Icꞌjinacbꞌat vin̈aj Pedro yedꞌ vin̈aj Juan dꞌa ebꞌ yajal
4
Ayic van yalan vin̈aj Pedro yedꞌ vin̈aj Juan dꞌa ebꞌ anima,
ix cꞌoch ebꞌ vin̈ sacerdote,
vin̈ yajalil* ebꞌ stan̈vumal stemplo Dios yedꞌ ebꞌ vin̈ saduceo.
2 Ix cot yoval ebꞌ vin̈,
yujto a vin̈aj Pedro yedꞌ vin̈aj Juan chiꞌ,
van scꞌaybꞌan ebꞌ anima ebꞌ vin̈.
Van yalan ebꞌ vin̈ to ol pitzvocxi ebꞌ chamnac,
yujto icha chiꞌ ix aj spitzvixi Jesús.
3 Yuj chiꞌ ix yamji ebꞌ vin̈ yuj ebꞌ vin̈,
ix acꞌjioch ebꞌ vin̈ dꞌa preso.
Yujto yemxo cꞌualil,
yuj chiꞌ jun acꞌval ix ochcan ebꞌ vin̈.
4 Palta a val ebꞌ ix abꞌan slolonel Dios dꞌa scal ebꞌ anima chiꞌ,
tzijtum ebꞌ ix acꞌanoch Jesús dꞌa scꞌool.
Yuj chiꞌ ix te qꞌuibꞌ sbꞌisul ebꞌ creyente.
A sbꞌisul ebꞌ vin̈ vinac,
ay am oyeoc mil.
5 Axo dꞌa junxo cꞌu ix smolbꞌej sbꞌa ebꞌ vin̈ sat yajal dꞌa Jerusalén chiꞌ,
ebꞌ vin̈ ichamtac vinac ay yopisio yedꞌ ebꞌ vin̈ cꞌaybꞌum dꞌa ley Moisés.
6 Ajun vin̈aj Anás,
vin̈ sat sacerdote ix cꞌochpax yedꞌ ebꞌ vin̈,
an̈ejtonaꞌ ix cꞌochpax vin̈aj Caifás,
vin̈aj Juan yedꞌ vin̈aj Alejandro yedꞌ jantacn̈ej ebꞌ scꞌabꞌ yoc ebꞌ vin̈ sat sacerdote.
7 Ix bꞌat yacꞌan icꞌjoccot vin̈aj Pedro yedꞌ vin̈aj Juan dꞌa yichan̈ ebꞌ vin̈.
Ix scꞌanbꞌan ebꞌ vin̈ dꞌa ebꞌ vin̈:
—¿Bꞌajtil ix eyicꞌ jun eyopisio tic yic tze cꞌulan juntzan̈ tic?
¿Mach tzꞌacꞌan e cꞌuloc?
xchi ebꞌ vin̈.
8 Axo vin̈aj Pedro chiꞌ,
te ayoch Yespíritu Dios yedꞌ vin̈,
yuj chiꞌ ix yal vin̈ icha tic:
—Ex yajal eyaj dꞌa ebꞌ chon̈abꞌ yedꞌ ex yichamtac vinaquil israel,
9 tze cꞌanbꞌej dꞌayon̈,
yujto ay jun vachꞌil ix cacꞌ dꞌa jun vin̈ max yaltaxon sbꞌey tic,
tecan e gana tzeyabꞌi tas ix aj sbꞌoxi vin̈.
10 Yuj chiꞌ a jun tic ol cal dꞌayex,
yic ol yojtaquejel ebꞌ quetisraelal smasanil.
A vin̈ ix javi dꞌa eyichan̈ tic,
ix bꞌoxi vin̈ yujn̈ej spoder Jesucristo aj Nazaret,
aton jun ix e culusejqꞌuei.
Palta axo Dios ix acꞌanxi pitzvoc dꞌa scal ebꞌ chamnac.
11 A ex tic,
icha junoc bꞌoum pat,
icha chiꞌ eyaji.
Axo Jesús,
icha qꞌuen qꞌueen albꞌilcan dꞌa Slolonel Dios Tzꞌibꞌabꞌilcani to malaj tzꞌoch dꞌayex.
Palta axo ix och yopisio,
icha qꞌuen qꞌueen ix och sjolomoc chiquin pat.
12 Malaj junocxo mach syal on̈ scolani,
yujto a dꞌa yolyibꞌan̈qꞌuinal tic,
malaj junocxo mach ix acꞌji yopisio yuj Dios yacꞌan co colnabꞌil,
an̈ej val Jesús,
xchi vin̈ dꞌa ebꞌ.
