—Oc val max ach bꞌat dꞌa Jerusalén,

xchi ebꞌ.

Icha chiꞌ ix aj yalan ebꞌ,

yujto a Yespíritu Dios ix acꞌan yojtaquejel ebꞌ tas ol ja dꞌa yibꞌan̈ vin̈ taꞌ.

5 Axo yic ix ecꞌbꞌat uqueꞌ cꞌual chiꞌ,

ix on̈ bꞌatxi.

Axo ebꞌ vin̈ cucꞌtac chiꞌ smasanil yedꞌ ebꞌ ix yetbꞌeyum ebꞌ vin̈ yedꞌ pax ebꞌ yuninal ebꞌ vin̈,

ix xidꞌecꞌ ebꞌ on̈ yacꞌcanel dꞌa stiel chon̈abꞌ chiꞌ.

Axo taꞌ ix on̈ em cuman dꞌa stiꞌ aꞌ mar,

ix on̈ lesalvi.

6 Ix lajvi chiꞌ,

ix calancan quil co bꞌa dꞌa ebꞌ.

Ix on̈ ochxican dꞌa yol barco chiꞌ.

Ix laj paxixcan ebꞌ dꞌa spat.

7 Ayic ix on̈ elxi dꞌa chon̈abꞌ Tiro chiꞌ,

ix on̈ cꞌoch dꞌa chon̈abꞌ Tolemaida.

Ataꞌ ix cactejcan teꞌ barco chiꞌ.

Ix on̈ lolon yedꞌ ebꞌ creyente taꞌ.

Jun cꞌual ix on̈ ecꞌ yedꞌ ebꞌ.

8 Axo dꞌa junxo cꞌu ix on̈ bꞌatxi,

ix on̈ cꞌoch dꞌa chon̈abꞌ Cesarea.

A dꞌa spat vin̈aj Felipe,

vin̈ tzꞌalanel vachꞌ abꞌix yic colnabꞌil,

ataꞌ ix on̈ vanaji.

A jun vin̈ chiꞌ,

aton vin̈ sicꞌbꞌiloch diáconoal dꞌa Jerusalén yedꞌ vacvan̈xo ebꞌ vin̈.

9 Ay chan̈van̈ yisil vin̈aj Felipe chiꞌ,

mantalaj yetbꞌeyum ebꞌ ix.

Syalel slolonel Dios ebꞌ ix.

10 Ayic ix on̈ ecꞌ jayeꞌ cꞌual taꞌ,

ix cꞌoch jun vin̈ tzꞌalanel slolonel Dios scuchan Agabo dꞌayon̈,

a dꞌa yol yic Judea cot vin̈.

11 Ix xidꞌecꞌ vin̈ on̈ scꞌumej.

Ayic van co lolon yedꞌ vin̈,

ix yicꞌanel stzecꞌul vin̈aj Pablo chiꞌ vin̈.

Ix tzecꞌan cꞌotan sbꞌa vin̈ yedꞌoc.

Ix lajvi chiꞌ ix yalan vin̈:

—A Yespíritu Dios tzꞌalani to icha ix vutej in tzecꞌan in bꞌa tic,

icha chiꞌ ol aj stzecꞌchaj vin̈ ay yic jun tzecꞌul tic yuj ebꞌ israel dꞌa Jerusalén.

Ol lajvoc chiꞌ,

ol yacꞌanoch vin̈ ebꞌ dꞌa yol scꞌabꞌ ebꞌ man̈ israeloc,

xchi vin̈.

12 A on̈xo tic yedꞌ ebꞌ aj Cesarea chiꞌ,

ayic ix cabꞌan tas ix yal vin̈ chiꞌ,

ix on̈ tevioch dꞌa vin̈aj Pablo chiꞌ,

yujto co gana max bꞌatlaj vin̈ dꞌa Jerusalén chiꞌ.

13 Palta ix yal vin̈ dꞌayon̈:

—¿Tas yuj tzex oqꞌui?

¿Tas yuj tzeyacꞌoch in cuscꞌolal?

Malaj yelcꞌochi tato tzin stzecꞌ ebꞌ.

