A juntzan̈ tas schꞌoxnac Dios dꞌa vin̈aj Pablo
12
Nabꞌan̈ej svixtej in bꞌa valan in bꞌa vachꞌil.
Más vachꞌ svalbꞌat dꞌayex yuj juntzan̈ icha vayich yedꞌ juntzan̈xo tas schꞌoxnac Cajal Jesús dꞌayin.
2 Ay jun vin̈ vojtac,
jichan scꞌool vin̈ dꞌa Cristo.
A ticnaic schan̈lajun̈ilxo abꞌil xidꞌecꞌ vin̈ dꞌa satchaan̈ bꞌaj ay Dios.
Man̈ vojtacoc tato icꞌjinacbꞌat snivanil vin̈ yedꞌoc,
mato maay.
An̈ej Dios ojtannac.
3 Vachꞌchom bꞌatnac vin̈ yedꞌ snivanil,
mato maay,
man̈ vojtacoc.
An̈ej Dios ojtannac.
Palta a jun vojtac
4 to xidꞌnaquecꞌ vin̈ dꞌa jun lugar scuchan paraíso.
Ataꞌ yabꞌnac juntzan̈ lolonel vin̈ malaj mach ojtannac.
Malaj pax spermiso vin̈ yalan dꞌa junocxo anima.
5 A jun vin̈ chiꞌ,
syal valan svachꞌil vin̈,
palta a inxo tic,
man̈ ol vicꞌchaan̈ in bꞌa.
Ay juntzan̈ tas ayoch dꞌayin schꞌoxani to malaj velcꞌochi.
A juntzan̈ chiꞌ,
ol valaꞌ yic svicꞌchaan̈ jabꞌoc in bꞌa.
6 Qꞌuinaloc yelcꞌolal in gana svicꞌchaan̈ in bꞌa ticnaic,
tato icha chiꞌ,
max am val icha junoc malaj spensar,
yujto an̈ej juntzan̈ tas yel,
an̈ej am svalaꞌ.
Palta man̈ ol vicꞌchaan̈ in bꞌa icha chiꞌ,
yujto malaj in gana syal ebꞌ to más nivan velcꞌoch dꞌa tas syil ebꞌ yedꞌ dꞌa tas syabꞌ ebꞌ dꞌayin.
7 A juntzan̈ tas chꞌoxbꞌil dꞌayin dꞌa satchaan̈ chiꞌ,
yelxo val nivan yelcꞌochi,
ay smay vicꞌanchaan̈ in bꞌa yuuj.
Yuj chiꞌ ay jun in yaelal yacꞌnac vin̈ Satanás yic tzin ixtani.
A jun chiꞌ lajan icha junoc nivan qꞌuiix tzꞌisanbꞌat dꞌayin.
Icha chiꞌ ajnac in,
yic vachꞌ max vicꞌchaan̈ in bꞌa.
8 Oxel in cꞌannac dꞌa Cajal Jesús,
yic talaj syiqꞌuel dꞌayin.
9 Palta icha tic ajnac yalan dꞌayin:
Stechaj uuj yujto tzin och edꞌoc.
Yujto a dꞌa ebꞌ malaj val yip dꞌa yol yicoꞌ,
ataꞌ vachꞌ scheclajel in poder,
xchi dꞌayin.
Yuj chiꞌ,
svacꞌ val och dꞌa in cꞌool to ol in te tzalajoc,
yujto malaj val vip,
yic svachꞌ aqꞌuej spoder Cristo dꞌayin.
10 Yuj chiꞌ tzin tzalaj ticnaic,
yujto malaj vip.
Vachꞌchom tzin bꞌuchji,
vachꞌchom malaj tas ay dꞌayin,
vachꞌchom tzꞌacꞌjioch in yaelal,
vachꞌchom svabꞌ syaelal yuj Cristo,
palta tzin tzalajn̈ej.
Yujto ayic malaj velcꞌoch jabꞌoc,
más ay in poder.
Ochnac vin̈aj Pablo ilcꞌolal yuj ebꞌ creyente aj Corinto
11 Ichato malaj in pensar ayic ix valan in bꞌa vachꞌil dꞌayex.
Palta a ex ix in eyacꞌ pural,
yuj chiꞌ ix valaꞌ,
palta a ex smoj tzin eyal vachꞌil.
A dꞌa ebꞌ munil syacꞌoch sbꞌa schecabꞌoc Cristo,
a dꞌa ebꞌ tzeyacꞌoch janicꞌ e pensar.
Vachꞌchom malaj tzin och a in tic,
palta malaj yelcꞌoch ebꞌ dꞌa vichan̈.
