Sicꞌbꞌilel ucvan̈ ebꞌ diácono
6
A dꞌa jun tiempoal chiꞌ,
ix te qꞌuibꞌ sbꞌisul ebꞌ creyente.
Palta a ebꞌ creyente aj Grecia,
ix cot yoval ebꞌ dꞌa ebꞌ creyente aj Israel,
yujto ayic tzꞌacꞌji va ebꞌ mebꞌaꞌ dꞌa junjun cꞌu,
man̈ tzꞌacanoc tzꞌacꞌji svael ebꞌ ix chamnac yetbꞌeyum aj Grecia chiꞌ.
2 Yuj chiꞌ ix avtajcot ebꞌ creyente smasanil yuj ebꞌ schecabꞌ Jesús chiꞌ.
Ix yalan ebꞌ:
—Man̈ smojoc scactejcan calanel slolonel Dios tic yic axon̈ej vael tic squilaꞌ.
3 Yuj chiꞌ,
ex vucꞌtac,
tze say ucvan̈oc vinac dꞌa co cal tic,
tzeyacꞌanoch yopisio ebꞌ sbꞌoan jun munlajel tic.
A ebꞌ tze say chiꞌ,
aton ebꞌ te vachꞌ sbꞌeybꞌal,
ebꞌ snachaj val el yic Dios yuuj,
ebꞌ te ay val och Yespíritu Dios yedꞌoc.
4 A on̈xo tic,
an̈ejaꞌ ol on̈ lesalvoc,
ol calanpaxel slolonel Dios,
xchi ebꞌ lajchavan̈ chiꞌ.
5 Ix te tzalaj ebꞌ smasanil yuj jun lolonel chiꞌ.
Axo ebꞌ vin̈ ix sicꞌjiel chiꞌ,
aton ebꞌ vin̈ tic:
Vin̈aj Esteban,
te ay val och spensar vin̈ dꞌa Dios,
te ay val och Yespíritu Dios yedꞌ vin̈,
vin̈aj Felipe,
vin̈aj Prócoro,
vin̈aj Nicanor,
vin̈aj Timón,
vin̈aj Parmenas yedꞌ vin̈aj Nicolás aj Antioquía.
A vin̈aj Nicolás tic,
ochnac vin̈ dꞌa scꞌaybꞌubꞌal ebꞌ israel dꞌa yalan̈taxo.
6 Ix lajvi sicꞌjielta ebꞌ vin̈ chiꞌ,
ix icꞌjibꞌat ebꞌ vin̈ dꞌa yichan̈ ebꞌ vin̈ schecabꞌ Jesús.
Axo ebꞌ vin̈ schecabꞌ Jesús chiꞌ ix lesalvi yuj ebꞌ vin̈,
ix yacꞌanpaxecꞌ scꞌabꞌ ebꞌ vin̈ dꞌa sjolom ebꞌ vin̈.
7 Axo slolonel Dios ix te pucaxbꞌat dꞌa scal ebꞌ anima.
Yuj chiꞌ ix te qꞌuibꞌ sbꞌisul ebꞌ creyente dꞌa Jerusalén chiꞌ.
Ay pax juntzan̈ ebꞌ vin̈ sacerdote ix acꞌanoch Cristo dꞌa scꞌool.
Yamchajnac vin̈aj Esteban
8 Axo vin̈aj Esteban chiꞌ,
nivan svachꞌcꞌolal Dios ix scha vin̈.
Ix och val Dios yedꞌ vin̈,
yuj chiꞌ tzijtum milagro ix schꞌoxel vin̈ dꞌa scal ebꞌ anima.
9 Palta ay juntzan̈ ebꞌ israel smolbꞌej sbꞌa dꞌa jun spatil culto scuch Yic ebꞌ Acꞌbꞌilxocanel dꞌa Libre.
Ay pax juntzan̈xo ebꞌ aj chon̈abꞌ Cirene,
ebꞌ aj Alejandría,
ebꞌ aj Cilicia yedꞌ ebꞌ aj Asia.
Ix cꞌoch ebꞌ dꞌa vin̈aj Esteban chiꞌ.
Ix stelan sbꞌa ebꞌ yedꞌ vin̈.
10 Palta maj yacꞌlaj ganar vin̈ ebꞌ,
yujto a Espíritu Santo ix acꞌan sjelanil vin̈.
11 Axo ebꞌ chiꞌ,
ton̈ej ix sman jayvan̈ stestigo ebꞌ.
Ix acꞌji scꞌool ebꞌ yuj ebꞌ,
yic syal ebꞌ icha tic:
—Ix cabꞌ sbꞌuchvaj vin̈aj Esteban tic dꞌa spatic vin̈ co mam quicham aj Moisés yedꞌ dꞌa Dios,
xchi ebꞌ.
12 Icha chiꞌ ix yutej ebꞌ stzuntzan chaan̈ ebꞌ chon̈abꞌ,
ebꞌ ichamtac vinac yedꞌ ebꞌ cꞌaybꞌum dꞌa ley Moisés.
Yuj chiꞌ ix cot jucnaj ebꞌ dꞌa vin̈aj Esteban chiꞌ,
ix syaman vin̈ ebꞌ,
xidꞌ yacꞌanoch vin̈ ebꞌ dꞌa yichan̈ ebꞌ vin̈ sat yajal.
13 Ix lajvi chiꞌ,
ix manji juntzan̈xo ebꞌ tzꞌacꞌanoch es dꞌa yibꞌan̈ vin̈aj Esteban chiꞌ yuj ebꞌ.
Ix stzꞌacan yal ebꞌ icha tic dꞌa ebꞌ vin̈ yajal chiꞌ:
—A vin̈aj Esteban tic,
max yactejcan vin̈ sbꞌuchvaj dꞌa jun templo yicn̈ej Dios yaj tic.
Sbꞌuchvaj pax vin̈ dꞌa ley Moisés.
14 Ix cabꞌ yalan vin̈ icha tic:
A Jesús aj Nazaret ol pojanem stemplo Dios tic.
Ol qꞌuexchaj juntzan̈ co bꞌeybꞌal acꞌbꞌilcan dꞌayon̈ yuj Moisés chiꞌ,
xchi vin̈,
xchi ebꞌ.
15 Axo ebꞌ vin̈ yajal chiꞌ yedꞌ ebꞌ cꞌojanem taꞌ smasanil,
ix och qꞌuelan ebꞌ dꞌa vin̈aj Esteban chiꞌ,
ix yilanoch sat vin̈ ebꞌ,
lajan yilji icha sat junoc ángel.