Emnacul Espíritu Santo dꞌa yibꞌan̈ ebꞌ creyente
2
Ayic ix ja scꞌual qꞌuin̈ Pentecostés,*
junn̈ej bꞌaj ix smolbꞌej sbꞌa ebꞌ creyente smasanil.
2 Axo dꞌa jun rato chiꞌ,
ix cꞌan̈ jun dꞌa satchaan̈,
icha scꞌan̈ junoc icꞌ te ov.
Ix laj cꞌan̈ yecꞌ dꞌa yol jun pat bꞌaj cꞌojanem ebꞌ chiꞌ.
3 Ix yilan juntzan̈ tas ebꞌ icha sqꞌue n̈iln̈on teꞌ cꞌacꞌ.
Ix pucaxbꞌat dꞌa scal ebꞌ.
Ix em dꞌa yibꞌan̈ junjun ebꞌ.
4 Ix laj ochcan Yespíritu Dios dꞌa junjun ebꞌ.
Ix och ijan ebꞌ slolon dꞌa juntzan̈xo chꞌocchꞌoc tial,
ato syalaꞌ tas ix acꞌji yal ebꞌ yuj Espíritu Santo chiꞌ.
5 A dꞌa jun tiempoal chiꞌ ayecꞌ juntzan̈ ebꞌ israel dꞌa Jerusalén chiꞌ,
aton ebꞌ scot dꞌa chꞌocchꞌoc chon̈abꞌil dꞌa yolyibꞌan̈qꞌuinal tic.
A dꞌa Dios syal sbꞌa ebꞌ.
6 Ayic ix cꞌan̈ jun chiꞌ,
tzijtum anima ix smolbꞌej sbꞌa dꞌa jun pat chiꞌ.
Ix laj somchaj spensar ebꞌ,
yujto ix laj yabꞌlaj stiꞌ ebꞌ,
yujto a ebꞌ creyente syal stiꞌ junjun chon̈abꞌ ebꞌ.
7 Ix te sat scꞌool ebꞌ,
ix laj och qꞌueljabꞌ ebꞌ.
Ix laj yalan ebꞌ:
—A val ebꞌ van slolon tic,
aj Galilea ebꞌ smasanil.
8 Yuj chiꞌ,
¿tas yuj scabꞌ yalan co tiꞌ ebꞌ?
Palta ina chꞌocchꞌoc co tiꞌ junjun on̈.
9 A dꞌa co cal tic ay ebꞌ aj Parta.
Ay ebꞌ aj Media,
ay ebꞌ aj Elam,
ay ebꞌ aj Mesopotamia,
ay ebꞌ aj Judea,
ay ebꞌ aj Capadocia,
ay ebꞌ aj Ponto yedꞌ dꞌa juntzan̈xo chon̈abꞌ dꞌa yol yic Asia.
10 Ay ebꞌ aj Frigia,
ebꞌ aj Panfilia,
ebꞌ aj Egipto.
Ay pax ebꞌ aj Libia dꞌa yichan̈bꞌat Cirene.
Ay pax juntzan̈ ebꞌ aj Roma,
aytaxon ecꞌ dꞌa tic.
Quetisraelal nan̈al ebꞌ.
Axo nan̈alxo ebꞌ man̈ israeloclaj ebꞌ,
palta ochnac ebꞌ dꞌa co cꞌaybꞌubꞌal.
11 Ay pax ebꞌ aj Creta yedꞌ ebꞌ aj Arabia.
Co masanil scabꞌ slolon ebꞌ dꞌa co tiꞌ yic syalan ebꞌ jantac val tas satubꞌtac sbꞌo Dios,
xchi ebꞌ.
12 Ix laj sat scꞌool ebꞌ smasanil,
ix laj somchaj ebꞌ.
Ix laj yalan ebꞌ:
—¿Tas val yaj juntzan̈ tic?
xchi ebꞌ.
13 Palta ay juntzan̈xo ebꞌ jun,
ton̈ej ix bꞌuchvaj ebꞌ.
