A yopisio vin̈aj Pablo
10
A Cristo,
te emnaquil yutejnac sbꞌa,
te vachꞌ yutejnac spensar.
Icha yutejnac sbꞌa chiꞌ,
icha chiꞌ svutej in tevibꞌat dꞌayex a in Pablo in tic.
Tzꞌalji,
tobꞌ emnaquil svutej in bꞌa ayic ay in ecꞌ eyedꞌoc,
axobꞌ yic ayinecꞌ dꞌa najat,
tobꞌ te ov in.
2 Palta tzin tevi dꞌayex to ayic ol in cꞌoch taꞌ,
man̈ yovaliloc ov ol vutoc in bꞌa.
Yujto ayex tzeyalaꞌ to icha ebꞌ comon anima svutej in bꞌa.
A in tic max in xivlaj vilan pax och in sat yedꞌ ebꞌ tzꞌalan icha chiꞌ.
3 Yel toni,
anima on̈.
Palta man̈ lajanoc scutej cacꞌan oval icha syutej ebꞌ comon anima chiꞌ.
4 Man̈oc juntzan̈ tas ay dꞌa yolyibꞌan̈qꞌuinal tic sco yamcꞌabꞌej ayic scacꞌan oval.
Palta an̈ej juntzan̈ tas bꞌaj ayoch spoder Dios sco yamcꞌabꞌej,
yic vachꞌ a juntzan̈ tzꞌalji to ay yip,
scan dꞌa yalan̈ cuuj.
5 Scan juntzan̈ comon jelanil cuuj dꞌa yalan̈.
Ay ebꞌ max ojtacanel Dios yuj yacꞌumtaquil,
palta yaln̈ej tas junoc acꞌumtaquil chiꞌ,
scan dꞌa yalan̈ cuuj.
Axo juntzan̈ comon pensar,
scacꞌoch dꞌa yol scꞌabꞌ Cristo smasanil,
yic vachꞌ a ebꞌ snaan juntzan̈ chiꞌ,
scꞌanabꞌajejn̈ej Cristo chiꞌ ebꞌ.
6 Axo yic tzaxo on̈ e cꞌanabꞌajej,
a on̈xo tic lista ol cutej co bꞌa cacꞌan syaelal ebꞌ man̈ ol on̈ cꞌanabꞌajanoc.
7 A exxo,
an̈ej tas tzeyil yedꞌ e sat snachajel eyuuj.
Ay ebꞌ dꞌa e cal tzꞌalani to a Cristo ay yic ebꞌ.
Nachajocabꞌel yuj ebꞌ to an̈ejtonaꞌ yic in pax Cristo chiꞌ yedꞌ ebꞌ.
8 Vachꞌchom tzin ecꞌ dꞌa yibꞌan̈ valan dꞌayex yuj jun vopisio tic,
palta man̈ ol in qꞌuixvoc yuuj.
A Cajal Jesús acꞌjinacoch vopisio,
yic svacꞌoch e tecꞌanil.
Man̈ yujoc ex vacꞌan juvoc ix yacꞌan vopisio tic.
9 Icha tic svutej valan dꞌayex,
yic man̈ ol e naꞌ to ton̈ej in gana tzex in xibꞌtej yuj juntzan̈ in carta svacꞌbꞌat dꞌayex.
10 Yujto ay ebꞌ tzꞌalan dꞌa in patic icha tic:
A juntzan̈ scarta vin̈,
te ov yalani,
te ay yip.
Palta axo vin̈,
malaj vachꞌ yoch vin̈.
A yic slolon vin̈,
malaj svachꞌil slolonel vin̈ syalaꞌ,
xchi ebꞌ.
11 Tato ayex tzeyal icha chiꞌ,
nachajocabꞌel jun tic eyuuj.
Icha svutej in tzꞌibꞌanbꞌat dꞌayex ayic ayinecꞌ dꞌa najat tic,
icha chiꞌ ol vutoc pax in bꞌa ayic ol in cꞌoch taꞌ.
12 A in tic,
max in tecꞌbꞌej in bꞌa in naani to lajan in icha juntzan̈xo ebꞌ munil syal sbꞌa vachꞌil.
Max yal in lajbꞌan in bꞌa yedꞌ ebꞌ.
A ebꞌ chiꞌ,
malaj spensar ebꞌ,
yujto ichato a ebꞌ mismo syechtej sbꞌa dꞌa yechlabꞌ.
Slajbꞌej sbꞌa ebꞌ yedꞌ juntzan̈xo ebꞌ.
13 A in tic max vicꞌchaan̈ in bꞌa yuj juntzan̈ tas bꞌaj malaj tzin ochi.
A Dios chꞌoxjinac dꞌayin bꞌajtac lugar bꞌaj tzin munlaji.
A chajinac in bꞌat dꞌayex dꞌa Corinto chiꞌ.
14 Yuj chiꞌ maj in cꞌaxpaj och dꞌa junocxo lugar.
Qꞌuinaloc maj in xidꞌecꞌ juneloc dꞌayex,
malaj am valan vic in munlaj dꞌa e cal ticnaic.
Palta a in bꞌabꞌel cꞌochnac in dꞌayex yedꞌ yabꞌixal Cristo.
15 Malaj bꞌaj svicꞌchaan̈ in bꞌa dꞌa spatic smunlajel junocxo.
Max val-laj tato vic jun munlajel chiꞌ.
Palta svacꞌoch junxo tic yipoc in cꞌool.
Ayic ol e vachꞌ acꞌanoch Dios dꞌa e cꞌool,
eyuuj ol yal in vachꞌ munlaj dꞌa juntzan̈xo lugar bꞌaj manta junocxo mach smunlaji,
palta man̈ ol in cꞌaxpajecꞌ bꞌaj ix schꞌox Dios dꞌayin.
16 Ol bꞌat valanel jun vachꞌ abꞌix yic colnabꞌil tic dꞌa yichan̈bꞌat e chon̈abꞌ chiꞌ,
palta man̈ ol vicꞌchaan̈ in bꞌa dꞌa spatic smunlajel juntzan̈xo ebꞌ ecꞌnacxo taꞌ.