Scachjioch vaan ebꞌ creyente
13
Yoxelalxo ol in bꞌat ex vilaꞌ.
Yaln̈ej tas junoc ol bꞌoꞌoc,
yovalil ayocabꞌ chavan̈ ma oxvan̈oc testigo ol alanoc,
ichato chiꞌ ol bꞌoꞌoc.
2 Ayic ix in ecꞌ dꞌa schaelal,
ay jun ix valcan dꞌayex.
Axo ticnaic svalbꞌat junelxo.
Vachꞌchom man̈ in ayoc ecꞌ eyedꞌ taꞌ,
palta svalbꞌati to a ex ochnac e mul dꞌa yalan̈taxo yedꞌ ex pax van yoch e mul ticnaic,
ayic ol in cꞌoch junelxo,
man̈xo ol ex vacꞌlaj nivancꞌolal.
Aton jun tic ix ecꞌ valcan dꞌayex.
3 E gana val tzeyilaꞌ tato a Cristo van in syamcꞌabꞌani yic syalan dꞌayex.
Ato val yic ol in cꞌochoc,
ol eyilani.
Ichato chiꞌ ol nachajel eyuuj.
Yujto a Cristo tic,
mantoc malaj spoder schꞌox dꞌayex,
palta nivan spoder yic smunlaj dꞌa e cal.
4 Yel toni,
ayic ix dꞌun̈bꞌajqꞌue dꞌa teꞌ culus,
ichato malaj spoder.
Palta yuj spoder Dios pitzan ticnaic.
An̈ejtonaꞌ,
a in pax tic,
ichato malaj in poder,
palta yuj spoder Dios pitzan in yedꞌ Cristo,
yic an̈ejaꞌ tzin ecꞌ ex in cꞌaybꞌej.
5 Tze cham naej val e bꞌa junjun ex,
yic scheclaji tato yel ayoch Cristo dꞌa e cꞌool.
Aqꞌuec proval e bꞌa junjun ex.
¿Tom man̈ eyojtacoc to a Jesucristo ayoch dꞌayex junjun ex?
Palta tato man̈ ex creyenteoc dꞌa yel,
man̈ ayococh dꞌayex.
6 Palta in gana snachajel eyuuj sicꞌlabꞌil to a in tic creyente in dꞌa val yel.
7 Tzin lesalvi dꞌa Dios eyuuj,
yic man̈ ol e cꞌuloc junoc chucal.
Man̈ ton̈ejoc tzin lesalvi eyuuj yic scheclajeli to vachꞌ in munlaji.
Palta in gana to vachꞌn̈ej tzeyutej e bꞌeybꞌal,
vachꞌchom ichato scheclajeli to man̈ vachꞌoc in munlajel.
8 Yujto max yal vajcꞌolan in bꞌa yedꞌ jun lolonel yel,
aton dꞌa jun bꞌaj svacꞌ vip in munlaji.
9 Yuj chiꞌ,
vachꞌchom malaj vachꞌ vochi,
palta tzin tzalaji tato e ex tic ay eyelcꞌochi.
An̈ejtonaꞌ,
ol in lesalvoc eyuuj,
yic ol vachꞌ bꞌo e pensar.
10 Tzin bꞌabꞌlaj tzꞌibꞌejbꞌat jun in carta tic dꞌayex,
yacbꞌan manto in cꞌoch eyedꞌ taꞌ,
yujto malaj in gana te ov ol vutej in bꞌa dꞌayex yuj jun vopisio tic,
ayic ol in cꞌoch dꞌayex taꞌ.
A Cajal Jesús acꞌjinac jun vopisio tic,
yic svacꞌ e tecꞌanil.
Man̈ yujoc ex vacꞌan juvoqueli ix yacꞌan dꞌayin.
Tzꞌacꞌji stzatzil scꞌool ebꞌ creyente
11 Axo ticnaic ex vucꞌtac ex vanabꞌ,
ayocabꞌ e tzalajcꞌolal taꞌ.
Tze vachꞌ bꞌoan e pensar.
Acꞌjocabꞌ snivanil e cꞌool.
Junxon̈ej ocabꞌ tzeyutej e pensar,
juncꞌolalxon̈ej tzeyutej e bꞌa taꞌ.
A Dios ol och eyedꞌoc,
aton jun tzꞌacꞌan e juncꞌolal,
jun tzꞌacꞌan pax e xajanej e bꞌa.
12 Slaj eyacꞌlaj stzatzil e cꞌool yuj e chꞌoxani to tze xajanej e bꞌa.
13-14 A ebꞌ creyente smasanil dꞌa tic,
syacꞌbꞌat stzatzil e cꞌool ebꞌ.
Checlajocabꞌ el svachꞌcꞌolal Cajal Jesucristo dꞌayex,
yacꞌocabꞌ pax svachꞌcꞌolal Dios dꞌayex.
Aocabꞌ Yespíritu Dios tzꞌoch eyedꞌoc e masanil taꞌ.