vanxo in cꞌoch dꞌa slacꞌanil chon̈abꞌ Damasco chiꞌ,
tecan chimcꞌualil ama,
ay jun saquilqꞌuinal te ov yoc cot copnaj dꞌa satchaan̈,
yemul dꞌa vibꞌan̈,
in can dꞌa scal,
7 in telvi dꞌa sat luum yuuj.
Axo vabꞌani,
yavaj jun dꞌayin,
yalan icha tic:
Saulo,
Saulo,
¿tas yuj tzin ixtej?
xchi dꞌayin.
8 ¿Mach ach Mamin?
xin chi dꞌay.
A in ton Jesús aj Nazaret in.
A in val tzin ixtej,
xchi dꞌayin.
9 Axo ebꞌ ajun vedꞌ chiꞌ,
yil jun saquilqꞌuinal chiꞌ ebꞌ,
te xiv ebꞌ.
Palta maj nachajel-laj yuj ebꞌ tas jun alji chiꞌ dꞌayin.
10 Slajvi chiꞌ valan dꞌay:
Mamin,
¿tas a gana tzin cꞌulej?
xin chi dꞌay.
Qꞌuean̈ vaan.
Ixic dꞌa chon̈abꞌ Damasco.
Ataꞌ ol aljoc dꞌayach tas yovalil ol a cꞌulej,
xchi Cajal Jesús chiꞌ dꞌayin.
11 Yujto majxo yal-laj vilan jabꞌoc yuj jun saquilqꞌuinal chiꞌ,
yuj chiꞌ a ebꞌ ajun vedꞌoc chiꞌ quetzan in bꞌat dꞌa chon̈abꞌ Damasco chiꞌ.
12 Axo taꞌ ay jun vin̈ scuch Ananías,
scꞌanabꞌajej val ley Moisés vin̈ sicꞌlabꞌil.
Te vachꞌ syutej sbꞌa vin̈ dꞌa yichan̈ ebꞌ israel smasanil dꞌa chon̈abꞌ Damasco chiꞌ.
13 Cꞌoch vin̈ dꞌayin,
yalan vin̈:
Vucꞌtac Saulo,
jacvocabꞌ a sat,
xchi vin̈.
Dꞌa jun rato chiꞌ,
jacvixi in sat.
Vilan vin̈.
14 Yalanxi vin̈ dꞌayin icha tic:
A co Diosal,
aton jun Dios bꞌaj yacꞌnaquem sbꞌa ebꞌ co mam quicham,
aꞌ ix ach sicꞌaneli yic vachꞌ ol ojtaquejel tas sgana dꞌayach.
Yujto sgana to tzil Jesús,
aton jun tojol spensar,
ix abꞌan pax tas ix yal dꞌayach.
15 Xal ticnaic ol alel yabꞌixal Jesús dꞌa scal anima smasanil.
Ol alaꞌ tas ix ilaꞌ yedꞌ tas ix abꞌi.
16 Axo ticnaic man̈ a tan̈vej.
Acꞌ acꞌjoc bautizar a bꞌa.
Al a bꞌa dꞌa Jesucristo yic vachꞌ ol acꞌjoccan lajvoc a mul,
xchi vin̈.
Yalnac vin̈aj Pablo chajtil ajnac schecjibꞌat dꞌa ebꞌ man̈ israeloc
17 Axo yic in jax dꞌa Jerusalén tic,
in lesalvi dꞌa stemplo Dios tic.
Ayic in lesalvi chiꞌ,
ichato vayichan in.
18 Vilan Cajal Jesús,
yalan dꞌayin icha tic:
Elan̈chamel tzach el dꞌa Jerusalén tic,
yujto toxon man̈ ol scha yabꞌ jun vabꞌixal ebꞌ ol alaꞌ,
xchi.
19 Yuj chiꞌ,
val dꞌay:
Mamin,
toxon yojtac ebꞌ to ix in ecꞌ in say ebꞌ ix yacꞌoch scꞌol dꞌayach dꞌa junjun spatil culto.
Ix laj in yam ebꞌ,
ix vacꞌanoch ebꞌ dꞌa preso,
ix in macꞌan pax ebꞌ.
20 Axo vin̈aj Esteban,
vin̈ aljinaquel abꞌixal,
ayic smilannac cham vin̈ ebꞌ,
locan in taꞌ.
A in vilnaccan spichul ebꞌ ayic sjulannaccham vin̈ ebꞌ,
xin chi dꞌay.
