Ol schꞌolbꞌitej Dios tas caji
2
A junoc on̈ sco chꞌolbꞌitej yaj junoc quetanimail,
max yal-laj calani to malaj co mul.
Yuj chiꞌ ayic sco chꞌolbꞌitan junocxo,
van quicꞌancot yaelal dꞌa quibꞌan̈.
Yujto van co chꞌolbꞌitan tas yaji,
palta lajan van co cꞌulan yedꞌoc.
2 Cojtac to a ebꞌ icha chiꞌ scꞌulej,
a Dios ol chꞌolbꞌitan yaj ebꞌ dꞌa stojolal,
ol yacꞌanbꞌat dꞌa yibꞌan̈ ebꞌ.
3 A exxo tic,
tato tze chꞌolbꞌitej yaj ebꞌ scꞌulan chucal,
¿tom a e naani to ol yal e colanel e bꞌa dꞌa jun yaelal ol yacꞌ Dios?
Yujto an̈ejaꞌ icha chiꞌ tzeyutej pax e bꞌa.
4 A Dios te nivan svachꞌil.
Ay snivancꞌolal.
Man̈ comonoc scot yoval.
Palta tecan ayex malaj tzꞌoch juntzan̈ tic dꞌayex.
¿Tom man̈ eyojtacoc to tzon̈ acꞌji nivancꞌolal yuj Dios yic vachꞌ sco na co bꞌa?
5 Palta a exxo tic,
te pit ex.
Max e na val jabꞌoc e bꞌa.
Yuj chiꞌ,
ton̈ej tze molbꞌej yoval scꞌool Dios dꞌa eyibꞌan̈.
Axo ol ja scꞌual yaelal chiꞌ,
ol cot dꞌa eyibꞌan̈.
Ato dꞌa jun cꞌual chiꞌ ol checlajelta yujto ol schꞌolbꞌitej Dios dꞌa stojolal.
6 Ato taꞌ ol scha spac yic junjun anima,
ato syalaꞌ tas ix scꞌulej junjun.
7 Ay ebꞌ ol acꞌjoc sqꞌuinal dꞌa juneln̈ej yuj Dios,
yujto tecꞌan syutej sbꞌa ebꞌ scꞌulan vachꞌil,
yuj pax to sgana svachꞌil ebꞌ icha svachꞌil Dios chiꞌ.
Sgana ebꞌ ay yelcꞌoch dꞌa yichan̈.
Sgana ebꞌ scha sqꞌuinal dꞌa juneln̈ej.
8 Palta a ebꞌ sgana te nivan yelcꞌochi,
ebꞌ max cꞌanabꞌajan jun cꞌaybꞌubꞌal te yel yedꞌ ebꞌ an̈ej dꞌa chucal ayoch spensar,
ol cotcan yoval scꞌol Dios dꞌa yibꞌan̈ ebꞌ.
9 Jantacn̈ej ebꞌ scꞌulan chucal,
ol yabꞌ val syail ebꞌ sicꞌlabꞌil.
Ol te cus ebꞌ.
Bꞌabꞌel ol yabꞌ syail ebꞌ vetisraelal,
ichato chiꞌ ebꞌ man̈ israeloc.
10 Axo ebꞌ vetisraelal yedꞌ ebꞌ man̈ israeloc,
ol yacꞌ svachꞌil Dios dꞌa ebꞌ.
Nivan ol aj yelcꞌoch ebꞌ dꞌa yichan̈.
Juncꞌolal ol aj ebꞌ yedꞌoc,
tato vachꞌ syutej sbꞌa ebꞌ.
11 A dꞌa sat Dios lajan yelcꞌoch junjun anima.
12 Jantacn̈ej ebꞌ man̈ ojtannacoc ley Moisés,
tato chuc sbꞌeybꞌal ebꞌ,
ol acꞌjoccanbꞌat ebꞌ dꞌa chamel dꞌa juneln̈ej.
Man̈ yovaliloc a jun ley chiꞌ ol acꞌancanbꞌat dꞌa yibꞌan̈ ebꞌ.
Palta jantacn̈ej ebꞌ ojtannac jun ley chiꞌ,
tato an̈ejaꞌ chuc sbꞌeybꞌal ebꞌ,
a ley chiꞌ ol chꞌolbꞌitan tastac yaj ebꞌ.
13 A ebꞌ sbꞌeybꞌalan tas syal Dios,
vachꞌ ebꞌ dꞌa yichan̈.
Axo ebꞌ ton̈ej tzꞌabꞌan jun ley chiꞌ,
man̈ vachꞌoc ebꞌ dꞌa yichan̈.
14 A ebꞌ man̈ israeloc man̈ yojtacoc ley Moisés ebꞌ.
Palta ay bꞌaj munil scomon bꞌeybꞌalej ebꞌ.
Vachꞌchom man̈ yojtacoc jun ley chiꞌ ebꞌ,
munil ayecꞌ dꞌa spensar ebꞌ.
