A slolonel vin̈aj Esteban
7
Axo vin̈ sat sacerdote ix cꞌanbꞌan dꞌa vin̈aj Esteban chiꞌ:
—¿Yel am juntzan̈ ix yal ebꞌ tic?
xchi vin̈.
2 Yuj chiꞌ,
ix yal vin̈aj Esteban chiꞌ icha tic:
—Ex vetchon̈abꞌ yedꞌ ex ichamtac vinac,
abꞌec nabꞌi.
A Dios,
te nivan yelcꞌochi.
Schꞌoxnac sbꞌa dꞌa vin̈ co mam quicham aj Abraham ayic ayecꞌ vin̈ dꞌa yol yic Mesopotamia,
ayic manto cꞌoch cajan vin̈ dꞌa chon̈abꞌ Harán.
3 Yalannac Dios chiꞌ icha tic dꞌa vin̈:
Actejcan lum a luum tic yedꞌ jantac ebꞌ a cꞌabꞌ oc.
Ixic dꞌa junxo lugar ol in chꞌox dꞌayach,
xchi dꞌa vin̈.
4 Slajvi chiꞌ,
yactannaccan slugar ebꞌ caldeo vin̈ bꞌaj ayecꞌ chiꞌ.
Axo dꞌa chon̈abꞌ Harán cꞌochnaccan cajan vin̈.
Axo yic schamnac vin̈ smam vin̈,
yicꞌjinaccot vin̈ yuj Dios dꞌa jun lugar bꞌaj ay on̈ ecꞌ tic.
5 Palta malaj jabꞌoc luum yacꞌnac Dios chiꞌ yicoc vin̈ dꞌa tic.
Malaj jabꞌoc acꞌjinac dꞌa vin̈,
palta yacꞌnaccan stiꞌ Dios chiꞌ dꞌa vin̈,
ayic yalannaccan icha tic:
Ol vacꞌ jun a luum.
Axo yic ol ach chamoc,
ol can jun a luum chiꞌ yicoc ebꞌ in̈tilal,
xchi Dios chiꞌ dꞌa vin̈.
Ayic mantalaj junoc yuninal vin̈,
ataꞌ yalnaccan jun chiꞌ Dios.
6 Yalannacpaxcan Dios chiꞌ icha tic dꞌa vin̈:
A ebꞌ in̈tilal ol cꞌoch cajan ebꞌ dꞌa yol yic junxo chꞌoc chon̈abꞌil.
Ol acꞌjoc och ebꞌ schecabꞌoc ebꞌ chꞌoc chon̈abꞌil chiꞌ.
Chan̈eꞌ ciento abꞌil ol yabꞌ syail ebꞌ yuj ebꞌ.
7 Palta a in ol vacꞌoch yaelal dꞌa yibꞌan̈ ebꞌ chꞌoc chon̈abꞌil chiꞌ.
Ol lajvoc chiꞌ,
ol elta ebꞌ in̈tilal chiꞌ dꞌa jun lugar chiꞌ,
ol in yacꞌan servil ebꞌ dꞌa jun lugar tic,
xchinac Dios chiꞌ.
8 An̈ejtonaꞌ,
yacꞌnacxican stiꞌ Dios dꞌa vin̈aj Abraham chiꞌ.
Yalannaccan dꞌa vin̈ to tzꞌoch jun yechel dꞌa snivanil vin̈ yedꞌ dꞌa jantacn̈ej ebꞌ yin̈tilal vin̈,
yic vachꞌ scheclajeli to ay strato Dios yedꞌ ebꞌ.
A jun yechel chiꞌ,
aton jun scuch circuncisión.
Yuj chiꞌ,
ayic yalji jun yuninal vin̈aj Abraham scuch Isaac,
yucubꞌixial yalji,
yacꞌji circuncidar yuj vin̈aj Abraham chiꞌ.
An̈ejtonaꞌ yalji pax jun yuninal vin̈aj Isaac chiꞌ scuch Jacob,
acꞌjipax circuncidar yuj vin̈aj Isaac chiꞌ.
Axo vin̈aj Jacob chiꞌ,
lajchavan̈ ebꞌ yuninal vin̈ aljinac.
