Schanac Cristo vin̈aj Saulo
9
Axo vin̈aj Saulo,
max yactej vin̈ yalani to ol smilcham ebꞌ tzꞌacꞌanoch Jesús Cajal dꞌa scꞌool.
Yuj chiꞌ ix cꞌoch vin̈ dꞌa vin̈ sat sacerdote.
2 Ix scꞌanan juntzan̈ chꞌan̈ carta vin̈,
yic syicꞌanbꞌat chꞌan̈ vin̈ dꞌa yoltac spatil culto ay dꞌa chon̈abꞌ Damasco.
A juntzan̈ carta chiꞌ tzꞌacꞌan sderecho vin̈ yic syaman jantacn̈ej ebꞌ syacꞌoch spensar dꞌa Jesús,
vachꞌchom vinac ma ix,
yic syicꞌcot ebꞌ vin̈ preso dꞌa Jerusalén.
Conversión de Saulo (Hechos 9.1-19)
3 Ix lajvi chiꞌ ix bꞌat vin̈,
palta axo yic van scꞌoch vin̈ dꞌa slacꞌanil chon̈abꞌ Damasco chiꞌ,
ix emul copnaj jun saquilqꞌuinal dꞌa satchaan̈ dꞌa yibꞌan̈ vin̈.
4 Yuj chiꞌ ix telvi vin̈ dꞌa sat luum.
Ix yabꞌan vin̈ yoch jun lolonel.
Ix yalan icha tic:
—Saulo,
Saulo,
¿tas yuj tzin ixtej?
xchi dꞌa vin̈.
5 —Mamin,
¿mach ach?
xchi vin̈.
—A in ton tic Jesús in.
A in val tzin ixtej.
6 —Qꞌuean̈ vaan,
ixic dꞌa chon̈abꞌ chiꞌ.
Ataꞌ ol alchaj dꞌayach tas yovalil ol a cꞌulej,
xchi Jesús chiꞌ dꞌa vin̈.
7 Axo ebꞌ vin̈ yetbꞌeyum vin̈aj Saulo chiꞌ,
ix vanaj ebꞌ vin̈,
ix sat scꞌol ebꞌ vin̈ yuj xivelal.
Ix yabꞌ ebꞌ vin̈ to ay mach sloloni,
palta malaj mach ix yil ebꞌ vin̈.
8 Ix lajvi chiꞌ,
ix qꞌue vaan vin̈aj Saulo chiꞌ dꞌa sat luum.
Axo yic ix elta qꞌuelan vin̈,
majxo yal-laj yilan jabꞌoc vin̈.
Yuj chiꞌ a ebꞌ vin̈ yetbꞌeyum vin̈ ix yaman scꞌabꞌ,
ix squetzanbꞌat vin̈ ebꞌ vin̈ dꞌa yol chon̈abꞌ Damasco chiꞌ.
9 Axo ix cꞌoch vin̈ taꞌ,
oxeꞌ cꞌual majxo yal-laj yilan vin̈.
Majxo valaj vin̈.
Majxo yucꞌpaxlaj aꞌ vin̈.
10 A dꞌa Damasco chiꞌ ay jun vin̈ creyente scuchan Ananías,
axo Jesús Cajal ix alan dꞌa vin̈ icha dꞌa vayichal icha tic:
—Ach Ananías,
xchi.
—Tic ay in Mamin,
xchi vin̈.
11 —Ixic dꞌa jun calle scuch Tojol.
Ayic tzach cꞌoch dꞌa spat vin̈aj Judas,
tza cꞌanbꞌan dꞌa vin̈ yuj vin̈aj Saulo aj Tarso.
Ol ilani to van slesalvi vin̈.
12 Ay jun tas ix in chꞌox dꞌa vin̈.
Ix yilan vin̈ to a ach ol ach cꞌochoc,
ol acꞌanecꞌ a cꞌabꞌ dꞌa sjolom vin̈,
yic vachꞌ ol jacvocxican sat vin̈,
xchi Jesús Cajal chiꞌ dꞌa vin̈.
13 Palta axo ix yalan vin̈:
—Mamin,
tzijtum mach ix alan dꞌayin yuj vin̈aj Saulo chiꞌ.
