A Scarta San Pablo
DꞌA EBꞌ AJ ROMA
Tzꞌel yich scarta vin̈aj Pablo
1
A in Pablo in schecabꞌ in Jesucristo tzin tzꞌibꞌej jun carta tic.
Yavtejnac in och Jesucristo chiꞌ schecabꞌoc.
Sicꞌbꞌil in el yuuj,
yic svalel vachꞌ abꞌix yic colnabꞌil syacꞌ Dios.
2 A Dios altannaccan jun vachꞌ abꞌix tic dꞌa pecaꞌ.
A ebꞌ schecabꞌ Dios dꞌa pecaꞌ chiꞌ tzꞌibꞌannaccan jun tic dꞌa Slolonel Dios to yicn̈ej yaji.
3 A jun vachꞌ abꞌix tic aton yabꞌixal Cajal Jesucristo Yuninal Dios.
A Jesucristo ayic ix alji,
a dꞌa yin̈tilal vin̈aj rey David ix cot snivanil,
yuj chiꞌ scheclaji to anima toni.
4 Axo Yespíritu Dios ix chꞌoxani to Yuninal Dios yaji,
to ay spoder,
yujto ix pitzvixi dꞌa scal ebꞌ chamnac.
5 Yuj Jesucristo chiꞌ ix schꞌox svachꞌcꞌolal Dios dꞌayin,
ix in yacꞌanoch schecabꞌoc,
yic vachꞌ dꞌa masanil nación ay mach syacꞌoch scꞌool dꞌay,
scꞌanabꞌajan tas syalaꞌ.
Icha chiꞌ tzꞌaj scheclajel snivanil yelcꞌochi.
6 Icha chiꞌ ex pax yedꞌ ebꞌ,
avtabꞌil ex yuj Dios quedꞌoc,
yic tzex och yicoc Jesucristo.
7 Tzin tzꞌibꞌejbꞌat jun in carta tic dꞌayex e masanil ex aj Roma,
ex xajanabꞌilxo yuj Dios.
A avtannac ex,
yic vachꞌ yicn̈ej tzex aji.
In gana to a co Mam Dios yedꞌ Cajal Jesucristo syacꞌ svachꞌcꞌolal dꞌayex taꞌ,
syacꞌanpax sjuncꞌolal.
Snibꞌej vin̈aj Pablo sbꞌat yil ebꞌ aj Roma
8 A jun tic in gana tzin bꞌabꞌlaj alejbꞌat dꞌayex.
Yuj Jesucristo svacꞌ yuj diosal dꞌa co Mam Dios eyuuj.
Yujto ix pucaxbꞌat eyabꞌixal dꞌa junjun nación,
ix eyacꞌ val och Cristo dꞌa e cꞌool.
9 A in tic,
svacꞌ servil Dios dꞌa smasanil in cꞌool,
svalanpaxel yabꞌixal Yuninal.
Syil Dios to ayic tzin lesalvi juntac el,
tzin lesalvi eyuuj.
10 Van in cꞌanan dꞌa Dios,
ta tzꞌel dꞌa scꞌol syal in bꞌat ex vilaꞌ,
yujto pecatax in gana tzin bꞌat taꞌ.
11 Tzin nibꞌej tzin bꞌat ex vilaꞌ,
yic tzin colvaj jabꞌoc dꞌayex dꞌa yic Dios,
yic tze vachꞌ tecꞌbꞌej e bꞌa.
12 In gana ayic ol in cꞌoch taꞌ,
ol quiptzitej co bꞌa junjun on̈,
yujto jun lajann̈ej scutej cacꞌanoch Cristo dꞌa co cꞌool.
13 Yuj chiꞌ ex vucꞌtac ex vanabꞌ,
in gana tzeyojtaquejeli to tzijtum elxo in gana tzin bꞌat ex vilaꞌ,
palta maxto yal-laj in bꞌati.
In gana tzin cꞌoch dꞌa e cal,
yic vachꞌ tzin munlaji,
icha ix in munlaj dꞌa scal juntzan̈xo nación.
14 Yujto vibꞌan̈ yaj valan dꞌa masanil anima,
vachꞌchom griego,
mato maay,
vachꞌchom ebꞌ jelan yedꞌ ebꞌ man̈ jelanoc.