Laj acꞌji circuncidar ebꞌ smasanil.
A ebꞌ lajchavan̈ chiꞌ,
aton ebꞌ co mam quicham a on̈ israel on̈ tic.
9 A dꞌa scal ebꞌ co mam quicham chiꞌ,
ay jun vin̈ yucꞌtac ebꞌ scuchan José.
A junel meltzajoch ebꞌ yucꞌtac vin̈aj José chiꞌ ajcꞌolal dꞌay.
Yuj chiꞌ schon̈bꞌat vin̈ ebꞌ dꞌa Egipto,
palta axo Dios och yedꞌ vin̈.
10 A Dios chiꞌ colanelta vin̈ dꞌa scal juntzan̈ syaelal.
Yacꞌan sjelanil dꞌa vin̈.
Och yedꞌ vin̈,
yic vachꞌ syutej sbꞌa vin̈ dꞌa yichan̈ vin̈ sreyal ebꞌ aj Egipto chiꞌ.
Yuj chiꞌ yacꞌoch yopisio vin̈aj José chiꞌ vin̈ yoch yajalil dꞌa Egipto chiꞌ.
An̈ejtonaꞌ,
yacꞌoch vin̈aj José chiꞌ vin̈ yilumaloc spat.
11 Palta a dꞌa jun tiempoal chiꞌ,
ja jun nivan vejel dꞌa yibꞌan̈ masanil ebꞌ aj Egipto chiꞌ yedꞌ dꞌa yibꞌan̈ ebꞌ aj Canaán.
Te yaꞌ ecꞌ ebꞌ yuj jun vejel chiꞌ.
Icha pax chiꞌ ebꞌ co mam quicham ay dꞌa Canaán chiꞌ,
man̈xa bꞌaj vachꞌ scot tas syabꞌlej ebꞌ.
12 Axo yabꞌan vin̈aj Jacob chiꞌ to ay ixim trigo dꞌa Egipto chiꞌ.
Yuj chiꞌ schecbꞌat ebꞌ yuninal vin̈ chiꞌ taꞌ,
aton ebꞌ co mam quicham.
Sbꞌabꞌelalto ebꞌ bꞌat dꞌa jun chiꞌ.
13 Axo schecjixibꞌat ebꞌ dꞌa schaelal,
ato taꞌ yal vin̈aj José chiꞌ dꞌa ebꞌ to yucꞌtac sbꞌa vin̈ yedꞌ ebꞌ.
Icha chiꞌ aj yojtacanel vin̈aj Faraón chiꞌ mach ebꞌ yetchon̈abꞌ vin̈aj José chiꞌ.
14 Axo vin̈aj José chiꞌ checan icꞌjibꞌat vin̈aj Jacob dꞌay,
aton vin̈ smam vin̈.
Schecan icꞌjibꞌat ebꞌ yucꞌtac yedꞌ ebꞌ ix yetbꞌeyum ebꞌ yedꞌ pax ebꞌ yuninal ebꞌ smasanil,
75 sbꞌisul ebꞌ.
15 Icha chiꞌ aj scꞌoch vin̈aj Jacob chiꞌ dꞌa Egipto chiꞌ.
Ataꞌ cham vin̈.
Junjunal champax ebꞌ co mam quicham chiꞌ taꞌ.
16 Ichato chiꞌ yicꞌjixicot snivanil vin̈ chiꞌ yuj ebꞌ junelxo dꞌa chon̈abꞌ Siquem.
Axo taꞌ acꞌjinacoch snivanil ebꞌ chiꞌ dꞌa yol jun qꞌuen n̈aqꞌueen.
A jun qꞌuen chiꞌ,
atax vin̈aj Abraham manannaccanel qꞌueen dꞌa ebꞌ yuninal vin̈aj Hamor aj chon̈abꞌ Siquem chiꞌ.
17 Axo yic vanxo scꞌoch stiempoal yelcꞌoch tas yalnaccan Dios dꞌa vin̈aj Abraham chiꞌ,
ayic yacꞌannaccan stiꞌ dꞌa vin̈,
qꞌuibꞌchaan̈ sbꞌisul ebꞌ yin̈tilal vin̈ dꞌa Egipto chiꞌ.