A dꞌa Jerusalén man̈ jantacoc chucal ix yacꞌ vin̈ dꞌa ebꞌ tzach acꞌanoch dꞌa scꞌool.
14 Xal ticnaic ix ja vin̈ dꞌa tic,
yic syamji jantacn̈ej ebꞌ syal sbꞌa dꞌayach yuj vin̈,
yujto acꞌbꞌil yopisio vin̈ yuj ebꞌ vin̈ sat sacerdote,
xchi vin̈.
15 Palta ix yalanxi Jesús Cajal chiꞌ dꞌa vin̈:
—Ixic,
yujto a vin̈aj Saulo chiꞌ,
ix in siqꞌuel vin̈,
yic vachꞌ ol yalel in lolonel vin̈ dꞌa scal ebꞌ man̈ israeloc,
dꞌa yichan̈ ebꞌ rey yedꞌ dꞌa scal ebꞌ eyetisraelal.
16 A in ol in chꞌox dꞌa vin̈,
jantac syaelal yovalil ol yabꞌ vin̈ vuuj,
xchi Jesús Cajal chiꞌ.
17 Yuj chiꞌ,
ix bꞌat vin̈aj Ananías chiꞌ dꞌa jun pat chiꞌ.
Axo ix cꞌoch vin̈,
ix och vin̈ dꞌa yool.
Ix yacꞌanecꞌ scꞌabꞌ vin̈ dꞌa sjolom vin̈aj Saulo chiꞌ.
Ix yalan vin̈:
—Vucꞌtac Saulo,
a Cajal Jesús,
jun ix schꞌox sbꞌa dꞌayach dꞌa yol bꞌe bꞌaj ach javi chiꞌ,
aꞌ in checancot dꞌayach,
yic vachꞌ ol jacvocxi a sat,
axo yochcan Espíritu Santo dꞌayach,
xchi vin̈ dꞌa vin̈.
18 Junanto rato chiꞌ ix elta tzicnaj juntzan̈ icha stumin nocꞌ chay ayoch dꞌa yol sat vin̈,
ichato chiꞌ ix bꞌoxican yilan vin̈.
Ix qꞌue vaan vin̈,
ix yacꞌan acꞌjoc bautizar sbꞌa vin̈.
19 Ix lajvi chiꞌ,
ix va vin̈,
ix yicꞌanxi yip vin̈.
Ix aj jayeꞌ cꞌual vin̈ yedꞌ ebꞌ creyente dꞌa Damasco chiꞌ.
Yalnaquel slolonel Dios vin̈aj Saulo dꞌa Damasco
20 A vin̈aj Saulo chiꞌ,
ix syamoch vin̈ yalel slolonel Dios dꞌa yoltac spatil culto.
Ix yalan vin̈ to a Jesús,
Yuninal ton Dios.
21 Jantacn̈ej ebꞌ ix abꞌan yalan vin̈,
ix te sat scꞌool ebꞌ.
Ix yalan ebꞌ:
—Aton jun vin̈ tic ix acꞌanoch syaelal ebꞌ syal sbꞌa dꞌa Jesús dꞌa Jerusalén.
A co naani to sja vin̈ ul syam ebꞌ creyente dꞌa tic,
yic syicꞌbꞌat ebꞌ vin̈ dꞌa ebꞌ vin̈ sat sacerdote,
xchi ebꞌ.
22 Axo vin̈aj Saulo chiꞌ,
ix ste aqꞌuej yip vin̈ yalaneli,
yic vachꞌ scheclajeli to a Jesús dꞌa val yel Cristo toni,
aton jun tan̈vabꞌil yuj ebꞌ.
Axo ebꞌ israel aj Damasco chiꞌ,
maj nachajel jabꞌoc yuj ebꞌ tas syutej ebꞌ spacan dꞌa vin̈.
Colchajnaquel vin̈aj Saulo dꞌa yol scꞌabꞌ ebꞌ yetisraelal
23 Ayic nivanxo tiempo ix eqꞌui,
ix slajtian sbꞌa ebꞌ israel dꞌa spatic vin̈aj Saulo chiꞌ.
Ix yalan ebꞌ to ol smilcham vin̈ ebꞌ.
