Bꞌabꞌel Corintios sbꞌi jun carta tic, aton jun sbꞌabꞌel carta vin̈aj apóstol Pablo stzꞌibꞌejnacbꞌat dꞌa ebꞌ creyente dꞌa chon̈abꞌ Corinto. Syalbꞌat vin̈ dꞌa ebꞌ to syaꞌilej sbꞌa ebꞌ dꞌa chucal yedꞌ dꞌa juntzan̈ cꞌaybꞌubꞌal malaj svachꞌil. A dꞌa jun tiempoal chiꞌ, a chon̈abꞌ Corinto chiꞌ, a nivan chon̈abꞌ yaj dꞌa juntzan̈xo chon̈abꞌ ay dꞌa yol yic Acaya. A dꞌa Corinto chiꞌ, man̈ jantacoc ebꞌ chon̈vajum, yuj chiꞌ man̈ jantacoc comon cꞌaybꞌubꞌal ay taꞌ, man̈ jantacocpax chucal.

Och vin̈aj apóstol Pablo chiꞌ ilcꞌolal, yujto slaj spoj sbꞌa ebꞌ creyente, ay pax ebꞌ tzꞌem dꞌa ajmulal, slaj yicꞌlanbꞌat sbꞌa ebꞌ dꞌa yichan̈ ebꞌ yajal man̈ creyenteoc. A juntzan̈ nocꞌ chibꞌej tzꞌacꞌji dꞌa comon dios, schipax nocꞌ ebꞌ. Syalanpaxbꞌat vin̈ yuj juntzan̈ opisio tzꞌacꞌji dꞌa ebꞌ creyente yuj Yespíritu Dios, yuj tas tzꞌaj yoch culto dꞌa stzolal yedꞌ pax yuj juntzan̈ comon cꞌaybꞌubꞌal tzꞌalji yuj ebꞌ creyente schami. Palta syal vin̈aj apóstol Pablo chiꞌ to a ebꞌ creyente yic Cristo schami, ol pitzvocxi ebꞌ. A dꞌa capítulo 13 syalaꞌ tas tzꞌaj co xajanan co bꞌa, yic scheclaji to ayecꞌ Dios dꞌa co cal.