Vachꞌchom tzin smilcham ebꞌ dꞌa Jerusalén chiꞌ yujn̈ej valanel yabꞌixal Cajal Jesús,

ol in bꞌecn̈ej in bꞌa dꞌa yol scꞌabꞌ ebꞌ,

xchi vin̈.

14 Juneln̈ej maj cacꞌlaj ganar vin̈ co cachanoch vaan.

Yuj chiꞌ ix cactej co tevi dꞌa vin̈.

Ton̈ej ix cal icha tic:

—A tas sgana Cajal Jesús,

ujocabꞌi,

xco chi.

15 Ix lajvi chiꞌ ix cacꞌan lista co bꞌa,

ix on̈ bꞌat dꞌa Jerusalén chiꞌ.

16 Ay pax jayvan̈ ebꞌ creyente aj Cesarea chiꞌ ix bꞌat quedꞌoc,

ix on̈ yicꞌanbꞌat ebꞌ dꞌa spat jun vin̈ bꞌabꞌel creyente aj Chipre scuch Mnasón,

yujto a dꞌa spat vin̈ chiꞌ ix on̈ cani.

17 Ayic ix on̈ cꞌoch dꞌa Jerusalén chiꞌ,

tzalajcꞌolal ix on̈ scha ebꞌ creyente taꞌ.

18 Axo dꞌa junxo cꞌu ix on̈ bꞌat yedꞌ vin̈aj Pablo chiꞌ dꞌa spat vin̈aj Jacobo.

Ayecꞌ pax ebꞌ vin̈ anciano taꞌ smasanil.

19 Yuj chiꞌ ix scꞌanbꞌej scꞌol ebꞌ vin̈ vin̈aj Pablo chiꞌ.

Ix laj yal vin̈ dꞌa ebꞌ yuj jantac tas ix scꞌulej Dios yedꞌoc dꞌa scal ebꞌ man̈ israeloc.

20 Axo ix yabꞌan juntzan̈ chiꞌ ebꞌ vin̈,

ix yal vachꞌ lolonel ebꞌ vin̈ dꞌa Dios.

Ix lajvi chiꞌ,

ix yalan ebꞌ vin̈ dꞌa vin̈aj Pablo chiꞌ:

—Te vachꞌ vucꞌtac,

palta ojtac,

tzijtum ebꞌ quetisraelal ix acꞌanoch Cristo dꞌa scꞌool.

Axo slaj yalan ebꞌ smasanil to yovalil sco cꞌanabꞌajej ley Moisés.

21 Ix yabꞌ specal ebꞌ to tzach ecꞌ a cꞌaybꞌej ebꞌ israel ay dꞌa scal masanil ebꞌ man̈ israeloc.

Tobꞌ ix al dꞌa ebꞌ israel chiꞌ to maxtzac scꞌanabꞌajej ley Moisés ebꞌ.

Tobꞌ ix al dꞌa ebꞌ to maxtzac yacꞌ circuncidar ebꞌ yuninal ebꞌ,

maxtzac scꞌanabꞌajej co bꞌeybꞌal ebꞌ a on̈ israel on̈ tic.

22 ¿Tas ol cutoc?

A ticnaic ol yabꞌ ebꞌ to ix ach javi.

23 Yuj chiꞌ,

vachꞌ icha tic tzutej a bꞌa.

Ay chan̈van̈ ebꞌ vin̈ dꞌa co cal tic,

yacꞌnacxo stiꞌ ebꞌ vin̈ dꞌa Dios.

Vanxo scꞌoch stiempoal bꞌaj yacꞌnaccan stiꞌ ebꞌ vin̈ chiꞌ.

24 Icꞌbꞌat ebꞌ vin̈ edꞌoc.

Tza bꞌoancan a bꞌa yedꞌ ebꞌ vin̈ icha syal ley Moisés.

Tzacꞌ stumin ebꞌ vin̈ yic smanan juntzan̈ nocꞌ nocꞌ ebꞌ vin̈ silabꞌoc.

Ol lajvoc chiꞌ,

ol yacꞌan joxchajel sbꞌa ebꞌ vin̈ schan̈van̈il.

