A vin̈aj Pedro yedꞌ vin̈aj Cornelio
10
A dꞌa chon̈abꞌ Cesarea ay jun vin̈ scuch Cornelio,
yajal yaj vin̈ dꞌa jun macan̈ ebꞌ soldado scuchan aj Italia.
2 Syacꞌ val och spensar vin̈ dꞌa Dios.
Te ay xivcꞌolal vin̈ dꞌay yedꞌ jantac ebꞌ ayecꞌ dꞌa yol spat vin̈ yedꞌoc.
Tzijtum tas syacꞌpax vin̈ dꞌa ebꞌ israel te mebꞌaꞌ.
Slesalvi val vin̈ dꞌa Dios.
3 Axo junel dꞌa tzꞌeymajcꞌualxo,
ix yilan vin̈ icha dꞌa vayich,
ay jun yángel Dios ayoch dꞌa yol jun cuarto bꞌaj ayecꞌ vin̈ chiꞌ.
Ix yalan jun ángel chiꞌ dꞌa vin̈:
—Cornelio,
xchi.
4 Ix och qꞌuelan vin̈ dꞌay.
Ix te xiv vin̈ yuuj.
—Mamin,
¿tas tzal dꞌayin?
xchi vin̈ dꞌay.
Yuj chiꞌ ix yalan dꞌa vin̈:
—A Dios ix abꞌan a lesal.
Ix yilanpax juntzan̈ a silabꞌ ix acꞌ dꞌa ebꞌ mebꞌaꞌ.
Maj satlaj scꞌool dꞌa juntzan̈ chiꞌ.
5 A ticnaic,
checbꞌat jayvan̈oc ebꞌ vin̈ vinac dꞌa chon̈abꞌ Jope,
yic bꞌat yicꞌcot vin̈aj Simón ebꞌ vin̈,
aton vin̈ scuchpax Pedro.
6 Ayecꞌ vin̈ dꞌa spat jun vin̈ sqꞌuexul,
aton jun vin̈ smunlaj yedꞌ nocꞌ tzꞌuum.
A spat vin̈ chiꞌ,
a dꞌa stiꞌ aꞌ mar ay,
xchi jun ángel chiꞌ dꞌa vin̈.
7 Ix lajvi spax jun ángel chiꞌ,
ix yavtancot chavan̈ ebꞌ vin̈ schecabꞌ vin̈aj Cornelio chiꞌ yedꞌ pax jun vin̈ soldado yacꞌumaltaxon servil vin̈ yaji.
A jun vin̈ soldado chiꞌ,
an̈ej dꞌa Dios ayoch spensar vin̈.
8 Jantacn̈ej tas ix yal jun ángel chiꞌ,
ix laj yal vin̈ dꞌa ebꞌ vin̈.
Ix lajvi chiꞌ,
ix schecanbꞌat ebꞌ vin̈ dꞌa chon̈abꞌ Jope chiꞌ.
9 Axo dꞌa junxo cꞌu dꞌa chimcꞌualil,
ayic van scꞌoch ebꞌ vin̈ dꞌa slacꞌanil Jope chiꞌ,
axo vin̈aj Pedro chiꞌ,
ix qꞌue vin̈ lesal dꞌa span̈anil yibꞌan̈ spat vin̈aj Simón chiꞌ.
10 Ayic ayecꞌ vin̈ taꞌ,
ix och svejel vin̈.
Ix scꞌanan va sbꞌa vin̈.
Palta axo yic van to sbꞌoji tas ol yabꞌlej vin̈ chiꞌ,
icha dꞌa vayichal
11 ix aj yilan vin̈ sjacvi satchaan̈.
Axo ix yilan vin̈ ichato ay jun cꞌapac yambꞌil schiquintac schan̈il,
ix emul dꞌa span̈anil yibꞌan̈ pat bꞌaj ayecꞌ vin̈ chiꞌ.
12 Axo dꞌa yol jun cꞌapac chiꞌ,
ataꞌ ayoch junjun macan̈ nocꞌ nocꞌ.
Ay nocꞌ chan̈eꞌ yoc.