24 Palta ix yabꞌ specal vin̈ to cꞌual dꞌacꞌval stan̈van ebꞌ dꞌa juntzan̈ bꞌe sbꞌat dꞌa stiel chon̈abꞌ,
yic ataꞌ smilcham vin̈ ebꞌ snaani.
25 Yuj chiꞌ,
a ebꞌ creyente ix acꞌanem vin̈ dꞌa yol jun xuuc,
axo dꞌa sventenail smuroal jun chon̈abꞌ chiꞌ ix yaqꞌuem dꞌun̈un̈oc vin̈ ebꞌ dꞌacꞌvalil.
Icha chiꞌ ix aj scolchajel vin̈.
Ayecꞌ vin̈aj Saulo dꞌa Jerusalén
26 Axo yic ix cꞌoch vin̈aj Saulo chiꞌ dꞌa Jerusalén,
ix snibꞌej vin̈ smolbꞌej sbꞌa yedꞌ ebꞌ creyente taꞌ,
palta ton̈ej ix xivqꞌue ebꞌ smasanil dꞌa vin̈.
Maj schalaj yabꞌ ebꞌ tato yel creyentexo vin̈.
27 Palta a jun vin̈ scuch Bernabé ix icꞌanbꞌat vin̈ dꞌa ebꞌ vin̈ schecabꞌ Jesús.
Ix yalan vin̈ dꞌa ebꞌ vin̈:
—A vin̈aj Saulo tic,
ix yil Cajal Jesús vin̈ dꞌa yol bꞌe.
Ix lolonpax Cajal Jesús chiꞌ yedꞌ vin̈.
Yuj chiꞌ malaj mach bꞌaj ix xiv vin̈ yalanel yabꞌixal Jesús dꞌa chon̈abꞌ Damasco chiꞌ,
xchi vin̈aj Bernabé chiꞌ.
28 Yuj chiꞌ ix aj vin̈aj Saulo dꞌa Jerusalén chiꞌ.
Junn̈ej ix ecꞌ vin̈ yedꞌ ebꞌ creyente taꞌ.
29 Ix ste tecꞌbꞌan sbꞌa vin̈ yalanel yabꞌixal Cajal Jesús.
Ix stelan sbꞌa vin̈ yedꞌ ebꞌ yetisraelal tzꞌalan stiꞌ ebꞌ griego.
Palta a ebꞌ chiꞌ,
ix slajtiej sbꞌa ebꞌ yic smilancham vin̈ ebꞌ.
30 Axo ix yabꞌan specal jun chiꞌ ebꞌ creyente,
ix yicꞌanbꞌat vin̈aj Saulo chiꞌ ebꞌ dꞌa chon̈abꞌ Cesarea.
Ix lajvi scꞌoch ebꞌ yedꞌ vin̈ taꞌ,
ix schecancanbꞌat vin̈ ebꞌ dꞌa chon̈abꞌ Tarso.
31 Ichato chiꞌ,
ix och vaan spechji bꞌeyecꞌ ebꞌ creyente dꞌa masanil chon̈abꞌ dꞌa yol yic Judea,
dꞌa yol yic Galilea yedꞌ dꞌa yol yic Samaria.
Ix laj stecꞌbꞌitan sbꞌa ebꞌ.
Te naann̈ej Cajal Jesús yuj ebꞌ.
Ix och Yespíritu Dios yedꞌ ebꞌ,
yuj chiꞌ ix te qꞌuibꞌ sbꞌisul ebꞌ.
Bꞌonacxi scꞌool vin̈aj Eneas
32 A junel,
ayic ix ecꞌ vin̈aj Pedro yil ebꞌ yetcreyenteal,
ix cꞌoch vin̈ dꞌa ebꞌ creyente dꞌa chon̈abꞌ Lida.
33 Ataꞌ ix ilchaj jun vin̈ scuch Eneas yuj vin̈.
Svajxaquilxo abꞌil stelvican vin̈,
yujto sicbꞌinaquel vin̈.
34 Yuj chiꞌ ix yal vin̈ dꞌa vin̈:
—Ach Eneas,
sval dꞌayach,
a Jesucristo tzꞌacꞌan bꞌoxoc a cꞌool.
