Ecꞌnac vin̈aj Pablo dꞌa Macedonia yedꞌ dꞌa Grecia
20
Ayic toxo ix lajvi jun oval chiꞌ,
ix smolbꞌan ebꞌ creyente vin̈aj Pablo.
Ix acꞌjican stecꞌanil ebꞌ yuj vin̈.
Ix lajvi chiꞌ,
ix yalancan quil co bꞌa vin̈ dꞌa ebꞌ,
ix bꞌatxi vin̈ dꞌa yol yic Macedonia.
2 Ayic ix cꞌoch vin̈ taꞌ,
ix laj ecꞌ vin̈ yil ebꞌ creyente dꞌa junjun chon̈abꞌ.
Ix ecꞌ yacꞌan stecꞌanil ebꞌ vin̈.
Ix lajvi chiꞌ,
ix bꞌat vin̈ dꞌa yol yic Grecia.
3 Ataꞌ ix ecꞌ oxeꞌ ujal vin̈.
Ix lajvi chiꞌ,
ayic toxo van yoch vin̈ dꞌa yol teꞌ barco yic sbꞌat vin̈ dꞌa Siria,
ix yabꞌan vin̈ to ay tas sna ebꞌ israel dꞌa spatic vin̈.
Yuj chiꞌ,
ix snaan vin̈:
Más vachꞌ tzin meltzajxiecꞌ dꞌa Macedonia,
xchi vin̈.
4 Axo ix bꞌat vin̈,
ay juntzan̈xo ebꞌ creyente ix bꞌat yedꞌ vin̈.
Ix bꞌat vin̈aj Sópater yuninal vin̈aj Pirro aj Berea yedꞌ vin̈,
vin̈aj Aristarco,
vin̈aj Segundo aj Tesalónica,
vin̈aj Gayo aj Derbe yedꞌ pax vin̈aj Timoteo.
Ay pax chavan̈ ebꞌ vin̈ aj Asia ix bꞌat yedꞌ vin̈,
aton vin̈aj Tíquico yedꞌ vin̈aj Trófimo.
5 Ayic ix cꞌoch ebꞌ vin̈ dꞌa chon̈abꞌ Filipos bꞌaj ayin eqꞌui,
ix yactejcan vin̈aj Pablo chiꞌ ebꞌ vin̈ vedꞌ taꞌ.
Ix bꞌabꞌlaj bꞌat ebꞌ vin̈ dꞌa chon̈abꞌ Troas.
Axo taꞌ ix on̈ stan̈vej ebꞌ vin̈.
6 A on̈xo tic,
a dꞌa chon̈abꞌ Filipos chiꞌ ix co tan̈vej quil jun qꞌuin̈ bꞌaj svaji ixim pan malaj yich.
Ix lajvi yecꞌ jun qꞌuin̈ chiꞌ,
ix on̈ bꞌat dꞌa yol barco.
Oyeꞌ cꞌual ix on̈ bꞌey dꞌa sat a aꞌ.
Ichato chiꞌ ix on̈ cꞌoch dꞌa chon̈abꞌ Troas chiꞌ.
Axo taꞌ ix quil-laj co bꞌa yedꞌ ebꞌ vin̈ ix bꞌabꞌlaj cuuj chiꞌ.
Uqueꞌ cꞌual ix on̈ ecꞌ taꞌ.
Ayecꞌ vin̈aj Pablo dꞌa Troas
7 Axo dꞌa domingo ix co molbꞌej co bꞌa yedꞌ ebꞌ creyente smasanil yic sco vaan ixim pan yic Santa Cena.
Axo vin̈aj Pablo ix cꞌaybꞌan ebꞌ quetcreyenteal.
Yujto qꞌuicꞌanocxon̈ej sbꞌat vin̈,
yuj chiꞌ tzijtum tas ix yalcan vin̈ dꞌa ebꞌ,
masanto ix och chimilacꞌval.
8 A dꞌa jun cuarto chaan̈ yajqꞌuei,
ataꞌ molan on̈ eqꞌui.
Tzijtum candil ayoch scꞌacꞌal.
9 Ay jun vin̈ quelem scuchan Eutico cꞌojanem dꞌa stiꞌ ventena.
Toxon̈ej snecnecan vin̈ svayi,
yujto junip ix yacꞌ vin̈aj Pablo chiꞌ sloloni.
Yuj chiꞌ ix te cot svayan̈ vin̈,
ix elta pichnaj vin̈ dꞌa stiꞌ jun ventena chiꞌ.
Ato dꞌa yoxil piso ix elta sutnaj vin̈.
Axo ix emul ebꞌ creyente chiꞌ,
ix schelan chaan̈ vin̈ ebꞌ,
palta chamnacxo vin̈.
10 Axo ix emul vin̈aj Pablo chiꞌ,
ix em lachan vin̈ dꞌa yibꞌan̈ vin̈.
