3
Palta a ebꞌ vetisraelal,
¿tom man̈ vachꞌoc yic ebꞌ tze na ticnaic?
Yedꞌ pax jun yechel circuncisión,
¿tom malaj yopisio e naani?
2 Ay toni.
Ol valbꞌat dꞌayex tas yuuj.
Aton val dꞌa ebꞌ chiꞌ bꞌaj yacꞌnac slolonel Dios.
3 Ay ebꞌ man̈ acꞌjinacoc och Slolonel Dios chiꞌ dꞌa scꞌool,
palta ¿tom yuj chiꞌ malaj yelcꞌoch icha yalnaccan Dios chiꞌ?
4 Elnaccꞌoch tas syalaꞌ.
Vachꞌchom syesej junjun anima,
palta a Dios yeln̈ej syalaꞌ,
tzꞌeln̈ejcꞌoch masanil tas syalaꞌ.
Icha tic syalcan dꞌa Slolonel Tzꞌibꞌabꞌilcani:
Mamin,
ayic tza chꞌolbꞌitan ebꞌ anima scheclajeli to yel tojol ach.
Ayic tza chꞌolbꞌitan ebꞌ,
max yal-laj yalji chucal dꞌayach,
xchi.
5 Yuj co chucal,
svachꞌ checlajeli to tojol ton val Dios schꞌolbꞌitani.
Palta ¿tas am tze na a ex tic?
¿Tom man̈ tojoloc Dios,
yuj chiꞌ syacꞌcot co yaelal yuj co chucal chiꞌ?
Ay ebꞌ anima snaan icha chiꞌ.
6 Palta man̈ ichoctaꞌ.
Qꞌuinaloc tato man̈ tojoloc Dios,
max am yal-laj on̈ schꞌolbꞌitan a on̈ cajan on̈ dꞌa yolyibꞌan̈qꞌuinal tic.
7 Ay ebꞌ snaan icha tic:
A svesani,
van in chꞌoxaneli to an̈ej Dios te yel.
Tato ecꞌto yelcꞌoch Dios yuj juntzan̈ tas svesej chiꞌ,
¿tas yuj syacꞌoch dꞌa vibꞌan̈ icha junoc mach tzꞌoch smul?
xchi ebꞌ.
8 Qꞌuinaloc tato icha chiꞌ yaji,
ste ochxopax co mul,
yic vachꞌ scheclajeli to an̈ej Dios vachꞌ.
Ay ebꞌ nivanoc tzꞌalan dꞌa in patic to sval icha chiꞌ.
A ebꞌ tzꞌalan juntzan̈ chiꞌ,
smoj ton tzꞌacꞌjibꞌat ebꞌ dꞌa syaelal.
Malaj mach vachꞌ
9 ¿Tas tze naꞌa?
A on̈ israel on̈ tic,
¿tom ecꞌalto co vachꞌil dꞌa yichan̈ ebꞌ man̈ israeloc?
Maay,
lajan on̈ yedꞌ ebꞌ.
Yujto toxo ix valaꞌ to co masanil ayon̈xo ecꞌ dꞌa yol scꞌabꞌ chucal,
vachꞌchom israel on̈,
mato maay.
10 A dꞌa Slolonel Dios Tzꞌibꞌabꞌilcani,
ataꞌ syal icha tic:
Malaj junoc mach scꞌulan vachꞌil.
Toton malaj val junoc mach.
11 Malaj junoc mach tzꞌacꞌanoch spensar dꞌa Dios.
Malaj pax junoc mach naan yuuj.
12 A juntzan̈ bꞌeybꞌal chuc sbꞌeybꞌalej ebꞌ smasanil.
Junlajanxon̈ej tzꞌaj sjuvibꞌat ebꞌ.
Malaj junoc mach sbꞌoan vachꞌ bꞌeybꞌal.
Toton malaj val junoc mach.
13 Icha bꞌaj toto smucchaj junoc chamnac,
sjacchajxi qꞌueta,
man̈ jantacoc sjabꞌ,
icha chiꞌ schucal juntzan̈ lolonel tzꞌelta dꞌa stiꞌ ebꞌ anima.
Ton̈ej sqꞌuexan̈tiej ebꞌ yetanimail ebꞌ.
Icha svenenoal stiꞌ nocꞌ chan,
icha chiꞌ schucal juntzan̈ tas syal ebꞌ chiꞌ.
14 Ton̈ej scomon bꞌajvaj ebꞌ.
Ovn̈ej slolon ebꞌ.
15 Scomon milejcham junoc yetanimail ebꞌ.
16 Masanil bꞌaj tzꞌecꞌ ebꞌ,
slaj juvi yuj ebꞌ,
syacꞌoch cuscꞌolal ebꞌ.