13 Axo ix yilan ebꞌ vin̈ yajal chiꞌ to ix stecꞌbꞌej sbꞌa vin̈aj Pedro chiꞌ yedꞌ vin̈aj Juan yalani.
Ix yilanpax ebꞌ vin̈ to man̈ cꞌaybꞌabꞌiloc ebꞌ vin̈,
comon anima ebꞌ vin̈.
Yuj chiꞌ ix te sat scꞌool ebꞌ vin̈.
Ichato chiꞌ ix nachajel yuj ebꞌ vin̈ to junn̈ej ecꞌnac ebꞌ vin̈ yedꞌ Jesús.
14 Ix yilanpax ebꞌ vin̈ to lin̈anoch vin̈ ix bꞌoxi yoc chiꞌ dꞌa stzꞌey ebꞌ vin̈.
Yuj chiꞌ maj yal yacꞌanoch junoc tas ebꞌ vin̈ dꞌa yibꞌan̈ ebꞌ vin̈.
15 Yuj chiꞌ ix yalan ebꞌ vin̈ to tzꞌicꞌjiel vin̈aj Pedro yedꞌ vin̈aj Juan chiꞌ dꞌa yichan̈ ebꞌ vin̈,
yacbꞌan slolon can ebꞌ vin̈ schꞌocoj.
16 Ixn̈ej elta ebꞌ vin̈,
ix yalan ebꞌ vin̈ icha tic:
—¿Tas val scutej ebꞌ vin̈ schavan̈il tze naꞌa?
Yujto yojtacn̈ej ebꞌ aj Jerusalén tic to ix sbꞌo jun nivan milagro ebꞌ vin̈.
Yuj chiꞌ max yal calani to es.
17 Axo ticnaic,
yic max spuquel jun abꞌix tic ebꞌ vin̈ dꞌa scal ebꞌ anima,
co xibꞌtejec ebꞌ vin̈,
yic vachꞌ man̈xo ol yalel yabꞌixal Jesucristo ebꞌ vin̈ dꞌa junocxo anima,
xchi ebꞌ vin̈ yajal chiꞌ.
18 Ix lajvi chiꞌ,
ix yavtanxioch ebꞌ vin̈ ebꞌ vin̈.
Ix yalan val ebꞌ vin̈ dꞌa ebꞌ vin̈ to man̈xa bꞌaqꞌuin̈ syalel yabꞌixal Jesús ebꞌ vin̈,
man̈xa pax bꞌaqꞌuin̈ scꞌaybꞌej ebꞌ anima ebꞌ vin̈ dꞌa jun cꞌaybꞌubꞌal chiꞌ.
19 Palta axo ix tacꞌvi vin̈aj Pedro yedꞌ vin̈aj Juan chiꞌ dꞌa ebꞌ vin̈ icha tic:
—Scham val e naani.
¿Tom vachꞌ dꞌa sat Dios tze naꞌa,
tato a eyic chiꞌ sco cꞌanabꞌajej,
axo Dios max co cꞌanabꞌajej tas syalaꞌ?
20 Yuj chiꞌ,
max yal cactan calanel yabꞌixal tas ix quilaꞌ yedꞌ tas ix cabꞌi,
xchi ebꞌ vin̈.
21 Yuj chiꞌ,
ix vachꞌ xibꞌtaj ebꞌ vin̈ yuj ebꞌ vin̈.
Ix acꞌjiel ebꞌ vin̈ dꞌa libre.
Max nachaj yuj ebꞌ vin̈ tas syutej ebꞌ vin̈ yacꞌanoch yaelal dꞌa yibꞌan̈ ebꞌ vin̈.
Yujto masanil ebꞌ chon̈abꞌ van yalan vachꞌ lolonel dꞌa Dios yuj jun ix scꞌulej ebꞌ vin̈ chiꞌ.
22 A vin̈ ix bꞌoxi yoc chiꞌ,
másxo 40 abꞌil sqꞌuinal vin̈.
Scꞌan stecꞌanil ebꞌ creyente dꞌa Dios
23 Ix lajvi yacꞌjiel vin̈aj Pedro yedꞌ vin̈aj Juan chiꞌ dꞌa libre,
ix bꞌat ebꞌ vin̈.
Ix cꞌochxi ebꞌ vin̈ bꞌaj aycan juntzan̈xo ebꞌ yetbꞌeyum.
Ix laj yalan ebꞌ vin̈ jantac tas ix yal ebꞌ vin̈ sat sacerdote yedꞌ ebꞌ vin̈ ichamtac vinac ay yopisio.
24 Axo ix yabꞌan ebꞌ yetbꞌeyum ebꞌ vin̈ chiꞌ,
junn̈ej molan̈ ix aj slesalvi ebꞌ dꞌa Dios.
Ix yalan ebꞌ icha tic:
—Mamin,
ach co Diosal,
a ach a bꞌonac satchaan̈ yedꞌ lum luum tic,
aꞌ mar yedꞌ smasanil tastac.