Ix yalan vin̈ dꞌa ebꞌ creyente chiꞌ:
—Man̈ ex och ilcꞌolal.
Ix pitzvixi vin̈,
xchi vin̈.
11 Ix lajvi chiꞌ,
ix qꞌuex vin̈aj Pablo chiꞌ dꞌa yol cuarto chiꞌ junelxo.
Ix spucanbꞌat ixim pan yic Santa Cena vin̈ dꞌa co cal.
Ix co vaani.
Tzijtumto tas ix yal vin̈aj Pablo chiꞌ,
masanto ayic van sacbꞌi.
Ix lajvi chiꞌ,
ix bꞌat vin̈.
12 Axo vin̈ quelem ix pitzvixi chiꞌ,
ix yicꞌanbꞌat vin̈ ebꞌ dꞌa spat.
Ix te tzalaj ebꞌ,
yujto ix pitzvixi vin̈.
Ix on̈ bꞌat dꞌa Mileto
13 A on̈ tic,
ix on̈ bꞌabꞌlaj och dꞌa yol jun barco,
ix on̈ bꞌat dꞌa chon̈abꞌ Asón.
Ataꞌ ix co tan̈vej scꞌoch vin̈aj Pablo chiꞌ icha ix cutej calan yedꞌ vin̈,
yujto dꞌa yoc vin̈ ix bꞌati.
14 Axo ix cꞌoch vin̈ dꞌayon̈,
ix och vin̈ dꞌa yol barco quedꞌoc.
Ix lajvi chi,
ix on̈ bꞌat yedꞌ vin̈ dꞌa chon̈abꞌ Mitilene.
15 Ix on̈ elxi taꞌ,
axo dꞌa yichan̈cot chon̈abꞌ Quío ix on̈ vanaj jun cꞌual.
Axo dꞌa junxo cꞌu,
ix on̈ cꞌoch dꞌa jun chon̈abꞌ scuch Samos ay dꞌa stiꞌ aꞌ mar chiꞌ.
A dꞌa junxo cꞌu ix on̈ bꞌatxi,
axo dꞌa chon̈abꞌ Mileto ix on̈ cꞌochi.
16 Icha chiꞌ ix aj co bꞌati,
yujto maj yal scꞌol vin̈aj Pablo chiꞌ ix on̈ ecꞌ dꞌa chon̈abꞌ Éfeso,
yujto sgana vin̈ elan̈chamel tzon̈ ecꞌ dꞌa Asia chiꞌ,
yic talaj cꞌocbꞌilto tzon̈ cꞌoch quil jun qꞌuin̈ Pentecostés dꞌa Jerusalén.
Yalnac vin̈aj Pablo dꞌa ebꞌ anciano aj Éfeso
17 Ayic ix on̈ cꞌoch dꞌa chon̈abꞌ Mileto,
ix yacꞌanbꞌat schecabꞌ vin̈aj Pablo chiꞌ dꞌa ebꞌ vin̈ anciano aj Éfeso,
yic bꞌat icꞌjoccot ebꞌ vin̈.
18 Axo ix ja ebꞌ vin̈,
ix yalan vin̈ dꞌa ebꞌ vin̈:
—A ex tic,
eyojtactaxon in bꞌeybꞌal yictax ix in ulecꞌ sbꞌabꞌelal dꞌa Asia tic.
19 Masanil tiempo ix vacꞌ servil Cajal Jesús dꞌa emnaquilal.
Ay bꞌaj te ocꞌnac in yuj spital ebꞌ anima.
Tzijtum el ix in acꞌji proval yuj juntzan̈ chucal ix yacꞌoch ebꞌ vetisraelal dꞌa vibꞌan̈.
20 Palta eyojtac,
maj in och vaan valan masanil juntzan̈ cꞌaybꞌubꞌal vachꞌ dꞌayex,
yic tze tecꞌbꞌej e bꞌa.
Ix valel slolonel Dios dꞌayex dꞌa yichan̈ ebꞌ chon̈abꞌ yedꞌ pax dꞌa yol e pat.
21 Ix valanpaxel dꞌa ebꞌ israel yedꞌ dꞌa ebꞌ man̈ israeloc,
to yovalil sna sbꞌa ebꞌ dꞌa yichan̈ Dios,
syacꞌanoch Cajal Jesucristo ebꞌ dꞌa scꞌool.
22 Axo ticnaic,
van in bꞌat dꞌa Jerusalén,
yujto a Yespíritu Dios tzin icꞌanbꞌati.
Man̈ vojtacoc tas ol javoc dꞌa vibꞌan̈ taꞌ.
23 Palta vojtac to tzijtum yaelal ol acꞌjococh dꞌa vibꞌan̈.
Ol in och dꞌa preso,
yujto icha chiꞌ syal Yespíritu Dios dꞌayin dꞌa junjun chon̈abꞌ bꞌaj in eqꞌui.