Ay pax nocꞌ chan yedꞌ nocꞌ much.*
13 Ix lajvi yemul jun chiꞌ,
ix yabꞌan vin̈aj Pedro chiꞌ,
ix och jun lolonel,
ix yalan icha tic:
—Pedro,
macꞌcham juntzan̈ nocꞌ tic a chiꞌa,
xchi.
14 Palta ix yalan vin̈:
—Ach Vajalil,
max yal-laj,
yujto manta jun eloc tzin chi junoc comon tasi,
ma junoc tas ay yovalil yuj ley Moisés,
xchi vin̈.
15 Yuj chiꞌ ix yalan junelxo:
—A juntzan̈ tas syal Dios to malaj yovalil,
a achxo tic,
man̈ alaꞌ to ay yovalil,
xchi.
16 Oxel ix alchaj icha chiꞌ.
Ix lajvin̈ej chiꞌ,
ix icꞌjixiqꞌue jun cꞌapac chiꞌ dꞌa satchaan̈.
17 Vanto snaan vin̈aj Pedro tas yaj jun chiꞌ,
ix cꞌoch ebꞌ vin̈ schecabꞌ vin̈aj Cornelio dꞌa stiꞌ jun pat chiꞌ.
Toxo ix scꞌanbꞌej ebꞌ vin̈ yabꞌi bꞌaj ay spat vin̈aj Simón chiꞌ.
18 Yuj chiꞌ ix avajoch ebꞌ vin̈,
ix scꞌanbꞌan ebꞌ vin̈:
—¿Ay am ecꞌ vin̈aj Simón dꞌa tic,
vin̈ scuchpax Pedro?
xchi ebꞌ vin̈.
19 An̈ejaꞌ vanto snaan vin̈aj Pedro yuj juntzan̈ ix yil chiꞌ,
ix yalan Yespíritu Dios dꞌa vin̈:
—Ay oxvan̈ ebꞌ vin̈ vinac tzach cꞌanbꞌani.
20 Yuj chiꞌ eman̈.
Ixic yedꞌ ebꞌ vin̈,
man̈ chabꞌcꞌolaloc tzach bꞌati,
yujto a in ix in checcot ebꞌ vin̈,
xchi dꞌa vin̈.
21 Yuj chiꞌ ix emta vin̈ bꞌaj ayecꞌ ebꞌ vin̈ schecabꞌ vin̈aj Cornelio chiꞌ.
Ix yalan vin̈ dꞌa ebꞌ vin̈:
—Ina in tzin e cꞌanbꞌej tic.
¿Tas e checabꞌil dꞌayin yuj chiꞌ tzex javi?
xchi vin̈.
22 Ix yalan ebꞌ vin̈ dꞌa vin̈:
—Ay jun vin̈ yajal soldado scuch Cornelio.
Te vachꞌ sbꞌeybꞌal vin̈,
syacꞌpaxem sbꞌa vin̈ dꞌa Dios.
Te vachꞌ vin̈ dꞌa yichan̈ ebꞌ etisraelal smasanil.
Axo jun yángel Dios ix alan dꞌa vin̈ to scheccot ebꞌ schecabꞌ vin̈ yic tzach yicꞌbꞌat ebꞌ dꞌa spat vin̈,
yic vachꞌ smaclej yabꞌ vin̈ tas ol alaꞌ,
xchi ebꞌ vin̈ dꞌa vin̈aj Pedro chiꞌ.
23 Yuj chiꞌ ix icꞌjioch ebꞌ vin̈ dꞌa yol pat chiꞌ yuj vin̈.
Ataꞌ ix ecꞌ acꞌval yuj ebꞌ vin̈.
Axo dꞌa junxo cꞌu ix bꞌat vin̈ yedꞌ ebꞌ vin̈.
Ix bꞌat jayvan̈ ebꞌ creyente aj Jope chiꞌ yucꞌlevoc vin̈.
24 Ato dꞌa schabꞌjial ix cꞌoch ebꞌ dꞌa chon̈abꞌ Cesarea.
Axo vin̈aj Cornelio ix tan̈van scꞌoch ebꞌ taꞌ.
Toxo ix yavtejcot ebꞌ scꞌabꞌ yoc vin̈ yedꞌ juntzan̈xo ebꞌ yamigo vin̈.
