A tas scutej cacꞌan cofrenda
8
A ticnaic,
ex vucꞌtac ex vanabꞌ,
tzin nibꞌej sval dꞌayex tas ix aj scheclajel svachꞌcꞌolal Dios dꞌa ebꞌ creyente dꞌa junjun iglesia dꞌa yol yic Macedonia tic.
2 Vachꞌchom ix acꞌji proval ebꞌ yuj juntzan̈ yaelal ix ja dꞌa yibꞌan̈ ebꞌ,
palta ix te tzalaj ebꞌ.
Vachꞌchom te mebꞌaꞌ ebꞌ,
palta axo svilani,
nivan slaj yacꞌ ebꞌ,
icha yacꞌan ebꞌ bꞌeyum.
3 Svacꞌ testigoal in bꞌa yuj ebꞌ,
yujto yelcꞌolal ix yacꞌ jantac ix techaj yuj ebꞌ.
Te ecꞌalto val ix yacꞌ ebꞌ.
4 Ix tevi ebꞌ dꞌayon̈ yic sco cha yacꞌ scolval ebꞌ,
yujto sgana pax ebꞌ scolvaj dꞌa ebꞌ yicxo Dios.
5 Ix co naani to quenn̈ej jabꞌoc ol yacꞌ ebꞌ,
palta yelxo val más nivan ix yacꞌ ebꞌ.
Bꞌabꞌel ix yacꞌoch sbꞌa ebꞌ dꞌa yol scꞌabꞌ Cajal Jesús.
An̈ejtonaꞌ ichato ix yacꞌpax sbꞌa ebꞌ dꞌayon̈ icha sgana Dios.
6 Yuj chiꞌ sco cꞌanxi pavor dꞌa vin̈aj Tito tic yic sbꞌatxi vin̈ ex yilaꞌ.
A vin̈ ol bꞌat chaan eyofrenda ol eyacꞌ yuj svachꞌil e cꞌool.
Yujto a dꞌa vin̈ ix e chael yich eyacꞌani.
7 Man̈ jantacoc svachꞌil tzeyutej e bꞌa.
Tzeyacꞌan val och dꞌa e cꞌool.
Jelan tzeyutej e bꞌa e cꞌaybꞌani.
Yelcꞌolal te vachꞌ tzeyutej e bꞌa e cꞌulan junoc tasi.
Tzon̈ e xajanan paxi.
Yuj chiꞌ tze chꞌox pax e vachꞌil eyacꞌan eyofrenda chiꞌ.
8 A jun svalbꞌat tic dꞌayex,
man̈ checnabꞌiloc yaji.
Ton̈ej in gana tzeyabꞌi chajtil syutej juntzan̈xo ebꞌ yacꞌan scolval,
yic scheclajeli to dꞌa val yel tze xajanej ebꞌ quetcreyenteal.
9 Cojtac to a Cajal Jesucristo,
te nivan svachꞌcꞌolal.
Vachꞌchom man̈ jantacoc sbꞌeyumal dꞌa satchaan̈,
palta ix ul yacꞌoch sbꞌa mebꞌail cuuj.
Icha chiꞌ ix yutej sbꞌa,
yic vachꞌ yuj smebꞌail chiꞌ tzon̈ och bꞌeyumal.
10 Yuj e vachꞌiloc svalbꞌat dꞌayex tas tzin na yuj eyofrenda chiꞌ.
Ix el yabꞌilal e chaanel yich e yacꞌani,
yujto ix el val dꞌa e cꞌool eyacꞌani.
11 A ticnaic,
in gana to tzeyacꞌ eyip e vachꞌ acꞌancani.
Icha ix eyutej e chaanel yich eyacꞌan dꞌa smasanil e cꞌool,
icha chiꞌ tzeyutej e lajancan ticnaic,
ato syalaꞌ tastac ay dꞌayex.
12 Chabꞌil cofrenda chiꞌ yuj Dios ato syalaꞌ tastac ay dꞌayon̈,
tato man̈oc yedꞌ chabꞌcꞌolal scacꞌaꞌ.
Max scꞌanlaj tato malaj tas dꞌayon̈.
13 Mantoc in gana tzex ochcan mebꞌail,
yuj slajviel tastac ay dꞌayex,
yic tzex colvaj dꞌa juntzan̈xo ebꞌ.
