A vin̈aj Pedro yedꞌ ebꞌ creyente dꞌa Jerusalén
11
Axo ebꞌ schecabꞌ Jesús yedꞌ ebꞌ creyente ay dꞌa yol yic Judea,
ix yabꞌ ebꞌ to ay ebꞌ man̈ israeloc ix acꞌanoch slolonel Dios dꞌa scꞌool.
2 Yuj chiꞌ ayic ix cꞌochxi vin̈aj Pedro dꞌa Jerusalén,
ix yalan ebꞌ creyente israel to man̈ vachꞌoc ix yutej sbꞌa vin̈.
3 Ix yalan ebꞌ icha tic dꞌa vin̈:
—¿Tas yuj ix ach xidꞌecꞌ a cꞌumej ebꞌ man̈ israeloc,
ach va pax yedꞌ ebꞌ?
xchi ebꞌ dꞌa vin̈.
4 Yuj chiꞌ ix och ijan vin̈ yalan dꞌa ebꞌ tastac ix uji chiꞌ,
ix yalan vin̈ icha tic:
5 —Ayinecꞌ dꞌa chon̈abꞌ Jope.
Axo dꞌa jun cꞌu,
van in lesalvi,
icha vayich ix aj vilan yemul jun nivan cꞌapac ix cot dꞌa satchaan̈.
Yambꞌil schiquintac schan̈il,
ix emul bꞌaj ay in ecꞌ chiꞌ.
6 Ix in och qꞌuelan dꞌay yic svilaꞌ tas ayoch dꞌa yool.
Axo ix vilani,
ay juntzan̈ nocꞌ caltacteꞌal nocꞌ chan̈eꞌ yoc.
Ay nocꞌ ay smay.
Ay nocꞌ chan yedꞌ juntzan̈ nocꞌ much.
7 Ix lajvi chiꞌ,
ix vabꞌan yoch jun lolonel,
ix yalani:
Pedro,
milcham juntzan̈ nocꞌ tic a chiꞌa,
xchi.
8 Palta ix in tacꞌvi dꞌay:
Maay,
ach Vajal,
yujto manta juneloc tzin chi junoc comon tas,
ma junoc tas ay yovalil yuj ley Moisés,
xin chi dꞌay.
9 Yuj chiꞌ,
ix yalanemta junelxo dꞌayin dꞌa satchaan̈:
A juntzan̈ tas syal Dios to malaj yovalil,
a achxo tic,
man̈ alaꞌ to ay yovalil,
xchi.
10 Oxel ix yal juntzan̈ chiꞌ icha chiꞌ.
Ix lajvi chiꞌ ix icꞌjixiqꞌue jun cꞌapac chiꞌ dꞌa satchaan̈.
11 Junanto rato chiꞌ ix cꞌoch oxvan̈ ebꞌ vin̈ dꞌa jun pat bꞌaj ayinecꞌ chiꞌ.
A ebꞌ vin̈ chiꞌ,
a dꞌa chon̈abꞌ Cesarea ix checjicot ebꞌ vin̈,
yic sbꞌat in sayan ebꞌ vin̈ dꞌa chon̈abꞌ Jope.
12 Axo Yespíritu Dios ix alan dꞌayin icha tic:
Ixic,
man̈ chabꞌcꞌolaloc tzach bꞌat yedꞌ ebꞌ vin̈,
xchi.
Ix bꞌat pax vacvan̈xo ebꞌ vin̈ cucꞌtac tic vedꞌoc.
Axo ix on̈ cꞌoch taꞌ,
ix on̈ och dꞌa yol spat jun vin̈.
13 Ix yalan vin̈ dꞌayon̈ to ix yil jun ángel vin̈,
lin̈anecꞌ dꞌa yol spat vin̈ chiꞌ.
Ix yalan dꞌa vin̈:
Checbꞌat jayvan̈oc ebꞌ vin̈ dꞌa chon̈abꞌ Jope,
bꞌat yicꞌocabꞌcot vin̈aj Simón ebꞌ vin̈,
scuchan pax Pedro.
14 A vin̈ ol alan dꞌayach tas ol aj a colchaji yedꞌ jantacn̈ej ebꞌ ayecꞌ dꞌa yol a pat,
xchi jun ángel chiꞌ dꞌa vin̈.
15 Axo yic ix in och ijan valan dꞌa ebꞌ,
dꞌa jun rato chiꞌ ix och Yespíritu Dios dꞌa ebꞌ,
icha ix aj yoch dꞌayon̈ dꞌa sbꞌabꞌelal.
16 Yuj chiꞌ ix in naancot tas albꞌilcan yuj Cajal Jesús,
ayic ix yalan icha tic:
Yel toni,
a vin̈aj Juan ix acꞌan bautizar ebꞌ anima dꞌa a aꞌ.
Palta a ex tic,
ol ex acꞌjoc bautizar yuj Yespíritu Dios,
xchi.
17 A Dios ix acꞌan Yespíritu dꞌa ebꞌ icha ix yutej yacꞌan dꞌayon̈ ayic ix cacꞌanoch Cajal Jesucristo dꞌa co cꞌool.
Yuj chiꞌ,
¿tom a in tic,
syal in cachanoch vaan tas scꞌulej Dios?
xchi vin̈aj Pedro chiꞌ dꞌa ebꞌ.
18 Axo ebꞌ creyente dꞌa Jerusalén chiꞌ,
ayic ix yabꞌan juntzan̈ chiꞌ ebꞌ,
man̈xalaj tas ix yal ebꞌ.