Ix yalan ebꞌ:
—A juntzan̈ ebꞌ tic,
ucꞌuman̈ ebꞌ,
xchi ebꞌ.
Yalnaquel slolonel Dios vin̈aj Pedro
14 Yuj chiꞌ,
ix qꞌue lin̈an vin̈aj Pedro yedꞌ ebꞌ vin̈ uxluchvan̈ yetchecabꞌvumal.
Te chaan̈ ix yal vin̈ dꞌa scal ebꞌ anima chiꞌ:
—Ex aj Judea yedꞌ ex e masanil ayextaxonecꞌ dꞌa Jerusalén tic,
svacꞌ eyojtaquejel tas yaj jun tic.
Aqꞌuecoch e chiquin dꞌa tas ol val dꞌayex.
15 ¿Tom tze naꞌa to ucꞌum on̈ an̈?
Maay,
ina qꞌue cꞌualto ticnaic.
16 Palta a vin̈aj Joel,
vin̈ schecabꞌ Dios dꞌa pecaꞌ,
ayocto yalannaccan vin̈ dꞌa Slolonel Dios Tzꞌibꞌabꞌilcani,
xchi icha tic:
17 Ix yalan Dios:
A dꞌa yic slajvubꞌ cꞌual,
ol vacꞌoch Vespíritu dꞌa masanil anima.
Axo ebꞌ eyuninal yedꞌ ebꞌ eyisil ol alanel in lolonel.
A dꞌa ebꞌ quelemtac ol in chꞌox juntzan̈ tas dꞌa vayichal.
Axo dꞌa ebꞌ ichamtac vinac,
ol in lolon dꞌa ebꞌ dꞌa svayich.
18 A dꞌa jun tiempoal chiꞌ,
ol vacꞌoch Vespíritu dꞌa jantacn̈ej ebꞌ tzin acꞌan servil,
vachꞌchom vinac,
mato ix,
ol yalel in lolonel ebꞌ.
19 Ol in chꞌoxan juntzan̈ tas dꞌa satchaan̈ yedꞌ dꞌa yolyibꞌan̈qꞌuinal,
ol sat scꞌool ebꞌ anima yilani.
Ol in chꞌoxpax juntzan̈xo tas schꞌoxanel in poder,
aton chicꞌ,
cꞌacꞌ yedꞌ jun nivan tabꞌ icha asun.
20 A cꞌu ol qꞌuicꞌbꞌoqueloc.
Axo qꞌuen uj,
te chac ol aj qꞌueen icha chicꞌ.
Icha chiꞌ ol ajoc ayic manto ja scꞌual yoval in cꞌool a in Yajal in tic.
A jun cꞌual chiꞌ,
te nivan yelcꞌochi.
Ol te sat scꞌool ebꞌ anima yuuj.
21 Axo ebꞌ syal sbꞌa dꞌayin a in Yajal in tic,
ol laj colchaj ebꞌ,
xchi Dios dꞌa Slolonel chiꞌ.
22 Ex vetisraelal,
aqꞌuecoch e chiquin dꞌa juntzan̈xo ol val tic dꞌayex.
A Dios ix chꞌoxani chajtil yopisio Jesús aj Nazaret dꞌayex,
ayic ix sbꞌoan juntzan̈ milagro,
juntzan̈ malaj bꞌaj squilaꞌ yedꞌ juntzan̈xo tas schꞌoxanel spoder.
A juntzan̈ chiꞌ ix sbꞌo Dios yedꞌ Jesús.
Ina eyojtactaxon juntzan̈ tic.
23 Palta a Jesús chiꞌ,
ix acꞌjicanoch dꞌa yol e cꞌabꞌ,
yujto icha chiꞌ ix el dꞌa scꞌool Dios.
Yictax dꞌa pecataxo yojtacxo Dios tas ol javoc dꞌa yibꞌan̈ Jesús chiꞌ.
A ex tic ix e majnej scꞌabꞌ ebꞌ chuc,
yic ix eyamani,
ix e culusanqꞌuei.
Icha chiꞌ ix eyutej e milanchamoc.