25 A ach lolonnac ach yedꞌ Espíritu dꞌa jun a checabꞌ scuch David ayic yalannaccan icha tic:
¿Tas val yuj tzꞌel veqꞌuecꞌoc yav ebꞌ chꞌoc chon̈abꞌil sqꞌuechaan̈?
¿Tas val yuj slajtiej sbꞌa ebꞌ dꞌa junoc tas man̈ ol tzacꞌvan ebꞌ sbꞌoani?
26 A ebꞌ vin̈ rey yedꞌ ebꞌ vin̈ yajal dꞌa juntzan̈ chon̈abꞌ chiꞌ,
schichonoch scꞌool ebꞌ vin̈,
smolbꞌan sbꞌa ebꞌ vin̈,
junlajanxon̈ej syutej slajtian sbꞌa ebꞌ vin̈ dꞌa spatic vin̈ Yajal yedꞌ dꞌa spatic vin̈ rey sicꞌbꞌilel uuj,
xchi dꞌa Slolonel Dios Tzꞌibꞌabꞌilcani.
27 Dꞌa val yel,
a vin̈aj Herodes,
vin̈aj Poncio Pilato,
ebꞌ man̈ israeloc yedꞌ pax ebꞌ israel,
ix smolbꞌej sbꞌa ebꞌ dꞌa yol chon̈abꞌ tic.
Ix slajtian sbꞌa ebꞌ dꞌa spatic Uninal,
aton jun sicꞌbꞌilelta uuj,
aton jun acꞌbꞌilcan yopisio uuj.
28 Ix laj sbꞌo ebꞌ jantacn̈ej tas albꞌilcan uuj dꞌa pecaꞌ,
yujto elnacxo dꞌa a cꞌool to icha chiꞌ scꞌulej ebꞌ.
29 Axo ticnaic Mamin,
ina val ebꞌ tic,
ste cot yoval ebꞌ dꞌayon̈.
Yuj chiꞌ,
acꞌ co tecꞌanil yic max on̈ xiv calanel a lolonel,
yujto a checabꞌ on̈.
30 Acꞌ val a poder dꞌayon̈,
yic vachꞌ ol bꞌoxoc scꞌool ebꞌ penaay.
Acꞌ co bꞌo juntzan̈ milagro schꞌoxanel a poder,
yujn̈ej Uninal aton Jesús,
sicꞌbꞌilcaneli,
xchi ebꞌ dꞌa Dios.
31 Ayic ix lajvi slesalvi ebꞌ chiꞌ,
axo jun pat bꞌaj ayecꞌ ebꞌ chiꞌ ix te tzicubꞌtan̈aj yuj Dios.
Ix te och val Yespíritu Dios yedꞌ ebꞌ smasanil.
Yuj chiꞌ ix stecꞌbꞌej sbꞌa ebꞌ yalanel slolonel Dios chiꞌ.
Junn̈ej yaj masanil tas yuj ebꞌ
32 Jantacn̈ej ebꞌ ix acꞌanoch Jesús dꞌa scꞌool,
jun lajann̈ej ix yutej spensar ebꞌ.
Juncꞌolalxon̈ej ix aj ebꞌ.
Malaj junoc mach ix alan yicoc junoc tas schꞌocoj.
Yujto a jantacn̈ej tas ay dꞌa ebꞌ,
junn̈ej ix yutej ebꞌ smasanil.
33 Axo ebꞌ schecabꞌ Jesús ix tecꞌbꞌan sbꞌa yalaneli to ix pitzvixi Cajal Jesús chiꞌ.
Axo Dios ix och yedꞌ ebꞌ creyente smasanil.
34 Malaj junoc mach mebꞌaꞌ ix ajcan dꞌa scal ebꞌ,
yujto a jantacn̈ej ebꞌ ay sluum ma spat,
ix laj schon̈el ebꞌ.
Axo stojol ix yicꞌcot ebꞌ.
35 Ix yacꞌanoch ebꞌ dꞌa yol scꞌabꞌ ebꞌ schecabꞌ Jesús chiꞌ.
Axo ebꞌ ix pucanbꞌat dꞌa ebꞌ creyente chiꞌ,
ato syalaꞌ tas tzꞌoch yuj junjun ebꞌ.
36 Ay jun vin̈ creyente scuch José,
ix acꞌji scuch Bernabé yuj ebꞌ schecabꞌ Jesús.
A Bernabé syalelcꞌochi,
Acꞌumoch Tecꞌanil.
A vin̈ chiꞌ yin̈tilalcan Leví vin̈,
aj chon̈abꞌ Chipre vin̈.
37 Ay jun sluum vin̈ ix schon̈eli.
Ix yicꞌancot stojol vin̈,
ix ul yacꞌancan vin̈ dꞌa ebꞌ schecabꞌ Jesús.