A vin̈aj Abraham chꞌoxnabꞌil yaj dꞌayon̈
4
A vin̈ co mam quicham Abraham,
¿tas ajnac vin̈ dꞌa yichan̈ Dios tze naꞌa?
2 Tato yuj tas vachꞌ scꞌulejnac vin̈ ochnac vin̈ vachꞌil dꞌa yichan̈ Dios,
yalnac am yicꞌanchaan̈ sbꞌa vin̈.
Palta maj yal-laj yicꞌanchaan̈ sbꞌa vin̈ dꞌa yichan̈ Dios chiꞌ.
3 Yujto icha tic syalcan dꞌa Slolonel Dios Tzꞌibꞌabꞌilcani:
A vin̈aj Abraham,
yacꞌnacoch Dios vin̈ dꞌa scꞌool,
yuj chiꞌ yalnac Dios chiꞌ to vachꞌ vin̈ dꞌa yichan̈,
xchi.
4 Qꞌuinaloc tzon̈ munlaj dꞌa junoc anima,
slajvi chiꞌ tzon̈ stupani,
a jun co tojol chiꞌ,
sbꞌocxo yaj dꞌayon̈,
man̈ ton̈ejoc siej.
5 Palta a on̈ tic,
max on̈ munlaji yic sco cha co colnabꞌil,
palta yujn̈ej to scacꞌoch Dios dꞌa co cꞌool,
yuj chiꞌ syalaꞌ to vachꞌ on̈ dꞌa yichan̈,
yujto ichan̈ej chiꞌ tzꞌaj coch vachꞌil dꞌa yichan̈ a on̈ ajmulon̈ tic.
6 A vin̈aj rey David aljinaccani to vachꞌ yic ebꞌ syal Dios to vachꞌ ebꞌ dꞌa yichan̈,
palta man̈ yujoc tas vachꞌ scꞌulej ebꞌ syal icha chiꞌ.
7 Yalannaccan icha tic:
Te vachꞌ yic ebꞌ tzꞌacꞌchaj lajvoc smul,
succhaj sat schucal ebꞌ yuj Dios.
8 Te vachꞌ yic ebꞌ syal Dios Cajal to man̈xa smul dꞌa yichan̈,
xchi.
9 A jun vachꞌilal syal chiꞌ,
man̈ocn̈ej ebꞌ acꞌbꞌil circuncidar ay yicoꞌ.
Yic pax ebꞌ man̈ acꞌbꞌiloc circuncidar.
Toxo ix val dꞌayex to a vin̈aj Abraham,
yacꞌnacoch Dios vin̈ dꞌa scꞌool.
Yujn̈ej chiꞌ,
yalnaccan Dios chiꞌ to vachꞌ vin̈ dꞌa yichan̈.
10 Naeccoti,
bꞌacꞌn̈itax yalnaccan Dios icha chiꞌ.
¿Tom acꞌbꞌilxo circuncidar vin̈ taꞌ?
Maay,
manto.
11 Cꞌojancꞌolalto acꞌbꞌil circuncidar vin̈.
A jun chiꞌ schꞌoxani to yujn̈ej to yacꞌnacoch Dios vin̈ dꞌa scꞌool,
ochnac vin̈ vachꞌil dꞌa yichan̈,
ayic manto acꞌji circuncidar vin̈.
Yuj chiꞌ a vin̈,
icha mamabꞌil yaj dꞌa jantacn̈ej ebꞌ man̈ acꞌbꞌiloc circuncidar,
tato syacꞌoch Dios ebꞌ dꞌa scꞌool,
yujto vachꞌ pax ebꞌ dꞌa yichan̈ Dios chiꞌ yedꞌ vin̈.
12 An̈ejtonaꞌ mamabꞌil pax yaj vin̈ dꞌa ebꞌ acꞌbꞌilxo circuncidar.
A ebꞌ maj acꞌanoch jun circuncisión chiꞌ yipoc scꞌool,
aton ebꞌ tzꞌacꞌanoch Dios dꞌa scꞌool,
icha yacꞌnac vin̈aj Abraham chiꞌ ayic manto acꞌjoc circuncidar vin̈.
Yacꞌnaccan stiꞌ Dios
13 Yacꞌnaccan stiꞌ Dios dꞌa vin̈aj Abraham chiꞌ yedꞌ dꞌa ebꞌ yin̈tilal to ol yiquej jun yolyibꞌan̈qꞌuinal tic ebꞌ.
Yacꞌnaccan stiꞌ Dios chiꞌ dꞌa vin̈,
man̈ yujoc to scꞌanabꞌajejnac sley Dios chiꞌ vin̈,
palta yujn̈ej to ochnac vin̈ vachꞌil dꞌa yichan̈ Dios yujto yacꞌnacoch slolonel Dios chiꞌ vin̈ dꞌa scꞌool.