24 Palta axo Dios ix acꞌan pitzvocxi.
Ix yacꞌan ganar spitzvixi,
yujto a chamel malaj tzꞌoch dꞌay.
25 A vin̈aj David alannaccan yabꞌixal Jesús chiꞌ to ol pitzvocxi.
Xchi icha tic:
Masanil tiempo naan achn̈ej vuuj.
Yujto ayachecꞌ dꞌa in vachꞌ cꞌabꞌ,
yuj chiꞌ max somchajel-laj in cꞌool.
26 Yuj chiꞌ ste tzalaj in cꞌool,
tzin bꞌitan dꞌa tzalajcꞌolal.
Malaj tas tzin na yuj in nivanil tic,
yujto tzach vacꞌoch yipoc in cꞌool.
27 Yujto man̈ ol actejcanlaj in pixan dꞌa scal ebꞌ chamnac,
man̈ ol a cha cꞌabꞌat in nivanil tic,
a in ton tic sicꞌbꞌil in el uuj.
28 Ix acꞌ vojtaquejel sbꞌeal qꞌuinal,
ol acꞌ tzalajbꞌoc in cꞌool ayic ayachecꞌ vedꞌoc.
Icha chiꞌ yaj stzꞌibꞌancan vin̈aj David dꞌa Slolonel Dios.
29 Ex vetchon̈abꞌ,
te chequel tas ajnac vin̈ co mam quicham aj David chiꞌ.
Cojtac to chamnac vin̈,
mucnajnac vin̈.
A jun yedꞌtal bꞌaj mucan vin̈ chiꞌ,
an̈ejaꞌ chequelto yajecꞌ ticnaic.
30 Palta a vin̈aj David chiꞌ,
acꞌbꞌil yopisio vin̈ yalancani tastac ol javoc.
Yojtac vin̈ to te yel stiꞌ Dios yacꞌnaccan dꞌay,
to a Cristo ol elixcan yin̈tiloc,
axo yochcan reyal chiꞌ sqꞌuexuloc vin̈.
31 Ayocto ix yojtacanel vin̈aj David chiꞌ tas ol aj Cristo.
Yuj chiꞌ yalnaccan vin̈ to ol pitzvocxi Cristo chiꞌ.
Ix yalanpaxcan vin̈ to a Dios man̈ ol actancan spixan dꞌa scal ebꞌ chamnac.
Axo snivanil,
man̈ ol cꞌaoc.
32 Yuj chiꞌ a Jesús tic,
a Dios ix acꞌanxi pitzvoc.
Co masanil scacꞌoch co bꞌa testigoal yuj jun tic,
yujto ix quilaꞌ.
33 An̈ejtonaꞌ,
ix pax dꞌa satchaan̈ yuj spoder Dios,
yic bꞌat em cꞌojan dꞌa svachꞌ cꞌabꞌ Dios chiꞌ,
axo ix acꞌan Espíritu Santo dꞌay,
icha yutejnac yalancani.
Axo Jesús chiꞌ ix acꞌancot jun tzeyil tic yedꞌ jun tzeyabꞌ tic.
34 A vin̈aj David chiꞌ maj bꞌatlaj vin̈ dꞌa satchaan̈ yedꞌ snivanil.
Palta yalnaccan vin̈ icha tic:
A Dios Cajal alannac dꞌa Vajalil:
Eman̈ cꞌojan dꞌa in vachꞌ cꞌabꞌ,*
35 masanto ol vacꞌcanoch ebꞌ ayoch ajcꞌool dꞌayach dꞌa yalan̈ oc,
xchi Dios dꞌa Vajalil,
xchi vin̈aj David chiꞌ.
36 Palta in gana tzeyojtaquejel sicꞌlabꞌil e masanil ex vetisraelal to a Jesús ix e culusejqꞌue chiꞌ,
aton ix acꞌjioch Cajaloc yuj Dios.
Ix acꞌjioch Cristoal,
aton jun tan̈vabꞌiltaxon sjavi cuuj,
xchi vin̈aj Pedro chiꞌ.
