Juncꞌolalxo caj yedꞌ Dios
5
A ticnaic,
toxo ix yal Dios to vachꞌ on̈ dꞌa yichan̈,
yujto scacꞌoch dꞌa co cꞌool.
Yuj chiꞌ juncꞌolalxo tzon̈ aj yedꞌoc,
yujn̈ej Cajal Jesucristo.
2 Ay calan quic co chaan svachꞌcꞌolal Dios,
yujto scacꞌoch Cristo dꞌa co cꞌool.
Yuj chiꞌ tzon̈ tzalaji,
yujto scacꞌoch yipoc co cꞌool to a Dios ol acꞌan tzꞌacvoc co vachꞌil icha yicoꞌ.
3 Man̈ yujocn̈ej chiꞌ tzon̈ tzalaji,
palta tzon̈ tzalaji ayic scabꞌan syail yuuj.
Yujto cojtac to yuj juntzan̈ yaelal chiꞌ,
ecꞌalxo tecꞌan tzon̈ aji.
4 Yuj co tecꞌanil chiꞌ,
stzalaj Dios quedꞌoc.
Yuj chiꞌ syal cacꞌanoch Dios yipoc co cꞌool.
5 Palta max on̈ qꞌuixvilaj ayic scacꞌanoch Dios chiꞌ yipoc co cꞌool,
yujto yuj Yespíritu ix yacꞌ dꞌayon̈,
scabꞌ dꞌa co pixan to te xajan on̈ yuuj.
6 Maj yal-laj co colan jabꞌoc co bꞌa dꞌa yalan̈taxo.
Te chuc on̈ co masanil.
Axo ix ja stiempoal,
ix cham Cristo cuuj.
7 Qꞌuinaloc ay junoc mach vachꞌ sbꞌeybꞌal ticnaic,
tecan malaj junoc mach syacꞌcham sbꞌa yuuj.
Yicxon̈ej am tato ay junoc mach vachꞌ spensar,
tzam yal stecꞌbꞌan sbꞌa scham yuuj.
8 Palta ix schꞌox Dios to te xajan on̈ yuuj,
yujto ayic te chuc on̈,
ix yacꞌcham sbꞌa Cristo cuuj.
9 Xal ticnaic,
vachꞌon̈xo dꞌa yichan̈,
yujto ix cham cuuj.
Yuj chiꞌ,
yel ton val ol on̈ svachꞌ colejel dꞌa jun nivan yaelal toto ol javoc.
10 A dꞌa yalan̈taxo,
vachꞌchom ajcꞌol on̈ dꞌa Dios,
palta ix on̈ och juncꞌolal yedꞌoc,
yujto ix cham Yuninal cuuj.
Axo ticnaic,
yujto juncꞌolalxo caj yedꞌ Dios,
yuj chiꞌ yel ton val ol on̈ vachꞌ colchajel yuuj,
yujto pitzan Yuninal chiꞌ.
11 Man̈ocn̈ej yuj juntzan̈ tic,
palta an̈ejaꞌ tzon̈ te tzalaj pax yedꞌ Dios yuj Cajal Jesucristo.
Yujto yuuj,
ix och juncꞌolal dꞌa co cal yedꞌ Dios.
A vin̈aj Adán yedꞌ Jesucristo
12 Yujn̈ej jun vin̈ vinac,
aton vin̈aj Adán,
pitzvinac chucal dꞌa yolyibꞌan̈qꞌuinal tic.
Yuj schucal vin̈ chiꞌ pitzvinac chamel.
Yuj chiꞌ ochnaccan chamel dꞌa quibꞌan̈ co masanil,
yujto co masanil ochnac co mul dꞌa Dios.
13 Ayic mantalaj ley Moisés,
ochnacxo smul ebꞌ anima dꞌa Dios,
palta maj canlaj smul ebꞌ chiꞌ dꞌa yibꞌan̈,
yujto mantalaj ley chiꞌ taꞌ.