15 Yuj chiꞌ,
lista vaj in bꞌat valel vachꞌ abꞌix yic colnabꞌil dꞌa e cal a ex aj Roma ex chiꞌ.
A spoder vachꞌ abꞌix yic colnabꞌil
16 A in tic,
max in qꞌuixvilaj valanel jun vachꞌ abꞌix yic co colnabꞌil tic,
yujto spoder Dios yaji,
yic vachꞌ scolchajel jantacn̈ej ebꞌ syacꞌoch dꞌa scꞌool,
ebꞌ israel dꞌa sbꞌabꞌelal slajvi chiꞌ ebꞌ man̈ israeloc.
17 A jun vachꞌ abꞌix yic co colnabꞌil tic,
a tzꞌacꞌan nachajel cuuj tas tzꞌaj coch vachꞌil dꞌa yichan̈ Dios,
an̈ej to scacꞌoch dꞌa co cꞌool.
Yuj chiꞌ co vachꞌ aqꞌuejecoch dꞌa co cꞌool,
icha syal dꞌa Slolonel Dios Tzꞌibꞌabꞌilcani:
A ebꞌ tzꞌacꞌanoch Dios dꞌa scꞌool,
vachꞌ ebꞌ dꞌa yichan̈.
Yuj chiꞌ ay sqꞌuinal ebꞌ dꞌa juneln̈ej,
xchi.
A smul ebꞌ anima dꞌa Dios
18 Cojtac to a Dios tzꞌacꞌancot yoval scꞌol dꞌa satchaan̈,
sjavi dꞌa yibꞌan̈ jantacn̈ej ebꞌ malaj yelcꞌoch Dios dꞌay,
aton ebꞌ scꞌulan chucal.
A ebꞌ chiꞌ,
te chuc ebꞌ.
Yuj chiꞌ malaj sgana ebꞌ yalchajel jun cꞌaybꞌubꞌal te yel tic.
19 Scot yoval scꞌol Dios dꞌa yibꞌan̈ ebꞌ yujto a juntzan̈ tas syal cojtacanel dꞌa Dios,
yojtactaxon ebꞌ,
yujto a Dios chiꞌ tzꞌacꞌan yojtaquejel ebꞌ.
20 Vachꞌchom man̈ chequeloc Dios,
palta scheclaj yuj juntzan̈ tastac sbꞌonaccani.
Yujto atax sbꞌoannac yolyibꞌan̈qꞌuinal tic,
scheclajnac eli to Dios toni,
aytaxon spoder.
Yuj chiꞌ malaj mach syal stecꞌbꞌan sbꞌa dꞌa yichan̈.
21 Vachꞌchom yojtac ebꞌ to ay Dios,
palta max yaloch ebꞌ sDiosaloc,
malaj tzꞌoch dꞌa ebꞌ.
Max yacꞌlaj yuj diosal ebꞌ dꞌay.
Palta a juntzan̈ tas malaj yopisio,
aꞌ snaubꞌtan̈ej ebꞌ,
yujto malaj spensar ebꞌ,
yuj chiꞌ te aycan ebꞌ dꞌa qꞌuicꞌalqꞌuinal.
22 Vachꞌchom jelan ebꞌ snaani,
palta te quistal ebꞌ.
23 Ix yactejcan ebꞌ yalan sbꞌa dꞌa Dios,
jun malaj bꞌaqꞌuin̈ sateli,
te ay pax spoder,
axo juntzan̈ yechel anima chamelbꞌa yaji,
aꞌ syacꞌoch ebꞌ sdiosaloc.
Syacꞌpaxoch juntzan̈ yechel nocꞌ much ebꞌ sdiosaloc,
nocꞌ chan yedꞌ nocꞌ chan̈eꞌ yoc.
24 Yuj chiꞌ ix actajcan ebꞌ yuj Dios,
yic svachꞌ bꞌatcan ebꞌ dꞌa juntzan̈ chucal bꞌaj sgana ebꞌ sbꞌati.
Yuj chiꞌ,
scꞌulej juntzan̈ tas ebꞌ qꞌuixvubꞌtac yedꞌ snivanil.