24 Palta a juntzan̈ chiꞌ,
malaj tas tzin na yuuj.
Vachꞌchom ol in smilcham ebꞌ,
palta bꞌalaj malaj yelcꞌoch jun chiꞌ dꞌayin.
An̈ej jun tzin naꞌa to svacꞌcan lajvoc jun in munlajel ayoch tic dꞌa vibꞌan̈ dꞌa tzalajcꞌolal,
yic slajvi vopisio yacꞌnac Cajal Jesús dꞌayin,
yic svalanel vachꞌ abꞌix to nivan svachꞌcꞌolal Dios dꞌa ebꞌ anima.
25 Ecꞌnac in val dꞌayex chajtil tzꞌaj e yoch dꞌa yol scꞌabꞌ Dios.
Axo ticnaic vojtac to man̈xa bꞌaqꞌuin̈ ol quil co bꞌa dꞌa tic.
26 Yuj chiꞌ,
a dꞌa jun cꞌu tic,
man̈xalaj valan vic dꞌayex,
27 yujto ix valcanel masanil juntzan̈ scꞌaybꞌubꞌal Dios dꞌayex,
malaj jabꞌoc ix in cꞌubꞌejeli.
28 Yuj chiꞌ,
tzeyil val e bꞌa.
Tzeyilanpax ebꞌ creyente smasanil,
yujto acꞌbꞌil eyopisio yuj Yespíritu Dios eyilan ebꞌ manbꞌilxo yuj schiqꞌuil Cajal Jesús ayic ix cham cuuj.
29 Yujto vojtac,
ayic toxo ix in pax dꞌa e cal,
ay juntzan̈ ebꞌ ol ja dꞌayex,
ol yacꞌlan ebꞌ ex yixtani,
icha syutej nocꞌ oques yicꞌanelta nocꞌ calnel.
30 Dꞌa e cal paxi,
ay juntzan̈xo ebꞌ ol qꞌue vaan.
Ol yesan ebꞌ,
ol yacꞌan scꞌool ebꞌ creyente ebꞌ yic tzꞌoch ebꞌ yedꞌ ebꞌ.
31 Yuj chiꞌ tzeyil val e bꞌa.
Naeccoti to ayic ix ex in cꞌaybꞌan junjunex dꞌa oxeꞌ abꞌil tic,
dꞌa cꞌual dꞌacꞌval ix ex in cꞌaybꞌej,
ay pax bꞌaj ix in ocꞌ eyuuj.
32 Xal ticnaic,
ex vucꞌtac,
tzex vacꞌcanoch dꞌa yol scꞌabꞌ Dios,
yic aꞌ ol ex tan̈van yedꞌ slolonel.
Yuj slolonel chiꞌ syacꞌ svachꞌcꞌolal dꞌayon̈,
yuj pax to ay spoder yacꞌan co tecꞌanil.
Yuj chiꞌ ol yacꞌ jun tas altabꞌil yuj dꞌayex,
yujto ay eyalan eyic yedꞌ juntzan̈ ebꞌ sicꞌbꞌilxoel yuuj.
33 A in tic,
malaj bꞌaj ix viloch in cꞌool dꞌa stumin,
ma dꞌa spichul junoc mach.
34 Ina eyojtac,
munil ix in munlaj val yedꞌ in cꞌabꞌ yuj tas ay ix och vuuj yedꞌ yuj tas ay ix och yuj ebꞌ ajun vedꞌoc.
35 Masanil tiempo ix in chꞌox dꞌayex to yovalil icha chiꞌ scutej co bꞌoan co munlajel,
yic syal co colvaj dꞌa ebꞌ ay tas ay tzꞌoch yuuj.
Yovalil sco nacot slolonel Cajal Jesús,
ayic ix yalancan icha tic:
A ebꞌ tzꞌacꞌan junoc tas,
ecꞌalxo val vachꞌ yic ebꞌ dꞌa yichan̈ ebꞌ schaani,
xchi Cajal Jesús chiꞌ,
xchi vin̈ dꞌa ebꞌ vin̈ anciano chiꞌ.
36 Ix lajvi yalan juntzan̈ chiꞌ vin̈aj Pablo chiꞌ,
ix em cuman vin̈.
Ix lesalvi vin̈ yedꞌ ebꞌ smasanil.
37 Ix lajvi slesalvi ebꞌ,
ix och ijan ebꞌ yocꞌ smasanil.
Junjunal ix och lacꞌnaj ebꞌ dꞌa vin̈aj Pablo chiꞌ,
ix stzꞌubꞌancanelta stiꞌ vin̈ ebꞌ.
38 Ix te cus ebꞌ yujto ix yal vin̈ dꞌa ebꞌ to man̈xa bꞌaqꞌuin̈ ol yil-lajxi sbꞌa ebꞌ.
Ix lajvi chiꞌ ix bꞌat yacꞌancan vin̈ ebꞌ dꞌa yol barco chiꞌ.