Schamel vin̈aj Jacobo, preso yaj pax vin̈aj Pedro
12
A dꞌa yic jun tiempoal chiꞌ,
a vin̈aj rey Herodes,*
ix och ijan vin̈ yacꞌan chucal dꞌa ebꞌ creyente.
2 Ix schecan vin̈ tzepchajel sjolom vin̈aj Jacobo,
aton vin̈ yucꞌtac vin̈aj Juan.
3 Ayic ix yilan vin̈ to vachꞌ ix yabꞌ ebꞌ israel yuj jun chiꞌ,
yuj chiꞌ ix schec vin̈ yamjocpax vin̈aj Pedro.
A dꞌa jun sqꞌuin̈ ebꞌ israel,
yic svaan ixim pan ebꞌ malaj yich,
ataꞌ ix yamji vin̈.
4 Axo ix yamchaj vin̈ chiꞌ,
ix acꞌjioch vin̈ dꞌa preso.
Ix acꞌjioch vin̈ dꞌa yol scꞌabꞌ vaclajun̈van̈ ebꞌ soldado,
yic stan̈vaj vin̈ yuj ebꞌ.
Chan̈tacvan̈ ebꞌ ix tan̈van vin̈ dꞌa juntac el.
Ix snaan vin̈aj Herodes chiꞌ to ayic ol lajvoc qꞌuin̈ yic snajicoti tas aj yelnaccot ebꞌ israel dꞌa Egipto chiꞌ,
ol schꞌoxanelta vin̈aj Pedro chiꞌ vin̈ dꞌa yichan̈ ebꞌ anima,
ichato chiꞌ ol schꞌolbꞌitan vin̈ rey chiꞌ tas yaj vin̈.
5 Yuj chiꞌ te ay val och yilumal vin̈aj Pedro dꞌa yol teꞌ preso chiꞌ.
Axo ebꞌ creyente,
dꞌa smasanil scꞌool ebꞌ ix lesalvi dꞌa Dios yuj vin̈.
Maj ochlaj vaan ebꞌ slesalvi.
Colchajnac elta vin̈aj Pedro dꞌa preso
6 Axo dꞌa jun acꞌval,
qꞌuicꞌanocxo tzꞌelta vin̈aj Pedro chiꞌ dꞌa yichan̈ ebꞌ anima yuj vin̈aj Herodes chiꞌ,
vaynac vin̈ dꞌa snan̈al chavan̈ ebꞌ soldado.
Tzecꞌbꞌil vin̈ dꞌa chabꞌ qꞌuen cadena.
Axo dꞌa stiꞌ teꞌ preso chiꞌ ayecꞌ chavan̈xo ebꞌ vin̈ stan̈vej.
7 Palta dꞌa jun rato chiꞌ ix cꞌoch jun yángel Dios Cajal.
Te sac qꞌuinal ix aj dꞌa yol teꞌ preso chiꞌ yuuj.
Ix yecubꞌtan̈an scostil vin̈aj Pedro chiꞌ jun ángel chiꞌ,
yic tzꞌel svayan̈ vin̈,
ix yalan dꞌa vin̈:
—Qꞌuean̈ vaan val ticnaic,
xchi.
Axo qꞌuen cadena ayoch chiꞌ dꞌa scꞌabꞌ vin̈aj Pedro chiꞌ,
munil ix el qꞌueen,
ix em lan̈naj qꞌueen.
8 Ix yalanpax jun ángel chiꞌ dꞌa vin̈:
—Tzatzbꞌitej a tzecꞌul,
tzacꞌanoch a xan̈abꞌ,
xchi.
Ix lajvi chiꞌ,
ix yalan dꞌa vin̈:
—Acꞌoch jun spatic a pichul.
Tzach och tzacꞌan vuuj,
xchi.
9 Yuj chiꞌ ix och tzacꞌan vin̈ yuuj.
Ix elta vin̈ dꞌa jun cuarto bꞌaj ayecꞌ chiꞌ.
Van svayichan vin̈ snaani.
Man̈ yojtacoc vin̈ tato yel to van yelta vin̈.
10 Ix ecꞌ ebꞌ dꞌa scha macan̈il bꞌaj ayecꞌ ebꞌ soldado van stan̈van teꞌ preso chiꞌ,
ichato chiꞌ ix cꞌoch ebꞌ bꞌaj ay qꞌuen smacul preso chiꞌ bꞌaj sjacviel dꞌa yol calle.
A jun qꞌuen chiꞌ munil ix jacvi qꞌuen schꞌocoj.
Ix el ebꞌ bꞌian.
Axo ix bꞌat ebꞌ dꞌa jun calle chiꞌ,
ix actajcan vin̈aj Pedro chiꞌ yuj jun ángel chiꞌ.
11 Axo ix yilan vin̈ to yel.
Yuj chiꞌ ix yalan vin̈:
—A ticnaic,
svilaꞌ to yel ix scheccot jun yángel Dios Cajal tzul in scolanel dꞌa yol scꞌabꞌ vin̈aj Herodes.
In colchajelta dꞌa yalan̈ jantacn̈ej tas sgana ebꞌ vetisraelal syacꞌoch dꞌa vibꞌan̈,
xchi vin̈.
12 Vanto snaan juntzan̈ chiꞌ vin̈,
ix cꞌoch vin̈ dꞌa spat ix María,
snun vin̈aj Juan,
aton vin̈ scuchpax Marcos.
Tzijtum ebꞌ molanecꞌ dꞌa jun pat chiꞌ,
van slesalvi ebꞌ yuj vin̈.
13 Yuj chiꞌ ix scꞌon̈ubꞌtan̈ej spuertail yamaqꞌuil jun pat chiꞌ vin̈.
Axo jun ix cobꞌes scuch Rode,
a ix ix ul tacꞌvoquelta dꞌa vin̈.