25 Ayic van scꞌoch vin̈aj Pedro chiꞌ,
ix elta vin̈aj Cornelio chiꞌ dꞌa stiꞌ spat.
Ix schaan vin̈ scꞌoch vin̈.
Ix em cuman vin̈ yaqꞌuem sbꞌa dꞌa vin̈aj Pedro chiꞌ.
26 Palta a vin̈aj Pedro chiꞌ ix quetzanqꞌue vaan vin̈.
Ix yalan vin̈ dꞌa vin̈ icha tic:
—Qꞌuean̈ lin̈an,
yujto quetanimail co bꞌa,
xchi vin̈.
27 Van slolon ebꞌ vin̈,
ix och ebꞌ vin̈ dꞌa yol pat.
Ix yilan vin̈aj Pedro chiꞌ to tzijtumxo ebꞌ molaneqꞌui.
28 Yuj chiꞌ ix yal vin̈ dꞌa ebꞌ:
—Ex vetanimail,
eyojtac to a on̈ israel on̈ tic,
ay yovalil co cꞌumlan co bꞌa yedꞌ junoc chꞌoc chon̈abꞌil,
ma coch dꞌa yol spat.
Palta a Dios ix acꞌan vojtaquejeli to max yal valani to ay yovalil tzin cꞌumej junoc mach.
29 Yuj chiꞌ malaj tas ix valaꞌ ayic ix bꞌat in eyicꞌancoti.
Xal ticnaic,
alec dꞌayin,
tas yuj ix bꞌat in eyicꞌcoti,
xchi vin̈ dꞌa ebꞌ.
30 Yuj chiꞌ ix yalan vin̈aj Cornelio chiꞌ dꞌa vin̈ icha tic:
—Yabꞌ am icha hora tic oxji,
van in lesalvi dꞌa yol in pat tic,
ichataxon tzin cꞌulej dꞌa junjun tzꞌeymajcꞌualil.
Ay jun schꞌox sbꞌa dꞌayin,
copopi quilan spichul.
31 Yalan dꞌayin:
Cornelio,
a Dios ix abꞌan a lesal.
Ix snaanpaxcot juntzan̈ a silabꞌ tzacꞌ dꞌa ebꞌ mebꞌaꞌ.
32 Axo ticnaic,
checbꞌat jayvan̈oc vinac dꞌa chon̈abꞌ Jope,
bꞌat yicꞌancot vin̈aj Simón ebꞌ,
scuch pax Pedro.
Ayecꞌ vin̈ dꞌa spat jun vin̈ sqꞌuexul,
aton jun vin̈ smunlaj yedꞌ nocꞌ tzꞌuum.
A spat vin̈ chiꞌ,
a dꞌa stiꞌ aꞌ mar ay,
xchi.
33 Slajvi chiꞌ,
in checanbꞌat ebꞌ in checabꞌ ach sayeqꞌui.
Yuj val dios dꞌayach ix a cꞌanabꞌajej a coti.
A ticnaic,
ayon̈ ecꞌ co masanil dꞌa yichan̈ Dios Cajal.
Yuj chiꞌ sco snibꞌej scabꞌi jantacn̈ej tas albꞌilcan dꞌayach yuuj,
yic tzalan dꞌayon̈,
xchi vin̈aj Cornelio chiꞌ dꞌa vin̈.
A smensaje vin̈aj Pedro dꞌa yol spat vin̈aj Cornelio
34 Axo vin̈aj Pedro chiꞌ,
ix och ijan vin̈ yalan dꞌa ebꞌ:
—A ticnaic vojtac to dꞌa val yel,
jun lajann̈ej yelcꞌoch masanil anima dꞌa yichan̈ Dios.
35 A ebꞌ xiv dꞌa Dios,
vachꞌchom man̈ israeloc ebꞌ,
ste tzalaj yedꞌ ebꞌ tato vachꞌ sbꞌeybꞌal ebꞌ.
36 A Dios acꞌjinaccan slolonel dꞌayon̈ a on̈ israel on̈ tic.
Yalannaccan dꞌayon̈ to ay juncꞌolal yuj Jesucristo,
aton Cajal co masanil.
37 A exxo tic,
ina eyojtac tas ix scꞌulej Dios dꞌa co lugar.