Te tzijtum aj sbꞌisul ebꞌ taꞌ.
18 Cꞌojancꞌolalto och junxo vin̈ sreyal ebꞌ aj Egipto chiꞌ.
A jun vin̈ chiꞌ,
man̈xo yojtacoc yabꞌixal vin̈aj José chiꞌ vin̈.
19 A jun vin̈ rey chiꞌ,
yixtejnac val ebꞌ co mam quicham chiꞌ vin̈.
Yacꞌnac val chucal vin̈ dꞌa ebꞌ.
Yalannac vin̈ dꞌa ebꞌ to yovalil syumel jantacn̈ej ebꞌ svinac unin ebꞌ tzato alji,
yic munil syacꞌcham sbꞌa ebꞌ bꞌaj sbꞌat yumjicanel chiꞌ.
20 Aton dꞌa jun tiempoal chiꞌ alji vin̈aj Moisés.
Te vachꞌ aj vin̈ dꞌa yichan̈ Dios.
Oxen̈ej ujal qꞌuibꞌtzitaj vin̈ yuj smam snun dꞌa yol spat.
21 Slajvi chiꞌ,
yactajcan vin̈ yuj ix snun icha syal jun ley chiꞌ.
Axo jun ix yisil vin̈ rey chiꞌ ilanelta vin̈.
Yicꞌanbꞌat vin̈ ix dꞌa spat.
Sqꞌuibꞌtzitan vin̈ ix icha val junoc yuneꞌ.
22 Axo vin̈aj Moisés chiꞌ scꞌaybꞌej vin̈ jantacn̈ej tas yojtac ebꞌ aj Egipto chiꞌ.
Yuj chiꞌ te jelan aj slolon vin̈.
Jelan pax aj vin̈ scꞌulan masanil tastac.
23 Ayic 40 abꞌilxo sqꞌuinal vin̈,
sja dꞌa spensar vin̈ bꞌat yilan ebꞌ yetchon̈abꞌ,
aton ebꞌ quetisraelal.
24 Axo scꞌoch vin̈,
yilan vin̈ to ay jun vin̈ aj Egipto chiꞌ van yacꞌan chucal dꞌa jun vin̈ yetchon̈abꞌ vin̈.
Yuj chiꞌ och vin̈ yedꞌ vin̈.
Axo vin̈ acꞌanecꞌ spac vin̈ yetchon̈abꞌ chiꞌ ayic smacꞌancham vin̈ aj Egipto chiꞌ vin̈.
25 Snaan vin̈aj Moisés chiꞌ to snachajel yuj ebꞌ yetchon̈abꞌ vin̈ chiꞌ to a Dios van yacꞌlabꞌan vin̈ yic scolancanel ebꞌ.
Palta maj nachajel-laj yuj ebꞌ.
26 Axo dꞌa junxo cꞌu scꞌoch vin̈ dꞌa chavan̈xo ebꞌ yetchon̈abꞌ.
Yilan vin̈ to van stzuntzan sbꞌa ebꞌ.
A sgana vin̈aj Moisés chiꞌ to tzꞌoch ebꞌ dꞌa juncꞌolal,
yuj chiꞌ yal vin̈ dꞌa ebꞌ:
Ex vetchon̈abꞌ,
¿tas yuj tzeyacꞌ oval?
Ina eyetchon̈abꞌ e bꞌa,
xchi vin̈ dꞌa ebꞌ.
27 Palta axo vin̈ van yacꞌan oval chiꞌ icꞌanel vin̈aj Moisés chiꞌ.
Yalan vin̈ dꞌa vin̈:
¿Mach ix ach acꞌanoch juezal,
yic tzon̈ acꞌan mandar?
28 ¿Tom a gana tzin a macꞌpaxchamoc icha utej jun vin̈ aj Egipto evi?
xchi vin̈.
29 Slajvin̈ej yabꞌan jun chiꞌ vin̈aj Moisés chiꞌ,
sbꞌatcan vin̈ elelal.
Scꞌochcan cajan vin̈ dꞌa scal ebꞌ chꞌoc chon̈abꞌil dꞌa yol yic Madián.
Axo taꞌ alji chavan̈ yuninal vin̈.
