—¿Tas yuj ix yacꞌ a cꞌool vin̈ Satanás,

yuj chiꞌ tzesej dꞌa Yespíritu Dios?

Ina ix icꞌcanel nan̈al qꞌuen ic dꞌa stojol jun a luum chiꞌ.

4 Ayic manto a chon̈ luum,

yel ic luum.

An̈ejtonaꞌ icha pax chiꞌ,

ayic ix a chon̈aneli,

yel ic ton stojol chiꞌ.

Yuj chiꞌ,

¿tas yuj ix a na jun chucal tic?

Man̈oclaj dꞌa ebꞌ anima tzesej,

palta a dꞌa Dios tzesej,

xchi vin̈aj Pedro chiꞌ dꞌa vin̈.

5 Ix lajvin̈ej yabꞌan jun chiꞌ vin̈aj Ananías chiꞌ,

ix ecꞌ telnaj vin̈,

ix cham vin̈.

Axo ebꞌ ix abꞌan specal jun chiꞌ,

ix te xiv ebꞌ.

6 Axo juntzan̈ ebꞌ quelemtac ix javi,

ix sbꞌacꞌanoch jun cꞌapac ebꞌ dꞌa snivanil vin̈.

Ix yicꞌanelta vin̈ ebꞌ,

ix bꞌat smucancan vin̈ ebꞌ.

7 Ayxom oxeoc hora scham vin̈aj Ananías chiꞌ,

ix cꞌoch ix yetbꞌeyum vin̈.

Ix och ix dꞌa yol pat.

Man̈ yojtacoc ix tato ay tas ix icꞌan vin̈ yetbꞌeyum ix chiꞌ.

8 Axo vin̈aj Pedro ix cꞌanbꞌan dꞌa ix:

—Al dꞌayin,

¿tom yel to icha tic ix e chon̈bꞌat jun e luum chiꞌ?

xchi vin̈ dꞌa ix.

—Iꞌ,

ichaton chiꞌ,

xchi ix dꞌa vin̈.

9 Yuj chiꞌ ix yal vin̈ dꞌa ix:

—¿Tas yuj tze mol lajtiej e bꞌa yic tzeyacꞌan proval Yespíritu Dios Cajal?

Ina yajecꞌ ebꞌ vin̈ ix xidꞌ mucancan vin̈ etbꞌeyum dꞌa tiꞌ pat chiꞌ.

Axo ticnaic ol ach yicꞌpaxbꞌat ebꞌ vin̈ a ach tic,

xchi vin̈ dꞌa ix.

10 Dꞌa jun rato chiꞌ,

ix telvi ix dꞌa yichan̈ vin̈aj Pedro chiꞌ.

Ix cham ix.

Axo ix ochcꞌoch ebꞌ quelemtac chiꞌ,

ix yilan ebꞌ chamnacxo pax ix.

Yuj chiꞌ ix yicꞌbꞌat ix ebꞌ.

Ix bꞌat smucanem ix ebꞌ dꞌa stzꞌey vin̈ yetbꞌeyum chiꞌ.

11 Yuj chiꞌ ix xivqꞌue ebꞌ creyente smasanil yedꞌ jantacn̈ej ebꞌ ix abꞌan specal jun chiꞌ.

12 Axo ebꞌ schecabꞌ Jesús chiꞌ,

tzijtum milagro ix sbꞌo ebꞌ.

Ix schꞌox val el spoder Dios ebꞌ dꞌa scal ebꞌ anima.

A dꞌa jun stentail stemplo Dios scuchan yic Salomón,

ataꞌ ix smolbꞌej sbꞌa ebꞌ creyente smasanil.

13 Axo ebꞌ man̈ creyenteoc,

malaj ebꞌ stecꞌbꞌej sbꞌa scꞌochi yic smolbꞌan sbꞌa ebꞌ yedꞌ ebꞌ.

Palta yojtac ebꞌ to te vachꞌ ebꞌ creyente chiꞌ.

