A Schabꞌil Carta San Pablo
DꞌA EBꞌ AJ CORINTO
Tzꞌel yich scarta vin̈aj Pablo
1
A in Pablo in,
schecabꞌ in Jesucristo,
yujn̈ej to icha chiꞌ ix el dꞌa scꞌool Dios.
A in yedꞌ vin̈ cucꞌtac Timoteo,
sco tzꞌibꞌejbꞌat jun co carta tic dꞌayex yiglesia exxo Dios dꞌa chon̈abꞌ Corinto.
Sco tzꞌibꞌanpaxbꞌat dꞌayex e masanil ex yiquexxo Dios dꞌa yol yic Acaya.
2 Co gana syacꞌ svachꞌcꞌolal co Mam Dios yedꞌ Cajal Jesucristo dꞌayex taꞌ,
syacꞌanpax sjuncꞌolal.
A tas ajnac yabꞌan syaelal vin̈aj Pablo
3 Calec vachꞌ lolonel dꞌa Dios,
aton Smam Cajal Jesucristo,
co Mam ton paxi,
tzꞌocꞌ scꞌool dꞌayon̈,
syacꞌ val snivanil co cꞌool yujto co Diosal yaji.
4 Ayic sja co yaelal,
a Dios tzꞌacꞌan snivanil co cꞌool,
yic vachꞌ syal pax cacꞌan snivanil scꞌool ebꞌ tzꞌabꞌan pax syail.
Icha syutej Dios yacꞌan snivanil co cꞌool,
icha pax chiꞌ scutej cacꞌan snivanil scꞌool ebꞌ.
5 Icha val tzꞌaj cabꞌan syaelal yedꞌ Cristo,
icha pax chiꞌ syutej yacꞌan snivanil co cꞌool.
6 Yuj chiꞌ,
icha chiꞌ tzon̈ aji ayic scabꞌan syail,
yic vachꞌ syal cacꞌan snivanil e cꞌool yic tecꞌan tzeyutej e bꞌa.
An̈ejtonaꞌ,
ayic syacꞌan snivanil co cꞌool Dios,
icha chiꞌ tzon̈ aji,
yic vachꞌ syal cacꞌan snivanil e cꞌool,
yuj chiꞌ syal e tecꞌbꞌan e bꞌa eyacꞌan techaj juntzan̈ yaelal ol acꞌjoc och dꞌa eyibꞌan̈ icha tzꞌacꞌjioch dꞌa quibꞌan̈ a on̈ tic.
7 Tecꞌan scutej co bꞌa cacꞌanoch Dios yipoc co cꞌool eyuuj,
yujto cojtac to icha tzeyutej eyabꞌan syail quedꞌoc,
icha pax chiꞌ ol aj yacꞌanpax snivanil e cꞌool Dios quedꞌoc.
8 Ex vucꞌtac ex vanabꞌ,
sco nibꞌej scal dꞌayex jantac syail ix cabꞌi ayic ix on̈ ecꞌ dꞌa yol yic Asia.
Yujto te yaꞌ ix on̈ ecꞌ taꞌ,
ijan maj techajlaj cuuj.
Ix co naꞌ to ijan val maj on̈ colchajel-laj dꞌa yol scꞌabꞌ chamel.
9 A co naani to ol on̈ cham taꞌ.
Icha chiꞌ utabꞌil on̈ taꞌ,
yic vachꞌ an̈ej Dios scacꞌoch yipoc co cꞌool,
yujto aꞌ tzꞌacꞌan pax pitzvoc ebꞌ chamnac.
Xal on̈,
maxtzac co naꞌ tato tzon̈ colchaji.
10 Jabꞌxon̈ej val maj on̈ cham yuj jun nivan yaelal chiꞌ,
axo Dios on̈ colanel dꞌa yol scꞌabꞌ chamel,
van on̈ scolan paxel ticnaic.
An̈ejaꞌ scacꞌoch yipoc co cꞌool to ol on̈ scolelta dꞌa juntzan̈ syaelal chiꞌ,
11 tato tzex colvaj quedꞌ dꞌa lesal.
Tato tzijtum ex tzex lesalvi cuuj,
an̈ejtonaꞌ nivan ex ol eyacꞌ yuj diosal dꞌa Dios yuj svachꞌcꞌolal ol yacꞌ dꞌayon̈.