14 Palta in gana lajan tzon̈ aj co masanil.
A ticnaic,
a tas syacꞌ sobre dꞌayex,
syal eyacꞌan dꞌa ebꞌ max tzacꞌvan yicoꞌ.
Axo dꞌa junelxo,
axo ebꞌ ol acꞌanxoc pax dꞌayex ayic man̈ ol ex tzacꞌvan dꞌa e yicoꞌ.
Tato icha chiꞌ,
lajan ol on̈ aj co masanil.
15 Yujto icha tic syalcan dꞌa Slolonel Dios Tzꞌibꞌabꞌilcani:
A ebꞌ nivan tas smolcani,
max yacꞌlaj sobre yic ebꞌ,
axo ebꞌ jabꞌn̈ej tas smolcani,
max yacꞌlaj palta dꞌa ebꞌ,
xchi.
A vin̈aj Tito yedꞌ ebꞌ ix bꞌat yedꞌoc
16 Svacꞌ yuj diosal dꞌa Dios,
yujto a tzꞌacꞌan sna vin̈aj Tito yic tzex syaꞌilej vin̈,
icha ix vutej ex vilan a in tic.
17 Ayic ix co cꞌanan pavor dꞌa vin̈ yic sbꞌat vin̈ ex yilaꞌ,
elan̈chamel ix tacꞌvi vin̈.
Toxon sgana pax vin̈ sbꞌat ex yilaꞌ,
yuj chiꞌ ol bꞌat vin̈.
18 Ay junxo vin̈ cucꞌtac ol co checbꞌat yedꞌ vin̈.
A jun vin̈ cucꞌtac tic,
tzꞌalji vin̈ vachꞌil yuj ebꞌ creyente ay dꞌa junjun iglesia,
yujto smunlaj val vin̈ yalanel vachꞌ abꞌix yic colnabꞌil.
19 An̈ejtonaꞌ,
aton jun vin̈ cucꞌtac tic sicꞌnaquelta ebꞌ creyente dꞌa junjun iglesia,
yic tzecꞌ schaan jun ofrenda chiꞌ vin̈ quedꞌoc.
Van co molan jun ofrenda tic,
yic ol checlaj svachꞌil Cajal Jesús yedꞌ svachꞌil e cꞌool a ex tic.
20 Co gana a on̈ tic to malaj mach tzon̈ alubꞌtan̈an yuj chajtil tzꞌaj ecꞌ quicꞌanchaan̈ juntzan̈ ofrenda tic.
21 Yuj chiꞌ te tojol scutej juntzan̈ tic.
Man̈ocn̈ej dꞌa yichan̈ Cajal Jesús tojol scutej co bꞌa,
an̈ejtonaꞌ tojol scutej co bꞌa dꞌa yichan̈ ebꞌ quetanimail.
22 Ay junxo vin̈ cucꞌtac ol co checbꞌat yedꞌ ebꞌ vin̈ tic.
A jun vin̈ tic,
tzijtum elxo squilaꞌ to vachꞌ smunlaj vin̈ dꞌa yic Cajal Jesús.
A ticnaic,
yel ay sgana vin̈ smunlaji,
yujto tzex yacꞌ val och vin̈ yipoc scꞌool.
23 Tato ay ebꞌ scꞌanbꞌan vin̈aj Tito chiꞌ dꞌayex,
tzeyal dꞌa ebꞌ:
Yetbꞌeyum sbꞌa vin̈ yedꞌ vin̈aj Pablo,
ayul vin̈ munlajel dꞌa co cal tic,
xe chi.
Tato ay pax mach scꞌanbꞌan yuj chavan̈ ebꞌ vin̈ cucꞌtac yetbꞌeyum sbꞌa yedꞌ vin̈aj Tito tic,
tzeyal dꞌa ebꞌ:
A ebꞌ vin̈ tic,
checbꞌilcot ebꞌ vin̈ yuj juntzan̈xo iglesia,
scheclaj val el svachꞌil Cristo yuj ebꞌ vin̈,
xe chi.
24 Ayic ol cꞌoch ebꞌ vin̈ taꞌ,
tze xajanej ebꞌ vin̈.
Tato icha chiꞌ tzeyutej e bꞌa dꞌa ebꞌ vin̈,
ol e chꞌox dꞌa ebꞌ creyente dꞌa junjun iglesia to yel scalaꞌ ayic ix ex calan vachꞌil.