Bꞌonacxi yoc jun vin̈ max yal sbꞌeyi
3
A junel,
dꞌa a las tres yic yemcꞌualil,
molan ix bꞌat vin̈aj Pedro yedꞌ vin̈aj Juan dꞌa stemplo Dios,
yujto icha chiꞌ yorail slesalvi ebꞌ aj Israel taꞌ.
2 Ay jun vin̈,
junjun cꞌu tzul chelchajcan dꞌa yol stiꞌ jun spuertail yamaqꞌuil templo chiꞌ,
aton dꞌa jun scuch Vachꞌ Yilji,
yic scꞌan tumin vin̈ dꞌa ebꞌ scꞌoch dꞌa yol yamaqꞌuil templo chiꞌ,
yujto max yal sbꞌey vin̈ yictax ix alji.
3 Axo ix yilan vin̈ scꞌoch vin̈aj Pedro yedꞌ vin̈aj Juan dꞌa stemplo Dios chiꞌ,
ayic van yoch ebꞌ vin̈ taꞌ,
ix scꞌanan stumin vin̈ dꞌa ebꞌ vin̈.
4 Axo vin̈aj Pedro yedꞌ vin̈aj Juan chiꞌ ix och qꞌuelan dꞌa vin̈.
—Cotan̈ qꞌuelan dꞌayon̈,
xchi vin̈aj Pedro chiꞌ dꞌa vin̈.
5 Yuj chiꞌ,
ix och qꞌuelan vin̈ dꞌa ebꞌ vin̈.
A snaan vin̈ to ol acꞌjoc jabꞌoc stumin vin̈ yuj ebꞌ vin̈.
6 Palta ix yalan vin̈aj Pedro chiꞌ dꞌa vin̈:
—A in tic,
malaj in tumin.
Palta ay jun syal vuuj,
a yedꞌ jun chiꞌ ol in colvaj dꞌayach.
Yuj spoder Jesucristo aj Nazaret qꞌuean̈ vaan,
bꞌeyan̈,
xchi vin̈ dꞌa vin̈.
7 Axo vin̈aj Pedro chiꞌ ix yaman scꞌabꞌ vin̈ dꞌa svachꞌ.
Ix squetzanqꞌue vaan vin̈.
Elan̈chamel ix och yip yoc vin̈ yedꞌ yip sjaj yoc vin̈ schabꞌil.
8 Ix qꞌue jucnaj vin̈,
ix och ijan vin̈ sbꞌeyi.
Ix och vin̈ dꞌa yol yamaqꞌuil templo chiꞌ yedꞌ ebꞌ vin̈,
sqꞌue chennaj vin̈ ayic sbꞌeyecꞌ vin̈.
Ix yalanpax vachꞌ lolonel vin̈ dꞌa Dios.
9 Axo ebꞌ anima ayecꞌ taꞌ,
ix laj yil ebꞌ sbꞌeyecꞌ vin̈,
ix yabꞌan ebꞌ yalan vachꞌ lolonel vin̈ dꞌa Dios.
10 Yuj chiꞌ ix te sat scꞌool ebꞌ yuj tas ix aj sbꞌo vin̈,
yujto yojtac ebꞌ to junjun cꞌu cꞌojanem vin̈ scꞌan tumin dꞌa stiꞌ spuertail yamaqꞌuil templo chiꞌ,
aton dꞌa jun scuch Vachꞌ Yilji.
Ix lolon vin̈aj Pedro dꞌa stentail yic Salomón
11 A vin̈ ix bꞌoxi yoc chiꞌ,
junn̈ej tzꞌecꞌ vin̈ yedꞌ vin̈aj Pedro yedꞌ vin̈aj Juan chiꞌ.
Axo ebꞌ anima smasanil,
ix te sat scꞌool ebꞌ.
Yuj chiꞌ ix smolbꞌan sbꞌa ebꞌ smasanil dꞌa stzꞌey ebꞌ vin̈ ayic ayecꞌ ebꞌ vin̈ dꞌa jun stentail stemplo Dios scuchan Yic Salomón.
12 Ayic ix yilan jun chiꞌ vin̈aj Pedro chiꞌ,
ix yalan vin̈ dꞌa ebꞌ:
—Ex vetisraelal,
¿tas yuj ste sat e cꞌool on̈ eyilani?
¿Tas yuj tzex och qꞌuelan dꞌayon̈?
Man̈ e naꞌa to yuj co jelanil mato yuj co vachꞌil ix bꞌoxi sbꞌey jun vin̈ tic.
13 A co Diosal,
an̈ejaꞌ jun Dios bꞌaj yacꞌnaquem sbꞌa ebꞌ co mam quicham,
aton vin̈aj Abraham,
vin̈aj Isaac yedꞌ vin̈aj Jacob.
Yuuj paxi te nivan ix aj yelcꞌoch Jesús,
aton Yuninal.