17 Max sayecꞌlaj juncꞌolal ebꞌ.
18 Maxtzac xiv jabꞌoc ebꞌ dꞌa Dios,
xchi dꞌa Slolonel chiꞌ.
19 Cojtac to a jantacn̈ej tas tzꞌibꞌabꞌilcan dꞌa ley,
a tzꞌalan dꞌa ebꞌ ayoch dꞌa yol scꞌabꞌ,
yic vachꞌ malaj junoc mach syal scolan sbꞌa.
Palta ol chꞌolbꞌitaj ebꞌ anima smasanil yuj Dios.
20 Yujto malaj junoc mach man̈ ol acꞌjoc och dꞌa yibꞌan̈ yujn̈ej to scꞌanabꞌajej tas syal jun ley chiꞌ.
Yujto a jun ley chiꞌ ay yopisio schꞌoxan dꞌayon̈ to ay co mul co masanil.
A ebꞌ tzꞌacꞌanoch Cristo dꞌa scꞌool
21 A ticnaic,
ix checlajelta chajtil tzꞌaj coch vachꞌil dꞌa yichan̈ Dios.
Man̈ yujoc to sco cꞌanabꞌajej ley Moisés chiꞌ,
man̈ yujoc chiꞌ icha chiꞌ tzon̈ aji.
Palta a dꞌa Slolonel Dios tzꞌibꞌyajcani tas tzꞌaj coch vachꞌilal.
Icha chiꞌ ajnac pax yalan ebꞌ schecabꞌ Dios dꞌa pecaꞌ.
22 Yujn̈ej to scacꞌoch Jesucristo dꞌa co cꞌool,
tzon̈ och vachꞌil dꞌa yichan̈ Dios chiꞌ yujto a ebꞌ tzꞌacꞌanoch dꞌa scꞌool,
tzꞌoch ebꞌ vachꞌil dꞌa yichan̈.
Jun lajan tzon̈ aj co masanil dꞌa yichan̈ Dios.
23 Yujto ochnac co mul co masanil dꞌay,
yuj chiꞌ malaj calan quic dꞌa svachꞌilal.
24 Palta yujn̈ej svachꞌcꞌolal Dios tzon̈ och vachꞌil dꞌa yichan̈,
yujto colbꞌil on̈xo yuj Cristo Jesús.
25 Ix acꞌji Cristo silabꞌil yuj Dios yic stupji smul ebꞌ anima.
Yuj schamel Cristo chiꞌ ix tup yoval scꞌool Dios dꞌa quibꞌan̈ yuj co mul,
tato scacꞌoch dꞌa co cꞌool.
Icha chiꞌ yutejnaccan Dios schꞌoxani to te tojol yutejnac sbꞌa dꞌa pecaꞌ,
ayic yacꞌannac nivancꞌolal ebꞌ ochnac smul dꞌay.
26 Icha chiꞌ yutejnac schꞌoxan paxi to an̈ejaꞌ tojol syutej sbꞌa ticnaic,
ayic syalani to vachꞌ on̈ dꞌa yichan̈ tato scacꞌoch Jesús dꞌa co cꞌool.
27 A ticnaic,
¿tom syal quicꞌanchaan̈ co bꞌa?
Max yal-laj.
Yujto man̈ yujoc to sco cꞌanabꞌajej ley Moisés tzon̈ colchaji.
Palta yujn̈ej to scacꞌoch Jesús dꞌa co cꞌool tzon̈ colchaji.
Yuj chiꞌ max yal-laj quicꞌanchaan̈ co bꞌa.
28 Yuj chiꞌ scal icha tic:
Yujto ix cacꞌoch Dios dꞌa co cꞌool,
yuj chiꞌ cojtac to vachꞌ on̈ dꞌa yichan̈,
man̈ yujoc co cꞌanabꞌajan tas syal jun ley chiꞌ.
29 A Dios,
¿tocval an̈ej ebꞌ vetisraelal ay yicoꞌ?
Maay,
sDiosal pax ebꞌ man̈ israeloc.
Co Diosal ton yaj co masanil.
30 Yujto junn̈ej Dios ay,
yuj chiꞌ,
yalxon̈ej mach,
vachꞌchom israel,
mato maay,
an̈ej tato syacꞌoch Jesús dꞌa scꞌool,
tzꞌoch vachꞌil dꞌa yichan̈ Dios.
31 Tato icha chiꞌ yaji,
¿tom yuj chiꞌ syal quicꞌanel yopisio ley Moisés chiꞌ?
Maay,
max yal-laj calan icha chiꞌ.
Palta van co chꞌoxaneli to nivan yelcꞌoch jun ley chiꞌ.