Vin̈aj Pablo yedꞌ ebꞌ syaloch sbꞌa schecabꞌoc Cristo
11
Comonoc tzeyacꞌ techaj juntzan̈ svalbꞌat tic dꞌayex.
Ichato malaj in pensar svalanbꞌati,
palta tzeyacꞌ techajoc.
2 Tzex in yaꞌilej val,
icha syutej Dios ex syailani.
Yujto toxo ix vacꞌ in trato yedꞌ Cristo to ol ex vacꞌoch dꞌa yol scꞌabꞌ.
Icha junoc ix cobꞌes ix manta vinac tzꞌecꞌ dꞌay,
tzꞌacꞌji entregar dꞌa vin̈ yetbꞌeyum,
icha chiꞌ ol ex vutoc vacꞌan och dꞌa yol scꞌabꞌ Cristo.
3 Palta tzin xivi,
talaj icha ajnac ix Eva yacꞌji musansatil yuj sjelanil jun yacꞌnacoch sbꞌa chanil,
talaj icha chiꞌ tzex aj eyacꞌji musansatil.
Axo tzꞌaji tzeyiqꞌuel e pensar dꞌa spatic Cristo,
man̈xo tojoloc pax tzeyutej e bꞌa icha snibꞌej.
4 A ex tic stechaj eyuuj,
vachꞌchom yaln̈ej mach tzecꞌ alanel junocxo chꞌoc cꞌaybꞌubꞌal dꞌa e cal,
yujto ichato chꞌoc junocxo Jesús tzecꞌ yalel ebꞌ,
man̈oc jun tzecꞌ valel a in tic,
palta van e chaan eyabꞌ dꞌa ebꞌ.
Van e chaan junxo espíritu dꞌa ebꞌ,
palta man̈ ichoc jun chabꞌilxo eyuuj.
Van eyacꞌanoch e cꞌol dꞌa junxo abꞌix yic colnabꞌil tzecꞌ alji,
palta man̈oc jun ix eyabꞌ dꞌayin.
5 A ebꞌ chiꞌ,
schecabꞌ Cristo yaj ebꞌ yalani.
Palta a tzin naan a in tic,
to man̈ ecꞌaloc yelcꞌoch ebꞌ dꞌayin.
6 Vachꞌchom malaj svachꞌil in loloni,
palta a tas vojtac,
ay val yip.
Jantacn̈ej juntzan̈ tas ecꞌ in cꞌulejnac dꞌa e cal,
a schꞌoxan dꞌayex to ay tas vojtac.
7 Ayic vecꞌ valel vachꞌ abꞌix yic Dios dꞌa e cal taꞌ,
malaj in tojol in cꞌan dꞌayex,
yujto a in tic,
emnaquil vutej in bꞌa taꞌ,
yic a ex tzex vicꞌchaan̈.
Palta tzeyalaꞌ to malaj svachꞌil vutejnac in bꞌa taꞌ.
8 Icha val to ochnac in elcꞌal dꞌa juntzan̈xo iglesia eyuuj,
yujto ataꞌ in cha in tojol,
ayic in ecꞌ dꞌa e cal.
9 Ayic in ecꞌ dꞌayex,
vachꞌchom ay tas yovalil tzꞌoch vuuj,
palta maj in cꞌanlaj dꞌayex.
A ebꞌ cucꞌtac aj Macedonia tic xidꞌ acꞌan jabꞌ tas ay ochnac vuuj taꞌ.
Malaj junoc ex vacꞌnac och jabꞌoc in gasto dꞌa eyibꞌan̈.
An̈ejtonaꞌ icha chiꞌ ol vutoc in bꞌa ticnaic.
10 Vachꞌchom svicꞌchaan̈ in bꞌa valan juntzan̈ tic,
palta malaj junoc ex aj Acaya ex chiꞌ syal in e cachanoch vaan.
Yel sval yuj jun tic,
yujto a Cristo ayoch vedꞌoc,
yel syalaꞌ.
11 ¿Tas yuj svalbꞌat juntzan̈ tic dꞌayex tze naꞌa?
¿Tom yujto man̈ ex xajanoc vuuj?