A dꞌa Galilea elnac yich,
ayic slajvinac yalancanel slolonel Dios vin̈aj Juan,
a slajvinac yacꞌan bautizar ebꞌ anima vin̈.
38 Eyojtac to a Dios yacꞌnac Yespíritu dꞌa Jesús aj Nazaret,
yacꞌannacpax spoder dꞌay.
Eyojtac paxi to a Jesús ix colvaj dꞌa ebꞌ anima.
Jantacn̈ej ebꞌ ixtabꞌil yuj vin̈ diablo,
ix laj yacꞌ bꞌoxoc scꞌool ebꞌ.
Icha chiꞌ yutejnac sbꞌa yujto a Dios ayoch yedꞌoc.
39 A on̈ tic scacꞌ testigoal co bꞌa yuj juntzan̈ tastac ix scꞌulej chiꞌ.
Jantacn̈ej tas ix ecꞌ scꞌulej dꞌa yol yic Judea yedꞌ dꞌa chon̈abꞌ Jerusalén,
ix quilaꞌ.
Ix lajvi chiꞌ,
ix culusajqꞌue yuj ebꞌ vetisraelal.
Icha chiꞌ ix yutej ebꞌ smilanchamoc.
40 Palta axo dꞌa schabꞌjial ix pitzvixi yuj Dios.
Yuj spoder Dios chiꞌ ix schꞌox sbꞌa dꞌayon̈.
41 Palta maj schꞌoxlaj sbꞌa dꞌa masanil ebꞌ anima.
An̈ej dꞌayon̈ ix schꞌox sbꞌa,
yujto atax dꞌa pecaꞌ sicꞌbꞌilon̈xocanel yuuj yic tzon̈ och stestigooc.
On̈ va pax yedꞌoc ayic toxo ix pitzvixi dꞌa scal ebꞌ chamnac chiꞌ.
42 Ix yalancan dꞌayon̈ to yovalil tzecꞌ calel yabꞌixal dꞌa ebꞌ anima,
to a Dios acꞌjinac yopisio schꞌolbꞌitan tas yaj ebꞌ anima smasanil,
vachꞌchom ebꞌ pitzanto ma ebꞌ chamnacxo.
43 Atax dꞌa pecaꞌ,
ayocto yalannaccanel yabꞌixal Jesús ebꞌ schecabꞌ Dios.
Yalnaccan junjun ebꞌ to a jantacn̈ej ebꞌ ol acꞌanoch Jesús chiꞌ dꞌa scꞌool,
ol acꞌjoccan lajvoc smul ebꞌ yuuj,
xchi vin̈aj Pedro chiꞌ dꞌa ebꞌ.
Ay ebꞌ man̈ israeloc ix chaan Yespíritu Dios
44 Axo yic van yalan vin̈aj Pedro chiꞌ,
ix ochcan Yespíritu Dios dꞌa masanil ebꞌ van yabꞌan chiꞌ.
45 Axo ebꞌ creyente aj Israel ajun yedꞌ vin̈aj Pedro chiꞌ,
ix te sat scꞌool ebꞌ,
yujto ix yacꞌpax Yespíritu Dios dꞌa ebꞌ man̈ israeloc.
46 Yujto ix yabꞌ ebꞌ to chꞌocchꞌoc tiꞌal syal ebꞌ bꞌaj ix ochcan cajan Espíritu Santo chiꞌ.
Ix yabꞌanpax ebꞌ yalan vachꞌ lolonel ebꞌ dꞌa Dios.
Ix lajvi chiꞌ ix yalan vin̈aj Pedro chiꞌ:
47 —Max yal sco cachoch vaan ebꞌ tic,
yic max acꞌji bautizar ebꞌ.
Ina to ix acꞌji Yespíritu Dios dꞌa ebꞌ icha ix aj yacꞌji dꞌayon̈,
xchi vin̈.
48 Yuj chiꞌ ix yal vin̈aj Pedro chiꞌ to tzꞌacꞌji bautizar ebꞌ dꞌa sbꞌi Jesucristo.
Ix lajvi yacꞌji bautizar ebꞌ chiꞌ,
ix scꞌanan pavor ebꞌ dꞌa vin̈,
yic vachꞌ tzꞌaj jayeoc cꞌual vin̈ yedꞌ ebꞌ.