Yacꞌnac chucal vin̈aj Saulo dꞌa ebꞌ creyente
8
Te locan vin̈aj Saulo yedꞌ ebꞌ ix milancham vin̈aj Esteban chiꞌ.
Aton val dꞌa jun cꞌu chiꞌ ix och ijan ebꞌ anima yacꞌanoch syaelal ebꞌ creyente dꞌa Jerusalén chiꞌ.
Ix yabꞌan val syail ebꞌ sicꞌlabꞌil.
Yuj chiꞌ ix laj saclembꞌat ebꞌ.
Ix laj bꞌat ebꞌ dꞌa yol yic Judea yedꞌ Samaria.
Axon̈ej ebꞌ schecabꞌ Jesús ix can dꞌa Jerusalén chiꞌ.
2 Ix lajvin̈ej scham vin̈aj Esteban chiꞌ,
ay juntzan̈ ebꞌ vin̈ ayoch spensar dꞌa Dios ix icꞌanbꞌat snivanil vin̈ chiꞌ,
ix bꞌat smucanem vin̈ ebꞌ.
Ix te ocꞌ ebꞌ vin̈ yuj vin̈.
3 Axo vin̈aj Saulo chiꞌ,
ix yacꞌ val chucal vin̈ dꞌa ebꞌ creyente.
Yaln̈ej bꞌaj ayecꞌ ebꞌ,
ix laj och vin̈ dꞌa yol spat ebꞌ.
Ix laj yiqꞌuelta ebꞌ vin̈ vinac vin̈ yedꞌ ebꞌ ix ix,
ix bꞌat yacꞌanoch ebꞌ vin̈ dꞌa preso.
Ix aljiel vachꞌ abꞌix dꞌa Samaria
4 Axo ebꞌ creyente ix el dꞌa Jerusalén,
ix laj saclembꞌat ebꞌ.
Masanil bꞌajtac ix laj cꞌoch ebꞌ ix laj yalel vachꞌ abꞌix yic colnabꞌil ebꞌ.
5 Ay jun vin̈ scuch Felipe ix cꞌoch dꞌa jun chon̈abꞌ dꞌa yol yic Samaria.
Ix yalcanel yabꞌixal Cristo vin̈ dꞌa scal ebꞌ.
6 Axo ebꞌ anima ayecꞌ taꞌ,
ix smaclej val yabꞌ ebꞌ tas ix yal vin̈ chiꞌ.
Ix yilanpax juntzan̈ milagro ebꞌ ix sbꞌo vin̈.
7 A dꞌa jun chon̈abꞌ chiꞌ,
tzijtum ebꞌ anima ayoch ebꞌ enemigo dꞌay,
axo vin̈aj Felipe chiꞌ ix laj icꞌanel ebꞌ dꞌa ebꞌ.
Ix laj el yav ebꞌ yel dꞌa ebꞌ.
Tzijtum ebꞌ sicbꞌinaqueli yedꞌ ebꞌ max yal sbꞌeyi,
ix laj bꞌoxican ebꞌ yuj vin̈.
8 Yuj juntzan̈ chiꞌ ix te tzalaj scꞌool ebꞌ anima smasanil dꞌa jun chon̈abꞌ chiꞌ.
9 Palta ay jun vin̈ vinac scuch Simón taꞌ.
Ste aqꞌuej val musansatil ebꞌ anima vin̈,
yujto te nivan yelcꞌoch vin̈ yalani,
ay tas syal yuj vin̈ yalani.
10 Masanil ebꞌ malaj yelcꞌochi yedꞌ ebꞌ nivan yelcꞌochi,
jun lajan syacꞌoch spensar ebꞌ dꞌa vin̈,
syalan ebꞌ:
—A vin̈aj Simón,
aton jun dios scuchan Nivan Spoder,
xchi ebꞌ dꞌa vin̈.
11 Syacꞌ val och spensar ebꞌ dꞌa vin̈,
yujto pecatax syamnacoch vin̈ yacꞌan musansatil ebꞌ,
syalan vin̈ to tzuji yuuj.
12 Axo vin̈aj Felipe chiꞌ ix alanel dꞌa scal ebꞌ tas tzꞌaj yoch ebꞌ dꞌa yol scꞌabꞌ Dios.
Ix yalanel yabꞌixal Jesucristo vin̈ dꞌa ebꞌ.
Yuj chiꞌ ay ebꞌ vin̈ vinac yedꞌ ebꞌ ix ix,
ix acꞌanoch dꞌa scꞌool tas ix yal vin̈ chiꞌ.
Ix lajvi chiꞌ,
ix schaan sbautismo ebꞌ.
13 Icha pax chiꞌ vin̈aj Simón chiꞌ,
ix yacꞌoch slolonel Dios vin̈ dꞌa scꞌool.
Ix schaan pax sbautismo vin̈.
Ix lajvin̈ej chiꞌ,
junxon̈ej ix ecꞌ vin̈ yedꞌ vin̈aj Felipe chiꞌ.