25 A dꞌa juntzan̈ es syacꞌoch scꞌool ebꞌ.
Axo slolonel Dios te yel max schalaj yabꞌ ebꞌ.
A dꞌa juntzan̈ tas sbꞌonac Dios,
ataꞌ syal sbꞌa ebꞌ,
slaj comon em cuman ebꞌ dꞌay.
Axo dꞌa Dios max yaqꞌuem sbꞌa ebꞌ.
Palta masanil tiempo smoj calan vachꞌ lolonel dꞌay.
Amén.
26 Yuj juntzan̈ scꞌulej ebꞌ chiꞌ,
yuj chiꞌ ix actajcan ebꞌ yuj Dios yic vachꞌ scꞌulej juntzan̈ tas sgana ebꞌ,
aton juntzan̈ qꞌuixvubꞌtac.
A ebꞌ ix ix,
man̈oc yedꞌ ebꞌ vin̈ vinac scꞌulej ebꞌ ix icha dꞌa stzolal,
axo ebꞌ ix yetixal ebꞌ ix yedꞌnac syixtan sbꞌa.
Maxtzac scꞌanabꞌajej ebꞌ ix tas acꞌbꞌilcan dꞌay yuj Dios.
27 Icha pax chiꞌ ebꞌ vin̈ vinac,
man̈oc yedꞌ ebꞌ ix ix scꞌulej ebꞌ vin̈ icha dꞌa stzolal.
Axo ebꞌ vin̈ yetvinaquil ebꞌ vin̈ yedꞌnac syixtan sbꞌa.
Ay ebꞌ vin̈ slaj cꞌulan juntzan̈ tas te qꞌuixvubꞌtac yedꞌ ebꞌ yetvinaquil.
Yuj chiꞌ an̈ejaꞌ dꞌa snivanil ebꞌ vin̈ van schaan syaelal juntzan̈ man̈ smojoc scꞌulej chiꞌ.
28 Yujto malaj sgana ebꞌ ay yelcꞌoch Dios dꞌa sat,
yuj chiꞌ tzꞌactajcan ebꞌ yuj Dios chiꞌ,
yic svachꞌ juviel spensar ebꞌ.
Yuj chiꞌ svachꞌ cꞌulejn̈ej juntzan̈ tas ebꞌ man̈ smojoc.
29 Cꞌajan ebꞌ yedꞌ juntzan̈ chucal yedꞌ ajmulal.
An̈ej chucal sgana ebꞌ.
Snibꞌej val och sbꞌa ebꞌ bꞌeyumal.
Te chuc ebꞌ.
Syiloch scꞌool ebꞌ dꞌa tastac ay dꞌa junocxo anima,
macꞌumcham anima ebꞌ.
Acꞌum oval ebꞌ,
ixtum anima ebꞌ.
An̈ej dꞌa chucal ayoch spensar ebꞌ,
an̈ej aloj pecal scꞌanji ebꞌ.
30 Syal chucal ebꞌ dꞌa spatic anima.
Ajcꞌool ebꞌ dꞌa Dios.
Puch vinac ebꞌ.
Nivac vinac syutej sbꞌa ebꞌ.
Acꞌumtac yecꞌ ebꞌ.
Jelan syutej sbꞌa ebꞌ snaanel chucal.
Max scꞌanabꞌajej smam snun ebꞌ.
31 Max snalaj sbꞌa scꞌool ebꞌ.
Max yaqꞌuelcꞌoch stiꞌ ebꞌ syacꞌaꞌ.
Max sxajanej yetanimail ebꞌ.
Malaj snivancꞌolal ebꞌ.
Max ocꞌlaj scꞌool ebꞌ dꞌa junocxo.
32 Yojtac val jun sley Dios ebꞌ tzꞌalani to a ebꞌ scꞌulan juntzan̈ chiꞌ,
smoj sbꞌatcan ebꞌ dꞌa chamel dꞌa juneln̈ej.
Palta an̈ejaꞌ scꞌulan ebꞌ.
Ste tzalaj ebꞌ yedꞌ ebꞌ yetanimail scꞌulan juntzan̈ chiꞌ yedꞌoc.