30 Ayxom 40 abꞌiloc scꞌoch vin̈ taꞌ,
sbꞌat vin̈ dꞌa tzalan Sinaí,
bꞌaj malaj anima.
Axo taꞌ schꞌox sbꞌa jun ángel dꞌa vin̈.
Ayecꞌ dꞌa scal jun cꞌacꞌ bꞌaj van stzꞌa jun teꞌ qꞌuiix.
31 Axo yic yilanbꞌat jun chiꞌ vin̈,
ton̈ej te sat scꞌool vin̈.
Yuj chiꞌ bꞌat vin̈ yilbꞌati,
axo Dios Cajal alan dꞌa vin̈:
32 A in ton tic,
jun Dios bꞌaj yacꞌnac em sbꞌa ebꞌ a mam icham,
aton vin̈aj Abraham,
vin̈aj Isaac yedꞌ vin̈aj Jacob,
xchi dꞌa vin̈.
Axo vin̈aj Moisés chiꞌ,
te ibꞌxiqꞌue vin̈ yuj xivelal.
Majxo ochlaj qꞌuelan vin̈ dꞌay.
33 Yalan Dios Cajal chiꞌ dꞌa vin̈:
Quichel a xan̈abꞌ,
yujto a dꞌa jun lugar bꞌaj ayach ecꞌ tic,
a inton ayinecꞌ dꞌay.
34 A ebꞌ in chon̈abꞌ ayecꞌ dꞌa Egipto,
svilaꞌ to van yabꞌan syail ebꞌ taꞌ.
Svabꞌanpaxi to scꞌacvi ebꞌ yabꞌan syail.
Yuj chiꞌ in javi viqꞌuelta ebꞌ dꞌa scal syaelal chiꞌ.
Yuj chiꞌ,
ixic.
Ol ach in checbꞌat dꞌa Egipto chiꞌ,
xchi Dios chiꞌ dꞌa vin̈.
35 Dꞌa pecaꞌ maj chajoclaj vin̈ yuj ebꞌ yetchon̈abꞌ chiꞌ.
Malaj ochnac vin̈ dꞌa ebꞌ.
Yalannac ebꞌ dꞌa vin̈:
¿Mach ach acꞌanoch juezal,
yuj chiꞌ tzon̈ acꞌ mandar?
xchi ebꞌ dꞌa vin̈.
Palta a Dios acꞌan yopisio vin̈ yacꞌan mandar ebꞌ.
Yacꞌjipax yopisio vin̈ yic syiqꞌuelta ebꞌ dꞌa scal yaelal chiꞌ.
A jun ángel schꞌox sbꞌa dꞌa vin̈ dꞌa scal teꞌ qꞌuiix chiꞌ,
a och yedꞌ vin̈.
36 Aton vin̈aj Moisés chiꞌ icꞌannaquelta ebꞌ quetchon̈abꞌ dꞌa Egipto chiꞌ.
40 abꞌil schꞌoxnac juntzan̈ milagro vin̈ dꞌa Egipto chiꞌ yedꞌ dꞌa aꞌ Chacchac Mar yedꞌ pax dꞌa tzꞌinan luum.
37 Aton vin̈ alannac icha tic dꞌa ebꞌ quetisraelal chiꞌ:
A Dios ol sicꞌanelta jun schecabꞌ dꞌa scal ebꞌ quetchon̈abꞌ icha ix yutej in sicꞌanelta a in tic,
xchi vin̈ dꞌa ebꞌ.
38 Ecꞌnac vin̈ yedꞌ ebꞌ co mam quicham dꞌa jun taquin̈ luum.
Aypaxecꞌ jun ángel yedꞌ ebꞌ,
aton jun lolonnac yedꞌ vin̈ dꞌa tzalan Sinaí.
A dꞌa vin̈aj Moisés chiꞌ,
ataꞌ yalnaccan juntzan̈ lolonel Dios tzꞌacꞌan co qꞌuinal.
Axo vin̈ alannaccan dꞌayon̈.
39 Palta a ebꞌ co mam quicham chiꞌ,
maj yal scꞌool ebꞌ scꞌanabꞌajej tas yal vin̈ chiꞌ.
Yuj chiꞌ spatiquejel vin̈ ebꞌ.