Ay juntzan̈ milagro ix schꞌox vin̈aj Felipe chiꞌ,
te nivan yelcꞌochi.
Yuj chiꞌ,
ix te sat scꞌool vin̈aj Simón chiꞌ yilani.
14 Axo ebꞌ schecabꞌ Jesús ayecꞌ dꞌa Jerusalén,
ayic ix yabꞌan ebꞌ to ay ebꞌ aj Samaria ix acꞌanoch slolonel Dios dꞌa scꞌool,
ix schecbꞌat vin̈aj Pedro ebꞌ yedꞌ vin̈aj Juan yil ebꞌ.
15 Ayic ix cꞌoch ebꞌ vin̈,
ix lesalvi ebꞌ vin̈ yuj ebꞌ creyente aj Samaria chiꞌ,
yic vachꞌ tzꞌacꞌji Espíritu Santo dꞌa ebꞌ,
16 yujto manta junoc ebꞌ schaani.
An̈ejanto dꞌa sbꞌi Cajal Jesús bꞌaj ix acꞌji bautizar ebꞌ.
17 Axo vin̈aj Pedro yedꞌ vin̈aj Juan chiꞌ ix acꞌanecꞌ scꞌabꞌ dꞌa sjolom ebꞌ.
Ichato chiꞌ ix schaancan Espíritu Santo chiꞌ ebꞌ.
18 Ix yilan vin̈aj Simón chiꞌ to ayic ix yacꞌanecꞌ scꞌabꞌ ebꞌ vin̈ dꞌa sjolom ebꞌ creyente chiꞌ,
ix schacan Espíritu Santo ebꞌ,
yuj chiꞌ ix yaltej tumin vin̈ dꞌa ebꞌ vin̈ schecabꞌ Jesús chiꞌ.
19 Ix yalan vin̈ dꞌa ebꞌ vin̈ icha tic:
—Aqꞌuec vopisio eyedꞌoc yic vachꞌ yaln̈ej mach ol vaqꞌuecꞌ in cꞌabꞌ dꞌa sjolom,
ol schacan Espíritu Santo chiꞌ,
xchi vin̈ dꞌa ebꞌ vin̈.
20 Yuj chiꞌ ix yalan vin̈aj Pedro dꞌa vin̈:
—Ach satocabꞌel yedꞌ qꞌuen a tumin chiꞌ,
yujto a jun tas syacꞌ Dios dꞌa nabꞌan̈ej ix a nibꞌej a man yedꞌ jabꞌ a tumin tic.
21 Malaj alan ic quedꞌoc.
Malaj och dꞌa jun copisio tic,
yujto man̈ tojoloc a pensar dꞌa yichan̈ Dios.
22 Yuj chiꞌ na a bꞌa yuj jun a chucal tic.
Cꞌan dꞌa Dios,
tope ol ach yacꞌ nivancꞌolal yuj tas van a naan tic.
23 Yujto svilaꞌ to an̈ej chichoncꞌolal tza naꞌa,
yujto an̈ej chucal van acꞌan servil,
xchi vin̈aj Pedro chiꞌ dꞌa vin̈.
24 Yuj chiꞌ ix yalxi vin̈:
—Tze cꞌan val dꞌa Dios Cajal vuuj,
yic man̈ ol javoc jun yaelal tzeyal tic dꞌa vibꞌan̈,
xchi vin̈.
25 Axo pax vin̈aj Pedro yedꞌ vin̈aj Juan chiꞌ,
ix yalel yabꞌixal Jesús ebꞌ vin̈.
Ix yalanpaxel slolonel Dios Cajal ebꞌ vin̈ dꞌa Samaria chiꞌ.
Ix lajvi chiꞌ,
yacbꞌan van smeltzajxibꞌat ebꞌ vin̈ dꞌa Jerusalén,
tzijtum juntzan̈ yunetac chon̈abꞌ dꞌa yol yic Samaria chiꞌ bꞌaj ix ecꞌ ebꞌ vin̈ yalcanel vachꞌ abꞌix yic colnabꞌil.
A vin̈aj Felipe yedꞌ vin̈ aj Etiopía
26 Ay jun yángel Dios Cajal ix alan icha tic dꞌa vin̈aj Felipe chiꞌ:
—Acꞌ lista a bꞌa.
Ixic dꞌa sur,
dꞌa jun bꞌe scot dꞌa Jerusalén,
scꞌoch dꞌa chon̈abꞌ Gaza,
xchi.
A jun bꞌe chiꞌ,
aton jun tzꞌecꞌ dꞌa tzꞌinan luum.
27 Yuj chiꞌ,
ix yacꞌ lista sbꞌa vin̈,
ix bꞌat vin̈.
Axo dꞌa yol bꞌe chiꞌ,
ix yil-laj sbꞌa vin̈ yedꞌ jun vin̈ aj Etiopía.