14 Tzijtum ebꞌ vin̈ vinac yedꞌ ebꞌ ix ix,

ix acꞌanoch Jesús dꞌa scꞌool.

15 Tzꞌicꞌjipaxelta ebꞌ penaay dꞌa yoltac calle.

Ay ebꞌ tzꞌicꞌjielta dꞌa sat chꞌat,

ay ebꞌ dꞌa sat svaynubꞌ.

Ataꞌ ix stan̈vej ebꞌ yecꞌ vin̈aj Pedro,

yic tope tzꞌecꞌ jabꞌoc yen̈ul vin̈ dꞌa yibꞌan̈ ebꞌ snaani.

16 Tzijtum ebꞌ anima ix cot dꞌa juntzan̈ chon̈abꞌ dꞌa slacꞌanil Jerusalén.

Ix yicꞌancot juntzan̈ ebꞌ penaay ebꞌ yedꞌ ebꞌ tzꞌixtax yuj ebꞌ enemigo.

Ix laj bꞌoxican scꞌool ebꞌ smasanil.

17 Axo vin̈ sat sacerdote yedꞌ ebꞌ yetbꞌeyum smasanil,

aton ebꞌ spartido ebꞌ saduceo,

ix te och chichoncꞌolal dꞌa spixan ebꞌ.

18 Yuj chiꞌ ix schec yamjoc ebꞌ vin̈ schecabꞌ Jesús chiꞌ ebꞌ.

Ix acꞌjioch ebꞌ vin̈ dꞌa jun preso yic ebꞌ chon̈abꞌ.

19 Axo dꞌacꞌvalil ay jun yángel Dios Cajal ix ul jacan teꞌ preso chiꞌ.

Ix icꞌjielta ebꞌ vin̈.

Ix lajvi chiꞌ,

ix yalan dꞌa ebꞌ vin̈:

20 —Ixiquec dꞌa stemplo Dios.

Tzex och dꞌa yol yamaqꞌuil.

Tzex aj lin̈an taꞌ,

tzeyalanel vachꞌ abꞌix yic qꞌuinal dꞌa juneln̈ej,

xchi jun ángel chiꞌ dꞌa ebꞌ vin̈.

21 Yuj chiꞌ toxo van sacbꞌi ayic ix ochcꞌoch ebꞌ vin̈ dꞌa yol yamaqꞌuil stemplo Dios chiꞌ,

ix scꞌaybꞌan ebꞌ anima ebꞌ vin̈ taꞌ.

Axo vin̈ sat sacerdote chiꞌ yedꞌ ebꞌ vin̈ yetbꞌeyum ix avtancot ebꞌ vin̈ sat yajal,

aton jantacn̈ej ebꞌ vin̈ yajal yaj dꞌa ebꞌ israel.

Ix lajvi chiꞌ,

ix schecanbꞌat jayvan̈ ebꞌ vin̈ polencía ebꞌ,

yic sbꞌat ebꞌ vin̈ yiqꞌuelta ebꞌ vin̈ schecabꞌ Jesús chiꞌ dꞌa preso.

22 Axo ix cꞌoch ebꞌ vin̈ dꞌa teꞌ preso chiꞌ,

man̈xalaj mach ayeqꞌui.

Ix lajvi yilan ebꞌ vin̈ to man̈xalaj mach,

ix bꞌat yalan ebꞌ vin̈ icha tic:

23 —Ix quilaꞌ,

vachꞌ yajoch scꞌabꞌ teꞌ preso chiꞌ.

Axo ebꞌ stan̈vumal teꞌ chiꞌ,

lin̈anecꞌ ebꞌ dꞌa stiꞌ teꞌ.

Palta axo ix co jacan teꞌ,

ix quilani man̈xalaj mach ayecꞌ dꞌa yol teꞌ,

xchi ebꞌ vin̈.