Snibꞌej ebꞌ meltzaj dꞌa Egipto.
40 Yalan ebꞌ dꞌa vin̈aj Aarón:
Bꞌo juntzan̈oc co diosal yic tzon̈ scuchbꞌani,
yujto a vin̈aj Moisés chiꞌ,
jun vin̈ ix on̈ icꞌanelta dꞌa Egipto,
man̈ cojtacoc tas ix icꞌan vin̈,
xchi ebꞌ.
41 Yuj chiꞌ,
sbꞌoan jun qꞌueen ebꞌ icha quelem vacax.
A jun chiꞌ yacꞌoch ebꞌ sdiosaloc.
Smilanpax juntzan̈ nocꞌ nocꞌ ebꞌ silabꞌoc dꞌay.
Yacꞌanoch sqꞌuin̈al jun sdiosal ebꞌ sbꞌo chiꞌ.
42 Yuj chiꞌ,
yiqꞌuel sbꞌa Dios dꞌa scal ebꞌ.
Actajcan ebꞌ schꞌocoj yic vachꞌ syaqꞌuem sbꞌa ebꞌ dꞌa juntzan̈ cꞌanal ay dꞌa satchaan̈.
Stzꞌibꞌejnaccan jun schecabꞌ Dios icha tic:
Ex israel,
ayic yecꞌnac 40 abꞌil ebꞌ e mam eyicham dꞌa tzꞌinan luum,
man̈oc dꞌayin sn̈usnac silabꞌ ebꞌ yedꞌ yofrenda.
43 Malaj jabꞌoc tas eyacꞌnac dꞌayin.
Palta a jun e diosal scuch Moloc,*
bꞌachbꞌil yedꞌtal eyuuj yedꞌ jun yechel cꞌanal scuch Renfán,
a juntzan̈ chiꞌ eyalnac och e diosaloc.
A dꞌa juntzan̈ yechel e bꞌonac chiꞌ,
ataꞌ eyalnac e bꞌa.
Yuj chiꞌ ol ex vicꞌcanel dꞌa jun e luum tic,
axo ex vacꞌancanbꞌat dꞌa yichan̈bꞌat Babilonia,
xchican Dios dꞌa Slolonel Tzꞌibꞌabꞌilcani.
44 Palta ayic yecꞌnac ebꞌ co mam quicham chiꞌ dꞌa tzꞌinan luum chiꞌ,
yedꞌnac jun yedꞌtal sley Dios ebꞌ.
Aton jun yedꞌtal chiꞌ bꞌonaccan yuj vin̈aj Moisés chiꞌ,
icha ajnac yalan Dios chiꞌ dꞌa vin̈,
ayic schꞌoxannac jun yechel dꞌa vin̈.
45 A jun yedꞌtal chiꞌ,
cꞌojancꞌolal cannac dꞌa juntzan̈xo ebꞌ co mam quicham.
Axo vin̈aj Josué icꞌannaccot jun chiꞌ yedꞌ ebꞌ.
Ayic yicannac jun sluum ebꞌ chꞌoc chon̈abꞌil tic ebꞌ,
aton ebꞌ pechbꞌilel yuj Dios.
A jun yedꞌtal sley Dios chiꞌ,
yedꞌnac ebꞌ,
masanto ochnac vin̈aj David sreyaloc ebꞌ.
46 A vin̈aj David chiꞌ,
te nivan svachꞌcꞌolal Dios schanac vin̈.
Yuj chiꞌ,
snibꞌej vin̈ sbꞌonac jun stemplo Dios,
aton jun Dios bꞌaj yacꞌnaquem sbꞌa vin̈aj Jacob,
aton pax co Diosal.
47 Palta ato val vin̈aj Salomón bꞌoannac stemplo Dios chiꞌ,
48 vachꞌchom a Dios yelxo val te nivan yelcꞌochi,
max aj dꞌa junoc templo bꞌobꞌil yuj ebꞌ anima.
Yalnaccan jun schecabꞌ dꞌa pecaꞌ icha tic:
49 A satchaan̈,
aton in despacho.
Axo yolyibꞌan̈qꞌuinal,
icha scꞌan̈ voc yaji.