A Dios ojtannac jantac tzex in xajanej.
12 Palta an̈ejaꞌ icha chiꞌ ol vutoc in bꞌa,
ichataxon svutej in bꞌa vecꞌ dꞌa e cal.
Icha chiꞌ ol vutoc in bꞌa,
yic vachꞌ a ebꞌ sayanecꞌ tas syutej yicꞌanchaan̈ sbꞌa,
ol can ebꞌ dꞌa yalan̈ vuuj.
Yujto syal ebꞌ to lajan yopisio ebꞌ vedꞌoc.
13 A ebꞌ chiꞌ,
ton̈ej stzꞌac yaloch sbꞌa ebꞌ schecabꞌoc Cristo.
Syixtej anima ebꞌ yedꞌ slolonel chiꞌ.
Munil scomon aqꞌuej och sbꞌa ebꞌ schecabꞌoc Cristo chiꞌ.
14 Palta a jun scꞌulej ebꞌ chiꞌ,
max sat co cꞌool yuuj.
Yujto icha chiꞌ vin̈ Satanás,
stzꞌac yacꞌoch sbꞌa vin̈ yángeloc Dios.
15 Yuj chiꞌ max sat co cꞌool,
tato icha pax chiꞌ syutej sbꞌa ebꞌ schecabꞌ vin̈ to syaloch sbꞌa ebꞌ tojolal.
Palta a val ebꞌ lacꞌan ol chaan spac,
ato syalaꞌ tas ix scꞌulej ebꞌ junjun.
A tas ecꞌnac dꞌa yibꞌan̈ vin̈aj Pablo
16 Tic svalbꞌat junelxo dꞌayex,
man̈ e na to malaj in pensar.
Palta tato tze na icha chiꞌ,
aqꞌuec in permiso in lolon icha junoc malaj spensar,
yic ol yal vicꞌanchaan̈ jabꞌoc in bꞌa,
icha juntzan̈ ebꞌ syicꞌchaan̈ sbꞌa.
17 A juntzan̈ svalbꞌat tic dꞌayex,
man̈oc Cajal Jesús schecan valaꞌ.
Ichato man̈ pensaril vaji svalanbꞌat dꞌayex,
yujto ton̈ej svicꞌchaan̈ in bꞌa valani.
18 Tzijtum ebꞌ syicꞌchaan̈ sbꞌa yuj tas ay dꞌa yolyibꞌan̈qꞌuinal tic.
Yuj chiꞌ ol vicꞌpaxchaan̈ jabꞌoc in bꞌa yedꞌ ebꞌ.
19 Yujto a ex tic,
jelan ex.
Yuj chiꞌ,
tzeyacꞌ techaj ebꞌ man̈ pensaril yaj dꞌayex,
tzex tzalaj yedꞌ ebꞌ.
20 Ay ebꞌ tzex acꞌan pural yic tzeyacꞌan servil ebꞌ.
Axo jantacn̈ej tas ay dꞌayex,
syiqꞌuecꞌ ebꞌ smasanil,
syacꞌoch sbꞌa ebꞌ yajalil dꞌayex,
syicꞌanchaan̈ sbꞌa ebꞌ.
Ichato ay bꞌaj stzꞌitbꞌat e sat ebꞌ,
palta tzeyacꞌ val techaj ebꞌ.
21 Tzin qꞌuixvi valanbꞌat dꞌayex,
a in tic malaj vip in cꞌulan icha syutej sbꞌa ebꞌ chiꞌ.
Palta icha syutej ebꞌ stecꞌbꞌan sbꞌa yalani,
icha pax chiꞌ svutej in tecꞌbꞌan in bꞌa valani.
Palta van valan icha junoc mach malaj spensar.
22 A ebꞌ chiꞌ,
hebreo ebꞌ,
an̈ejtonaꞌ in,
hebreo in paxi.
Israel ebꞌ,
israel in paxi.
Yin̈til Abraham ebꞌ,
an̈ejaꞌ yin̈til in pax Abraham yedꞌ ebꞌ.
23 Tato schecabꞌ Cristo yaj ebꞌ,
a in tic más val schecabꞌ in dꞌa yichan̈ ebꞌ.
