Schabꞌil Corintios sbꞌi jun carta tic, aton schabꞌil carta vin̈aj apóstol Pablo stzꞌibꞌejnacbꞌat dꞌa ebꞌ aj Corinto, bꞌaj syal vin̈ yuj telajbꞌail sqꞌue vaan dꞌa scal ebꞌ creyente dꞌa jun chon̈abꞌ chiꞌ. Icha val to ay juntzan̈ ebꞌ creyente dꞌa jun iglesia chiꞌ ya ix alan dꞌa vin̈. Palta te xajan ebꞌ yuj vin̈, sgana vin̈ juncꞌolal tzꞌaj yedꞌ ebꞌ, yuj chiꞌ schꞌox stzalajcꞌolal vin̈ yil ebꞌ, yujto vanxo sbꞌo yaj juntzan̈ chiꞌ.

Ayic ix el yich jun libro tic, ix schꞌox vin̈aj Pablo tas yuj ov ix yutej sbꞌa vin̈ dꞌa jun mach ya ix alan dꞌa vin̈ yedꞌ dꞌa juntzan̈xo ebꞌ yacꞌlejnac syamanoch vaan vin̈. Stzalaj val vin̈, yujto ov ix yutej vin̈ yalan dꞌa ebꞌ, yujto yuj chiꞌ ix sna sbꞌa ebꞌ creyente chiꞌ, juncꞌolal ix aj ebꞌ. Ix lajvi chiꞌ, ix scꞌanan jun ofrenda vin̈ dꞌa ebꞌ, yic scolvaj ebꞌ dꞌa ebꞌ creyente mebꞌaꞌ dꞌa Judea. An̈ejtonaꞌ syalpax vin̈ yuj yopisio to yel schecabꞌ Cristo yaj vin̈, yujto ay juntzan̈ ebꞌ aj chon̈abꞌ Corinto chiꞌ syaloch sbꞌa schecabꞌoc Cristo, axo vin̈aj Pablo chiꞌ to man̈ schecabꞌoc Cristo vin̈ yalan ebꞌ.