Yuj chiꞌ,
¿tasto val ol eyutoc e bꞌoan junoc in templo?
Malaj junoc lugar bꞌaj syal vicꞌan vip.
50 Yujto a in ix in bꞌo masanil juntzan̈ tic,
xchi Dios dꞌa Slolonel Tzꞌibꞌabꞌilcani.
51 Palta a ex tic,
te pit ex.
Lajan val e pensar yedꞌ ebꞌ man̈ ojtannacoc Dios.
Max eyacꞌoch e chiquin dꞌa slolonel.
Ton̈ej tze macoch vaan Yespíritu Dios.
Yuj chiꞌ,
lajan ex yedꞌ ebꞌ co mam quicham chiꞌ.
52 Ina ebꞌ schecabꞌ Dios dꞌa pecaꞌ,
laj yabꞌnac syail ebꞌ yuj ebꞌ co mam quicham chiꞌ.
Aton ebꞌ schecabꞌ Dios chiꞌ alannaccani to ol javoc vin̈ tojol spensar,
palta milbꞌilcham ebꞌ yuj ebꞌ co mam quicham chiꞌ.
Axo ix javi jun tojol spensar chiꞌ,
a exxo ix eyacꞌoch dꞌa yol scꞌabꞌ chamel,
ix eyacꞌan miljocchamoc.
53 Vachꞌchom acꞌbꞌilcan juntzan̈ schecnabꞌil Dios dꞌayex yuj ebꞌ ángel,
palta max e cꞌanabꞌajej,
xchi vin̈aj Esteban chiꞌ dꞌa ebꞌ.
A schamel vin̈aj Esteban
54 Ayic ix yabꞌan juntzan̈ chiꞌ ebꞌ,
ix te och pitzꞌan dꞌa spixan ebꞌ,
ix cot yoval ebꞌ dꞌa vin̈aj Esteban chiꞌ.
Ix scꞌux val ye ebꞌ scot yoval.
55 Palta axo vin̈aj Esteban chiꞌ,
te ay val och Yespíritu Dios yedꞌ vin̈,
yuj chiꞌ ix qꞌue qꞌuelan vin̈ dꞌa satchaan̈,
ix yilanqꞌue stziquiquial Dios vin̈.
Ix yilan vin̈ to lin̈anecꞌ Jesús dꞌa svachꞌcꞌabꞌ Dios chiꞌ.
56 Yuj chiꞌ ix yalan vin̈:
—Inai,
a svilani to jacan spuertail satchaan̈.
Svilani to a jun Acꞌbꞌilcot yuj Dios yoch animail,
lin̈anecꞌ dꞌa svachꞌ cꞌabꞌ Dios chiꞌ ticnaic,
xchi vin̈.
57 Axo ebꞌ ayecꞌ taꞌ,
ix qꞌue n̈ilnaj ebꞌ yavaji.
Ix smacan schiquin ebꞌ.
Ix cot n̈ilnaj ebꞌ dꞌa vin̈,
ix jachjiel vin̈ dꞌa stiel chon̈abꞌ yuj ebꞌ.
58 A ebꞌ ix acꞌanbꞌat dꞌa yibꞌan̈ vin̈aj Esteban chiꞌ,
ix squichel spatic scꞌapac junjun ebꞌ,
ix yacꞌancanbꞌat ebꞌ dꞌa jun vin̈ scuch Saulo,
yic vachꞌ a vin̈ tzꞌilancani.
Ix lajvi chiꞌ,
ix och ijan ebꞌ sjulancham vin̈aj Esteban chiꞌ yedꞌ qꞌuen qꞌueen.
59 Ayic van sjulqꞌuenan cham vin̈ chiꞌ ebꞌ,
ix lesalvi vin̈ dꞌa Dios.
—Mamin Jesús,
cha in pixan,
xchi vin̈.
60 Ix lajvi chiꞌ ix em cuman vin̈.
Te chaan̈ ix yutej sjaj vin̈ slesalvi dꞌa Dios:
—Mamin,
man̈ acꞌcanoch jun smul ebꞌ tic dꞌa yibꞌan̈,
xchi vin̈.
Ix lajvi yalan jun chiꞌ vin̈,
ix cham vin̈.