24 Axo vin̈ sat sacerdote chiꞌ,

ebꞌ yetbꞌeyum yedꞌ pax vin̈ yajal ebꞌ vin̈ stan̈vumal stemplo Dios,

ayic ix yabꞌan juntzan̈ chiꞌ ebꞌ vin̈,

ix te sat scꞌool ebꞌ vin̈.

Maj nachajel-laj yuj ebꞌ vin̈ tas val yaji.

25 Junanto rato chiꞌ ix cꞌoch junxo vin̈.

Ix yalan vin̈ dꞌa ebꞌ vin̈:

—A ebꞌ vin̈ ix eyacꞌoch dꞌa preso,

ayxo ecꞌ ebꞌ vin̈ dꞌa yamaqꞌuil stemplo Dios ticnaic.

Van scꞌaybꞌaj ebꞌ anima yuj ebꞌ vin̈,

xchi vin̈.

26 Yuj chiꞌ,

axo vin̈ yajal ebꞌ stan̈van templo chiꞌ yedꞌ ebꞌ vin̈ polencía,

ix bꞌat ebꞌ vin̈ yicꞌcot ebꞌ vin̈.

Palta acꞌan̈cꞌolal ix yutej ebꞌ vin̈ yicꞌancot ebꞌ vin̈ schecabꞌ Jesús chiꞌ,

yujto ix xiv ebꞌ vin̈ sjulqꞌuenaj yuj ebꞌ anima.

27 Ix bꞌat acꞌji ebꞌ vin̈ schecabꞌ Jesús chiꞌ dꞌa yichan̈ ebꞌ vin̈ sat yajal.

Axo vin̈ sat sacerdote chiꞌ ix alan dꞌa ebꞌ vin̈.

28 —Ina ix cham val calan dꞌayex to maxtzac e cꞌaybꞌej ebꞌ anima dꞌa scꞌaybꞌubꞌal Jesús.

¿Tom max e cꞌanabꞌajej?

A ticnaic,

ix te pucaxbꞌat e cꞌaybꞌubꞌal dꞌa Jerusalén tic,

masanto e gana tze chꞌoxelta to a on̈ ix co milcham Jesús chiꞌ,

xchi vin̈ dꞌa ebꞌ vin̈.

29 Palta ix tacꞌvi vin̈aj Pedro yedꞌ juntzan̈xo ebꞌ vin̈ schecabꞌ Jesús,

ix yalan ebꞌ vin̈:

—Yovalil a tas syal Dios,

a sco cꞌanabꞌajej.

Axo juntzan̈ schecnabꞌil anima,

tato max scha sbꞌa yedꞌ yic Dios,

max co cꞌanabꞌajejlaj.

30 A ex tic ix eyacꞌ miljoccham Jesús,

ayic ix dꞌun̈bꞌajqꞌue dꞌa teꞌ culus.

Palta a jun Dios bꞌaj yacꞌnac em sbꞌa ebꞌ co mam quicham,

an̈ejaꞌ co Diosal a on̈ tic.

Aꞌ ix acꞌan pitzvocxi Jesús chiꞌ dꞌa scal ebꞌ chamnac.

31 A ix acꞌan yopisio,

ix yicꞌanbꞌat dꞌa svachꞌcꞌabꞌ.

Ix yacꞌanoch Cajaloc yedꞌ co Columaloc,

yic vachꞌ sco na co bꞌa a on̈ israel on̈ tic,

yic slajvican co mul yuuj.

32 A on̈ tic,

scacꞌ testigoal co bꞌa yuj juntzan̈ scal tic dꞌayex.

An̈ejtonaꞌ Yespíritu Dios syacꞌ pax testigoal sbꞌa quedꞌoc.

A Dios tzꞌacꞌan Yespíritu tic dꞌa jantacn̈ej mach scꞌanabꞌajan tas syalaꞌ,

xchi ebꞌ vin̈.

33 Ayic ix yabꞌan jun chiꞌ ebꞌ vin̈ yajal chiꞌ,

ix te cot yoval ebꞌ vin̈.