37 Ayic ix yabꞌan juntzan̈ chiꞌ ebꞌ chon̈abꞌ,
ix te och pitzꞌan cuscꞌolal dꞌa spixan ebꞌ.
Ix yalan ebꞌ icha tic dꞌa vin̈aj Pedro yedꞌ dꞌa juntzan̈xo ebꞌ schecabꞌ Jesús:
—Ex vetanimail,
¿tas vachꞌ co cꞌulan ticnaic jun?
xchi ebꞌ.
38 Yuj chiꞌ,
ix yal vin̈aj Pedro chiꞌ dꞌa ebꞌ:
—Naec e bꞌa.
Aqꞌuec bautizar e bꞌa dꞌa sbꞌi Jesucristo,
yic vachꞌ ol acꞌjoc lajvoc e mul yuj Dios.
Ichato chiꞌ,
ol yacꞌan Espíritu Santo dꞌayex.
39 Yujto icha chiꞌ ajnac yacꞌannaccan stiꞌ dꞌayon̈,
dꞌa ebꞌ cuninal yedꞌ pax dꞌa masanil mach najat ay.
Yujto a Cajalil co Diosal syacꞌ Yespíritu dꞌa jantacn̈ej ebꞌ syavtejcot yicoc,
xchi vin̈aj Pedro chiꞌ dꞌa ebꞌ.
40 Tzijtumto tas ix yal vin̈ dꞌa ebꞌ.
Ix yacꞌanpax razón vin̈ dꞌa ebꞌ:
—Iqꞌuequel e bꞌa dꞌa scal ebꞌ malaj svachꞌil tic,
xchi vin̈.
41 Yuj chiꞌ ay ebꞌ ix acꞌanoch dꞌa scꞌool tas ix yal vin̈aj Pedro chiꞌ.
Ix yacꞌan acꞌjoc bautizar sbꞌa ebꞌ.
A ebꞌ ix och creyenteal dꞌa jun cꞌu chiꞌ,
ay am oxeoc mil ebꞌ.
42 Ix yacꞌan val och spensar ebꞌ dꞌa juntzan̈ cꞌaybꞌubꞌal ix yal ebꞌ schecabꞌ Jesús chiꞌ.
Junxon̈ej ix yutej spensar ebꞌ smasanil.
Slesalvi ebꞌ,
smolbꞌan sbꞌa ebꞌ,
svaan ixim pan ebꞌ yic vachꞌ snaancot Jesús Cajal ebꞌ.
A sbꞌeybꞌal ebꞌ bꞌabꞌel creyente
43 A ebꞌ schecabꞌ Jesús,
tzijtum milagro ix schꞌox ebꞌ yuj spoder Dios.
Yuj chiꞌ ix laj xiv ebꞌ anima smasanil.
44 Jantacn̈ej ebꞌ ix acꞌanoch Cristo dꞌa scꞌool,
junxon̈ej ix aj ebꞌ.
Jantacn̈ej tastac ay dꞌa ebꞌ,
junxon̈ej ix laj yutej ebꞌ.
45 Ay ebꞌ ix laj schon̈el sluum yedꞌ jantacn̈ej tastac ay dꞌa ebꞌ.
Ix laj spucanecꞌ stojol ebꞌ dꞌa scal,
icha syalaꞌ tastac tzꞌoch yuj junjun ebꞌ.
46 Junjun cꞌu smolbꞌan sbꞌa ebꞌ dꞌa yol yamaqꞌuil stemplo Dios.
Axo dꞌa spat ebꞌ smolbꞌej sbꞌa yic smol va ebꞌ.
Junxon̈ej slaj va ebꞌ dꞌa tzalajcꞌolal.
Te juncꞌolal ix aj ebꞌ.
47 Slaj yalan vachꞌ lolonel ebꞌ dꞌa Dios,
ste tzalaj pax ebꞌ anima smasanil yedꞌ ebꞌ.
Axo Jesús Cajal tzꞌacꞌan qꞌuibꞌ sbꞌisul ebꞌ dꞌa junjun cꞌu,
yuj ebꞌ van scolchaj chiꞌ yuuj.