14 Qꞌuinaloc tato an̈ej ebꞌ scꞌanabꞌajan jun ley chiꞌ ol ican jun yolyibꞌan̈qꞌuinal tic,
nabꞌan̈ej am scacꞌoch Dios dꞌa co cꞌool syal chiꞌ.
Axo stiꞌ Dios yalnaccani,
malaj am yopisio.
15 Yuj jun ley chiꞌ,
tzꞌacꞌjicot yaelal dꞌa quibꞌan̈.
Qꞌuinaloc malaj jun ley chiꞌ,
malaj am mach tzꞌoch smul dꞌay.
16 Yacꞌnaccan stiꞌ Dios dꞌa vin̈aj Abraham chiꞌ,
yujto yacꞌnacoch vin̈ dꞌa scꞌool.
Icha chiꞌ ix aj scheclajeli to yujn̈ej svachꞌcꞌolal Dios yacꞌnaccan stiꞌ dꞌa vin̈.
Vachꞌxo yaj dꞌayon̈ yedꞌ a on̈ yin̈til on̈ vin̈aj Abraham tic.
Man̈ocn̈ej ebꞌ syacꞌoch spensar dꞌa jun ley chiꞌ ay yicoꞌ,
palta quic yaj co masanil a on̈ scacꞌoch Dios dꞌa co cꞌol icha ajnac vin̈aj Abraham chiꞌ.
Yujto yacꞌnacoch vin̈ dꞌa scꞌool,
yuj chiꞌ mamabꞌil yaj vin̈ dꞌayon̈.
17 Icha yajcan yalan dꞌa Slolonel Dios:
Vuuj,
tzijtum chon̈abꞌ ol pitzvoccan in̈tiloc,
xchi Dios dꞌa vin̈aj Abraham chiꞌ.
A Dios tzꞌacꞌan pitzvocxi ebꞌ chamnac.
Ton̈ej syalaꞌ scheclaj juntzan̈ tas manto ayoc eqꞌui.
18 A scꞌulejnac vin̈aj Abraham chiꞌ junel,
malaj junoc tas yacꞌnac vin̈ yipoc scꞌool,
palta yacꞌnacoch tas yalnac Dios vin̈ dꞌa scꞌool.
Yuj chiꞌ,
tzijtum juntzan̈ chon̈abꞌ pitzvinaccan yin̈tiloc vin̈,
icha ajnac yalancan Dios chiꞌ dꞌa vin̈:
Icha tic ol aj sbꞌisul ebꞌ in̈tilal ol pitzvoccaneli,
xchi dꞌa vin̈.
19 A vin̈aj Abraham chiꞌ,
cien abꞌilxo sqꞌuinal vin̈.
Yojtac vin̈ to icham vinacxo vin̈.
Yojtac pax vin̈ to chichim ixxo ix Sara.
Ichato man̈xa bꞌaqꞌuin̈ ol yil sat junoc unin ebꞌ.
Palta an̈ejaꞌ yacꞌnacoch vin̈ dꞌa scꞌool,
tas yalcan Dios chiꞌ dꞌa vin̈.
20 Man̈ schabꞌcꞌolejnacoc vin̈.
Yacꞌnac val och vin̈ dꞌa scꞌool.
Tecꞌtecꞌ yutejnac spensar vin̈.
Yuj chiꞌ yalnac vachꞌ lolonel vin̈ dꞌa Dios.
21 Yojtac vin̈ sicꞌlabꞌil to ay spoder Dios sbꞌoan icha yutejnac yacꞌancan stiꞌ.
22 Yuj chiꞌ,
yalnac Dios to vachꞌ vin̈ dꞌa yichan̈,
yujto yacꞌnac val och vin̈ dꞌa scꞌool.
23 Tzꞌibꞌabꞌilcan dꞌa Slolonel to ochnac vin̈aj Abraham chiꞌ vachꞌil dꞌa yichan̈ Dios,
yujto yacꞌnacoch vin̈ dꞌa scꞌool.
Palta man̈ yujocn̈ej vin̈ tzꞌibꞌabꞌilcani.
24 Tzꞌibꞌabꞌil pax can cuuj a on̈ tic.
Yujto syal pax Dios to vachꞌ on̈ dꞌa yichan̈,
tato scacꞌoch dꞌa co cꞌool,
aton jun ix acꞌanxi pitzvoc Cajal Jesús dꞌa scal ebꞌ chamnac.
25 A Cristo acꞌbꞌiloch dꞌa yol scꞌabꞌ chamel yuj co mul.
Ix lajvi chiꞌ,
ix pitzvixi,
yic tzon̈ och vachꞌil dꞌa yichan̈ Dios.