A jun ofrenda sqꞌue vaan
9
A eyofrenda ol eyacꞌ dꞌa ebꞌ yicxo Dios,
man̈ yovaliloc tzato valbꞌat dꞌayex yuuj.
2 Yujto vojtacxo to ay val e gana tzex colvaj dꞌa ebꞌ.
Van ex valan vachꞌil dꞌa ebꞌ aj Macedonia tic.
Icha tic sval dꞌa ebꞌ eyuuj:
A ebꞌ ay dꞌa yol yic Acaya,
yabꞌilalxo scajvi ebꞌ yacꞌan yofrenda,
xin chi.
Ayic ix yabꞌan ebꞌ aj Macedonia tic to yelcꞌolal tzeyacꞌ eyicoꞌ,
tzijtum ebꞌ ix e cuchbꞌej yacꞌ yicoꞌ.
3 Palta ol in checbꞌat ebꞌ vin̈ cucꞌtac tic dꞌayex,
yic man̈ ol juvoc jun ix val tic eyuuj,
yujto ix valaꞌ to vachꞌ ex.
Ol in checbꞌat ebꞌ,
yic vachꞌ listaxo yaj eyofrenda,
icha ix vutej valan chiꞌ eyuuj.
4 Talaj ay ebꞌ aj Macedonia sbꞌat vedꞌoc,
axo syilan ebꞌ to man̈ listaoc eyaj eyacꞌan eyofrenda chiꞌ,
axom in qꞌuixvibꞌat chiꞌ bꞌian.
Yujto toxo ix ex vacꞌoch yipoc in cꞌool.
A exxo tic ol ex qꞌuixvoc paxi.
5 Yuj chiꞌ ix in na to yovalil tzin cꞌan pavor dꞌa ebꞌ vin̈ cucꞌtac tic,
yic ol bꞌabꞌlaj bꞌat ebꞌ vin̈ dꞌayex.
Ol bꞌat colvaj ebꞌ vin̈ eyedꞌoc eyicꞌanchaan̈ eyofrenda icha ix eyutej eyalancani.
Tato icha chiꞌ,
lista ol eyutoc eyofrenda chiꞌ,
ol eyacꞌan yedꞌ smasanil e cꞌool,
yic man̈ ol on̈ bꞌat ex cacꞌ pural eyacꞌani.
6 Tze nacot jun tic.
A ebꞌ jabꞌn̈ej tzꞌavani,
jabꞌn̈ej sjachꞌ ebꞌ.
Axo ebꞌ nivan tzꞌavani,
nivan pax sjachꞌ ebꞌ.
7 Junjun ex tze na jantac tzeyacꞌaꞌ.
Man̈ chabꞌcꞌolaloc tzeyacꞌaꞌ.
Man̈ acꞌbꞌiloc pural,
yujto a Dios sxajanan ebꞌ tzꞌacꞌan val dꞌa tzalajcꞌolal.
8 A Dios syal yacꞌan masanil tas dꞌayex yuj svachꞌcꞌolal.
Syacꞌanpax masanil tas tzꞌoch eyuuj dꞌa masanil tiempo.
Ol to yacꞌpax sobre dꞌayex,
yuj chiꞌ tzijtum tastac bꞌaj syal tzex colvaji.
9 Yujto icha tic syalcan dꞌa Slolonel Dios Tzꞌibꞌabꞌilcani:
Tzijtum tas ix yacꞌ dꞌa ebꞌ mebꞌaꞌ.
Axo svachꞌ spensaril jun chiꞌ,
ol snacot Dios dꞌa masanil tiempo,
xchi.
10 A Dios tzꞌacꞌan jantac in̈at tzꞌavchaji.
Syacꞌanpax jantac tas svaji.
Aꞌ ol acꞌan dꞌayex juntzan̈ tas ol eyacꞌ eyofrendaoc.
Ichato ol eyavej.
Axo jun spac ol yacꞌ dꞌayex yuj svachꞌil e cꞌool chiꞌ ol yacꞌ qꞌuibꞌoc,
ol e jachꞌani.
11 Yuj chiꞌ nivan svachꞌil ol e chaꞌa,
yic ol eyacꞌan nan̈alocxo.
Ayic ol quicꞌanbꞌat eyofrenda chiꞌ dꞌa ebꞌ yicxo Dios,
tzijtum ebꞌ ol acꞌan yuj diosal dꞌa Dios yuuj ayic ol schaan ebꞌ.
12 Yujto a jun colval chiꞌ,
man̈ yujocn̈ej scolvaj dꞌa ebꞌ dꞌa stzapan majanil,
palta a yopisio,
to yuuj ol yacꞌ yuj diosal ebꞌ dꞌa Dios dꞌa smasanil scꞌool.
13 Ol yal vachꞌ lolonel ebꞌ dꞌa Dios,
yujto a jun eyofrenda chiꞌ van schꞌoxani to van e cꞌanabꞌajan tas ix yalcan jun vachꞌ abꞌix yic Cristo.
An̈ejaꞌ ol yal pax vachꞌ lolonel ebꞌ dꞌa Dios yuj jun nivan colval tzeyacꞌ dꞌa ebꞌ.
Yujto a jun chiꞌ,
ol colvaj dꞌa masanil ebꞌ yicxo Dios.
14 A ebꞌ ol chaanoc,
ol yacꞌ lesal ebꞌ eyuuj.
Ol ex sxajanej ebꞌ,
yujto nivan svachꞌcꞌolal Dios ol yacꞌ dꞌa ebꞌ eyuuj.
15 Caqꞌuec yuj diosal dꞌa Dios yuj jun Colvajum ix yacꞌcot dꞌayon̈,
man̈xo jantacoc svachꞌil.