Gálatas sbꞌi jun carta tic, aton jun scarta vin̈aj apóstol Pablo stzꞌibꞌejnacbꞌat dꞌa ebꞌ creyente dꞌa yol yic Galacia. Syalbꞌat vin̈ dꞌa ebꞌ to sbꞌoxi spensar ebꞌ somchajnaquel spensar yuj juntzan̈xo chꞌoc cꞌaybꞌubꞌal. Ay ebꞌ tzꞌalani to a ebꞌ man̈ israeloc tzꞌoch creyenteal yovalil scꞌanabꞌajej ley Moisés ebꞌ, yic vachꞌ scan ebꞌ dꞌa sat Dios. Palta a vin̈ apóstol Pablo tzꞌalani to man̈ ichocta yaji.

Ix stecꞌbꞌej val sbꞌa vin̈ yedꞌ yopisio, ix yalan vin̈ to schecabꞌ Cristo yaj vin̈. Ay juntzan̈ ebꞌ scomon alejoch sbꞌa cꞌaybꞌumal, palta ix yal vin̈ to a dꞌa Dios schanac yopisio vin̈ chiꞌ, man̈oc dꞌa ebꞌ comon anima. Ix acꞌji yopisio vin̈ chiꞌ yic vachꞌ syal slolonel Dios vin̈ dꞌa ebꞌ man̈ israeloc. Icha chiꞌ ix yutej vin̈ schꞌoxaneli to scha scolnabꞌil ebꞌ anima tato syacꞌoch Cristo ebꞌ dꞌa scꞌool, man̈ yujoc scꞌanabꞌajan ley Moisés ebꞌ.

Axo dꞌa juntzan̈xo slajvubꞌ capítulo, syalcot tas tzꞌajelcꞌoch sbꞌeybꞌal ebꞌ syacꞌoch Cristo dꞌa scꞌool, vachꞌchom acꞌbꞌil circuncidar ebꞌ, mato maay, an̈ej jun tas nivan yelcꞌochi to syacꞌoch Cristo ebꞌ dꞌa scꞌool.