21 Palta yalanxi dꞌayin:
Ixic,
yujto najat tzach in checbꞌati,
aton dꞌa scal ebꞌ man̈ israeloc.
Icha chiꞌ aj yalan Cajal Jesús chiꞌ,
xchi vin̈aj Pablo chiꞌ dꞌa ebꞌ.
Ayoch vin̈aj Pablo dꞌa yol scꞌabꞌ vin̈ coronel
22 Ix smaclej yabꞌ ebꞌ anima chiꞌ tas van yalan vin̈aj Pablo chiꞌ,
masanto dꞌa juntzan̈ ix yal vin̈ chiꞌ,
ix och ijan ebꞌ ste avajqꞌuei,
ix yalan ebꞌ:
—Chamocabꞌ vin̈.
Man̈xo smojoc pitzan vin̈,
xchi ebꞌ.
23 Ix te qꞌue somnaj ebꞌ scot yoval.
Ix laj stzicubꞌtan̈an spichul ebꞌ.
Ix stzipanqꞌue lum pococ ebꞌ dꞌa chaan̈ yic schꞌoxanel ebꞌ to te yoval ebꞌ dꞌa vin̈.
24 Ayic ix yilan jun chiꞌ vin̈ coronel chiꞌ,
ix yalan vin̈ to tzꞌicꞌjioch vin̈aj Pablo chiꞌ dꞌa yol cuartel chiꞌ.
Ix yalan vin̈ to smacꞌji vin̈ yic vachꞌ syal vin̈ tas yuj sqꞌue yav ebꞌ anima chiꞌ scot yoval yuj vin̈.
25 Axo yic toxo ix tzecꞌji vin̈ chiꞌ yic smacꞌji vin̈,
ix yalan vin̈ dꞌa jun vin̈ capitán ayecꞌ taꞌ
—¿Tom ay sleyal tzin e comon maqꞌuej?
Ina aj Roma in.
An̈ejtonaꞌ,
malaj jabꞌoc in mul ix checlaji,
xchi vin̈.
26 Ayic ix yabꞌan vin̈ capitán jun ix yal vin̈ chiꞌ,
ix bꞌat vin̈ yal dꞌa vin̈ coronel chiꞌ icha tic:
—Te ay smay jun van a cꞌulan tic.
Abꞌi to aj Roma vin̈aj Pablo chiꞌ,
xchi vin̈ dꞌa vin̈.
27 Dꞌa jun rato chiꞌ ix bꞌat vin̈ coronel chiꞌ scꞌanbꞌej dꞌa vin̈aj Pablo chiꞌ:
—¿Tom yel aj Roma ach?
xchi vin̈ dꞌa vin̈.
—Iꞌ,
aj Roma in,
xchi vin̈ dꞌa vin̈.
28 —Ichin pax taꞌ.
An̈ejto te nivan tumin ix vacꞌaꞌ,
ix in manoch in bꞌa aj Romail,
xchi vin̈.
—Palta a in tic,
atax yic ix in alji toxonton aj Roma in,
xchi vin̈aj Pablo chiꞌ dꞌa vin̈.
29 Yuj chiꞌ,
a ebꞌ soldado ijan ix macꞌan vin̈ chiꞌ,
ix yactejxiel vin̈ ebꞌ.
Ayic ix yabꞌan vin̈ coronel chiꞌ to aj Roma vin̈aj Pablo chiꞌ,
ix te xiv vin̈,
yujto ix yacꞌ tzecꞌchaj vin̈ yedꞌ qꞌuen cadena.
Cꞌochnac vin̈aj Pablo dꞌa yichan̈ ebꞌ sat yajal
30 Axo dꞌa junxo cꞌu,
sgana vin̈ coronel chiꞌ syabꞌi tas yuj ix acꞌjioch dꞌa yibꞌan̈ vin̈aj Pablo chiꞌ yuj ebꞌ israel.
Yuj chiꞌ ix schec vin̈ icꞌjoquel qꞌuen cadena chiꞌ dꞌa vin̈.
Ix lajvi chiꞌ,
ix yalan vin̈ to smolbꞌej sbꞌa ebꞌ vin̈ sat sacerdote yedꞌ masanil ebꞌ vin̈ sat yajal.
Ix yicꞌanelta vin̈aj Pablo chiꞌ vin̈ dꞌa yol cuartel chiꞌ,
ix acꞌji entregar vin̈ yuj vin̈ dꞌa ebꞌ vin̈.