14 Palta atax dꞌa stiempoal vin̈aj Adán chiꞌ masanto ix acꞌjielta ley Moisés,
ix laj cham ebꞌ anima smasanil,
vachꞌchom man̈ lajanoc smul ebꞌ icha smul vin̈aj Adán chiꞌ,
ayic maj scꞌanabꞌajej jun schecnabꞌil Dios vin̈.
A vin̈aj Adán chiꞌ,
chꞌoxnabꞌil yaj vin̈ dꞌa jun tzacꞌanto ix javi.
15 Palta a smul vin̈ chiꞌ,
max yal-laj co lajbꞌan yedꞌ jun co colnabꞌil syacꞌ Dios.
Tzijtum pax ebꞌ ix cham yuj smul vin̈ chiꞌ.
Palta yelxo val nivan yelcꞌoch jun colnabꞌil syacꞌ Dios chiꞌ dꞌayon̈,
aton jun ton̈ej tzꞌel dꞌa scꞌool yacꞌani.
Yujto yuj val jun mach,
aton Jesucristo,
tzijtum on̈ sco cha svachꞌcꞌolal Dios.
16 A smul vin̈aj Adán chiꞌ,
max yal-laj co lajbꞌan yedꞌ jun co colnabꞌil syacꞌ Dios.
Yujn̈ej jun smul vin̈ chiꞌ,
ix acꞌjicanoch yaelal dꞌa quibꞌan̈ co masanil.
Palta vachꞌchom te ay co mul ix och dꞌa Dios chiꞌ,
ton̈ej ix el dꞌa scꞌool yacꞌan co colnabꞌil,
yuj chiꞌ syalaꞌ to vachꞌ on̈ dꞌa yichan̈ ticnaic.
17 A smul vin̈ chiꞌ icꞌannaccancot chamel dꞌa quibꞌan̈ co masanil.
Palta yujn̈ej junxo mach,
aton Jesucristo,
te nivan svachꞌcꞌolal Dios schꞌoxnac dꞌayon̈,
yujto syalaꞌ to vachꞌ on̈ dꞌa yichan̈.
Yuj val chiꞌ,
ol co cha co qꞌuinal dꞌa juneln̈ej,
axo coch cacꞌan yajalil chiꞌ yedꞌoc.
18 Yuj chiꞌ,
yuj jun smul vin̈aj Adán chiꞌ,
ix acꞌjicanoch yaelal dꞌa quibꞌan̈ co masanil,
palta yujto vachꞌ scꞌulejnac Jesucristo,
yuj chiꞌ syal Dios to vachꞌ on̈ dꞌa yichan̈,
syicꞌanpaxel jun yaelal ochnac can chiꞌ dꞌa quibꞌan̈.
19 Yuj jun vin̈ maj cꞌanabꞌajanoc,
yuj chiꞌ tzijtum on̈ ochnac on̈ ajmulal.
Palta yuj junxo ix cꞌanabꞌajani,
yuj chiꞌ,
masanil on̈ tzon̈ och pax vachꞌilal dꞌa yichan̈ Dios ticnaic.
20 Acꞌbꞌilcot ley Moisés yic svachꞌ checlajel co chucal.
Vachꞌchom nivan ix aj co mul,
palta a svachꞌcꞌolal Dios,
yelxo val nivan yelcꞌoch dꞌa yichan̈.
21 Ay on̈ och co masanil dꞌa yol scꞌabꞌ jun chucal chiꞌ.
Yuj spoder jun chucal chiꞌ,
slaj on̈ chami.
Palta a svachꞌcꞌolal Dios te ay pax spoder.
Yuuj,
vachꞌ on̈ dꞌa yichan̈ ticnaic.
Icha chiꞌ syutej yacꞌan co qꞌuinal dꞌa juneln̈ej yuj Cajal Jesucristo.