A jun vin̈ chiꞌ ay yopisio vin̈ yuj ix Candace,
ix yajal yaj dꞌa Etiopía chiꞌ.*
Sicꞌum tumin yaj vin̈ dꞌa ix.
Ix xidꞌecꞌ vin̈ yaqꞌuem sbꞌa dꞌa Dios dꞌa Jerusalén.
28 Van spax vin̈ dꞌa Etiopía chiꞌ.
Cꞌojanem vin̈ dꞌa yol jun scarruaje.
Van yilan Slolonel Dios vin̈ tzꞌibꞌabꞌilcan yuj vin̈aj Isaías,
aton vin̈ schecabꞌ Dios.
29 Axo Yespíritu Dios ix alan dꞌa vin̈aj Felipe chiꞌ:
—Ixic,
nitzbꞌat a bꞌa dꞌa stzꞌey jun carruaje chiꞌ,
xchi.
30 Axo ix cꞌoch vin̈ dꞌa stzꞌey,
ix yabꞌan vin̈ to van yavtan Slolonel Dios vin̈,
aton jun tzꞌibꞌabꞌilcan yuj vin̈aj Isaías.
Yuj chiꞌ ix yal vin̈ dꞌa vin̈:
—¿Tzam nachajel uuj tas van avtan chiꞌ?
xchi vin̈.
31 Ix yalan vin̈:
—Tato malaj mach tzin cꞌaybꞌani,
¿tas ol aj snachajel vuuj?
¿Max am yal a qꞌueta dꞌa yol carruaje tic yic tzach em cꞌojan vedꞌoc?
xchi vin̈ dꞌa vin̈aj Felipe chiꞌ
32 A Slolonel Dios van yavtan vin̈ chiꞌ,
aton jun tzꞌalan icha tic:
Icha junoc nocꞌ calnel tzꞌicꞌjibꞌat bꞌaj ol bꞌat chamoc,
icha chiꞌ ol aj yicꞌjibꞌat jun Schecabꞌ Dios Cajal schami.
Icha junoc nocꞌ calnel tzꞌinn̈ej xchi sjoxchaji,
icha pax chiꞌ ol ajoc.
33 Te qꞌuixvelal ol yutej ebꞌ.
Toxonton man̈ ol sbꞌo yaj jabꞌoc ebꞌ dꞌay.
Malaj junoc mach ol alanoc tato ay yin̈tilal ol canoc,
yujto ol miljocchamoc,
xchi dꞌa Slolonel Dios chiꞌ.
34 Yuj chiꞌ ix scꞌanbꞌej vin̈ dꞌa vin̈aj Felipe chiꞌ:
—Al dꞌayin,
¿mach ay yabꞌixal jun yalnaccan vin̈ schecabꞌ Dios chiꞌ?
¿Tom a yabꞌixal vin̈ yalnaccani,
ma to chꞌoc junocxo mach yalnaccan yabꞌixal vin̈?
xchi vin̈ aj Etiopía chiꞌ.
35 Axo vin̈aj Felipe chiꞌ ix alan dꞌa vin̈ tas syalelcꞌoch Slolonel Dios chiꞌ.
Ix syamanoch vin̈ yalan yabꞌixal Jesucristo dꞌa vin̈.
36-37 Ayic van sbꞌat ebꞌ vin̈ dꞌa yol bꞌe chiꞌ,
ix cꞌoch ebꞌ vin̈ dꞌa jun a aꞌ.
Ix yalan vin̈ aj Etiopía chiꞌ dꞌa vin̈:
Ina jun a aꞌ tic,
¿max am yal in acꞌancan bautizar ticnaic?
xchi vin̈.
38 Ix lajvin̈ej chiꞌ,
ix yalan vin̈ to syamjioch vaan jun scarruaje vin̈ chiꞌ.
Ix em ebꞌ vin̈ schavan̈il dꞌa yol jun a aꞌ chiꞌ.
Axo taꞌ ix acꞌjican bautizar vin̈.
39 Ayic ix lajvi sqꞌuexta ebꞌ vin̈ dꞌa yol a aꞌ chiꞌ,
axo Yespíritu Dios ix icꞌanbꞌat vin̈aj Felipe chiꞌ.
Yuj chiꞌ majxo iljilaj vin̈ yuj vin̈ aj Etiopía chiꞌ,
majxo yil-laj vin̈ bꞌaj ix cꞌoch vin̈.
Palta te tzalajcꞌolal ix bꞌatxican vin̈ aj Etiopía chiꞌ dꞌa yol bꞌe chiꞌ.
40 Axo vin̈aj Felipe chiꞌ,
a dꞌa chon̈abꞌ Azoto ix cꞌoch vin̈.
Ix lajvin̈ej chiꞌ,
ix bꞌatxi vin̈.
Ix laj ecꞌ yalancanel vachꞌ abꞌix yic colnabꞌil vin̈ dꞌa juntzan̈xo chon̈abꞌ,
masanto ix cꞌoch vin̈ dꞌa chon̈abꞌ Cesarea.