Ix snibꞌej ebꞌ vin̈ smilcham ebꞌ vin̈ dꞌa elan̈chamel.

34 Palta a dꞌa scal ebꞌ vin̈ yajal chiꞌ ay jun vin̈ fariseo scuch Gamaliel ayeqꞌui.

Te cꞌaybꞌum vin̈ dꞌa sley Dios.

Bꞌinajnac vin̈ dꞌa vachꞌil yuj ebꞌ anima.

Ix qꞌue lin̈an vin̈.

Ix schecan vin̈ icꞌjoccanelta ebꞌ vin̈ schecabꞌ Jesús chiꞌ junoc rato.

35 Ix lajvi yelcancot ebꞌ vin̈ chiꞌ,

ix yalan vin̈:

—Ex vetisraelal,

naec val sicꞌlabꞌil tas tzeyutej e bꞌoan yaj juntzan̈ ebꞌ vin̈ tic.

36 Co naeccot jun vin̈ scuch Teudas^* ecꞌnac dꞌa yalan̈taxo.

Yacꞌnacoch sbꞌa vin̈ yajalil dꞌa scal ebꞌ anima.

Yalannaquel vin̈ to te ay yopisio vin̈.

Ay am junoc chan̈eꞌ ciento vinac ochnac yedꞌ vin̈.

Palta miljicham vin̈.

Axo jantac ebꞌ ochnac yedꞌ vin̈ chiꞌ,

saclemnaccanbꞌat ebꞌ.

Satnacpaxcanem jun yic ebꞌ chiꞌ.

37 Ix lajvi chiꞌ,

ay jun vin̈ scuch Judas aj Galilea,

yacꞌnacoch sbꞌa vin̈ yacꞌan oval yedꞌ ebꞌ vin̈ yajal ayic ix icꞌjichaan̈ sbꞌisul ebꞌ anima.

Tzijtum anima ochnac yedꞌ vin̈.

An̈ejaꞌ ix miljipaxcham junxo vin̈ chiꞌ.

Axo jantacn̈ej ebꞌ ochnac yedꞌ vin̈,

saclemnacpaxcanbꞌat ebꞌ.

38 Yuj chiꞌ sval dꞌayex,

cactejec quixtan ebꞌ vin̈ schecabꞌ Jesús tic,

yil ebꞌ vin̈.

A jun yic ebꞌ vin̈ tic,

tato an̈ej ebꞌ anima ay yicoꞌ,

munil ol satxicanemoc.

39 Palta tato a Dios ay yicoꞌ,

man̈ ol yal-laj cacꞌan lajvoc.

Ay smay to van cacꞌan oval yedꞌ Dios chiꞌ,

xchi vin̈.

40 Ix snaan ebꞌ vin̈ yajal chiꞌ to te yel syal vin̈.

Yuj chiꞌ ix avtajxioch ebꞌ vin̈ schecabꞌ Jesús chiꞌ yuj ebꞌ vin̈.

Ix yalan ebꞌ vin̈ to smacꞌji ebꞌ vin̈.

Ix yalanpax ebꞌ vin̈ dꞌa ebꞌ vin̈ to maxtzac yalel yabꞌixal Jesús ebꞌ vin̈.

Ix lajvi chiꞌ,

ix actajel ebꞌ vin̈.

41 Yuj chiꞌ ix elta ebꞌ vin̈ schecabꞌ Jesús chiꞌ dꞌa yichan̈ ebꞌ vin̈ sat yajal.

Te vachꞌ ix yabꞌ ebꞌ vin̈,

yujto yujn̈ej Jesús ix yabꞌ syail ebꞌ vin̈ icha sgana Dios.

42 Masanil cꞌu ix yalel yabꞌixal Jesús ebꞌ vin̈ to Cristo toni,

syalelcꞌochi Jun Sicꞌbꞌilel yuj Dios.

Ix laj ecꞌ yalel ebꞌ vin̈ dꞌa yol yamaqꞌuil stemplo Dios yedꞌ dꞌa caltac pat.