14 Palta axo ix yabꞌan ix to a vin̈aj Pedro,
maj sjaclaj teꞌ puerta chiꞌ ix.
Ton̈ej ix te tzalaj ix.
Ix ochxi lemnaj ix.
Ix yalan ix dꞌa ebꞌ ayecꞌ chiꞌ taꞌ to a vin̈aj Pedro ayecꞌ dꞌa stiꞌ puerta chiꞌ.
15 Yuj chiꞌ ix yal ebꞌ dꞌa ix:
—Tecan ton̈ej tzach comon loloni,
xchi ebꞌ.
Palta ix yalxi ix to yel a vin̈aj Pedro chiꞌ ayeqꞌui.
Axo ix yalanxi ebꞌ:
—Tecan man̈oclaj vin̈aj Pedro chiꞌ.
Tecan a junoc ángel ayoch stan̈vumaloc vin̈,
tecan a ix javi,
xchi ebꞌ dꞌa ix.
16 Axo vin̈aj Pedro chiꞌ,
an̈ejaꞌ scꞌon̈cꞌon̈an och vin̈.
Axo ix sjacan ebꞌ,
ix yilan ebꞌ to yel a vin̈aj Pedro chiꞌ ayeqꞌui.
Ix te sat scꞌool ebꞌ.
17 Palta ix yacꞌan yechel vin̈ yedꞌ scꞌabꞌ dꞌa ebꞌ yic numan tzꞌaj ebꞌ.
Ix lajvi chiꞌ,
ix yalan vin̈ dꞌa ebꞌ tas ix aj yicꞌjielta vin̈ yuj Dios Cajal dꞌa preso chiꞌ.
Ix yalanpax vin̈ dꞌa ebꞌ:
—Tzeyal juntzan̈ tic dꞌa vin̈aj Jacobo yedꞌ dꞌa juntzan̈xo ebꞌ creyente,
xchi vin̈.
Ix lajvi chiꞌ,
ix elta vin̈ dꞌa scal ebꞌ.
Ix bꞌat vin̈ dꞌa junxo lugar.
18 Axo yic ix sacbꞌi,
ix qꞌue somnaj ebꞌ soldado yalani,
yujto maj nachajel yuj ebꞌ tas ix yutej sbꞌa vin̈aj Pedro chiꞌ.
19 Axo vin̈aj Herodes chiꞌ ix acꞌan órden yic saychaj vin̈,
palta majxo ilchajlaj vin̈ yuj ebꞌ.
Ix scꞌanbꞌan vin̈ dꞌa ebꞌ soldado chiꞌ tas ix aj yel vin̈aj Pedro chiꞌ dꞌa yol scꞌabꞌ ebꞌ.
Ix lajvi chiꞌ,
ix yacꞌan órden vin̈ scham ebꞌ.
Ix lajvi chiꞌ,
ix el vin̈aj Herodes dꞌa yol yic Judea bꞌaj ayecꞌ chiꞌ.
Ix cꞌoch cajan vin̈ dꞌa chon̈abꞌ Cesarea.
A schamel vin̈aj Herodes
20 A junel,
ix te cot yoval vin̈aj rey Herodes chiꞌ dꞌa ebꞌ anima aj Tiro yedꞌ Sidón.
Yuj chiꞌ ix slajtiej sbꞌa ebꞌ tas syutej ebꞌ bꞌat yalan sbꞌa dꞌa vin̈.
Ix yacꞌan scꞌol jun vin̈ scuchan Blasto ebꞌ.
Aton vin̈ sat yaj yacꞌan servil vin̈ rey chiꞌ.
Yuj chiꞌ,
axo vin̈ ix cꞌanan nivancꞌolal ebꞌ dꞌa vin̈ rey chiꞌ.
Icha chiꞌ ix yutej sbꞌa ebꞌ,
yujto a dꞌa schon̈abꞌ vin̈ rey chiꞌ,
ataꞌ tzꞌacꞌjicot jantacn̈ej tas sva ebꞌ.
21 Axo vin̈ rey chiꞌ ix alani tas cꞌual scꞌoch ebꞌ dꞌa yichan̈ vin̈.
Axo dꞌa jun cꞌu chiꞌ,
ix yacꞌoch juntzan̈ spichul vin̈ te vachꞌ,
icha yic ebꞌ rey smasanil.
Ix lajvi chiꞌ,
ix em cꞌojan vin̈ dꞌa scꞌojnubꞌ.
Ix och ijan vin̈ slolonelta dꞌa ebꞌ anima chiꞌ.
22 Ix lajvi yabꞌan ebꞌ,
ix laj yalanqꞌue ebꞌ:
—A jun slolon tic,
man̈ animaoc,
aton dios,
xchi ebꞌ.
23 Yujto maj yicꞌchaan̈ sbꞌi Dios vin̈,
yuj chiꞌ dꞌa jun rato chiꞌ ix acꞌjioch syaelal vin̈ yuj jun yángel Dios,
ix och nocꞌ aꞌay dꞌa yol scꞌool vin̈,
ix cham vin̈.
24 Palta axo slolonel Dios Cajal ix pucaxn̈ejel dꞌa scal ebꞌ anima.
Ix laj alchajel dꞌa junjun lugar.
25 Axo vin̈aj Bernabé yedꞌ vin̈aj Saulo,
ayic ix lajvi schecnabꞌil ebꞌ vin̈ dꞌa Jerusalén,
ix bꞌatxi ebꞌ vin̈.
Ix yicꞌanbꞌat vin̈aj Juan ebꞌ vin̈,
aton vin̈ scuch pax Marcos.
Ix cꞌochxi ebꞌ vin̈ dꞌa Antioquía chiꞌ.