Axon̈ej vachꞌ lolonel ix yal ebꞌ dꞌa Dios.
Ix yalan ebꞌ:
—An̈ejtonaꞌ pax ebꞌ man̈ israeloc,
a Dios ix acꞌan sna sbꞌa ebꞌ yic vachꞌ scha sqꞌuinal ebꞌ dꞌa juneln̈ej quedꞌoc,
xchi ebꞌ.
A yabꞌixal ebꞌ creyente dꞌa Antioquía
19 Ayic ix miljicham vin̈aj Esteban,
ix acꞌjipax och syaelal ebꞌ creyente smasanil.
Yuj chiꞌ ix bꞌat ebꞌ elelal.
Ay ebꞌ ix cꞌoch masanto dꞌa chon̈abꞌ Fenicia,
dꞌa Chipre yedꞌ dꞌa Antioquía.*
Ix laj yalanel vachꞌ abꞌix ebꞌ dꞌa ebꞌ yetisraelal ayecꞌ taꞌ.
Palta malaj tas ix yal ebꞌ dꞌa ebꞌ man̈ israeloc.
20 Palta ay jayvan̈ ebꞌ creyente aj Chipre yedꞌ ebꞌ aj Cirene ix cꞌoch dꞌa chon̈abꞌ Antioquía chiꞌ.
Ataꞌ ix yalel yabꞌixal Jesucristo ebꞌ dꞌa ebꞌ man̈ israeloc.
21 Axo Jesús Cajal ix och yedꞌ ebꞌ creyente chiꞌ,
yuj chiꞌ tzijtum anima ix sqꞌuex sbꞌeybꞌal.
Ix yacꞌanoch Cajal Jesús ebꞌ dꞌa scꞌool.
22 Axo ebꞌ creyente aj Jerusalén,
ayic ix yabꞌan specal jun chiꞌ ebꞌ,
ix schecbꞌat vin̈aj Bernabé ebꞌ dꞌa Antioquía chiꞌ.
23 Axo ix cꞌoch vin̈,
ix yilan vin̈,
te nivan svachꞌcꞌolal Dios ix yacꞌ dꞌa ebꞌ.
Yuj chiꞌ ix te tzalaj vin̈ yuj ebꞌ.
Ix acꞌji stecꞌanil ebꞌ yuj vin̈.
Ix yalan vin̈ to tecꞌan syutej sbꞌa ebꞌ,
syacꞌanpax och spensar ebꞌ dꞌa Cajal Jesús dꞌa masanil tiempo.
24 Icha chiꞌ ix yutej vin̈aj Bernabé chiꞌ yalan dꞌa ebꞌ,
yujto te vachꞌ spensar vin̈.
Te ayoch Espíritu Santo yedꞌ vin̈.
Syacꞌ val och Dios vin̈ dꞌa scꞌool.
Yuj chiꞌ tzijtum val ebꞌ aj chon̈abꞌ chiꞌ ix acꞌanoch Cajal Jesús dꞌa scꞌool yuj vin̈.
25 Ix lajvi chiꞌ,
ix bꞌat vin̈aj Bernabé chiꞌ dꞌa chon̈abꞌ Tarso,
ix bꞌat sayanecꞌ vin̈aj Saulo vin̈ taꞌ.
Axo ix ilchaj vin̈ yuj vin̈,
ix yicꞌancot vin̈ vin̈ dꞌa chon̈abꞌ Antioquía chiꞌ.
26 Axo taꞌ ix ecꞌ jun abꞌil ebꞌ vin̈ dꞌa scal ebꞌ creyente chiꞌ.
Tzijtum mach ix scꞌaybꞌej ebꞌ vin̈.
A dꞌa jun chon̈abꞌ chiꞌ,
ataꞌ ix acꞌji scuch ebꞌ creyente cristiano dꞌa sbꞌabꞌelal.
27 A dꞌa jun tiempoal chiꞌ,
ay jayvan̈ ebꞌ vin̈ schecabꞌ Dios ix bꞌat alanel slolonel.
Ix cot ebꞌ vin̈ dꞌa Jerusalén,
ix javi ebꞌ vin̈ dꞌa Antioquía chiꞌ.
28 Ay jun vin̈ yetbꞌeyum ebꞌ vin̈ scuch Agabo.
Ix qꞌue vaan vin̈ dꞌa scal ebꞌ creyente.
Axo Yespíritu Dios ix acꞌan yal vin̈ icha tic:
—Ay jun nivan vejel ol javoc dꞌa masanil yolyibꞌan̈qꞌuinal tic,
xchi vin̈.
(A jun vejel ix yal vin̈ chiꞌ,
a dꞌa stiempoal ayoch vin̈aj Claudio yajalil,
ataꞌ ix yacꞌaꞌ).
29 Yuj tas ix yal vin̈aj Agabo chiꞌ,
axo ebꞌ creyente aj Antioquía chiꞌ,
ix el dꞌa scꞌool ebꞌ to scolvaj ebꞌ dꞌa ebꞌ creyente aj Judea,
ato syalaꞌ jantac stzacꞌvan ebꞌ yacꞌani.
30 Icha chiꞌ ix scꞌulej ebꞌ.
Ix yacꞌanbꞌat yofrenda ebꞌ dꞌa ebꞌ vin̈ anciano aj Judea chiꞌ.
Axo vin̈aj Bernabé yedꞌ vin̈aj Saulo ix icꞌanbꞌat jun ofrenda chiꞌ.