Yuj chiꞌ qꞌuean̈ vaan,
pac a vaynubꞌ tic,
xchi vin̈ dꞌa vin̈.
Val dꞌa jun rato chiꞌ,
ix qꞌue van vin̈.
35 Axo ebꞌ anima smasanil aj Lida chiꞌ yedꞌ ebꞌ aj Sarón,
ix yil ebꞌ to ix bꞌoxican vin̈.
Yuj chiꞌ ix sqꞌuex sbꞌeybꞌal ebꞌ,
ix yacꞌanoch spensar ebꞌ dꞌa Cajal Jesús.
Pitzvinacxi ix Dorcas
36 A dꞌa chon̈abꞌ Jope,
ay jun ix creyente scuchan Tabita.
Axo dꞌa tiꞌ griego Dorcas sbꞌi ix.
Te vachꞌ ix,
scolvaj ix dꞌa ebꞌ mebꞌaꞌ.
37 Axo dꞌa jun tiempo chiꞌ,
ix yamchaj ix yuj jun yabꞌil,
ix cham ix.
Ix lajvi chiꞌ,
ix bꞌicchajel snivanil ix,
ix icꞌjiqꞌue dꞌa yol jun cuarto dꞌa chaan̈.
38 A jun chon̈abꞌ Jope chiꞌ,
a dꞌa slacꞌanil chon̈abꞌ Lida ay,
aton bꞌaj ayecꞌ vin̈aj Pedro chiꞌ.
Axo ix yabꞌan ebꞌ creyente to ataꞌ ayecꞌ vin̈,
ix schecanbꞌat chavan̈ vinac ebꞌ dꞌa vin̈,
ix yalan ebꞌ vin̈:
—Cotan̈,
con̈ quedꞌoc dꞌa Jope val ticnaic,
xchi ebꞌ vin̈ dꞌa vin̈.
39 Yuj chiꞌ ix bꞌat vin̈aj Pedro chiꞌ yedꞌ ebꞌ vin̈.
Axo ix cꞌoch vin̈,
ix icꞌjiqꞌue vin̈ dꞌa jun cuarto bꞌaj ay snivanil ix Dorcas chiꞌ.
Ataꞌ molanecꞌ ebꞌ ix chamnac yetbꞌeyum.
Van yocꞌ ebꞌ ix yuj ix.
Ay juntzan̈ spichul ebꞌ ix yedꞌ juntzan̈ scamix sbꞌonac ix Dorcas chiꞌ ayic pitzanto ix.
Ix schꞌoxan juntzan̈ chiꞌ ebꞌ ix dꞌa vin̈aj Pedro chiꞌ.
40 Axo vin̈ ix checanxiemta ebꞌ smasanil.
Ix lajvi chiꞌ ix em cuman vin̈,
ix lesalvi vin̈.
Ix och qꞌuelan vin̈ dꞌa ix Dorcas chiꞌ.
Ix yalan vin̈ dꞌa ix:
—Ach Tabita,
sval dꞌayach,
qꞌuean̈ vaan,
xchi vin̈ dꞌa ix.
Axo ix elta qꞌuelan ix.
Ix yilanoch vin̈aj Pedro chiꞌ ix,
ix qꞌue cꞌojan ix.
41 A vin̈ ix yaman scꞌabꞌ ix.
Ix squetzanqꞌue vaan ix vin̈.
Ix lajvi chiꞌ,
ix yavtanxiqꞌue ebꞌ ix ix chiꞌ vin̈ yedꞌ juntzan̈xo ebꞌ creyente.
Ix schꞌoxanelta ix vin̈ dꞌa ebꞌ to ix pitzvixi ix.
42 Axo ebꞌ aj Jope chiꞌ,
ix laj yabꞌ specal jun chiꞌ ebꞌ.
Yuj chiꞌ tzijtum ebꞌ ix acꞌanoch Cajal Jesús dꞌa scꞌool.
43 A vin̈aj Pedro chiꞌ,
ixto ecꞌ jayexo cꞌual vin̈ dꞌa Jope chiꞌ,
axo dꞌa spat jun vin̈ scuchan Simón smunlaj yedꞌ nocꞌ tzꞌum ix aj vin̈.