Vachꞌchom ayic svalanbꞌat juntzan̈ tic dꞌayex,
svalbꞌat icha yaj junoc mach malaj spensar.
Más nivan in munlaj dꞌa yichan̈ ebꞌ.
Más tzijtum el ix in macꞌji dꞌa yichan̈ ebꞌ.
Tzijtum el ix in och dꞌa preso.
Tzijtum el pax ix in acꞌjioch dꞌa yol scꞌabꞌ chamel.
24 Oel val smacꞌnac in ebꞌ vetisraelal,
39 val tzꞌuum vicꞌnac yuj ebꞌ dꞌa juntac el ayic smacꞌannac in ebꞌ chiꞌ.
25 Oxel macꞌbꞌil in pax dꞌa teꞌ jixcꞌabꞌ teꞌ.
Junel julbꞌil in cham yedꞌ qꞌuen yaxqꞌueen.
Oxel bꞌatnac teꞌ barco dꞌa yol aꞌ mar dꞌa valan̈.
A junel,
jun cꞌual yedꞌ jun acꞌval cannac in dꞌa sat aꞌ.
26 Tzijtum bꞌaj ecꞌnac in.
Ay bꞌaj ay smay yuj a nivac aꞌ yedꞌ pax yuj ebꞌ elcꞌum.
Ay bꞌaj ay smay yuj ebꞌ vetchon̈abꞌ yedꞌ pax yuj ebꞌ man̈ vetchon̈abꞌoc.
Ay bꞌaj ay smay dꞌa juntzan̈ chon̈abꞌ,
bꞌaj cuseltac yedꞌ dꞌa yibꞌan̈ aꞌ mar.
Ay pax bꞌaj ay smay dꞌa scal ebꞌ syaloch sbꞌa creyenteal.
27 Ay bꞌaj te cꞌunbꞌinac in,
in munlaji.
Vabꞌnac val syail.
Tzijtum el man̈ in vaynacoc.
Ay bꞌaj te ochnac in vejel,
te tacjinacpax in tiꞌ.
Tzijtum el ochnac in dꞌa tzecꞌojcꞌolal.
Ay bꞌaj vabꞌnac syail yuj siic.
Ay bꞌaj elnac in bꞌeran yuj man̈ pichulal.
28 Man̈ocn̈ej juntzan̈ yaelal tic vabꞌnac.
Yujto junjun cꞌu,
svabꞌ syaelal ayic tzin och ilcꞌolal yuj ebꞌ creyente dꞌa junjun iglesia.
29 Tato ay ebꞌ creyente manto tecꞌanoc,
ichato mantalaj in tecꞌanil yedꞌ ebꞌ.
Tato ay junoc ebꞌ tzꞌacꞌji telvoc dꞌa junoc chucal,
tzin qꞌuixvi yuj ebꞌ,
scot voval.
30 Tato e gana svicꞌchaan̈ in bꞌa,
ol vicꞌchaan̈ in bꞌa yuj juntzan̈ svalbꞌat tic dꞌayex.
Yujto a juntzan̈ tic schꞌoxani to malaj jabꞌoc velcꞌochi.
31 A Dios,
aton Smam Cajal Jesucristo,
smoj tzꞌalji vachꞌ lolonel dꞌay dꞌa masanil tiempo.
A ojtannac to te yel svalaꞌ.
32 Ayic vecꞌnac dꞌa chon̈abꞌ Damasco,
ataꞌ ayecꞌ jun vin̈ gobernador munlajnac dꞌa jun vin̈ rey scuch Aretas.
A jun vin̈ chiꞌ,
yalnac vin̈ to stan̈vaj spuertail jun chon̈abꞌ chiꞌ,
yic tzin syam vin̈ snaani.
33 Palta a dꞌa sventenail smuroal schon̈abꞌ ebꞌ chiꞌ el in ta,
vacꞌjiem dꞌun̈un̈oc dꞌa yol jun xuuc dꞌa sat luum.
Icha chiꞌ ajnac in colchajel dꞌa yol scꞌabꞌ vin̈.