Palta a ex tic,
ix eyacꞌoch dꞌa yol scꞌabꞌ ebꞌ yajal.
A vin̈ yajal scuchan Pilato,
sgana vin̈ ix yaqꞌuel dꞌa libre.
A exxo maj yal-laj e cꞌool.
14 A Jesús chiꞌ,
yicn̈ej Dios yaji,
te tojol sbꞌeybꞌal.
Palta a exxo tic,
maj e cha el-laj dꞌa libre.
Axo jun vin̈ macꞌumcham anima ix e cꞌanelta sqꞌuexuloc.
15 Icha chiꞌ ix eyutej e milancham jun aj qꞌuinal.
Palta a Dios ix acꞌanxi pitzvoc dꞌa scal ebꞌ chamnac.
A jun tic scacꞌ val och co bꞌa testigoal yuuj.
16 A jun vin̈ tzeyil tic,
eyojtac vin̈,
toxonton max yal sbꞌey vin̈.
Palta a Jesús ix acꞌan bꞌoxoc vin̈.
Yujn̈ej to scacꞌoch Jesús chiꞌ dꞌa co cꞌool ix bꞌoxi scꞌool vin̈ sicꞌlabꞌil dꞌa eyichan̈ e masanil.
17 Axo ticnaic ex vetchon̈abꞌ,
vojtac to ix eyacꞌ miljoccham Jesús chiꞌ yujto man̈ eyojtacoc tas van e cꞌulani.
Icha pax chiꞌ ebꞌ yajal,
man̈ yojtacoc ebꞌ.
18 Palta icha chiꞌ ix yutej Dios yacꞌan elcꞌoch tas albꞌilcan yuj ebꞌ schecabꞌ.
Yujto yalnaccan ebꞌ to a Cristo yovalil ol yabꞌ syail.
19 Yuj chiꞌ,
naec e bꞌa.
Qꞌuexec e bꞌeybꞌal,
aqꞌuec och e pensar dꞌa Dios,
yic vachꞌ ol succhaj sat e mul.
Tato icha chiꞌ,
ay jun tiempoal ol yacꞌ Dios Cajal tzalajcꞌolal dꞌayon̈ a on̈ israel on̈ tic.
20 A Dios ol checanxicot Jesús dꞌa schaelal,
yujto a acꞌjinac yopisio yoch Cristoal dꞌayex yedꞌ dꞌayon̈.
21 Palta a ticnaic,
yovalil ol cann̈ej Jesucristo dꞌa satchaan̈,
masanto ol javoc jun tiempoal ayic ol bꞌo yaj masanil tas yuj Dios.
Icha chiꞌ yutejnac yalancanel dꞌa stiꞌ ebꞌ schecabꞌ dꞌa pecaꞌ,
aton ebꞌ yicn̈ej Dios yaji.
22 Axo vin̈aj Moisés alannaccan icha tic dꞌa ebꞌ co mam quicham:
A Dios Cajal ol sicꞌanelta jun schecabꞌ dꞌa scal ebꞌ quetchon̈abꞌ,
icha ix yutej in sicꞌanelta a in tic.
Tzeyacꞌ val och e chiquin dꞌa jantacn̈ej tas ol yal dꞌayex.
23 Yujto a mach man̈ ol acꞌanoch schiquin smaclan yabꞌ tas ol yalaꞌ,
ol satxicanel dꞌa scal ebꞌ quetchon̈abꞌ,
xchinaccan Moisés chiꞌ dꞌa Slolonel Dios Tzꞌibꞌabꞌilcani.
24 A jantacn̈ej ebꞌ schecabꞌ Dios ecꞌnac dꞌa pecaꞌ,
yictax yecꞌnac vin̈aj Samuel,
ix laj yalcan yabꞌixal jun tiempoal van yecꞌ tic ebꞌ.
25 Palta a ex tic,
yin̈til ex can ebꞌ vin̈ alannaccanel slolonel Dios chiꞌ quedꞌoc.
Yuj chiꞌ,
ayic yacꞌannacpaxcan strato Dios yedꞌ ebꞌ co mam quicham chiꞌ,
yacꞌnacpaxcan dꞌayon̈ yedꞌ ebꞌ.
Aton jun strato tic yacꞌnaccan dꞌa vin̈aj Abraham chiꞌ.
Xchi icha tic:
Yuj in̈tilal,
ol vacꞌ in vachꞌcꞌolal dꞌa ebꞌ anima dꞌa junjun chon̈abꞌ dꞌa yolyibꞌan̈qꞌuinal tic,
xchi Dios dꞌa vin̈aj Abraham chiꞌ.
26 Ayic ix yacꞌanxi pitzvoc Yuninal,
a dꞌayon̈ ix sbꞌabꞌlaj chequejcoti,
yic vachꞌ tzon̈ colchaji,
scactancan co chucal junjun on̈,
xchi vin̈aj Pedro chiꞌ dꞌa ebꞌ.