A tas yuuj pural ix cꞌoch vin̈aj Pablo dꞌa Corinto
12 Tzon̈ tzalaji,
yujto cojtac val to tojol scutej co bꞌeybꞌal dꞌa masanil ebꞌ anima yedꞌ pax dꞌayex.
Malaj spaltail co bꞌeybꞌal,
yujto scolvaj Dios yedꞌ svachꞌcꞌolal dꞌayon̈.
Man̈ yujoc co jelanil vachꞌ co bꞌeybꞌal.
13-14 Ayic sco tzꞌibꞌanbꞌat juntzan̈ carta dꞌayex,
an̈ej juntzan̈ tas tzeyilaꞌ yedꞌ juntzan̈ tas snachajel eyuuj,
a sco tzꞌibꞌejbꞌat dꞌayex.
Tzaxo nachajel jabꞌoc eyuuj tas caji.
Yuj chiꞌ,
svacꞌoch yipoc in cꞌool to ol vachꞌ nachajel eyuuj to ayic ol jax Cajal Jesús,
ol yal e qꞌuechaan̈ cuuj,
ich on̈ pax taꞌ ol on̈ qꞌuepaxchaan̈ eyuuj.
15 Icha chiꞌ vutejnac vacꞌanoch yipoc in cꞌool.
Yuj chiꞌ,
tzin bꞌabꞌlaj ecꞌ ex vilaꞌ yic vachꞌ chael tzin ecꞌ dꞌayex dꞌa elan̈chamel in naani,
axo e vachꞌ chaan svachꞌcꞌolal Dios.
16 A in naani to tzin ecꞌ ex vilaꞌ,
ichato chiꞌ bꞌian tzin ja dꞌa Macedonia tic.
Axo tzin meltzaji,
tzex ecꞌ vilanxi.
Tato icha chiꞌ,
a ex syal tzex colvaj dꞌayin yic tzin bꞌatxi dꞌa Judea.
17 Ayic ix in naan juntzan̈ tic,
¿tom man̈ chamoc ix in na e naani?
¿Tom tze naꞌa to ton̈ej tzin na juntzan̈ tic icha sna ebꞌ comon anima?
¿Tom tze naꞌa,
to an̈ej yedꞌ in tiꞌ,
inye,
xin chi,
palta axo dꞌa in pensar van in naani to maay?
18 Syil Dios,
aton tzꞌeln̈ejcꞌoch tas syalaꞌ,
a on̈ tic malaj juneloc sco tacꞌvej co tiꞌoc,
slajvi chiꞌ scalanxi to man̈xo.
19 A in tic,
vin̈aj Silvano yedꞌ vin̈aj Timoteo ecꞌnac on̈ calel yabꞌixal Cristo Jesús Yuninal Dios dꞌayex.
A Cristo chiꞌ,
malaj juneloc yalnac:
Inye,
palta axo dꞌa spensar yojtac to maay.
20 A tzꞌacꞌan elcꞌoch masanil tas ix yalcan Dios.
Yuj chiꞌ,
a scalan vachꞌ lolonel dꞌa Dios,
scalan amén yuj Cristo Jesús.
21 A Dios tzꞌacꞌan stecꞌanil e pensar quedꞌoc,
yujto ay on̈xo och dꞌa yol scꞌabꞌ Cristo.
A Dios acꞌjinac copisio coch schecabꞌoc.
22 A acꞌjinac och jun sello dꞌayon̈ junjun on̈,
aton Yespíritu.
A Yespíritu tic schꞌoxani to yic on̈xo Dios,
schꞌoxanpax dꞌayon̈ to dꞌa val yel ol co cha juntzan̈xo tas yalnac Dios chiꞌ to ol yacꞌ dꞌayon̈.
23 Malaj in gana tzꞌoch e cuscꞌolal vuuj,
yuj chiꞌ majto in ecꞌ dꞌayex dꞌa Corinto chiꞌ.
Val yel svalaꞌ,
syil co Mam Dios yujto yojtac masanil tas ay dꞌa in pensar.
24 Malaj co gana tzex cacꞌ pural,
scalan dꞌayex tas tzeyutej eyacꞌanoch Dios dꞌa e cꞌool.
Yujto tecꞌanxo tzeyutej eyacꞌanoch dꞌa e cꞌool.
Palta co gana tzon̈ colvaj dꞌayex,
yic sco vachꞌ aqꞌuej e naꞌa,
yic vachꞌ ol ja e tzalajcꞌolal taꞌ.