Tato icha chiꞌ ol utoc a bꞌa,

ol yil ebꞌ anima smasanil to a jun a pecal ix yabꞌ ebꞌ chiꞌ,

to es.

Axo ol yilan ebꞌ to tza cꞌanabꞌajej pax tas syal ley Moisés.

25 Axo ebꞌ man̈ israeloc ix acꞌanoch Cristo dꞌa scꞌool,

tzꞌibꞌabꞌilxobꞌat co carta dꞌa ebꞌ to man̈ yovaliloc scꞌanabꞌajej juntzan̈ tic ebꞌ.

An̈ej juntzan̈ checnabꞌil tic ix calbꞌat dꞌa ebꞌ:

To max schi nocꞌ chibꞌej ebꞌ tzꞌacꞌji silabꞌil dꞌa juntzan̈ comon dios.

Max schi schiqꞌuil junoc nocꞌ nocꞌ ebꞌ.

Max schi nocꞌ nocꞌ ebꞌ sudꞌjichamoc.

Max em ebꞌ dꞌa ajmulal.

Icha chiꞌ ix cutej calanbꞌat dꞌa ebꞌ,

xchi ebꞌ anciano chiꞌ dꞌa vin̈aj Pablo chiꞌ.

26 Axo vin̈aj Pablo chiꞌ ix icꞌanbꞌat ebꞌ vin̈ chiꞌ schan̈van̈il.

Axo dꞌa junxo cꞌu ix sbꞌo sbꞌa vin̈ yedꞌ ebꞌ vin̈ icha syal ley Moisés.

Ix lajvi chiꞌ ix och vin̈ dꞌa yol yamaqꞌuil stemplo Dios yic syalan vin̈ dꞌa vin̈ sacerdote tas cꞌual ol lajvoccꞌoch stiempoal sbꞌoan sbꞌa ebꞌ vin̈,

yic syacꞌan silabꞌ ebꞌ vin̈ dꞌa Dios.

27 Axo yic vanxo slajvi uqueꞌ cꞌual chiꞌ,

ay jayvan̈ ebꞌ israel aj Asia,

ayic ix yilan ebꞌ to ayecꞌ vin̈aj Pablo dꞌa yol yamaqꞌuil stemplo Dios,

ix yacꞌanqꞌue somnaj ebꞌ anima ebꞌ smasanil scot yoval.

Ix syaman vin̈aj Pablo chiꞌ ebꞌ.

28 Te chaan̈ ix yal ebꞌ:

—Ex quetisraelal,

ochan̈ec quedꞌoc.

Aton vin̈ tic tzecꞌ cꞌaybꞌan ebꞌ anima dꞌa junjun lugar dꞌa chucal.

Syalan chucal vin̈ dꞌa co patic a on̈ israel on̈ tic.

Syalanpax vin̈ dꞌa spatic ley Moisés yedꞌ dꞌa spatic stemplo Dios tic.

Axo ticnaic ix scomon iqꞌuejochta jayvan̈ ebꞌ griego vin̈ dꞌa yol yamaqꞌuil stemplo Dios tic.

A jun templo tic,

yicn̈ej Dios yaji,

palta ix te juvi yuj vin̈ dꞌa yichan̈ Dios,

xchi ebꞌ.

29 Icha chiꞌ ix aj yalan ebꞌ,

yujto ix yil ebꞌ to junn̈ej ix ecꞌ vin̈aj Trófimo yedꞌ vin̈aj Pablo chiꞌ dꞌa yol chon̈abꞌ chiꞌ.

A vin̈ chiꞌ,

griego vin̈,

aj Éfeso vin̈.

A snaan ebꞌ to a vin̈aj Pablo chiꞌ ix icꞌanoch vin̈ dꞌa yol yamaqꞌuil stemplo Dios yedꞌoc.

30 Axo ebꞌ chon̈abꞌ smasanil,

ix te cot yoval ebꞌ.

Ix smolbꞌan sbꞌa ebꞌ.

Ix bꞌat sjachanelta vin̈aj Pablo chiꞌ ebꞌ dꞌa yol yamaqꞌuil stemplo Dios chiꞌ.

Ix smacan puerta ebꞌ dꞌa vin̈.