12 Ayic ix in ecꞌ dꞌa e cal,
tecꞌtecꞌ ix vutej in bꞌa in munlaji.
Ix in bꞌo juntzan̈ milagro yedꞌ juntzan̈xo tastac schꞌoxanel spoder Dios.
Ix te sat e cꞌool eyilan juntzan̈ ix in bꞌo chiꞌ.
Yuj juntzan̈ chiꞌ scheclajeli to dꞌa val yel schecabꞌ in Cristo.
13 Icha val svachꞌil ix vutej in bꞌa,
ayic ix in ecꞌ dꞌa ebꞌ creyente dꞌa junjun iglesia,
icha chiꞌ ix vutej in bꞌa ayic ix in ecꞌ dꞌayex.
An̈ej bꞌian to maj vacꞌoch in bꞌa dꞌa yalan̈ e gasto.
Palta aqꞌuec nivancꞌolal yuj jun in mul ix och tic dꞌayex.
14 A ticnaic,
listaxo vaj in bꞌatxi dꞌa yoxelal dꞌayex,
palta an̈ejaꞌ man̈ ol vacꞌoch in bꞌa e cuentaoc,
yujto max in nibꞌejoch tastac ay dꞌayex,
palta a e vachꞌil a chiꞌ tzin nibꞌej.
A ebꞌ mamabꞌil,
smoj smolbꞌan stumin ebꞌ yic syacꞌ ebꞌ dꞌa ebꞌ yuninal.
Man̈oc ebꞌ uninabꞌil chiꞌ smolbꞌej stumin yic syacꞌ ebꞌ dꞌa ebꞌ smam chiꞌ.
15 A in tic,
in gana tzin lajel tastac ay dꞌayin,
yic ol bꞌoxoc e pensar.
Vachꞌchom ol lajvel in nivanil tic yujto tzex in cꞌaybꞌej,
palta ol in tzalajn̈ej.
Tato tzex in te xajanej,
¿tom yuj chiꞌ maxtzac in e xajanej a ex tic?
16 Ay juntzan̈xo ebꞌ,
vachꞌchom yojtac ebꞌ to maj vacꞌoch in bꞌa e cuentaoc,
palta syal ebꞌ to tzex vacꞌ musansatil yedꞌ in jelanil yic tzex vacꞌ ganar.
17 ¿Tom vacꞌnac ex musansatil yedꞌ junoc ebꞌ in checnacbꞌat dꞌayex?
18 In cꞌannac pavor dꞌa vin̈aj Tito yic sbꞌat vin̈ ex yilaꞌ.
In checannacbꞌat junxo vin̈ cucꞌtac yedꞌ vin̈.
¿Tom xidꞌnaquecꞌ vin̈aj Tito chiꞌ ex yacꞌ musansatil jun?
Lajann̈ej cutejnac co pensar quecꞌ dꞌa e cal taꞌ.
19 Tecan ayex tze naꞌa to ton̈ej tzin col in bꞌa dꞌa eyichan̈.
Palta man̈ ichoc taꞌ svutej in bꞌa.
Yujto dꞌa yichan̈ Dios van valanbꞌat juntzan̈ tic dꞌayex,
icha pax sgana Cristo,
yic ol laj och e tecꞌanil dꞌa yic Dios.
20 Tzin xiv in bꞌat ex vilaꞌ,
talaj man̈ ichoc in gana tzeyutej e bꞌa.
A inxo tic,
talaj man̈ ichoc e gana svutej in bꞌa.
Tzin xiv in bꞌat dꞌayex taꞌ,
ta icha chiꞌ ayto oval,
chichoncꞌolal yedꞌ cꞌacꞌalcꞌolal dꞌa e cal.
Tato icha chiꞌ ayexto tzeyicꞌchaan̈ e bꞌa,
ayexto tzex bꞌuchvaj dꞌa e patic junjun ex,
ayexto tzex alvi pecal,
ayexto tzeyacꞌ acꞌumtaquil,
talaj ayexto pax van e somchitan e bꞌa.
21 Tzin xiv in bꞌatxi dꞌayex,
talaj icha chiꞌ a Dios tzin acꞌan qꞌuixvelal eyuuj.
Talaj icha chiꞌ tzin ocꞌ eyuuj,
yujto a dꞌa yic yalan̈,
tzijtum ex ix e cꞌulej juntzan̈ chucal.
Man̈ jabꞌoc tzeyactejcan e cꞌulan juntzan̈ chucal chiꞌ yedꞌ e nivanil,
aton ajmulal yedꞌ juntzan̈xo tas te qꞌuixvelal.