15 Yuj sbꞌeybꞌal ebꞌ scheclaji to a tas syal jun ley chiꞌ ayecꞌ dꞌa spensar ebꞌ.
Nabꞌil yuj ebꞌ dꞌa spensar to vachꞌ jun ley chiꞌ,
yujto a spensar ebꞌ chiꞌ,
ay bꞌaj syalaꞌ to chuc tas scꞌulej ebꞌ,
ay pax bꞌaj syalaꞌ to vachꞌ tas scꞌulej ebꞌ.
16 Ayic ol ja jun cꞌual,
ayic ol chꞌolbꞌitaj ebꞌ anima smasanil yuj Dios yuj tastac cꞌubꞌeltac yaj yuj ebꞌ,
a Jesucristo ol chꞌolbꞌitan tas yaj ebꞌ icha syal vachꞌ abꞌix yic colnabꞌil svalel tic.
A ebꞌ israel yedꞌ ley Moisés
17 Palta ayex tzeyicꞌchaan̈ e bꞌa,
yujto israel ex,
an̈ej val ley Moisés tzeyacꞌoch yipoc e cꞌool.
Tzeyicꞌanpax chaan̈ e bꞌa,
yujto schon̈abꞌ ex Dios.
18 Eyojtacxo tas sgana Dios.
Eyojtacpaxi tas junoc vachꞌ sco cꞌulej,
yujto e cꞌaybꞌejnac ley Moisés chiꞌ.
19 A ebꞌ man̈ ojtannacoc bꞌaj ay Dios,
ichato max yal yilan ebꞌ.
A exxo tze naꞌa to syal e chꞌoxan bꞌaj ay Dios dꞌa ebꞌ.
A ebꞌ qꞌuicꞌalqꞌuinal to yaji,
syal eyacꞌan saquilqꞌuinal dꞌa ebꞌ e naani.
20 Tze naani to syal e cꞌaybꞌan ebꞌ malaj tas yojtac.
Axo ebꞌ manto nachajel yuuj,
syal eyacꞌan nachajel yuj ebꞌ e naani.
Yuj ley Moisés snachajel juntzan̈ cꞌaybꞌubꞌal tic eyuuj,
eyojtacxo bꞌaja cꞌaybꞌubꞌal yel.
21 Te cꞌaybꞌum ex dꞌa juntzan̈xo anima,
palta ¿tas yuj max e cꞌaybꞌej e bꞌa a ex tic?
Tzeyalaꞌ to max yal quelcꞌani,
palta ina elcꞌum ex.
22 Tzeyalanpaxi to max yal quem ajmulal.
Palta ayex tzex em ajmulal.
A juntzan̈ comon dios,
chacbꞌilel eyuuj,
palta ina elcꞌum ex dꞌa templo.
23 Tze yicꞌchaan̈ e bꞌa,
yujto eyojtac ley Moisés,
palta max e cꞌanabꞌajej tas syal jun ley chiꞌ.
Yuj chiꞌ sbꞌuchji Dios eyuuj.
24 A dꞌa Slolonel Dios Tzꞌibꞌabꞌilcani,
ataꞌ syal icha tic:
Yuj tas tze cꞌulej,
ton̈ej sbꞌuchvaj ebꞌ man̈ israeloc dꞌa Dios,
xchi.
25 Tato tze cꞌanabꞌajej masanil tas syal ley Moisés chiꞌ,
yel ay yopisio jun yechel scuch circuncisión ayoch dꞌa e nivanil.
Palta tato max e cꞌanabꞌajej jun ley chiꞌ,
a dꞌa yichan̈ Dios,
ichato man̈ ex acꞌbꞌiloc circuncidar.
26 Axo ebꞌ man̈ ayococh jun yechel chiꞌ dꞌa snivanil,
tato scꞌanabꞌajej ebꞌ tas syal jun ley chiꞌ,
a dꞌa yichan̈ Dios,
ichato acꞌbꞌil circuncidar ebꞌ.
27 Ay ebꞌ man̈ ayococh jun yechel chiꞌ dꞌa snivanil,
palta scꞌanabꞌajej jun ley chiꞌ ebꞌ.
Yuj ebꞌ ol chꞌolbꞌitaj tas eyaji.
Vachꞌchom ayoch jun yechel chiꞌ dꞌayex,
ay pax ecꞌ jun ley chiꞌ dꞌa yol e cꞌabꞌ,
palta max e cꞌanabꞌajej.
28 Ay ebꞌ tzꞌalji israelal yuj ebꞌ anima,
man̈ yeloc israel ebꞌ* dꞌa yichan̈ Dios.
A ebꞌ ayoch circuncisión dꞌa snivanil,
man̈ yeloc acꞌbꞌil circuncidar ebꞌ dꞌa yichan̈ Dios.
29 Palta a val ebꞌ yel ayoch spensar dꞌa Dios,
aton ebꞌ chiꞌ yel israel dꞌa yichan̈.
Yujto a jun circuncisión ayoch dꞌa co pensar,
aton jun chiꞌ yel circuncisión dꞌa yichan̈ Dios.
Man̈ yujoc junoc ley tzꞌibꞌabꞌilcani tzꞌacꞌjioch dꞌayon̈,
palta a Yespíritu Dios tzꞌacꞌan dꞌayon̈.
Yuj chiꞌ man̈oc ebꞌ anima tzon̈ alan vachꞌil.
A Dios tzon̈ alan vachꞌil.