31 Toxo val smilcham vin̈ ebꞌ,

palta ayic ix yabꞌan vin̈ coronel to ix qꞌue somnaj ebꞌ aj chon̈abꞌ chiꞌ scot yoval,

32 ix yicꞌbꞌat ebꞌ soldado vin̈ yedꞌ juntzan̈xo ebꞌ yetyajalil.

Te yelcꞌolal ix bꞌat ebꞌ bꞌaj van smolbꞌan sbꞌa ebꞌ anima chiꞌ.

Axo ix yilanbꞌat ebꞌ anima chiꞌ to van scꞌoch vin̈ coronel chiꞌ yedꞌ ebꞌ soldado smasanil,

ix yactan ebꞌ smacꞌan vin̈aj Pablo chiꞌ.

33 Axo ix cꞌoch vin̈,

ix syaman vin̈aj Pablo chiꞌ vin̈.

Ix schecan vin̈ acꞌjoc och chabꞌ cadena dꞌa vin̈.

Ix lajvi chiꞌ,

ix scꞌanbꞌan vin̈ dꞌa ebꞌ anima chiꞌ icha tic:

—¿Mach jun vin̈ tic?

¿Tas smul vin̈?

xchi vin̈.

34 Palta axo ebꞌ anima chiꞌ,

ton̈ej ix qꞌue somnaj ebꞌ yalani.

Chꞌocchꞌoc ix yal junjun ebꞌ.

Maj yabꞌ vin̈ tas ix yal ebꞌ yujto ton̈ej ix qꞌue somnaj ebꞌ yavajqꞌuei.

Yuj chiꞌ ix schec vin̈ icꞌjocbꞌat vin̈aj Pablo chiꞌ dꞌa cuartel.

35 Axo ix cꞌoch ebꞌ dꞌa sbꞌachquiltaquil stiꞌ cuartel chiꞌ,

ix bꞌachjiqꞌue vin̈aj Pablo chiꞌ yuj ebꞌ soldado chiꞌ,

yujto sgana ebꞌ anima chiꞌ smilcham vin̈.

36 Masanil ebꞌ tzacꞌanoch yuj vin̈ ix laj avaj chaan̈ ebꞌ:

—Chamocabꞌ vin̈ dꞌa elan̈chamel,

xchi ebꞌ.

37 Ayic van yicꞌanoch vin̈aj Pablo chiꞌ ebꞌ dꞌa yol cuartel chiꞌ,

ix yalan vin̈ dꞌa vin̈ coronel chiꞌ:

—¿Ma max yal in lolon jabꞌoc edꞌoc?

xchi vin̈ dꞌa vin̈.

Yuj chiꞌ ix yal vin̈:

—¿Tom syal alan tiꞌ griego?

38 Valoc to aj Egipto ach.

A valani to a ach tic icꞌnacchaan̈ jun oval dꞌa spatic vin̈ yajal dꞌa pecaꞌ.

A jun vin̈ chiꞌ,

yicꞌnacbꞌat chan̈eꞌ mil ebꞌ macꞌumcham anima vin̈ dꞌa tzꞌinan luum,

xchi vin̈.

39 Yuj chiꞌ ix yalxi vin̈aj Pablo chiꞌ dꞌa vin̈:

—Maay.

A in tic,

israel in.

A dꞌa chon̈abꞌ Tarso dꞌa yol yic Cilicia,

jun chon̈abꞌ te nivan yelcꞌochi,

ataꞌ aljinac in.

Tzin cꞌan dꞌayach,

cha in lolon dꞌa scal ebꞌ anima tic,

xchi vin̈.

40 —Lolonan̈,

xchi vin̈.

Ix lajvi chiꞌ ix elta lin̈an vin̈aj Pablo chiꞌ dꞌa sbꞌachquiltaquil stiꞌ cuartel chiꞌ.

Ix yicꞌanchaan̈ scꞌabꞌ vin̈ yic vachꞌ tzꞌem numan ebꞌ anima chiꞌ.

Axo ix em numan ebꞌ,

ix yalan vin̈ dꞌa ebꞌ dꞌa tiꞌ hebreo icha tic: